I Stap na Wok Bilong Jisas

Mekim Gutpela Wok Long Sabat

NAU yia 31 C.E. i kirap. Sampela mun bipo, taim Jisas i lusim Judia na i go long Galili, em i bin toktok wantaim meri bilong Sameria long hul wara.

Jisas i mekim bikpela wok bilong lainim ol man long Galili na nau em i laik lusim Galili na go bek gen long Judia. Em i autim tok long ol haus lotu long Judia. Baibel i mekim bikpela stori bilong ol wok Jisas i mekim long hap bilong Galili, tasol Baibel i no stori tumas long ol wok Jisas i mekim long dispela taim long Judia, o ol wok em i bin mekim bihain long Pasova bipo, long taim em i stap sampela mun long Judia. Ating long Galili planti man i harim tok bilong em, tasol long Judia, nogat.

Liklik taim bihain Jisas i kirap i go long nambawan biktaun bilong Judia, em Jerusalem. Em i go bilong lukim Pasova bilong yia 31 C.E. Long Jerusalem, klostu long bikpela dua bilong ol sipsip, i gat wanpela liklik raunwara i stap, ol i kolim Betesda. Planti man i gat sik, na ol aipas, na lek nogut, ol i kam long dispela liklik raunwara. Ol i bilip olsem, taim wara i meknais, orait man i go daun insait long wara, bai sik bilong em i pinis.

Em i de Sabat na Jisas i lukim wanpela man i stap klostu long dispela liklik raunwara, em i gat sik inap long 38 yia. Jisas i save, em i sik longtaim pinis, na Jisas i tokim em: “Ating yu laikim bai skin bilong yu i kamap gutpela?”

Sikman i tok: “Bikpela man, taim wara i mekim nais, mi no gat man i ken kisim mi na putim mi insait long raunwara. Mi yet mi laik i go, tasol arapela man i save go daun pastaim na i winim mi.”

Jisas i tokim em: “Yu sanap na kisim bet bilong yu na wokabaut.” Orait, wantu tasol skin bilong dispela man i kamap gutpela, na em i kisim bet bilong em na i wokabaut i go!

Taim ol Juda i lukim dispela man ol i tok: “Nau em i sabat. I tambu long yu karim bet bilong yu.”

Em i bekim tok long ol, “Dispela man i mekim mi orait, em i tokim mi olsem: ‘Kisim bet bilong yu na wokabaut.’ ”

Ol i askim em: “Wanem man i tokim yu, ‘Kisim bet bilong yu na wokabaut’?” Tasol dispela man i orait gen, em i no save, long wanem i gat planti manmeri i stap na Jisas i go pinis. Bihain Jisas i bungim em long tempel na nau em i save, Jisas i bin oraitim em.

Orait, dispela man i go na tokim ol Juda, Jisas i bin oraitim em. Ol Juda i harim dispela tok na ol i go long Jisas. Bilong wanem ol i go? Ating ol i laik save olsem wanem em inap mekim ol dispela gutpela wok? Nogat. Ol i laik krosim em, long wanem em i mekim dispela gutpela wok long Sabat. Na ol i kirap mekim nogut long em! Luk 4:44; Jon 5:​1-16.

◆ Jisas i lusim Judia na ating hamas mun i lus na nau em i go bek gen long Judia?

◆ Bilong wanem planti man i go long liklik raunwara ol i kolim Betesda?

◆ Jisas i wokim wanem mirakel long dispela liklik raunwara? Na ol Juda i kirap mekim wanem?