Ol Famili i Stap Gut—Hap 1
Olsem dispela spesel Kirap! i soim pinis, ol famili i stap gut sampela taim ol tu i gat hevi. Yumi no kirap nogut long dispela, long wanem, yumi stap long taim em Baibel i kolim olsem taim bilong “planti hevi nogut tru.” (2 Timoti 3:1) Sampela kain hevi bai kamap insait long olgeta famili.
Tasol tingim, i no olsem famili bai stap gut sapos sindaun bilong famili i gutpela tasol na i no gat hatwok long en, nogat. Jisas i tok: “Ol manmeri i save, ol i stap rabis tru long ol samting bilong God [“hangre long kisim save long God,” NW ], em ol i ken amamas.” (Matyu 5:3) Ol famili husat i bihainim ol stiatok bilong Baibel bilong inapim hangre bilong ol long kisim save long God, ol i save long rot bilong stap gut—maski ol i gat sampela hatwok long sindaun bilong ol. Tingim sampela stori olsem.
Lukautim pikinini i gat bagarap long bodi. Baibel i tok wok bilong lukautim famili i bikpela samting tru, na yumi mas lukautim tu ol wanfamili em ol i mas kisim helpim. Baibel i tok: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.”—1 Timoti 5:8.
Long pes 15, Victor, wanpela papa long Saut Afrika, i stori long olsem wanem em na meri bilong em i bin lukautim pikinini i gat bagarap long bodi winim 40 yia.
Kamap bikpela olsem pikinini ol i adoptim. Ol stiatok bilong Baibel inap helpim man long amamas long em yet—maski papamama tru i bin lusim em long han bilong ol narapela. Baibel i tok, God Jehova i save “lukautim” ol pikinini i no gat papa.—Song 27:10.
Long pes 16, Kenyatta, wanpela yangpela meri long Amerika, i stori long olsem wanem em i lain long karim bel hevi em i pilim long em i no bin bungim papamama tru bilong em.
Karim hevi taim papa o mama i dai. Taim papa o mama i dai, dispela inap bagarapim tru bel bilong pikinini na i hatwok long dispela kain bel hevi i pinis. Baibel inap helpim man i gat kain hevi olsem. Man i kamapim ol tok bilong Baibel, em Jehova, em i “God bilong mekim isi bel bilong olgeta man i gat hevi.”—2 Korin 1:3.
Long pes 17, Angela, wanpela yangpela meri long Australia, i stori long olsem wanem pasin bilong em long pas gut wantaim God i bin helpim em long karim bel hevi taim papa i dai.
Olgeta famili i gat sampela hatwok ol i mas karim. Olsem ol stori long ol pes bihain long dispela bai kamapim, ol man husat i bihainim ol stiatok bilong Baibel, ol i bin painim wanpela bikpela samting i helpim ol long karim ol hevi i painim ol.
[Blok/Piksa long pes 15]
Lukautim Pikinini i Gat Bagarap Long Bodi
Stori bilong Victor Maynes, Saut Afrika
“Kirap long taim Andrew i bon, mipela i mas putim klos long em, wasim em, na sampela taim helpim em long kaikai. Nau em i gat 44 krismas.”
TAIM Andrew i winim wanpela krismas na em i no kirap wokabaut, mipela i tingting olsem sampela samting i no stret. Long dispela taim, sik i kisim em na em i hap i dai. Mipela i kisim Andrew i go hariap long haus sik, na long hap mipela i kisim save olsem em i gat sik epilepsi. Tasol i no dispela samting tasol. Ol i mekim sampela tes moa long Andrew na kisim save olsem em i gat bagarap long kru.
Mipela i traim kain kain marasin samting na bihain Andrew i no hap i dai planti taim tumas. Inap sampela hap taim, em i mas kisim 4-pela narapela narapela marasin inap 3-pela taim long olgeta de. Tru, ol marasin i no inap oraitim sik i stap long kru bilong em. Nau Andrew i gat 44 krismas, na tingting bilong em i olsem tingting bilong pikinini i gat 5-pela o 6-pela krismas.
Ol dokta i tokim mipela long putim Andrew long wanpela haus sik i save lukautim ol kain sikman olsem, tasol mipela i no laik mekim olsem. Mipela inap long lukautim Andrew, olsem na mipela i wokim disisen olsem mipela yet bai lukautim em long haus, maski i gat hatwok bilong en.
Olgeta insait long famili bilong mipela i insait long wok bilong lukautim Andrew. Ol arapela pikinini bilong mipela—mipela i gat 2-pela pikinini meri na 1-pela pikinini man—ol i helpim gut mipela, na mi tenkyu tru long ol! Na tu, mipela i Witnes Bilong Jehova, olsem na ol bratasista bilong kongrigesen bilong mipela i helpim gut mipela. Sampela taim ol i kukim kaikai long mipela o lukautim Andrew taim mipela i go autim tok o mekim sampela narapela wok.
Oltaim mipela i save tingim tok bilong Aisaia 33:24, i gat tok promis bilong God long taim we ‘i no gat man bai tok olsem, “Mi gat sik.” ’ Mipela i bilip tru olsem God bai mekim samting em i tingting pinis long mekim, olsem kamapim nupela graun na pinisim olgeta kain sik. (2 Pita 3:13) Olsem na mipela i wetim taim we Andrew bai i no gat sik moa. Taim mipela i wet long dispela taim, mipela i bilip long tok bilong Jisas olsem sapos mipela i putim ol wok bilong Kingdom Bilong God i stap namba wan long laip bilong mipela, bai mipela i kisim ol samting mipela i nidim. (Matyu 6:33) Mipela i lukim olsem oltaim God i save givim mipela ol samting mipela i mas kisim. I no gat wanpela taim mipela i bin sot long wanpela samting.
Tru, i no olgeta inap lukautim sikman long haus. Ol lain husat i save mekim olsem, namba wan samting mi laik tokim ol long mekim em olsem, ol i mas beten strong na beten long olgeta taim. (1 Pita 5:6, 7) Namba tu, tingim tru pikinini na mekim gut long em, na tingim olsem em inap lain long laikim God Jehova. (Efesus 6:4) Namba tri, kirapim famili olgeta long lukautim sikman, na larim ol i helpim yu. Namba foa, tingim olsem haus bilong yu em i hap we i gat ol man i laikim tru pikinini bilong yu. Tru, sindaun bilong ol famili i no wankain. Tasol mipela yet i no bin bel hevi long mipela i bin lukautim Andrew long haus. Em i wanpela pikinini na wanpela man mi laikim tru.
[Blok/Piksa long pes 16]
Kamap Bikpela Olsem Pikinini Ol i Adoptim
Stori bilong Kenyatta Young, Amerika
“Taim papa o mama bilong yu i marit gen, yu stap yet wantaim papa o mama tru bilong yu. Tasol ol i adoptim mi, olsem na mi no stap wantaim papa o mama tru bilong mi. Mi no save mi luk olsem papa o mama.”
MI NO save long papa tru bilong mi, na mi no bin bungim mama i karim mi. Em i bin dring planti na kisim ol drak taim em i gat bel long mi. Taim mi bon, ol i putim mi long haus em gavman i makim bilong lukautim ol pikinini i no gat papamama. Mi bin stap long narapela narapela haus olsem paslain long ol i adoptim mi taim mi no winim yet 2-pela krismas.
Papa i adoptim mi i tok, taim wokmeri bilong gavman i soim piksa bilong mi long em, kwiktaim em i gat laik long adoptim mi. Wantu mi kirap laikim nupela mama bilong mi. Mi tokim em olsem em i mama bilong mi na mi laik go long haus wantaim em.
Tasol mi tingim yet taim mi liklik pikinini, mi save pret long mi bai mekim wanpela rong na ol bai salim mi i go bek long haus bilong ol pikinini i no gat papamama. Mi ting mi no ken bel hevi o kisim sik olsem ol narapela pikinini. Mi mekim ol samting na bai mi no ken kisim kus tu! Planti taim papamama i tokim mi olsem ol i laikim mi tru na ol bai i no inap lusim mi.
Maski mi bikpela pinis, sampela taim mi save pilim yet olsem papamama i no laikim mi wankain olsem ol papamama husat i mekim bikpela long pikinini tru bilong ol. Na taim bel bilong mi i stap isi na mi no gat dispela kain tingting, wanpela bai tokim mi olsem, “Yu mas tenkyu tru long yu gat gutpela papamama husat i redi long adoptim yu!” Yes, mi tenkyu tru long dispela, tasol ol kain tok olsem i mekim na mi pilim olsem sampela samting long mi i no stret na wanpela i bin wok strong tru bambai em inap laikim mi.
Em hatwok long mi long tingting olsem, ating bai mi no inap save long husat em i papa tru bilong mi. Sampela taim mi bel hevi long mama i karim mi, long em i no bin lusim pasin bilong dring na kisim drak bambai em i ken lukautim mi, i olsem mi samting nating tasol. Tasol sampela taim mi sori long em. Planti taim mi save tingting olsem sapos mi bungim em, mi laik tokim em olsem laip bilong mi i gutpela na em i no ken bel hevi long em i bin lusim mi long han bilong ol narapela.
Papamama i adoptim mi ol i Witnes Bilong Jehova, na nambawan gutpela presen mi bin kisim long ol, em mi kisim save long Baibel. Tok bilong Song 27:10 i save mekim gut bel bilong mi long olgeta taim, em i tok: “Maski papa na mama i givim baksait long mi, Bikpela bai i lukautim mi.” Dispela samting i bin kamap long mi. Mi wanpela pikinini ol i adoptim na dispela i kamapim sampela gutpela samting. Olsem, mi gat laik long save gut long ol man, mi laik save long sindaun bilong ol na laip bilong ol. Ating i olsem, long wanem, mi no save long famili tru bilong mi. Mi save laikim tru ol man, na dispela em i bikpela samting long wok Kristen. Mi wanpela Witnes Bilong Jehova, na wok bilong tokim ol man long Baibel i mekim na mi amamas long mi yet na laip bilong mi i gat as tru bilong en. Taim mi bel hevi, mi save go aut na helpim ol man. Taim mi skulim ol man long Baibel, mi inap toktok gut wantaim ol. Olgeta man i gat sampela samting i bin kamap long laip bilong ol em ol inap stori long en.
[Blok/Piksa long pes 17]
Karim Hevi Taim Papa o Mama i Dai
“Taim papa bilong mi i dai, mi pilim olsem i no gat moa man bilong sambai long mi. Dispela man husat i save long olgeta samting na husat inap stretim olgeta samting long laip bilong mi, em i no stap moa.”
Stori bilong Angela Rutgers, Australia
INAP 10-pela yia i go pinis, papa bilong mi i dai taim mi tineja. Inap 6-pela mun paslain long dispela, em i bin kisim operesen, na bihain liklik long operesen, dokta i tokim mipela olsem i no gat narapela samting ol inap mekim bilong helpim papa. Mama i laik kisim sampela save moa, bikpela brata bilong mi i airaun na pundaun, na mi kisim kain kain tingting i bagarapim bel bilong mi. Inap 6-pela mun bihain, papa bilong mi em i dai.
Inap sampela hap taim mi kisim kain kain tingting. Mi laik bai ol pren bilong mi i kliagut long hevi mi karim, tasol mi no laik bai ol i tingim mi olsem wanpela tarangumeri. Olsem na mi wok strong long ol i no ken luksave long ol tingting i stap long bel bilong mi. Na tu, mi pilim olsem sapos mi amamas long stap wantaim ol, dispela bai soim olsem laip bilong mi i orait liklik, tasol laip bilong mi i no orait. Nau taim mi tingting i go bek, mi pilim tru pasin bilong ol pren bilong mi long ol i no bin les kwik long mi.
Olsem wanem? Dai bilong Papa i mekim na bel i save kotim mi? Yes, bel i save kotim mi! Mi save tingting olsem wai na mi no bin tokim em planti taim moa olsem “Mi laikim yu!” Wai na mi no bin holimpasim em planti taim moa o lusim bikpela hap taim moa bilong stap wantaim em. Planti taim mi save tokim mi yet olsem, ‘Papa bai i no laik long mi gat ol dispela kain tingting,’ tasol mi save wari yet long dispela samting.
Mi wanpela Witnes Bilong Jehova, na tok promis bilong Baibel long ol man i dai pinis bai kirap bek, dispela i mekim gut bel bilong mi. (Jon 5:28, 29) Mi traim long piksaim long tingting olsem papa bilong mi i bin go raun long narapela kantri na em bai kam bek long bihain, tasol mipela i no save long wanem de stret. Taim ol man i tokim mi olsem, “Papa bilong yu bai kam bek long taim bilong kirap bek,” pastaim dispela tok i no bin strongim bel bilong mi. Mi tingting, ‘Mi laik bai Papa i kam bek nau tasol!’ Tasol mi kisim helpim long dispela tok piksa long man i go raun long narapela kantri. Em i makim olsem bihain ol man bai kirap bek, na dispela i helpim mi long karim bel hevi taim Papa i dai.
Ol wanbilip Kristen i bin helpim mi tru. Mi tingim wanpela brata husat i tokim mi olsem em i no pilim amamas long toktok long dai bilong papa bilong mi, tasol em i tok em i save tingting long mi na famili bilong mi long olgeta taim. Mi no lusim tingting long dispela tok. Em i helpim mi long karim bel hevi bilong mi taim i no gat wanpela man i mekim sampela tok bilong strongim mi. Dispela tok i helpim mi long luksave olsem maski ol man i no mekim wanpela tok, ol i tingting long mi na famili bilong mi. Dispela i bikpela samting tru long mi!
Inap 4-pela mun bihain long Papa i dai, Mama i kirap lusim bikpela hap taim long autim tok, na mi inap luksave olsem em i kisim bikpela amamas long dispela. Olsem na mi kirap autim tok wantaim em. Taim yu helpim ol narapela, dispela i helpim yu long karim bel hevi bilong yu. Dispela i mekim na mi bilip strong moa long Tok Bilong Jehova na ol tok promis bilong em, na long nau tu dispela i helpim mi long mi no ken tingting tasol long bel hevi bilong mi.