LESEN 09
Go Klostu Long God Long Rot Bilong Beten
Sampela taim yu pilim olsem yu nidim tok bilong stiaim yu long laip? Yu gat ol bikpela askim em yu laik kisim ol bekim bilong en? Yu nidim tok bilong mekim isi bel o strongim yu? Yu laik stap klostu long Jehova? Beten bai helpim yu long olgeta dispela samting. Tasol wanem stretpela rot bilong beten? Yu ting God i save harim olgeta beten? Yu mas mekim wanem na bai em i harim ol beten bilong yu? Yumi ken skelim.
1. Yumi mas beten long husat, na yumi ken beten long wanem samting?
Jisas i tok yumi mas beten long Papa bilong yumi long heven. Jisas yet i bin beten long Jehova. Em i tok: “Yupela i mas beten olsem: ‘Papa bilong mipela long heven . . . ’” (Matyu 6:9) Taim yumi beten long Jehova, yumi strongim pasin pren bilong yumi wantaim em.
Yumi ken beten long olgeta samting, tasol bilong God i ken harim ol beten bilong yumi, yumi mas askim long ol samting i stret wantaim laik bilong em. “Maski wanem wanem samting yumi askim [God] long en na i stret wantaim laik bilong em, em bai harim yumi.” (1 Jon 5:14) Jisas i givim sampela eksampel long ol samting i stret long yumi ken beten long en. (Ritim Matyu 6:9-13.) Na tu, yumi mas beten long ol samting yumi tingting long en, tok tenkyu long God long ol samting em i mekim long yumi na askim em long helpim ol narapela.
2. Yumi mas beten olsem wanem?
Baibel i kirapim yumi long “autim olgeta tingting i stap long bel bilong [yumi] long [God].” (Buk Song 62:8) So ol beten bilong yumi i mas kamapim tingting i stap long bel bilong yumi. Yumi ken beten na kolim ol tok long maus o long tingting, na yumi ken sindaun o sanap o nildaun na mekim long pasin rispek. Yumi inap beten long kain kain taim na ples.
3. Olsem wanem God i save bekim ol beten bilong yumi?
Em i save mekim olsem long kain kain rot. Jehova i givim yumi Tok bilong em, Baibel, na long dispela rot planti taim yumi kisim ol bekim bilong ol askim bilong yumi. Pasin bilong ritim Tok Bilong God inap “givim savetingting long man i no gat planti save.” (Buk Song 19:7; ritim Jems 1:5.) Em inap mekim tingting bilong yumi i stap isi taim yumi bungim ol hevi. Na God inap kirapim ol wokman bilong em long helpim yumi long taim yumi nidim tru helpim.
KISIM SAMPELA SAVE MOA
Kisim save long hau yu inap mekim ol beten i kamapim tingting i stap long bel bilong yu na God i amamas long en, na kisim save long hau beten inap helpim yu.
4. God i makim ol samting yumi mas beten long en
Yumi mas beten long wanem ol samting na bai God i harim? Pilaim VIDIO.
Jehova i laik bai yumi prea long em. Ritim Buk Song 65:2, na stori long ol dispela askim:
Yu ting “Man Bilong Harim ol prea” i laik bai yu mas beten long em? Wai na yu ting olsem? O wai na yu ting nogat?
Yumi mas bihainim ol lo bilong God sapos yumi laik bai em i harim ol beten bilong yumi. Ritim Maika 3:4 na 1 Pita 3:12, na stori long dispela askim:
Bilong wanem yumi mas bilip olsem Jehova bai harim ol beten bilong yumi?
Long taim bilong woa, tupela lain wantaim i beten long winim pait. Yu ting i stret long ting God bai harim ol dispela beten?
5. Ol beten bilong yumi i mas kamapim tingting i stap long bel bilong yumi
Sampela man i lain long kolim wan wan wed bilong sampela beten inap planti taim. Tasol yu ting em pasin God i laik yumi bihainim taim yumi beten long em? Ritim Matyu 6:7, na stori long dispela askim:
Hau bai yu abrusim pasin bilong kolim “ol wankain tok gen na gen” long beten bilong yu?
Long olgeta de, yu ken tingim wanpela blesing long laip bilong yu na tok tenkyu long Jehova long dispela blesing. Mekim olsem long olgeta de insait long wanpela wik, na bai yu beten long 7-pela narapela narapela samting na yu no kolim seim samting planti taim.
Gutpela papa i laik bai ol pikinini i tokim em long tingting i stap long bel bilong ol. Olsem tasol, Jehova i laik bai yumi beten na kamapim tingting i stap long bel bilong yumi
6. Beten em presen i kam long God
Hau bai beten i strongim yumi, long gutpela taim na long taim bilong hevi? Pilaim VIDIO.
Baibel i tok promis olsem beten inap helpim yumi long kisim bel isi tru. Ritim Filipai 4:6, 7, na stori long ol dispela askim:
Tru beten i no save pinisim ol hevi bilong yumi, tasol em i save helpim yumi olsem wanem?
Wanem sampela samting yu laik beten long en?
Yu save long dispela?
Dispela tok “amen” i makim “dispela samting i ken kamap,” o i tru. Kirap long taim ol man i raitim Baibel, ol man i save tok “amen” long pinis bilong ol beten.—1 Stori 16:36.
7. Makim taim long beten
Sampela taim yumi inap bisi tru na yumi lusim tingting long beten. Yu ting beten i bikpela samting long Jisas? Ritim Matyu 14:23 na Mak 1:35, na stori long ol dispela askim:
Jisas i mekim wanem na bai em i gat taim long beten?
Yu mas mekim wanem na bai yu gat taim long beten?
SAMPELA MAN I TOK: “God i no save hariap long bekim ol beten.”
Bai yu tok wanem?
OL BIKPELA POIN
Ol beten yumi kamapim long bel i mekim yumi go klostu long God, mekim tingting bilong yumi i stap isi, na givim yumi strong yumi nidim bilong amamasim Jehova.
Riviu
Yumi mas beten long husat?
Yumi mas beten olsem wanem?
Yumi kisim wanem helpim long beten?
MEKIM WOK PAINIMAUT
Kisim bekim bilong ol askim em planti man i gat long beten.
“Sevenpela Samting Yu Mas Save Long Beten” (Wastaua, Oktoba 1, 2010)
Kisim save long ol bikpela risen na yu mas beten na hau bai yu mekim ol beten i kamap gutpela.
Skelim tok Baibel i mekim long yumi mas beten long husat.
Long dispela musik-vidio, luksave olsem yumi ken beten long kain kain taim na ples.