Sapta 8
Ol Man Bilong Olgeta Lain Ol i Abrusim Bagarap
JEHOVA i gat sori long ol man bilong olgeta lain na em i save tingim ol. Em i wokim rot bilong ol bambai em i ken amamas long ol na givim blesing long ol. Em i bin givim tok promis long wanpela tumbuna pikinini bilong Noa i kam long lain bilong Siem, em Ebraham. Jehova i tokim Ebraham: “Yu lusim graun bilong yu, na lain bilong papa bilong yu na ples bilong papa bilong yu. Na yu go long wanpela hap bai mi soim yu long en. Bai mi mekim lain tumbuna bilong yu i kamap bikpela lain tru. Bai mi givim blesing long yu na mekim nem bilong yu i kamap bikpela. Olsem na bai ol pipel i kolim nem bilong yu long ol arapela man. Bai mi givim blesing long ol man ol i save mekim gutpela pasin long yu. Bai mi yet mi bagarapim ol man ol i tok long bagarapim yu. Na bai olgeta lain pipel long graun ol i kisim blesing long lain bilong yu.” (Jenesis 12:1-3 Aposel 7:2-4) “Olgeta lain pipel long graun”—em i makim yumi tu, maski yumi bilong wanem lain o yumi gat wanem tok ples.—Sam 65:2.
2 Dispela man Jehova i givim dispela tok promis long em, em i man bilong bilip. Yumi tu yumi mas bilip sapos yumi laik kisim dispela blesing God i tok promis long en. (Jems 2:23; Hibru 11:6) Ebraham i no bilip nating; em i mekim wok tu wantaim. Bilip bilong em i kirapim em long lusim Mesopotemia na i go long wanpela longwe hap em i no bin lukim bipo. “Em i bilip na i go sindaun long dispela graun bipo God i tok long givim em. Na em i stap long dispela graun olsem long graun bilong arapela lain.” Em i no holim strong samting bilong wanpela taun o kingdom bilong dispela ples; em i wetim ‘dispela taun [Kingdom bilong God] em God yet i wokim.’—Hibru 11:8-10.
3 Taim Ebraham i gat 100 krismas na meri bilong em Sera i gat 90 krismas, Jehova i wokim mirakel na i givim wanpela pikinini man long tupela, nem bilong em Aisak. Bikpela traim i painim Ebraham long dispela pikinini bilong em—Ebraham i bilip tru long God na bihainim tok bilong em o nogat. Jehova i tokim Ebraham long kisim yangpela man Aisak i go long hap bilong Moraia na kilim em i dai na kukim em long paia olsem wanpela ofa. Ebraham i bilip olsem God inap long kirapim bek pikinini bilong em, olsem na Ebraham i bihainim tok bilong God. (Hibru 11:17-19) Aisak i harim tok bilong papa bilong em na em i slip long alta na papa i pasim han lek bilong em na holim naip bilong kilim em i dai. Tasol ensel bilong Jehova i pasim Ebraham. Ebraham i winim pinis traim, long wanem ol samting em i mekim pinis i kamapim bel bilong em, em i redi long givim olgeta samting bilong em long God. Olsem na God i kolim gen tok promis em i bin givim long Ebraham long bipo. Baibel i tok:
4 “Yawe i tok olsem, ‘Long nem bilong mi yet mi tok tru. Yu no pasim dispela wanpela pikinini bilong yu. Olsem na bai mi blesim yu. Mi promis olsem: Bai mi mekim ol lain tumbuna pikinini bilong yu ol i kamap planti olsem sta long skai na wesan long nambis. Na bai ol lain tumbuna pikinini bilong yu ol i daunim ol birua bilong ol. Na olgeta lain pipel long graun bai ol i askim mi long blesim ol olsem mi blesim ol lain tumbuna pikinini bilong yu. Long wanem, yu bin bihainim tok bilong mi.’ ”—Jenesis 22:15-18.
5 Taim yumi save Ebraham i makim Jehova na Aisak i makim Krais Jisas, orait yumi inap save olsem wanem ol dispela samting i bin kamap em i bikpela samting bilong yumi yet. Tru tumas ol samting nau yumi mekim long God Jehova, dispela i as bilong ol samting bai painim yumi long bihain. Yumi inap long kisim laip i stap oltaim, long wanem God i bin givim Pikinini bilong em Jisas olsem ofa (olsem Ebraham i laik givim Aisak) na Jisas i tekewe sin bilong yumi. (Jon 3:16) Ol man i strong long ‘tok nogut long Jehova,’ olsem ol i ting Em i samting nating, o ol i no tingim ol gutpela samting em i laik mekim bilong helpim ol man, Jehova i makim ol bilong bagarap na lus olgeta. (Lukim 1 Samuel 3:12-14; 2:12.) Tasol sapos yumi man bilong pilim ol gutpela samting Jehova i mekim bilong helpim yumi, bai yumi “mekim gutpela pasin” long em, em Man I Winim Ebraham. Yumi inap mekim olsem wanem? Yumi mas tokaut olsem olgeta gutpela samting yumi kisim—na laip yumi kisim long rot bilong Krais Jisas—God Jehova yet i givim ol dispela gutpela samting long yumi. Na bai yumi tokim ol man long gutpela pasin bilong Jehova na long ol gutpela pasin em i mekim long wok king bilong em. (Jems 1:17; Sam 145:7-13) Sapos yumi mekim olsem, bai yumi inap kisim ol blesing long em oltaim oltaim.
DISPELA “PIKININI” BILONG EBRAHAM GOD I TOK PROMIS LONG EM
6 Bilong givim blesing long ol man, Jehova i tingting long kamapim wanpela stretpela gavman long heven. Krais Jisas i kamap insait long lain bilong Ebraham, na Jehova i putim dispela “pikinini” i stap king. (Galesia 3:16; Matyu 1:1) Olsem na long rot bilong dispela man Krais Jisas bai olgeta lain i kisim blesing olsem God i bin tok promis long Ebraham. Orait, olsem wanem long yu? Yu save mekim ol samting yu mas mekim bambai yu ken kisim dispela blesing? Olsem: Wokabaut bilong yu na i stap bilong yu i kamapim long ples klia olsem yu save ofa bilong Jisas i bikpela samting long yu? Yu bihainim tru lo bilong dispela King?—Jon 3:36; Aposel 4:12.
7 Aposel Jon i lukim olsem piksa bilong sampela samting bai kamap long heven na em i lukim sampela man i sanap wantaim Krais long Maunten Saion bilong heven. Ol tu i “pikinini bilong Ebraham.” Olsem Revelesen 14:1-5 i tok, God i “bin baim bek ol namel long olgeta man bilong graun” na lain bilong ol em inap olsem 144,000. (Galesia 3:26-29) Husat ol i insait long dispela lain? Baibel i tok klia olsem God i no bin tingting long kisim olgeta stretpela man i go long heven. (Matyu 11:11; Aposel 2:34; Sam 37:29) “Liklik lain” tasol bai wok wantaim Krais long Kingdom bilong heven. Bai ol i stap king na pris wantaim em inap 1,000 yia.—Luk 12:32; Revelesen 5:9, 10; 20:6.
8 Wok bilong makim ol manmeri bilong dispela “liklik lain” i kamap olsem wanem? Pastaim God i singautim ol Isrel bilong skin na ol i ken insait long Kingdom bilong heven. Tasol ol i no bilip, olsem na ol i no inapim dispela lain bilong 144,000. Orait, God i singautim ol Sameria na bihain, ol man bilong olgeta lain. (Aposel 1:8) Ol man God i singautim ol pastaim bilong mekim wok king wantaim Krais, God i kapsaitim spirit holi long ol long Pentikos long yia 33 C.E. na makim ol i bilong dispela lain. God i wok yet long makim sampela man bilong dispela lain na em bai mekim i go inap long taim olgeta 144,000 i kisim pinis mak olsem God i orait long ol. Na nau God i kirap long bungim ol manmeri ol bai stap long graun aninit long gavman bilong heven.
9 Ol manmeri ol i bilong mekim wok king wantaim Krais long Kingdom bilong heven, Baibel i kolim ol “ol manmeri God i bin makim bilong em yet,” na “ol manmeri bilong God,” na ol manmeri ‘God i bin putim ol long wok.’ (2 Timoti 2:10; 1 Korin 6:1, 2; 2 Korin 1:21) Na Baibel i stori long olgeta wantaim na i tok ol i olsem “meri i laik marit” long Krais. (Revelesen 21:2, 9; Efesas 5:22-32) Na Baibel i kolim ol tu olsem “brata” bilong Krais na “pikinini bilong God,” na Baibel i tok bai ol i “kisim samting bilong God . . . wantaim Krais.” (Hibru 2:10, 11; Efesas 1:5; Rom 8:15-17) Maski ol i bilong wanem lain bilong skin, tasol ol i kamap olsem Isrel bilong spirit o “Isrel tru bilong God.” (Galesia 6:16; Rom 2:28, 29; 9:6-8) Taim Jehova i pinisim kontrak bilong em wantaim Isrel bilong skin, em i wokim nupela kontrak wantaim Isrel bilong spirit. Tasol ol samting em i mekim long ol Isrel bilong skin taim ol i stap yet aninit long Lo, ol dispela samting i olsem piksa bilong samting i mas kamap bihain. (Hibru 10:1) Orait, lain Isrel bilong skin, em God i ‘makim ol i stap ol manmeri bilong em stret,’ dispela lain i makim husat? Ol samting i bin kamap i soim yumi em lain Isrel bilong spirit tasol, em God i bin makim ol bilong mekim wok king wantaim Krais long heven. (Skelim Eksodas 19:5, 6 wantaim 1 Pita 1:3, 4 na 1 Pita2:9.) Ol dispela manmeri wantaim Krais ol i olsem rot bilong ol blesing i ken i go long ol narapela man tu, em ol i bihainim tok bilong God. Yumi mas save long dispela samting bambai yumi inap kisim gut as bilong ol tok bilong Baibel.
OL MAN BILONG KISIM BLESING LONG ROT BILONG DISPELA “PIKININI”
10 Taim lain Isrel bilong skin i stap olsem lain bilong God, em i wokim rot bilong helpim ol man i no bilong dispela lain, tasol ol i bung wantaim ol na lotu long Em. Baibel i stori long ol dispela man. Olsem wanem? Ol tu i olsem piksa na i makim sampela man bilong nau? Tru tumas. Long planti samting ol i makim ol manmeri ol i no bilong lain Isrel bilong spirit, tasol ol i wet long kisim laip oltaim long graun aninit long Kingdom bilong God. God i tingim ol dispela man taim em i tokim Ebraham, “olgeta lain pipel long graun” bai kisim blesing long rot bilong “pikinini” bilong em.—Jenesis 22:18; Diuteronomi 32:43.
11 God i laik bai olgeta man i wanbel long lotuim em, na dispela laik bilong em i stap yet. Olsem na taim King Solomon i dediketim haus lotu em i bin wokim long Jerusalem, i stret em i beten long Jehova i mas harim beten bilong ol man bilong ol narapela lain tu, em ol i bung wantaim ol Isrel na ol i laik lotuim Jehova long pasin em i laikim. (2 Kronikel 6:32, 33) Na long Aisaia 56:6, 7 (NW) God i tok promis olsem: “Ol man bilong ol narapela lain ol i kam bung long Jehova bilong mekim wok bilong em na bilong laikim tumas nem bilong Jehova, bambai ol i ken kamap wokboi bilong em, . . . bai mi bringim ol tu i kam long maunten holi bilong mi na bai mi mekim ol i amamas insait long haus bilong mi, em haus bilong beten. . . . Long wanem, ol bai kolim haus bilong mi olsem haus bilong beten bilong olgeta lain man.” Olsem dispela tok i makim, “ol man bilong ol narapela lain” long nau ol i kam bung, i no bilong lukluk tasol—ol i “kam bung long Jehova.” Ol i mekim olsem taim ol i dediket long em na kisim baptais long wara bilong kamapim long ples klia ol dispela tok promis ol i bin mekim long God. Na bihain ol i mekim wok bilong Jehova long pasin i soim olsem ol i “laikim tumas nem bilong Jehova” na olgeta samting dispela nem i makim.—Matyu 28:19, 20.
12 Ol dispela man tu i mas i stap gut long God wankain olsem ol Kristen em spirit holi i makim ol. Jehova i givim Lo long rot bilong Moses i tok, “ol man bilong ol narapela lain” ol i kirap lotuim Jehova, ol i mas bihainim wankain lo olsem ol Isrel i mas bihainim. (Nambas 15:15, 16, NW) Pasin sori tru i mas i stap namel long lain Isrel na ol dispela man bilong ol narapela lain; i no olsem narapela i orait tasol long narapela. Nogat. (Levitikas 19:34) Olsem tasol “ol man bilong ol narapela lain” long nau ol i wok strong long bihainim tru ol lo bilong Jehova, na ol i wok gut wantaim liklik hap lain bilong ol Isrel bilong spirit ol i stap yet long graun.—Aisaia 61:5.
13 Long maus bilong profet Aisaia, Jehova i stori long bikpela lain man bilong “olgeta lain” nau ol i kam long haus bilong Jehova bilong lotu long em. Jehova i tok: “Planti lain man bai go na ol bai tok: ‘Yupela man yupela kam, na yumi go antap long maunten bilong Jehova, na long haus bilong God bilong Jekop; na bai em i lainim yumi long pasin bilong em, na bai yumi wokabaut long rot bilong em.’ ” Olsem na ol i bin “wokim ol bainat bilong ol i kamap samting bilong wokim gaden,” na maski i gat planti pait long graun, tasol ol i ‘no lain moa long pait.’ (Aisaia 2:1-4, NW) Yu ting yu bai stap insait long dispela lain ol i amamas? Yu tu yu gat laik long kisim save long ol samting Jehova i tok yu mas mekim na bai yu ken bihainim na yu no ken tingting moa long ol samting bilong pait inap helpim yu? God i tok promis olsem bikpela lain manmeri ol i mekim ol dispela samting ol bai winim taim bilong bikpela hevi tru. Bai ol i abrusim bagarap na i stap bel isi long “nupela graun” bilong em.—Revelesen 7:9, 10, 14; Sam 46:8, 9.
[Askim Bilong Stadi]
1. God i givim wanem tok promis long Ebraham na yumi save, God inap orait long ol man bilong olgeta lain?
2. (a) Yumi mas i gat wanem kain pasin olsem bilong Ebraham? (b) Olsem Hibru 11:8-10 i tok, Ebraham i mekim wanem na yumi save em i gat dispela pasin?
3. Wanem bikpela traim i painim Ebraham long pikinini bilong em Aisak?
4. Long dispela taim God i mekim wanem narapela bikpela tok promis bilong helpim olgeta lain man?
5. (a) Ebraham i laik givim Aisak olsem ofa na dispela i makim wanem samting? (b) Olsem Jenesis 12:3 i tok, ol man i mekim wanem na i olsem ol i ‘tok nogut’ long Jehova, em Man I Winim Ebraham? Na wanem samting i painim ol? (c) Olsem wanem yumi ken “mekim gutpela pasin” long Man I Winim Ebraham?
6. (a) Husat em i nambawan tumbuna “pikinini” bilong Ebraham? (b) Olsem wanem yumi inap kisim dispela blesing i kam long rot bilong em?
7. (a) Husat tu ol i “pikinini” bilong Ebraham? (b) Olsem wanem yumi save, i no olgeta man i stap gut long wok bilong God bai ol i go long heven?
8. Wanem taim God i kirap long makim ol manmeri bilong “liklik lain”? God bai mekim dispela wok i go inap long wanem taim?
9. (a) Baibel i kolim wanem ol tok long dispela lain bilong heven? (b) Lain Isrel bilong skin i olsem piksa na i makim husat?
10. Ol man i no bilong lain Isrel, tasol ol i lotuim Jehova, ol i makim husat?
11. (a) Taim Solomon i dediketim haus lotu em i bin wokim, em i tok wanem long dispela lain? (b) Olsem wanem “ol man bilong ol narapela lain” i kam bung long Jehova nau long taim bilong yumi, olsem Aisaia 56:6, 7 i tok?
12. Ol man i gat tingting long i stap long graun aninit long Kingdom, olsem wanem Lo bilong Moses i makim ol i mas bihainim wankain lo olsem lain Isrel bilong spirit?
13. Sapos yumi laik abrusim bagarap na i stap long “nupela graun,” yumi mas tingim gut wanem ol tok bilong Aisaia 2:1-4?