God i Makim Pinis Samting i Kamap o Em i Kamap Nating?

WANPELA nius (International Herald Tribune) i tok: “God i bin makim planti bilong kisim bagarap na sampela nogat.” Long yia i go pinis, bom bilong ol paitman i bagarapim haus embasi bilong Amerika long Kenya na long Tansania​—⁠klostu 200 man i dai na planti handet man i kisim bagarap. Nius i tok, “taim bilong bom i pairap, dispela i mekim na ol nambawan bikman bilong embasi i no kisim bagarap.”

Ol i no kisim bagarap, long wanem, ol i insait long wanpela miting i kamap long wanpela hap bilong embasi em bom i no bin bagarapim. Tasol wanpela bikman bilong embasi​—⁠em wok bilong em long go long dispela miting tasol em i no go​—⁠em i dai. Em i bin stap klostu long hap bom i pairap long en.

Dispela nius i tok: “Em taim bilong Arlene Kirk tu i kisim nogut.” Arlene i bin go malolo na em i laik go bek long Kenya, tasol planti pasindia tumas ol i laik kalap long balus, olsem na Arlene i orait long narapela i kisim sia bilong em. Tasol sampela narapela pasindia ol i bin tok pinis olsem ol i orait long narapela i kisim sia bilong ol long balus, olsem na Arlene inap kalap long balus. Orait Arlene i kamap long embasi bilong mekim wok long dispela de bom i pairap, na em i dai.

Hevi i save painim olgeta man. Tasol i hatwok long save bilong wanem ol bikpela hevi i kamap. Long olgeta taim, ol man i save kisim birua na ol bikpela bagarap i save kamap long olgeta hap, na sampela man i save dai long ol dispela bagarap, tasol sampela nogat. Tasol i no long taim bilong bagarap tasol na sampela i tingting, ‘Bilong wanem dispela samting i painim mi?’ Ol gutpela samting tu i save painim sampela man tasol na sampela nogat. Long olgeta taim i stap bilong sampela man i gat hatwok long en, tasol i olsem i stap bilong sampela i no gat hatwok tumas long en. Olsem na ating yu gat askim olsem: ‘Dispela samting i mas painim ol man na ol i no inap abrusim? God i makim pinis ol samting i mas painim mi?’

Ol i Laik Painim As Bilong En

Inap 3,000 yia i go pinis, wanpela king i gat gutpela tingting na save, em i lukim sampela samting em i no bin ting bai kamap. Em i stori long as bilong ol dispela samting i kamap na em i tok: “Taim nogut i save painim yumi olgeta.” (Saveman 9:11) Sampela taim, wanpela samting i save kamap na yumi no bin ting em bai kamap, na yumi no gat rot bilong save dispela samting bai kamap. Ol narapela kain samting​—⁠gutpela samting o samting nogut​—⁠i save painim yumi, long wanem, yumi stap long wanpela hap long taim dispela samting i kamap.

Tasol ating yu gat wankain tingting olsem ol man i save tok, ol samting i no save kamap nating​—⁠em wok bilong wanpela strong​—⁠olsem God i makim pinis ol samting i mas kamap. Long olgeta bilip bilong lotu, dispela bilip olsem God i makim pinis ol samting i mas kamap, em i wanpela olpela bilip tru na planti man i save bilip long en. Profesa François Jouan, dairekta bilong wanpela dipatmen (Center for Mythological Research) long Yunivesiti Bilong Paris, em i tok: ‘I no gat wanpela taim o wanpela lain em ol man i no bin bilip olsem wanpela god i bosim ol samting i save painim ol​—⁠ol i tok olsem long ol samting long i stap bilong yumi em yumi no inap kamapim as bilong en.’ Long dispela as tasol planti man i save tok: “Em i no taim bilong em bilong i dai,” o “God i bin makim taim bilong em.”

Dispela Bilip

Dispela tok olsem God i makim pinis ol samting i mas kamap ol i kisim long wanpela tok Latin olsem fatum, na insait bilong en i olsem “wanpela tok profet, wanpela tok i kamap long maus bilong glasman, o samting God i tingim pinis na i mas kamap.” Sampela taim ol man i ting wanpela strong i kamap nating i makim samting bai kamap bihain, na i no gat rot bilong abrusim dispela samting na i olsem yumi no save long as bilong en, tasol planti man i ting dispela strong em wanpela god.

Wanpela man bilong raitim stori long lotu, em Helmer Ringgren, em i tok: ‘Wanpela bikpela samting long pasin bilong bilip long ol samting bilong lotu em dispela bilip olsem samting i mas painim man; samting i no save kamap nating, tasol wanpela strong i makim pinis ol samting bai painim man.’ Sampela man i mekim sampela samting bilong pasim ol hevi i laik painim ol, tasol planti man i ting yumi no inap mekim wanpela samting bilong helpim yumi yet. Em nau, ‘samting God i makim pinis i save painim ol.’

Inap longtaim pinis, ol tisa bilong lotu na ol saveman ol i bin wok strong long kamapim as bilong dispela bilip olsem God i makim pinis ol samting i mas kamap. Buk The Encyclopedia of Religion i tok: ‘I gat wanpela samting bilong dispela bilip i wankain long olgeta lain, olsem: As bilong en i stap hait.’ Tasol wanpela samting i wankain long ol kain kain tingting long dispela bilip, em tingting bilong ol man olsem wanpela samting i gat bikpela strong, winim strong bilong man, em i save bosim na stiaim olgeta samting bilong man. Ol i ting dispela strong i makim pinis ol samting i mas kamap long ol man na ol lain, olsem na olgeta samting bai kamap bihain, ol i mas kamap na i no gat rot bilong abrusim, wankain olsem ol samting i bin kamap bipo.

Samting i Kamapim Klia Dispela Samting

Sapos yu bilip olsem God i makim pinis ol samting i mas kamap, dispela i bikpela samting o nogat? Wanpela saveman bilong Inglan, em Bertrand Russell, em i tok: ‘Planti samting long i stap bilong ol man i save makim wanem kain tingting ol bai kisim, tasol tingting bilong ol i mekim bikpela wok bilong makim wanem ol samting bai kamap long i stap bilong ol.’

Tru tumas, dispela bilip olsem God i makim pinis ol samting i mas kamap​—⁠maski dispela bilip i stret o nogat​—⁠em inap stiaim yumi long mekim sampela kain pasin. Planti man i ting em laik bilong ol god, olsem na ol i orait tasol long sindaun bilong ol​—⁠maski ol i stap nogut na ol man i daunim ol na i no stret ol i mekim​—⁠i olsem dispela samting i mas painim ol na i no inap senis. Olsem na dispela bilip i mekim na ol man i no pilim olsem i gat sampela samting em wok bilong ol yet long mekim.

Tasol dispela bilip olsem God i makim pinis ol samting i mas kamap, em i bin kirapim sampela long mekim narapela kain samting. Olsem: Ol saveman i tok, pasin bilong larim ol man yet i bosim ol wok bisnis na pasin bilong kamapim ol nupela kain masin na haus faktori samting, sampela samting i as bilong en na dispela pasin i kamap bikpela moa. Wanpela bilong ol dispela samting em tingting bilong ol man olsem God i makim pinis ol samting bai painim man. Sampela lotu Talatala i bin skulim ol man olsem God i save makim sampela man bilong kisim laip. Max Weber, em wanpela saveman bilong Jemani, em i tok: ‘Wanpela askim olgeta bilipman i mas mekim long wanpela taim em olsem: Mi wanpela bilong ol man God i makim pinis bilong kisim laip?’ Sampela man i bin wok strong bambai ol i ken save, ol i kisim pinis blesing bilong God na God i makim ol pinis bilong kisim laip oltaim o nogat. Weber i tok ol i bin mekim olsem long rot bilong ‘ol wok bilong dispela graun’ ol i mekim. Taim wok bisnis bilong ol i kamap gutpela na ol i bungim planti mani kago, ol i ting dispela i makim olsem God i orait long ol.

Dispela bilip olsem God i makim pinis ol samting i mas kamap, dispela i mekim na sampela man i bihainim ol pasin i narapela kain tru. Long Namba Tu Pait, sampela pailot bilong Japan em ol i orait long kisim bagarap wantaim balus bilong ol i gat bom long en, ol i bin bilip long kamikasi o “win bilong God.” Ol i ting olsem ol god i gat laik bilong ol na ol man inap insait long dispela laik, na dispela tingting i mekim na indai bilong ol dispela pailot i olsem samting bilong lotu. Insait long 10-pela yia i go pinis, ol nius i bin tokaut planti taim long ol man long hap bilong Midel-Is i draivim ka i gat bom long en bambai ol i ken bagarapim sampela man, maski ol yet i dai. Wanpela buk i tok, bilip bilong ol man olsem God i makim pinis ol samting i mas painim ol, dispela em i bikpela samting long pasin bilong ol dispela man long bagarapim ol yet wantaim ol birua, ‘em lotu i as bilong dispela pasin.’

Tasol bilong wanem planti man i bilip olsem God i makim pinis ol samting i mas kamap? Bilong bekim dispela askim, yumi ken stori liklik long as bilong en.