Birua i Painim Yu—i Kamap Nating o God i Makim Pinis?
WANPELA yangpela meri i gat gutpela skin, nem bilong em Kristina, em i brukim rot i gat planti ka long en, em wanpela bikrot long biktaun Sao Paulo long Brasil. Em i no lukim bas i kam. Draiva i laik brek, tasol sori! Bas i bamim Kristina na kilim em i dai.
Wanpela nius bilong Brasil (O Estado de S. Paulo bilong Julai 29, 1990) i putim stori bilong dispela samting nogut long namba wan pes. Tasol long olgeta yia long Brasil kain birua olsem i painim inap olsem 50,000 manmeri na ol i dai. Na planti tausen moa i kisim bikpela bagarap, tasol sampela i abrusim bagarap. Orait, bilong wanem dispela yangpela meri i no bin abrusim bagarap? Yu ting God i makim pinis taim bilong em na long dispela de stret em i mas i dai?
Planti planti manmeri i gat dispela kain tingting. Ol i ting ol bikpela samting i save painim yumi, olsem i dai, em God i makim pinis taim bilong en na yumi no inap abrusim. Ol i save tok, ‘Taim bilong em i kamap na em i dai.’ Ol i save mekim kain tok olsem. Tasol dispela tok i stret o nogat? Tru God i makim pinis taim bilong yumi mas i dai na yumi no inap abrusim dispela taim, o olsem wanem?
Ol Grik na ol Rom long bipo i ting, i gat taim bilong olgeta samting i mas kamap na i no gat rot bilong abrusim. Long nau tu ol man bilong planti lotu i gat dispela kain tingting. Ol Muslim bilong lotu Islam i bihainim tok bilong buk lotu bilong ol, em Koran, i tok: “No gat wanpela man inap i dai nating—Ala [God] i mas givim orait pastaim—em i mas i dai long taim Ala i makim pinis.” Planti lotu i gat nem Kristen ol tu i gat dispela tingting. Samting i strongim dispela tingting em olsem: Wanpela man bilong lotu, nem bilong em Jon Kalvin, em i bin lainim ol man olsem God i makim pinis ol samting i mas painim yumi. Olsem na taim wanpela man i dai, pris o pasto i save tokim ol famili bilong em olsem: “Em laik bilong God.”
Dispela tingting olsem God i makim pinis taim bilong birua o bagarap i mas painim yumi, em i no stret wantaim save yumi kisim pinis na i no stret wantaim samting tru i save painim yumi; i no gat as bilong dispela tingting, na i no stret tu. Olsem: Yumi no ken tok God i mekim na ka i bam na ol man i kisim bagarap, long wanem sapos yumi skelim gut ol samting bai yumi save i gat as na dispela samting i bin kamap. Na ol man i bin skelim planti birua i kamap long rot na ol i tok, sapos man i pasim let bilong sia insait long ka, dispela inap lukautim skin bilong em na sapos ka i bam, em inap abrusim bagarap. Tasol sapos em laik bilong God na man i mas i dai long dispela taim, yu ting dispela man inap mekim wanpela samting bilong lukautim skin bilong em na abrusim bagarap? Nogat, a?
Sapos man i ting God i makim pinis taim bilong i dai i mas painim em, dispela kain tingting inap nogutim em. Dispela inap kirapim em long mekim pasin longlong, olsem brukim ol lo bilong rot na givim siksti, na dring o kisim drak na draivim ka, long wanem, em i ting sapos i no taim bilong em, bagarap i no inap painim em. Na samting i moa nogut em olsem: Dispela kain tingting i kirapim sampela man long sutim asua i go long God taim birua i painim ol yet o famili bilong ol. Ol i bel nogut na pilim olsem ol i no inap mekim wanpela samting, na ol i ting God i no save tingim yumi, na ating bai ol i no bilip moa long God. Tok bilong wanpela man, nem bilong em Emerson, i stret, em i tok, ‘Samting i save nogutim tru ol man em dispela tingting olsem wanpela hatpela God i makim pinis ol samting i mas painim yumi.’
Tasol Baibel i tok wanem long birua o bagarap i painim yumi long rot o long haus samting? Yu ting Baibel i tok God i makim pinis taim bilong en na yumi no inap abrusim? Na olsem wanem long bihain? Yu yet yu inap mekim sampela samting na bai yu ken kisim laip i stap oltaim long bihain? O God i makim pinis ol samting i mas painim yu na yu no inap abrusim?
[Rait long pes 4]
‘Samting i save nogutim tru ol man em dispela tingting olsem wanpela hatpela God i makim pinis ol samting i mas painim yumi.’—Ralph Waldo Emerson