Yu Ting Man Inap Mekim Gutpela Wok Long De Sabat?

Jisas i bin mekim planti gutpela wok taim em i autim tok long Galili. Tasol em i no tingting long autim tok long Galili tasol, nogat. Em i tok: “Mi mas autim gutnius bilong Kingdom bilong God long ol arapela taun tu.” Olsem na em i “go autim tok long ol sinagog bilong Judia.” (Luk 4:43, 44) Yumi save long dispela, long wanem, em mun Mas o Epril na taim bilong bikpela de bilong lotu long Jerusalem i kam klostu.

Taim yumi skelim ol tok yumi ritim long ol wok Jisas i mekim long Galili, yumi luksave olsem ol Gutnius i no stori planti long wok em i mekim long Judia. Maski ol manmeri long Judia i no laik harim tok, dispela i no pasim Jisas long givim bel long autim tok na mekim ol gutpela wok long ol ples em i go long en.

Klostu nau Jisas bai go long nambawan biktaun bilong Judia, em Jerusalem. Em i go bilong mekim bung bilong Pasova bilong yia 31 C.E. Long Jerusalem, klostu long Geit Bilong Ol Sipsip, i gat wanpela hulwara ol i kolim Betseda, em i stap long ples we planti manmeri i save i go i kam. Planti sikman, aipas, na ol lek nogut i kam long dispela hulwara. Bilong wanem ol i kam? Long wanem, ol man i bilip olsem taim wara i meknais na man i go insait long wara, sik bilong em bai pinis.

Nau em de Sabat, na Jisas i lukim wanpela man long hulwara husat i bin sik inap 38 yia. Jisas i tokim em: “Ating yu laik kamap orait, a?” Sikman i tokim em: “Bikman, mi no gat wanpela man bilong putim mi i go insait long wara taim wara i meknais. Taim mi laik i go daun, narapela i save go pas long mi.”—Jon 5:6, 7.

Jisas i mekim wanpela tok na dispela man na ol narapela husat i harim, ol i kirap nogut. Em i tok: “Kirap, kisim bet bilong yu na wokabaut.” (Jon 5:8) Na em i mekim olsem Jisas i tok. Wantu sik bilong em i pinis, na em i kisim bet bilong em na i wokabaut i go!

Tasol ol Juda i no amamas long gutpela samting i kamap, nogat, ol i kirap na sutim tok olsem: “Em Sabat, na i tambu long yu karim bet.” Na em i tokim ol: “Dispela man i bin oraitim mi em yet i tokim mi, ‘Kisim bet bilong yu na wokabaut.’” (Jon 5:10, 11) Ol Juda i no save amamas long man i oraitim sikman long de Sabat.

Ol i laik save long dispela man i oraitim em, olsem na ol i tok: “Husat dispela man i tokim yu olsem, ‘Kisim bet bilong yu na wokabaut’?” Bilong wanem ol i askim em olsem? Long wanem, “i gat bikpela lain manmeri i stap long dispela hap, na Jisas i go pinis,” na dispela man i no save long nem bilong Jisas. (Jon 5:12, 13) Tasol bihain dispela man i bungim Jisas long tempel, na em i luksave olsem Jisas em man husat i bin oraitim sik bilong em long hulwara.

Dispela man i bungim ol Juda na i tokim ol olsem Jisas em dispela man i oraitim em. Ol Juda i harim dispela tok na ol i go long Jisas. Yu ting ol i go bilong kisim save long olsem wanem Jisas inap mekim ol kain gutpela wok? Nogat. Ol i go bilong sutim tok long ol gutpela wok Jisas i mekim long de Sabat. Olsem na ol Juda i birua long em!