Namba Wan Man na Meri

NAU yu lukim wanem samting long dispela piksa? Yes, i gat wanpela man na meri i stap. Ol i namba wan man na meri. Husat i wokim tupela? God i wokim tupela. Yu save long nem bilong God? Nem bilong em Jehova. Na nem bilong dispela man na meri em Adam na Iv.

God Jehova i wokim Adam olsem: Em i kisim hap graun na wokim wanpela bodi i gutpela olgeta, em bodi bilong wanpela man. Bihain em i winim win i go insait long nus bilong dispela man, na Adam i kisim laip.

God Jehova i givim wok long Adam. Em i tokim Adam long givim nem long olgeta kain kain animal. Ating Adam i lusim bikpela haptaim liklik long skelim pasin bilong ol animal na bai em inap makim nem i stret long ol. Taim Adam i givim nem long ol animal, em i luksave long wanpela samting. Yu save em wanem samting?

Em i lukim olsem olgeta animal i gat poroman. I gat papa elefan na mama elefan, na papa laion na mama laion. Tasol Adam i no gat poroman. Olsem na Jehova i mekim na Adam i slip i dai tru, na em i kisim wanpela bun long banis bilong Adam. Jehova i yusim dispela bun long wokim meri bilong Adam.

Adam i amamas nogut tru! Na tingim bikpela amamas Iv i kisim long i stap long wanpela naispela ples olsem! Nau tupela inap kamapim ol pikinini na stap amamas wantaim.

Jehova i laik bai Adam na Iv i stap oltaim. Em i laik bai tupela i mekim olgeta hap bilong graun i kamap naispela tru wankain olsem gaden Iden. Yumi ken tingim bikpela amamas bilong Adam na Iv long mekim dispela wok! Sapos yu bin i stap wantaim tupela, bai yu amamas long wok wantaim ol na mekim graun i kamap naispela ples? Tasol bihain Adam na Iv i no amamas moa. Bilong wanem i olsem?