Wok Long Kamap Olsem Wanpela Tisa

YU LAIK winim wanem mak long wok tisa bilong yu? Sapos nau tasol yu kamap wanpela pablisa bilong autim tok, ating yu laik kisim save long pasin bilong stadi wantaim narapela long Baibel, long wanem, Jisas i bin givim wok long lain bilong em long kamapim ol disaipel. (Mt. 28:​19, 20) Sapos yu save pinis long mekim dispela wok, ating yu laik mekim gutpela wok moa long putim tok i go daun long bel bilong ol man yu laik helpim ol. Sapos yu wanpela papa o mama, ating yu laik stap kain tisa em inap kirapim ol pikinini bilong yu long dediketim laip bilong ol long God. (3 Jo. 4) Sapos yu wanpela elda o yu laik kamap elda, ating yu laik bai ol tok yu mekim long ai bilong ol man i ken kirapim ol long laikim moa yet Jehova na ol pasin bilong em. Olsem wanem yu inap winim ol dispela mak?

Larim Nambawan Tisa, Jisas Krais, i skulim yu. (Lu. 6:40) Maski Jisas i toktok long bikpela lain man long arere bilong maunten o wan wan man ol i wokabaut long rot, tok em i mekim na pasin bilong em long mekim dispela tok i bin pas gut long tingting bilong ol. Jisas i bin kirapim tingting na bel bilong ol man i harim tok, na em i tokim ol klia long olsem wanem ol i ken bihainim ol tok em i mekim. Olsem wanem long yu? Yu inap mekim wankain samting?

Jisas i pas tru wantaim Papa na God i givim spirit holi long em. Dispela tupela samting i mekim na pasin bilong Jisas long lainim ol man em i gutpela tru. Yu save beten strong long Jehova bambai yu inap mekim gut Baibel-stadi yu mekim wantaim narapela? Sapos yu wanpela papa o mama, yu save beten oltaim long God i ken stiaim yu long skulim ol pikinini? Yu save beten taim yu wok long redim wanpela tok o yu laik lukautim wanpela miting? Taim yu beten na bilip strong long Jehova olsem, dispela bai helpim yu long kamap gutpela tisa moa.

Taim yu bilip long Baibel, dispela tu i kamapim long ples klia olsem yu save Jehova i mas helpim yu. Long laspela de em i stap laip olsem man bilong graun, Jisas i beten long Papa olsem: “Tok bilong yu, mi givim pinis long ol.” (Jo. 17:14) Maski Jisas i gat save long planti samting, em i no mekim tok long tingting bilong em yet. Olgeta tok em i mekim em ol tok Papa i bin lainim em, na long dispela rot em i stap olsem gutpela piksa yumi ken bihainim. (Jo. 12:​49, 50) Tok Bilong God long Baibel i gat strong bilong kirapim ol man long senisim pasin, tingting, na laik bilong bel. (Hi. 4:12) Taim save bilong yu long Baibel i go bikpela na yu lain long mekim gutpela wok long en long autim tok, pasin bilong yu long lainim man bai kamap gutpela na i bringim ol man i kam long God.​—2 Ti. 3:​16, 17.

Bilong i stap wanpela tisa olsem Jisas, i no olsem yu inap mekim ol tok ol man i laik harim na em tasol. Tru, ol man i kirap nogut long ol “gutpela tok” Jisas i autim. (Lu. 4:22) Tasol wanem as na Jisas i mekim ol gutpela tok? Em bilong givim biknem long Jehova​—long em yet nogat. (Jo. 7:​16-18) Na em i tokim ol disaipel olsem: “Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” (Mt. 5:16) Dispela tok kaunsel i mas stiaim pasin bilong yumi long mekim wok tisa. Yumi no laik mekim wanpela samting i pasim yumi long givim biknem long Jehova. Olsem na taim yumi tingting long tok yumi bai mekim o bai yumi mekim olsem wanem, em i gutpela long askim yumi yet olsem, ‘Dispela tok bai kirapim ol long laikim Jehova moa yet, o em bai pulim tingting bilong ol man i kam long mi?’

Olsem: Bilong skulim gut ol man, yu ken kamapim ol tok piksa na ol stori bilong samting tru tru i bin painim sampela man. Tasol taim tok piksa i longpela o yu kamapim olgeta liklik liklik samting long stori bilong dispela man, ol man i no inap tingim as bilong tok ol i harim. Na tu, pasin bilong kamapim ol stori bilong amamasim ol man tasol, dispela i mekim na ol man i no tingting long as tru bilong wok autim tok bilong yumi. Taim tisa i mekim olsem, dispela i save litimapim em yet na em i no mekim wok tru bilong em, em wok bilong givim skul tiokratik long ol man.

Bilong kamap disaipel tru, man i mas save gut long ol samting em i lainim. Em i mas harim tok i tru na luksave long olsem wanem tok i tru i narapela kain long ol narapela bilip. Bilong mekim olsem, pasin bilong skelim olsem wanem tupela samting i narapela narapela kain inap helpim yu.

Planti taim Jehova i laik kirapim ol manmeri bilong em long “skelim gut” wanem samting i klin na wanem samting i no klin. (Wkp. 10:​9-11) Em i tok olsem ol man i mekim wok insait long bikpela tempel spirit bilong em bai skulim ol manmeri long “wanem samting i klin long ai bilong mi na wanem samting i doti long ai bilong mi.” (Ese. 44:23) Buk Sindaun i kamapim planti tok long olsem wanem stretpela pasin i narapela kain long pasin nogut, na olsem wanem gutpela tingting i narapela kain long longlong pasin. Na tu, yu inap luksave long olsem wanem ol samting i narapela narapela. Long Rom 5:7, aposel Pol i stori long olsem wanem stretpela man i narapela kain long gutpela man. Long Buk Hibru em i stori long olsem wanem wok hetpris bilong Krais i winim wok hetpris bilong Aron. Wanpela tisa, em John Amos Comenius (1592-1670), i tok: “Bilong skulim man yu mas soim em olsem wanem ol samting i narapela narapela kain, olsem ol i gat narapela narapela wok, na pasin, na as. . . . Olsem na man i save kamapim gut olsem wanem ol samting i narapela narapela kain, em i save skulim gut ol man.”

Yumi ken tingim taim yumi laik lainim man long Kingdom bilong God. Sapos em i no save Kingdom em i wanem samting, ating yu ken soim em long olsem wanem tok Baibel i kamapim i narapela kain long tingting bilong sampela olsem Kingdom i stap long bel bilong ol man. O yu ken stori long olsem wanem Kingdom i narapela kain long ol gavman bilong ol man. Tasol long ol man i save pinis long ol dispela samting, bai yu stori gut long sampela samting moa bilong Kingdom. Ating bai yu kamapim olsem wanem Kingdom bilong Mesaia i narapela kain long wok king bilong Jehova long bosim olgeta samting, olsem Song 103:19 i stori long en, o olsem wanem em i narapela kain long “lain [olsem kingdom] bilong Pikinini bilong [God],” em Kolosi 1:13 i stori long en, o olsem wanem em i narapela kain long “dispela samting” Efesus 1:10 i toktok long en. Taim yu skelim wanpela tok wantaim narapela tok, dispela inap helpim man yu toktok long en long klia tru long dispela bikpela tok bilong Baibel.

Planti taim Jisas i mekim wok long dispela pasin bilong skulim man. Em i bin stori long olsem wanem tingting bilong ol man long as bilong Lo Bilong Moses i no wankain long as tru bilong Lo. (Mt. 5:​21-48) Em i kamapim olsem wanem pasin bilong givim bel tru long God i no wankain olsem ol pasin ol Farisi i mekim. (Mt. 6:​1-18) Em i skelim pasin bilong ol man i “strong tumas” long bosim ol man wantaim pasin bilong ol disaipel long givim ol yet bilong helpim ol narapela. (Mt. 20:​25-28) Long Matyu 21:​28-32, Jisas i askim ol man long skelim long tingting bilong ol yet olsem pasin bilong ting yumi yet i stretpela man na pasin bilong tanim bel tru i narapela narapela kain olsem wanem. Dispela i kirapim yumi long tingim narapela gutpela pasin bilong skulim gut man.

Long Matyu 21:​28, Jisas i kirapim tok bilong em wantaim wanpela askim olsem: “Orait yupela i ting wanem?” Gutpela tisa i no save kamapim ol save o bekim ol askim tasol. Nogat. Em i save kirapim ol man long kisim pasin bilong wokim tingting. (Snd. 3:21; Ro. 12:1) Wanpela rot bilong mekim olsem em bilong kamapim ol askim. Long Matyu 17:​25, Jisas i givim dispela askim: “Saimon, yu ting wanem? Ol king bilong dispela graun i save kisim pe bilong ol kain kain takis long husat? Ol i save kisim long ol lain bilong ol yet, o long ol arapela man?” Ol askim bilong Jisas i kirapim tru tingting bilong Pita na i helpim em long kisim stretpela tingting long pasin bilong givim takis bilong tempel. Na tu, taim man i askim Jisas, “Taim lo i tok long wantok bilong mi, em i tok long husat tru?” Jisas i stori long olsem wanem pasin bilong wanpela pris, na wanpela Levi i narapela kain long pasin bilong wanpela Samaria. Bihain em i kamapim dispela askim: “Yu ting wanem? Husat bilong ol tripela man i laikim tru dispela man i bin bagarap long han bilong ol stilman?” (Lu. 10:​29-36) Em nau, Jisas yet i no bekim dispela askim na bai man i no gat wok long tingim, nogat. Jisas i kirapim man long bekim askim bilong em yet.​—Lu. 7:​41-43.

Ol tisa i save tru long as bilong Tok Bilong God ol i save, bilong lotu tru long God i no olsem yu putim sampela tok long tingting na bihainim sampela lo, na em tasol. Bilong lotu tru yumi mas pas gut wantaim Jehova na amamas long ol pasin bilong em. Kain lotu olsem, yumi mas pilim long bel bilong yumi. (Lo 10:​12, 13; Lu. 10:​25-27) Planti taim long Baibel dispela tok “bel” i makim tingting na pasin olgeta bilong man, em ol kain samting olsem ol laik bilong skin, pasin bilong laikim narapela, ol tingting bilong bel, na ol samting i save kirapim yumi.

Jisas i save olsem ol man i save lukluk long bodi, tasol God i save lukim tingting i stap long bel. (1 Sml. 16:7) Pasin bilong laikim tru God i mas kirapim yumi long mekim wok bilong em, na i no olsem yumi laik amamasim ol man, nogat. (Mt. 6:​5-8) Tasol ol Farisi i bin mekim planti samting bambai ol man i ken lukim na litimapim nem bilong ol. Ol i strong tru long bihainim olgeta liklik hap bilong Lo na ol lo ol yet i bin kamapim. Tasol ol i no kamapim ol pasin long sindaun bilong ol em inap makim olsem ol i bilong dispela God ol i tok ol i lotuim. (Mt. 9:13; Lu. 11:42) Jisas i lainim ol man olsem ol i mas bihainim ol lo bilong God, tasol wanem tingting i stap long bel bilong man na i kirapim man long bihainim lo, dispela em i bikpela samting. (Mt. 15:​7-9; Mk. 7:​20-23; Jo. 3:36) Pasin bilong yumi long skulim man bai karim gutpela kaikai sapos yumi bihainim pasin bilong Jisas. Em i bikpela samting long helpim ol man long kisim save long ol samting God i laik bai ol i mas mekim. Tasol em i bikpela samting tu long ol i mas save long Jehova na laikim em tru bambai pasin ol i bihainim i kamapim klia olsem ol i tingim pasin bilong i stap gut wantaim God em i bikpela samting tru.

Tasol bilong kain skul olsem inap helpim ol man, ol i mas luksave long tingting i stap long bel bilong ol yet. Jisas i laik kirapim ol man long skelim as na ol i kirap mekim samting na skelim tingting bilong bel. Taim em i stretim wanpela tingting kranki, em bai askim ol man bilong wanem ol i bin ting olsem, o tok olsem, o mekim olsem. Tasol em i no givim askim tasol. Em i kamapim wanpela tok, o tok piksa, o wanpela pasin bilong kirapim ol long kisim stretpela tingting long dispela samting. (Mk. 2:8; 4:40; 8:17; Lu. 6:​41, 46) Bilong helpim ol man yumi skulim ol, yumi ken tokim ol long givim ol kain askim long ol yet olsem: ‘Bilong wanem mi laik bihainim dispela kain pasin? Taim kain samting olsem i kamap, bilong wanem mi kirap mekim kain pasin olsem?’ Nau kamapim sampela tok em i kirapim ol long kisim tingting bilong Jehova long ol dispela samting.

Gutpela tisa i save olsem “nambawan samting yumi mas kisim, em i gutpela tingting.” (Snd. 4:7) Gutpela tingting em i pasin bilong mekim gutpela wok long ol save yumi bin kisim bilong stretim ol hevi, na abrusim ol samting inap bagarapim yumi, na winim ol mak yumi bin putim, na bilong helpim ol narapela man. Em i wok bilong tisa long helpim ol sumatin long lain long mekim olsem, tasol i no wok bilong em long tokim ol long ol samting ol i mas mekim. Helpim sumatin long tingting na skelim gut ol tok taim yu stori long ol stiatok bilong Baibel. Yu ken kolim samting i save painim ol man long i stap bilong ol na askim sumatin, sapos dispela samting i painim em, olsem wanem dispela stiatok bilong Baibel yupela i stadi pinis long en i ken helpim em.​—Hi. 5:14.

Long tok aposel Pita i mekim long Pentikos 33 C.E., em i soim olsem wanem ol i ken mekim gutpela wok long tok ol i harim, na dispela i bin kirapim ol man long bihainim dispela tok long i stap bilong ol. (Ap. 2:​14-36) Em i stori pinis long 3-pela skripsa ol manmeri i tok ol i bilipim, na nau em i skelim tok bilong dispela 3-pela skripsa wantaim ol samting ol dispela manmeri i bin lukim i kamap. Olsem na dispela lain i pilim olsem ol i mas kirap bihainim tok ol i harim. Olsem wanem? Pasin bilong yu long skulim man i save kirapim ol long bihainim tok ol i harim? Yu save kolim tasol ol trupela tok o yu save helpim ol man long save gut long as na dispela tok i tru? Yu save kirapim ol long tingim ol samting ol dispela tok ol i lainim i mas mekim long sindaun bilong ol? Tru, ating ol i no ken singaut, “Bai mipela i mekim wanem nau?”olsem dispela lain long Pentikos i bin mekim, tasol sapos yu bin kamapim gut insait bilong ol skripsa, dispela bai kirapim ol long tingting long bihainim tok ol i harim.​—Ap. 2:37.

Taim yupela papamama i ritim Baibel wantaim ol pikinini, dispela em i gutpela taim long lainim ol long tingim olsem wanem ol i ken mekim wok long ol stiatok bilong Baibel. (Ef. 6:4) Yu ken mekim olsem: Kisim wan wan ves em sediul bilong ritim Baibel long wik i makim na toktok wantaim ol long mining bilong en, na bihain givim ol kain askim long ol olsem: ‘Dispela i givim wanem tok bilong stiaim yumi? Olsem wanem yumi ken kamapim dispela tok long wok autim tok? Ol dispela ves i givim wanem save long yumi long Jehova na pasin bilong em long mekim wok? Olsem wanem dispela i kirapim yumi long laikim em moa yet?’ Kirapim famili long bekim tok long ol dispela tok taim ol brata i toktok long ol bikpela tok bilong Baibel long Skul Tiokratik. Ol ves ol i bekim tok long en, ating em ol ves ol i holim gut long tingting.

Yu skulim man long rot bilong ol tok yu mekim na long pasin yu bihainim. Ol samting yu mekim i stap olsem gutpela piksa long pasin bilong bihainim tok yu mekim. Long dispela rot ol pikinini i wok long kisim save. Taim ol i bihainim pasin bilong papamama, ol i kamapim klia olsem ol i laik stap wankain olsem papamama. Ol i laik save ol bai pilim olsem wanem sapos ol i mekim pasin papamama i mekim. Na olsem tasol, taim ol man yu skulim i ‘bihainim pasin bilong yu na wokabaut, olsem yu save bihainim pasin bilong Krais,’ ol bai kirap kisim ol blesing bilong wokabaut long pasin Jehova i laikim. (1 Ko. 11:1) Ol samting God i mekim bilong helpim ol i insait long ol samting i bin painim ol.

Olsem na em i bikpela samting long yumi mas i stap olsem gutpela piksa. Taim yumi “wokabaut long pasin holi na bihainim olgeta pasin bilong God,” dispela bai soim ol man yumi skulim long olsem wanem ol i ken bihainim ol stiatok bilong Baibel. (2 Pi. 3:11) Sapos yu tokim sumatin bilong Baibel long ritim Baibel long olgeta taim, yu yet mas mekim olsem. Sapos yu laik bai ol pikinini bilong yu i bihainim ol stiatok bilong Baibel, orait ol i mas lukim olsem pasin yu bihainim i stret wantaim laik bilong God. Sapos yu tokim kongrigesen long givim bel long mekim wok autim tok, orait yu yet mas insait tru long dispela wok. Taim yu bihainim tok yu lainim ol man long en, yu inap kirapim ol narapela long bihainim.​—Ro. 2:​21-23.

Bilong mekim wok tisa bilong yu i kamap gutpela moa, askim yu yet olsem: ‘Pasin bilong mi long givim skul long man i save senisim tingting, toktok, na pasin bilong ol man i harim tok bilong mi? Bilong ol man i ken klia gut long tok mi kamapim, mi save stori gut na ol i ken luksave olsem wanpela tingting o pasin i narapela kain olsem wanem long narapela tingting o pasin? Mi save mekim wanem bilong helpim ol sumatin, ol pikinini bilong mi, o ol man i sindaun harim tok long miting long tingim ol tok mi mekim? Mi save kamapim klia rot bilong bihainim ol tok ol i lainim? Ol inap lukim dispela long pasin mi bihainim? Ol i pilim tru olsem samting ol i mekim long tok ol i harim inap helpim ol o pasim ol long stap gut wantaim Jehova?’ (Snd. 9:10) Wok yet long tingim ol dispela samting taim yu wok long kamap gutpela tisa. “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.”​—1 Ti. 4:16.