Nem Bilong god

SAMPELA MAN I TOK

Planti man i holim nem Kristen i bilip olsem nem bilong God em Jisas. Ol narapela i tok i gat wanpela God tasol em God i Gat Olgeta Strong, olsem na i no gat wok long kolim nem tru bilong em. Na sampela narapela i tok i no stret long kolim nem tru bilong God.

BAIBEL I TOK

God i Gat Olgeta Strong i gat nem, na nem bilong em i no Jisas. Jisas i skulim ol wanbilip bilong em long beten long God na tok: “Papa, mekim holi nem bilong yu.” (Luk 11:2) Jisas yet i beten long God na tok: “Papa, litimapim nem bilong yu.”—Jon 12:28.

Long Baibel, God i tokaut olsem: “Mi Jehova. Dispela em nem bilong mi; mi no inap givim glori bilong mi long narapela.” (Aisaia 42:8, NW ) Long tok Hibru YHWH em 4-pela leta i makim nem bilong God, na long tok Inglis ol i trensletim olsem “Jehova.” Dispela nem i kamap inap olsem 7,000 taim long Ol Skripsa Hibru.a Em i kamap planti taim moa winim ol biknem olsem “God,” “God i Gat Olgeta Strong,” na “Bikpela,” na tu, em i kamap planti taim moa winim ol nem olsem Abraham, Moses, na Devit.

I no gat wanpela skripsa long Baibel i soim olsem Jehova i tambuim yumi long kolim nem bilong em long pasin rispek. Baibel i kamapim olsem ol wokman bilong God i bin amamas long kolim dispela nem. Ol i bungim nem bilong God wantaim nem ol i givim long ol pikinini bilong ol. Kain olsem, Elaija, mining bilong en, “God Bilong Mi Em Jehova,” na Sekaraia, mining bilong en, “Jehova i Tingim.” Na tu, ol i kolim nem bilong God long nomol toktok bilong ol.—Rut 2:4, NW.

God i laik bai yumi kolim nem bilong em. Baibel i kirapim yumi long “kolim nem bilong [“Jehova,” NW ] na singaut long em na tok tenkyu long em.” (Song 105:1) Em i save tingim gut ol man i “tingim tingim nem bilong em.”—Malakai 3:16, NW.

Sampela saveman i tok long tok Hibru, mining bilong nem Jehova i olsem, “Em i Mekim i Kamap.” Dispela nem i makim olsem God inap mekim olgeta kain samting o em inap mekim lain manmeri bilong em i kamap wanem wanem kain em i laikim bilong kamapim laik bilong em. Dispela nem i stret tru long Krieta i gat olgeta strong.

NEM I MEKIM WANEM LONG YU

Taim yu save long nem bilong God, dispela bai senisim tingting yu holim long em. Yu bai pilim isi moa long i go klostu long em. Em tru olsem yu no inap pas gut wantaim man o meri yu no save long nem bilong em, laka? Tasol God i tokim yu long nem bilong em, na dispela i soim olsem em i laik bai yu go klostu long em.​—Jems 4:8.

Yu ken bilip olsem oltaim Jehova bai inapim mining i stap long nem bilong em na truim ol promis bilong em. Olsem na Baibel i tok: “Ol man i save long nem bilong yu bai i trastim yu.” (Song 9:10, NW ) Yu bai kisim pasin bilong trastim God taim yu kisim save olsem nem bilong em i stret long ol pasin bilong em, olsem pasin bilong laikim na stap gut long narapela, pasin marimari, pasin sori, na stretpela pasin. (Kisim Bek 34:5-7) Yumi amamas tru long save olsem oltaim Jehova bai inapim ol promis bilong em, na em i no inap mekim ol samting i no stret wantaim ol pasin bilong em.

Sapos yu save long nem tru bilong God i Gat Olgeta Strong, dispela em samting yu ken amamas long en. Dispela inap opim rot bilong yu long kisim ol blesing long nau na long bihain. God i promis olsem: “Mi bai lukautim em, long wanem, em i save long nem bilong mi.”—Song 91:14, NW.

“Olgeta manmeri i singaut long nem bilong Jehova, em bai kisim bek ol.” —Joel 2:32, NW.