Olsem Wanem Yumi Inap Save Armagedon i Klostu Pinis?

YU SAVE mak em wanem samting, a?— Long Sapta 46 yumi bin ritim stori long mak God i bin givim bilong soim olsem em i no inap bagarapim gen ol manmeri long rot bilong tait wara. Na tu, ol aposel i bin askim long wanpela mak na bai ol inap save long wanem taim Jisas i kam bek pinis na ol pasin bilong graun i laik pinis.—Matyu 24:3.

Jisas bai stap long heven na ol man i no inap lukim em, olsem na i mas i gat wanpela mak ol man inap lukim na bai ol i ken save olsem em i kirap pinis long mekim wok king. Olsem na Jisas i kolim ol samting ol disaipel i mas was na lukluk long en long graun. Taim ol dispela samting i kamap, dispela i makim olsem em i kam bek pinis na kirap long mekim wok King long heven.

Bilong skulim ol disaipel olsem em i bikpela samting long ol i mas was i stap, Jisas i tokim ol: “Yupela lukim diwai fik na ol arapela diwai tu. Taim yupela i lukim ol nupela lip i kamap long ol, orait yupela i save, taim bilong gutpela san i laik kamap nau.” Yu inap save sapos taim bilong san i klostu pinis. Na yu inap save Armagedon i klostu pinis taim yu lukim ol samting i wok long kamap olsem Jisas i bin kolim.—Luk 21:29, 30.

Long dispela pes na long pes bihain long en, bai yumi lukim ol piksa bilong ol samting Jisas i tok em hap bilong dispela mak olsem Kingdom Bilong God i kam klostu pinis. Taim olgeta dispela samting i kamap, Kingdom Bilong God em Krais i stap King long en bai bagarapim olgeta arapela gavman, olsem yumi bin ritim long Sapta 46.

Olsem na lukluk gut long ol piksa long dispela tupela pes na bai yumi stori long ol. Long Matyu 24:6-14 na Luk 21:9-11, yu inap ritim stori bilong ol samting yu lukim long ol dispela piksa. Lukim tu ol liklik namba i stap long wan wan piksa. Wankain namba i stap long kirap bilong paragraf i stori long dispela piksa. Orait nau yumi ken lukim sapos planti hap bilong dispela mak Jisas i kolim i kamap tru long nau o nogat.

(1) Jisas i tok: “Yupela bai i harim nois bilong ol bikpela pait, na yupela bai i harim tok win long ol bikpela pait i kamap. . . . Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king.” Olsem wanem? Yu bin harim ol nius i stori long ol pait?— Wol Woa 1 i bin kamap long 1914 i go 1918, na Wol Woa 2 i bin kamap long 1939 i go 1945. I no gat wanpela taim bipo we pait i bin kamap long olgeta hap bilong graun! Long nau ol pait i save kamap long olgeta hap bilong graun. I luk olsem long olgeta de long TV, redio, na niuspepa, yumi harim o ritim stori bilong ol pait.

(2) Jisas i tok tu olsem: “Long sampela hap ol bai i gat taim bilong bikpela hangre.” Ating yu save pinis olsem i no olgeta man i gat kaikai inap long ol. Long olgeta de, planti tausen man i dai, long wanem, ol i sot long kaikai.

(3) Jisas i tok moa olsem: ‘Long sampela hap bai i gat taim bilong bikpela sik.’ Ol bikpela sik i save kilim i dai planti man. Wanpela bikpela sik ol i kolim olsem bikpela sik kus bilong Spen, i bin kilim i dai inap 20 milion man insait long wanpela yia samting. Ating long taim bilong yumi planti man moa bai i dai long sik AIDS. Na sik kensa, sik bilong klok, na ol arapela sik i save kilim i dai planti tausen man long olgeta yia.

(4) Jisas i kamapim narapela hap bilong dispela mak, na em i tok: “Long sampela hap . . . graun bai i guria.” Yu save guria em wanem samting?— Guria i save mekim ol haus i pundaun, na planti manmeri i save dai. Kirap long yia 1914, planti guria i bin kamap long olgeta yia. Yu bin harim stori bilong ol guria?—

(5) Jisas i tok narapela hap bilong dispela mak em “pasin nogut bai i kamap bikpela.” Long dispela as pasin bilong stil na pait na bagarapim man i pulap tru. Long olgeta hap ol man i pret long ol raskol inap brukim haus bilong ol. Long nau, winim olgeta taim bipo, pasin raskol na pasin bilong pait na bagarapim man i pulap long olgeta hap bilong graun.

(6) Jisas i kamapim wanpela bikpela hap bilong dispela mak taim em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Sapos yu bilip long “dispela gutnius,” orait yu mas tokim ol arapela long en. Long dispela rot yu inap insait long wok bilong truim dispela hap bilong mak.

Ating sampela man bai tok ol samting Jisas i bin tok profet long en em ol samting i bin kamap oltaim. Tasol i no gat wanpela taim bipo we olgeta dispela samting i bin kamap long planti hap bilong graun na long wankain taim. Yu kliagut nau long dispela mak i makim wanem samting?— Em i makim olsem taim yumi lukim olgeta dispela samting i kamap, orait klostu nau bai ol pasin nogut bilong dispela graun i pinis na God bai kamapim nupela taim.

Taim Jisas i kolim dispela mak, em i stori tu long wanpela haptaim bilong yia. Em i tok: “Yupela i mas beten, bai yupela i no mas ranawe long taim bilong kol.” (Matyu 24:20) Yu ting dispela tok i makim wanem samting?—

Sapos man i mas ranawe bilong abrusim wanpela bagarap long taim bilong kol, taim ren na ais samting i mekim na i hatwok long ranawe o bagarap inap painim em, wanem samting inap kamap?— Em bai hatwok tru long ranawe o ating em i no inap ranawe. Sapos wanpela man i dai long dispela kain taim, long wanem, em i bin bisi tumas long mekim ol arapela samting na em i no kirap kwik long wokabaut i go, yu ting dispela em samting bilong sori long en?—

Olsem wanem? Yu kliagut nau long bikpela tok Jisas i laik kamapim taim em i tok long no ken wet i go inap long taim bilong kol na ranawe long dispela taim?— Em i tok yumi save Armagedon i klostu pinis, olsem na yumi no ken surikim taim bilong kamapim klia olsem yumi laikim God na mekim wok bilong em. Sapos yumi surikim taim, ating rot bai i no op moa long yumi. Dispela bai mekim na yumi olsem ol man long taim bilong Bikpela Tait, ol i bin harim tok Noa i mekim tasol ol i no go insait long sip.

Orait nau yumi ken stori long ol samting bai kamap taim bikpela pait bilong Armagedon i pinis. Bai yumi kisim save long ol samting God i redim long yumi olgeta husat i laikim em na mekim wok bilong em long nau.