Hau Mi Inap Mekim Ol Gutpela Disisen?

Baibel i givim yumi ol gutpela tok bilong stiaim yumi long mekim ol gutpela disisen. Em inap helpim yumi long “kisim savetingting [na] pasin bilong kliagut long ol samting.” (Provep 4:5) Long sampela samting, Baibel i tokim yumi long disisen we i gutpela. Long ol narapela samting, em i givim yumi edvais we inap stiaim yumi long mekim gutpela disisen.

Long dispela atikol

• Sampela rot bilong helpim yu long mekim gutpela disisen

• Mi mas senisim disisen em mi bin mekim pinis?

• Olsem wanem sapos mi mekim wanpela rong disisen we mi no inap senisim?

• No ken hariap long mekim wanpela bikpela disisen. Baibel i tok: “Man i gat pasin bilong tingting gut na mekim samting, em i save skelim gut olgeta wokabaut bilong em.” (Provep 14:15) Sapos yu hariap long mekim wanpela disisen, bai yu no inap tingim gut ol samting we i bikpela samting long skelim. Lusim sampela haptaim long skelim gut ol samting yu tingting long en.—1 Tesalonaika 5:21.

• No ken larim filings bilong yu i stiaim yu taim yu mekim ol disisen. Baibel i givim tok lukaut long yumi no ken trastim tingting bilong bel long olgeta taim. (Provep 28:26; Jeremaia 17:9) Olsem, ating taim yumi kros, bel hevi, yumi no stap isi, o taiet tru, yumi no inap mekim ol gutpela disisen.—Provep 24:10; 29:22.

• Beten long God i givim yu savetingting. (Jems 1:5) God i amamas long harim ol kain beten olsem. Em i gutpela Papa husat i laik bai ol pikinini bilong em i abrusim ol hevi. “Jehova yet i save givim savetingting; na maus bilong em i save kamapim tok bilong givim save na tok bilong helpim ol man long skelim gut ol samting.”a (Provep 2:6) Em i save givim dispela savetingting long rot bilong Tok bilong em, em Baibel.—2 Timoti 3:16, 17.

• 

  Mekim wok painimaut. Bilong mekim wanpela gutpela disisen, yu nidim ol infomesen we yu ken bilip long en. Olsem Baibel i tok, “man i gat savetingting i save harim na bihainim ol tok.” (Provep 1:5) Yu inap painim we ol infomesen we inap helpim yu na yu ken bilip long en?

  Pastaim, lukim tok Baibel i mekim long samting em yu tingting long en. Krieta bilong yumi i save long wanem samting i gutpela bilong helpim yumi, olsem na Tok bilong em i pulap long ol gutpela edvais em yumi inap bilip tru long en. (Buk Song 25:12) Long sampela disisen, Baibel i kamapim klia samting em yumi mas mekim, ating long rot bilong ol lo na ol tok. (Aisaia 48:17, 18) Long planti narapela samting, Baibel i no kolim stret wanpela lo long en. Tasol em i givim ol stiatok bilong stiaim yumi. Dispela inap stiaim yumi long mekim gutpela disisen, maski sapos disisen yumi mekim i no wankain long disisen bilong narapela. Bilong painim ol ves bilong Baibel we i stret long dispela, mekim wok painimaut long ol atikol o ol buk na nius em Baibel i as bilong ol tok bilong en, olsem ol dispela buk na nius i stap long dispela websait, em ol i fri.b

  Long sampela disisen, ating yu mas skelim ol buk samting bilong narapela lain em yu inap bilip long tok bilong en. Olsem, paslain long yu baim wanpela samting—moa yet wanpela samting i gat bikpela pe—em i savetingting long mekim wok painimaut long dispela samting na lain i wokim, na tu, painimaut wanem ol lo ol i putim sapos dispela samting i bagarap, o yu laik givim i go bek. Na tu, yu mas skelim gut sapos ol samting long en i stret long laik bilong yu.

  Baibel i tok: “Taim man i no toktok wantaim ol arapela bilong kisim tingting, ol plen bilong em i no inap kamap gut.” (Provep 15:22) So paslain long mekim disisen, toktok wantaim wanpela em yu trastim. Olsem, em i savetingting long toktok wantaim wanpela dokta long disisen yu laik mekim long sait bilong marasin samting. (Matyu 9:12) Long sampela samting, yu ken toktok wantaim ol man em ol i bin feisim wankain hevi olsem yu. Tasol tingim, yu yet—i no ol man yu toktok wantaim ol—bai mekim disisen long dispela samting na yu yet bai karim kaikai bilong disisen bilong yu.—Galesia 6:4, 5.

• 

  Skelim gut olgeta samting. Taim yu kisim pinis ol infomesen, wokim wanpela lista long ol samting yu laik mekim, na tu, ol gutpela samting bilong en na ol hevi bilong en. Na yu mas tingim tu ol samting we inap kamap long disisen bilong yu. (Lo 32:29) Olsem, disisen bilong yu inap mekim wanem long yu, famili bilong yu, o ol narapela? (Provep 22:3; Rom 14:19) Sapos yu bekim ol dispela askim na tingim ol stiatok bilong Baibel bilong stiaim yu, dispela bai helpim yu long mekim gutpela disisen.

• Mekim disisen. Sampela taim yumi no mekim disisen long wanpela samting bikos yumi gat tupela tingting. Tasol sapos yumi no mekim disisen, yumi no inap mekim samting em rot i op long yumi mekim o yumi inap mekim samting we yumi no amamas long en. O yumi ken tok, sapos yumi no mekim wanpela disisen, dispela i wankain olsem yumi mekim wanpela rong disisen. Baibel i helpim yumi long kliagut long dispela, taim em i tok piksa long pasin bilong wokim gaden: “Sapos yu wetim gutpela taim bilong win na ren samting, orait bai yu no inap wokim gaden na yu no inap kisim kaikai i mau.”—Eklisiastis 11:4, Buk Baibel.

Tingim tu olsem, maski yu mekim gutpela disisen, ating dispela disisen i no gutpela olgeta. Bilong makim ol samting yu laik mekim, yu mas lusim sampela samting. Na tu, ating ol samting em yu no tingim inap kamap. (Eklisiastis 9:11) So yusim ol gutpela infomesen em yu gat, na makim samting em yu save bai kamapim gutpela samting.

Sampela disisen yu mekim pinis inap senis. Ating sindaun bilong yu i senis, o ating yu luksave olsem disisen yu mekim pastaim i gat sampela samting em yu no bin tingim i kamap. Olsem na em i savetingting long skelim gen na makim narapela we inap kamapim samting yu laikim.

Tasol i gat sampela disisen em yu no ken senisim. (Buk Song 15:4) Olsem, God i tok tupela marit i mas i stap gut long tok promis ol i bin mekim taim ol i marit.c (Malakai 2:16; Matyu 19:6) Taim ol hevi i kamap insait long marit, tupela marit i mas mekim olgeta samting bilong stretim na ol i no ken brukim marit.

Sampela taim, yumi olgeta bai mekim ol rong o kranki disisen. (Jems 3:2) Na ating yumi bai rigret o pilim nogut long en, tasol em nomol long pilim olsem. (Buk Song 69:5) Tru, sampela taim ol kain filings olsem em i gutpela samting bikos em inap stopim yumi long mekim seim popaia gen! (Provep 14:9) Tasol Baibel i givim edvais long yumi mas was gut, sapos bel i kotim yumi tumas, em inap bagarapim tingting na bel bilong yumi. (2 Korin 2:7)d Baibel i tok: “Jehova i gat pasin marimari na pasin sori.” (Buk Song 103:8-13) So luksave long ol samting i kamap long rong disisen yu bin mekim em yu no inap senisim, na mekim ol samting bilong stretim dispela.