6-pela Rot Bilong Lukautim Helt Bilong Yu

Wanpela Hatwok Long Ol Kantri i Stap Rabis

PLANTI manmeri long nau i mas taitim bun long i stap klin, moa yet long ol hap we i no gat gutpela wara na ol samting i no stap klin. Tru, ol man i mas taitim bun, tasol gutpela samting i save kamap. Sampela man i ting winim 50 pesen bilong olgeta kain sik na dai i painim ol pikinini, as bilong en em ol binatang jem i stap long han i doti, o kaikai o wara nogut em ol i putim long maus na jem i go insait. Yumi inap lukautim yumi yet long planti sik, moa yet em pekpek wara, taim yumi bihainim ol dispela tok i stap long buk Facts for Life bilong United Nations Children’s Fund.

1 Pekpek long ples stret

Planti jem i stap long pekpek. Taim ol jem bilong kamapim sik i go insait long wara na kaikai, o i stap long han, ol plet kap samting, o ples bilong redim na sutim kaikai, yumi inap kaikai na daunim, na long dispela rot yumi kisim sik. Nambawan gutpela rot bilong pasim ol jem long kamap planti em long rausim olgeta pekpek. Man i mas pekpek long toilet. Pekpek bilong animal i no ken stap klostu long haus, ol ples wokabaut, o ples we ol pikinini i save pilai.

Sapos i no gat toilet, kwiktaim karamapim pekpek. Tingim, olgeta pekpek i save karim jem bilong kamapim sik, maski em pekpek bilong bebi. Yu mas putim pekpek bilong ol pikinini long toilet o karamapim long graun.

Yu mas klinim toilet long olgeta taim na karamapim ai bilong toilet.

2 Wasim han

Yu mas wasim han bilong yu long olgeta taim. Pasin bilong wasim han long sop na wara o sit bilong paia na wara inap rausim jem. Pasin bilong wasim nating han long wara, dispela i no inap​—⁠yu mas rapim tupela han wantaim sop o sit bilong paia.

Em i bikpela samting long wasim han bihain long yu pekpek na bihain long yu klinim as bilong bebi o bilong pikinini em nau tasol i pekpek. Na tu, wasim han bihain long yu holim ol animal, paslain long yu holim kaikai, na paslain long givim kaikai long pikinini.

Pasin bilong wasim han i lukautim ol manmeri na bai ol liklik snek i save kamapim sik i no ken bagarapim ol. Ol dispela snek i liklik tru, olsem na yumi inap lukim ol long rot bilong maikroskop tasol. Ol i stap long pekpek na pispis, antap long wara na graun, na long nupela mit o mit i no tan gut. Nambawan rot bilong pasim ol binatang long go insait long bodi em long wasim han bilong yu. Na tu, sapos yu putim su taim yu stap klostu long toilet, dispela inap pasim ol liklik snek long go insait long skin bilong lek bilong yu na go insait long bodi.

Ol pikinini i save putim han long maus planti taim, olsem na planti taim yu mas wasim han bilong ol, yu mas mekim olsem bihain long ol i pekpek na paslain long ol i kaikai. Skulim ol long wasim han bilong ol yet na no ken pilai klostu long toilet, o ples we pekpek i stap.

3 Wasim pes long olgeta de

Bilong abrusim sik long ai, wasim pes bilong yu wantaim sop na wara long olgeta de. Wasim pes bilong ol pikinini tu. Pes i doti i save pulim ol lang em ol i save karim ol jem. Ol dispela jem inap kamapim sik long ai na inap mekim man i kamap aipas.

Sekim ai bilong pikinini bilong yu long olgeta taim. Ai i no gat sik long en, em i gat wara na em i lait. Sapos ai i luk drai, ret, o i gat sua o ai pekpek, orait kisim em i go long wanpela nes o dokta bilong sekim em.

4 Yusim klinpela wara tasol

Ol famili i no sik planti taim ol i yusim klinpela wara na lukautim gut na bai i no gat jem long en. Ating wara bilong yu i klin sapos em i kam long rot bilong ol gutpela paip o hulwara i no gat samting nogut i bagarapim. Wara long ol liklik raunwara, ol bikpela wara, na ol tang o hulwara ol i no karamapim, dispela wara i doti, tasol em inap kamap klin sapos yu boilim.

Karamapim ai bilong hulwara. Long olgeta taim yu mas wasim ol baket, rop, na ol kontena samting bilong pulimapim wara na putim long hap i klin, no ken putim long graun. Ol animal i no ken i stap klostu long wara bilong dring na hap ol famili i save stap long en. No ken yusim ol marasin bilong kilim binatang o ol strongpela marasin klostu long hap bilong kisim wara.

Long haus, wara i mas i stap long klinpela kontena i gat ai bilong en. Kontena i gat tep olsem long bikpela eski samting em i gutpela. Sapos nogat, orait yu mas yusim klinpela kap samting long kisim wara long kontena. Han i doti i no ken holim wara bilong dring.

5 Lukautim kaikai

Pasin bilong kukim gut kaikai inap kilim ol jem. Yu mas kukim gut kaikai, moa yet em ol abus na kakaruk samting. Ol jem i save kamap planti kwiktaim long ol kaikai i hat liklik. Taim kaikai i tan pinis, kwiktaim yu mas kaikaim. Sapos yu laik larim kaikai i stap 2-pela aua na moa, yu mas putim long hap i kol o i hat. Na tu, sapos yu laik lusim kuk kaikai bilong kaikaim long narapela taim, orait yu mas karamapim. Dispela i lukautim kaikai na ol lang na binatang i no ken holim. Paslain long yu kaikaim dispela kol kaikai, yu mas hatim.

Susu bilong mama em i nambawan gutpela kaikai bilong ol liklik pikinini. Susu bilong animal em ol i bin boilim i gutpela moa winim susu ol i no bin boilim. Abrusim pasin bilong givim susu long bebi long rot bilong botol, tasol yu ken mekim olsem sapos yu klinim botol long hat wara paslain long yu mekim wok long en. Ol botol i save karim ol jem inap mekim pikinini i pekpek wara. Em i gutpela long mama i givim susu long pikinini o givim kaikai long em long klinpela kap.

Wasim ol prut na kumu samting long klinpela wara. Dispela em i bikpela samting sapos yu givim kaikai em yu no bin kukim long ol bebi na ol liklik pikinini.

6 Rausim olgeta pipia bilong haus

Ol lang, kokoros, na rat, olgeta i save karim binatang jem. Ol i save kamap planti long ples i gat pipia long en. Sapos i no gat ol lain bilong kisim pipia, orait planim ol pipia o kukim long olgeta de. Mekim haus bilong yu i stap klin na i no gat ol pipia na doti wara.

Sapos oltaim yu bihainim ol dispela tok, i no longtaim na bai yu pilim olsem ol i hap wok bilong wan wan de. I no hatwok long mekim ol dispela samting na yu no inap tromoi bikpela mani bilong mekim, tasol ol bai lukautim helt bilong yu na famili bilong yu.

[Piksa long pes 11]

Sapos i no gat toilet, kwiktaim karamapim pekpek

[Piksa long pes 11]

Wasim han bilong yu long olgeta taim

[Piksa long pes 12, 13]

Wasim pes bilong yu wantaim sop na wara long olgeta de

[Ol Piksa long pes 12]

Ol famili i no sik planti taim ol i yusim klinpela wara na lukautim gut na bai i no gat jem long en

[Piksa long pes 13]

Sapos yu laik lusim kuk kaikai bilong kaikaim long narapela taim, orait yu mas karamapim

[Piksa long pes 13]

Yu mas planim ol pipia o kukim long olgeta de