Wanpela yangpela man i lukluk long ol manmeri i wokabaut i go insait long Haus Kingdom

ASKIM BILONG OL YANGPELA

Wai na Mi Mas Go Long Ol Miting Long Haus Kingdom?

Tupela taim long olgeta wik, ol Witnes Bilong Jehova i save mekim ol miting long ol ples bilong mekim lotu, em ol i kolim Haus Kingdom. Wanem samting i save kamap long dispela hap, na hau bai ol miting i helpim yu?

Wanem samting i save kamap long Haus Kingdom?

Haus Kingdom em ples bilong kisim skul long ol tok bilong Baibel we inap helpim yumi. Ol miting long dispela hap inap helpim yu long:

kisim stretpela save long God.
kliagut long as na ol samting i wok long kamap long nau.
kamap gutpela man o meri.
painim ol gutpela pren.

Yu save long dispela? Ples ol Witnes Bilong Jehova i save mekim ol miting, em ol i kolim olsem Haus Kingdom bikos ol i save stori long Kingdom Bilong God long dispela hap.—Matyu 6:9, 10; 24:14; Luk 4:43.

Wai na yu mas go long ol dispela miting?

Dispela infomesen bai helpim yu. Ol stiatok bilong Baibel em ol i kamapim long ol miting bilong ol Witnes Bilong Jehova bai helpim yu long “kisim savetingting.” (Provep 4:5) Dispela i makim olsem Baibel inap helpim yu long mekim ol gutpela disisen long laip. Em inap helpim yu tu long bekim ol bikpela askim bilong laip, sampela bilong ol dispela askim em:

Dispela em sampela bilong ol het tok bilong ol tok i save kamap long ol miting long ol wiken:

Bilong Wanem Yumi Mas Larim Baibel i Soim Rot Long Yumi?
Yu Inap Kisim Helpim We Long Taim Bilong Hevi?
Ol Samting Kingdom Bilong God i Mekim Bilong Helpim Yumi Long Nau.

“Wanpela klasmeit i kam long wanpela miting. Em i sindaun wantaim mipela famili, na mipela i serim buk wantaim em. Bihain, em i tokim mi olsem em i kirap nogut long bekim bilong odiens long ol hap bilong miting we i gat askim na bekim. Na tu, em i tok long lotu bilong em ol i no gat ol buk samting bilong stadi long en olsem yumi.”—Brenda.

Yu save long dispela? Bilong go long Haus Kingdom em fri, na mipela i no save singaut long mani.

Taim yu bung wantaim ol narapela dispela bai strongim yu. Baibel i tok wanpela risen na ol Kristen i mas bung wantaim em long “strongim bel bilong narapela narapela.” (Hibru 10:24, 25) Ol gutpela pren husat i putim God na ol narapela i stap namba wan long ol, ol i save kisim nupela strong namel long ol manmeri bilong dispela graun we ol man i save tingim ol yet tasol.

“Bihain long de olgeta, mi pilim taiet, tasol ol manmeri long Haus Kingdom i save mekim mi amamas. Bihain long miting taim mi wok long go long haus, mi pilim amamas na redi long mekim wok bilong narapela de.”—Elisa.

Yu save long dispela? I gat winim 120,000 kongrigesen bilong ol Witnes Bilong Jehova long olgeta hap bilong graun, ol i save bung long winim 60,000 narapela narapela ples. Long olgeta yia, ol i save wokim winim 1,500 Haus Kingdom na bai i gat inap spes bilong ol man i wok long kam long miting.a

Tok bilong ol wanlain

“Taim mi stap long haiskul, klasmeit bilong mi i kam wantaim mi long sampela miting, na em i kirap nogut long lukim ol Baibel sumatin i gat kain kain krismas i bung wantaim long kisim skul long Baibel. I no longtaim i go pinis bos bilong mi i kam, na em i amamas long lukim olsem yumi save yusim Baibel oltaim. Taim mi lukim amamas bilong em long miting mi yet i kisim bikpela amamas moa!”—Jessica.

“Mi luksave olsem ol miting i mekim na mi no tingim tumas ol hevi bilong wan wan de. Mipela kisim save long rot bilong stap amamas, hau long kamap gutpela man, na lainim planti moa. Taim mi lusim Haus Kingdom oltaim mi pilim olsem mi kisim nupela strong.”—Timothy.

“Wanpela man mi invaitim long kam long miting, bihain em i tok: ‘Mi kam long miting bilong painim ol popaia long bilip bilong yupela. Tasol mi luksave olsem bilip bilong mi yet i no stret!’ Em i amamas tu long lukim pasin pren bilong ol Witnes Bilong Jehova. Em i tok: ‘Maski nau tasol mi bungim yupela, yupela i mekim olsem yupela i save long mi inap planti yia!’ ”—Jacob.

“Sampela taim mi save tingting olsem, ‘Taim miting i pinis, mi bai hariap long go.’ Tasol long taim bilong miting, dispela tingting i lus. Bihain long miting, mi toktok wantaim ol narapela na mi no inap tingim wai na pastaim mi bin tingting long go hariap. Sapos mi no go long ol dispela miting, mi no inap long gat ol dispela gutpela pren.”—Madison.

a Bilong painim wanpela ples bilong miting, go long hap “Miting Bilong Kongrigesen Bilong Ol Witnes Bilong Jehova” na klikim “Painim Hap i Klostu Long Yu.”