BAIBEL I TOK WANEM?

Alkohol

I gat rong long dring alkohol?

‘Mipela i ken wokim wain bilong dring, bai bel bilong mipela i amamas. Na kisim wel bilong diwai oliv na welim pes bai pes i lait. Na wokim bret bilong kaikai na strongim bodi.’—Song 104:15.

TOK OL MAN I MEKIM Long planti famili, ol i save kisim ol dring alkohol wantaim kaikai long olgeta taim. Long sampela narapela famili ol i no orait liklik long pasin bilong dring alkohol. Bilong wanem ol man i gat narapela narapela tingting? Ol samting olsem kalsa, helt bilong man, na lotu i stiaim disisen ol man i mekim.

TOK BAIBEL I MEKIM Baibel i tambuim pasin bilong dring spak na dring planti tumas alkohol, tasol em i no tambuim pasin bilong dring inap tasol long skel. (1 Korin 6:9, 10) Long bipo ol man na meri i lotuim God ol i save dring wain, em wanpela dring Baibel i kolim winim 200 taim. (Stat 27:25) Saveman 9:7 i tok: “Kaikai na amamas. Yu dring wain na belgut.” Wain i save mekim ol man i amamas, olsem na ol i save dring long ol bung bilong amamas, olsem long taim bilong marit. Jisas i bin wokim fes mirakel bilong em long wanpela bung bilong marit taim em i tanim wara i kamap “gutpela wain.” (Jon 2:1-11) Ol i mekim wok long wain tu olsem wanpela marasin.—Luk 10:34; 1 Timoti 5:23.

Yu ting Baibel i makim stret hamas dring yumi mas kisim?

“No ken kalabus long pasin bilong dring planti wain.”—Taitus 2:3.

BILONG WANEM EM I BIKPELA SAMTING? Long olgeta yia planti famili i kisim hevi, long wanem, papa o mama wantaim i save dring planti tumas. Pasin bilong dring planti inap mekim na man inap kisim bagarap na em inap insait tu long ol eksiden, olsem kar eksiden samting. Na tu, pasin bilong dring planti tumas alkohol inap planti yia inap bagarapim kru, klok, liva, na bel bilong man.

TOK BAIBEL I MEKIM Pasin bilong dring alkohol na kaikai inap tasol long skel em samting God i laik yumi mekim. (Sindaun 23:20; 1 Timoti 3:2, 3, 8) God i no orait long ol man i no bosim gut ol yet long sait bilong dring planti na kaikai planti. Baibel i tok: “Man i dringim planti bia, em bai i tok bilas na tok nogut na pait nabaut. Sapos man i larim bia i bosim em, orait em i no gat gutpela tingting.”—Sindaun 20:1.

Wanpela rot we alkohol inap nogutim man em long paulim tingting bilong em na em i no mekim stretpela pasin. Hosea 4:11 i tok: “Kain kain strongpela dring i save paulim tingting bilong ol manmeri.” Wanpela man nem bilong em John, i kisim save long dispela bihain long wanpela samting nogut i painim em.a Bihain long em i kros wantaim meri bilong em, em i go long wanpela hotel, dring planti alkohol, na em i mekim pasin adaltri. Bihain em i rigret tru long ol dispela pasin em i mekim na pasim tok long bel olsem em bai no inap tru mekim gen. Pasin bilong dring planti alkohol inap bagarapim bodi bilong yumi, stretpela pasin bilong yumi, na pasin bilong yumi long pas gut wantaim God, na olsem Baibel i tok, ol man bilong dring planti bai i no inap kisim laip oltaim.—1 Korin 6:9, 10.

Wanem taim i no stret long dring alkohol?

“Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.”—Sindaun 22:3.

BILONG WANEM EM I BIKPELA SAMTING? Buk World Book Encyclopedia i tok: “Alkohol em i strongpela drak.” Olsem na i gat sampela taim we i no gutpela long dring alkohol, maski em liklik tasol.

TOK BAIBEL I MEKIM Planti taim ol man i save bungim trabel, long wanem, ol i save dring alkohol long taim we i no stret long dring. Baibel i tok: “Olgeta samting i . . . save kamap long taim bilong em yet,” na dispela i makim tu taim bilong no ken dring alkohol. (Saveman 3:1) Olsem, pikinini i yangpela tumas na lo i no orait long em i dring alkohol, o man i laik lusim pasin bilong dring alkohol. O man i kisim ol marasin i pait wantaim alkohol. Planti manmeri i save abrusim alkohol long taim ol i go long wok, long taim ol i stap long wok, na moa yet long taim ol i yusim ol masin we inap kamapim bikpela bagarap. Na tu, ol man i gat gutpela tingting i tingim laip na helt bilong ol olsem gutpela presen i kam long God. (Song 36:9) Yumi soim rispek long dispela presen taim yumi larim ol stiatok bilong Baibel i stiaim tingting bilong yumi long alkohol.

[Futnot]

[Piksa long pes 14]