Jisas i Oraitim Man Long Sabat

Ol Farisi i heitim Jisas na painim risen bilong arestim em. Ol i tok em i no ken oraitim ol sikman long Sabat. Long Sabat, Jisas i lukim wanpela aipas man i wok long singaut long mani samting long rot. Em i tokim ol disaipel: ‘Lukim hau strong bilong God bai helpim dispela man.’ Jisas i miksim spet bilong em yet wantaim graun na wokim graun malumalum, na putim long ai bilong dispela man. Jisas i tokim em: ‘Go na wasim ai bilong yu long hulwara bilong Siloam.’ Dispela man i mekim olsem, na fes taim long laip bilong em, em inap lukluk.

Ol manmeri i kirap nogut. Ol i tok: ‘Em dispela man bipo em i save sindaun na singaut long mani samting, o em narapela man wankain olsem em?’ Dispela man i tok: ‘Mi dispela man em mama i bin karim mi aipas!’ Ol manmeri i tok: ‘Bilong wanem yu no aipas moa?’ Taim em i tokim ol long samting i bin kamap, ol i kisim em i go long ol Farisi.

Dispela man i tokim ol Farisi: ‘Jisas i putim graun malumalum long ai bilong mi na tokim mi long go wasim. Mi mekim olsem, na nau mi inap lukluk.’ Ol Farisi i tok: ‘Sapos Jisas i oraitim ol man long de Sabat, strong bilong em i no kam long God.’ Tasol ol narapela i tok: ‘Sapos strong bilong em i no kam long God, em i no inap oraitim ol man.’

Ol Farisi i singautim papamama bilong em na tok: ‘Hau na nau pikinini man bilong yupela inap lukluk?’ Papamama bilong em i pret bikos ol Farisi i tok sapos wanpela i bilip long Jisas, ol bai tromoi em i go ausait long sinagog. So ol i tok: ‘Mipela i no save. Yupela askim em.’ Ol Farisi i givim em planti moa askim inap em i tok: ‘Mi tokim yupela pinis long samting mi save. Bilong wanem yupela i wok yet long askim mi?’ Ol Farisi i belhat nogut tru, na tromoi em i go ausait.

Jisas i go painim em, na askim em: ‘Yu bilip long Mesaia?’ Na em i tok: ‘Sapos mi save em i husat, mi bai bilip long em.’ Jisas i tok: ‘Mi dispela Mesaia.’ Jisas i mekim gutpela pasin, a? Em i oraitim dispela man na strongim tu bilip bilong em.