Husat Bai Seivim Ol Man Nating?​—Baibel i Tok Wanem?

Ripot bilong lain Yunaitet Nesen

• Stat long Oktoba 7 i go long Oktoba 23, 2023, pait i kamap namel long Gasa na Israel i kilim i dai winim 6,400 manmeri na 15,200 manmeri i kisim bagarap, planti bilong ol em ol manmeri nating. Na tu, planti handret tausen manmeri i ranawe lusim haus bilong ol.

• I kam inap long Septemba 24, 2023, woa namel long Rasia na Yukren i kilim i dai 9,701 manmeri nating na inap 17,748 i kisim bagarap long Yukren.

Baibel i mekim wanem gutpela tok bilong helpim ol manmeri i karim hevi bilong woa?

Baibel i tok profet olsem God bai “mekim i dai ol pait i kamap long olgeta hap bilong graun.” (Buk Song 46:9) Em bai yusim wanpela gavman bilong heven o Kingdom long kisim ples bilong olgeta gavman bilong graun. (Daniel 2:44) Kingdom Bilong God bai pinisim tru olgeta hevi bilong ol manmeri.

Lukim ol samting Jisas Krais, em King bilong Kingdom Bilong God bai mekim:

• “Em bai kisim bek ol rabisman i singaut long kisim helpim, na em bai helpim tu ol man i no gat nem na ol man i no gat wanpela bilong helpim ol. Em bai sori long ol man i no gat nem na ol rabisman, na em bai kisim bek ol man i stap rabis. . . . Em bai kisim bek ol long han bilong ol man i mekim nogut long ol na long ol man i pait na bagarapim ol.”​—Buk Song 72:12-14.

Long rot bilong Kingdom bilong em, God bai pinisim tru olgeta pen na hevi em woa na pait bilong ol man i kamapim.

• “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen. Ol dispela samting bilong bipo ol i pinis olgeta.”​—Revelesen 21:4.

Klostu nau Kingdom Bilong God bai kamapim ol bikpela senis long graun. Baibel i tok profet long yumi bai harim long “ol woa i kamap klostu na ol woa i kamap longwe,” em yumi lukim i wok long kamap long nau. (Matyu 24:6) Ol dispela woa na ol narapela samting i kamap i soim olsem yumi stap long “taim bilong las de” bilong wok bos bilong ol man.​—2 Timoti 3:1.