51 BARNABAS
“Pikinini Bilong Mekim Isi Bel”
SOL BILONG TARSUS i kamap disaipel, na bihain long tripela yia em i go bek long Jerusalem bilong go lukim ol Kristen. (Gal. 1:15-19) Em i tingim ol olsem ol bratasista bilong em, tasol long ol, em i birua bilong ol. I luk olsem planti i no bin save olsem em i bin senis olgeta. Tasol i gat wanpela man i strongim bel, mekim pasin sori, na helpim Sol. Dispela man em bihain ol i kolim em Barnabas.
Ol Kristen long Jerusalem i pret long helpim Sol Bilong Tarsus, tasol Barnabas i strongim bel na helpim em
Baibel i tok, Barnabas i gat narapela nem, em Josep. Tasol ol bratasista i kolim em Barnabas, mining bilong en “Pikinini Bilong Mekim Isi Bel.” Ol i givim em dispela nem bikos em i man bilong mekim gutpela pasin na oltaim em i painim rot bilong mekim isi bel bilong ol narapela na helpim ol. Olsem, bihain liklik long Pentikos 33 C.E., Barnabas i salim graun bilong em na givim mani long helpim ol bratasista i sot long samting. Taim Sol i go kamap long Jerusalem long 36 C.E., Barnabas i bungim Paul na soim pasin helpim long em. Baibel i tok: “Barnabas i helpim Sol na bringim em i go long ol aposel.”
Kirap long dispela taim na i go Sol na Barnabas i kamap gutpela pren tru. Sol i givim bel tru long autim tok long Jerusalem na sampela Juda i laik kilim em i dai. So ol brata i salim em i go long Tarsus, em ples we em i bin bon. Bihain long 9-pela yia samting, ol i salim Barnabas i go bilong strongim ol nupela bilipman long Antiok bilong Siria. Baibel i tok olsem “em i wanpela gutpela man i bilip tru na holi spirit i pulap long em.” Planti manmeri long Antiok i bilip long gutnius, olsem na Barnabas i nidim sampela moa long helpim em. So em i go long Tarsus long painim pren bilong em Sol. Tupela i wok gut wantaim long autim tok. Ol i helpim tu wok bilong bungim ol samting bilong bringim i go long ol Kristen i nidim samting.
Sol, em bihain ol i kolim Pol, i kirap mekim wok misineri wantaim Barnabas. Ol i mas i gat strongpela bel long mekim dispela wok. Long Aikoniam, sampela Juda i birua na i laik kilim ol i dai, so dispela tupela misineri i lusim dispela hap na go long Listra. Pastaim ol man long Listra i ting tupela i god! Tasol sampela man bilong Pisidia Antiok na Aikoniam i kam na sutim tok giaman long tupela. Ol manmeri i bilipim tok giaman ol i mekim na ol i tromoi ston long Pol, na pulim bodi bilong em i go ausait long taun na lusim em i stap bikos ol i ting em i dai pinis. Taim ol Kristen long Listra i bung raunim Pol, em i kirap sanap na wokabaut i go bek insait long taun. Tingim amamas bilong Barnabas taim em i lukim olsem Pol i no dai! Bihain tupela i lusim Listra. I no longtaim bihain, tupela i go bek long Listra long mekim isi bel bilong ol Kristen. Man! Tupela i gat strongpela bel long go bek long ples we klostu ol i kilim i dai tupela!
Barnabas na Pol i mekim gut wok bilong Jehova wantaim, maski ol i bungim planti hevi. Tasol bihain wanpela samting i kamap na mekim tupela i kros. Barnabas i tingting strong long kisim kasen bilong em Mak i go wantaim tupela long neks misineri raun bilong ol. Tasol Pol i no wanbel long dispela, bikos bipo Mak i bin go wantaim tupela tasol em i lusim ol. Tupela wantaim i strong long tingting bilong ol, “olsem na bikpela kros i kamap,” so tupela i bruk na go long narapela narapela hap.
Barnabas bai kros yet long Pol o fogivim em? Taim kros i kamap namel long tupela Kristen, em isi long holim yet bel kros i stap na mekim ol tok i daunim dispela wanbilip Kristen, o stop long go long ol miting. Tasol Kristen i mas strongim bel long sakim dispela pasin, wok strong long kamap wanbel wantaim God na dispela wanbilip Kristen.
Em i klia tru olsem Barnabas na Pol i no larim dispela kros i pasim ol long mekim yet wok bilong Jehova. Barnabas na Mak i kisim sip i go long Saipras, we ol i mekim yet wok bilong kamapim disaipel. Na Pol i kisim Sailas i go wantaim em long ol hap we em i plen long raun long en, na Jehova i helpim ol long strongim ol kongrigesen na helpim planti man long harim gutnius.
Yu ting dispela tupela man i holim yet kros long narapela narapela? Nogat. Tingim: Long ol pas Pol i raitim long ol kongrigesen, em i mekim gutpela tok long pasin bilong Barnabas. Long wanpela pas em i tok, pren bilong em, Barnabas, i mekim liklik wok mani bilong sapotim em yet so em i ken mekim yet wok bilong autim tok wankain olsem em yet. (1 Kor. 9:6) Long narapela pas Pol i stori long Mak, “kasen bilong Barnabas,” na mekim gutpela tok long pasin bilong em. (Kol. 4:10, 11) Ating Pol na Barnabas i no raun moa wantaim long autim tok, tasol tupela i stap gutpela pren yet. Barnabas i wok yet long autim gutnius long ol manmeri na mekim isi bel bilong ol. Na taim em i wok wantaim Mak, em i skulim gut dispela yangpela man long mekim gut moa wok bilong Jehova. Long neks sapta bai yumi stori gut long pasin bilong Mak long strongim bel.
Ritim dispela stori bilong Baibel:
Bilong skelim:
Long wanem ol rot Barnabas i soim olsem em i gat strongpela bel?
Mekim Wok Painimaut
1. Ol Livai i no kisim wanpela graun. So hau na Barnabas, em wanpela Livai, i gat wanpela hap graun bilong em? (Nam. 18:20; Apo. 4:36, 37; w98 4/15 20 par. 4, ftn.)
2. Wai na Baibel i kolim Barnabas olsem wanpela aposel? (Apo. 14:14; it “Barnabas” par. 3-wcgr)
3. Long Saiprus, Barnabas na Pol i autim tok long wanpela man nem bilong en Sergius Paulus. Long Buk Aposel, Luk i kolim em olsem “gavana,” wai na i stret Luk i kolim em olsem? (Apo. 13:7, 12; it “Saiprus” par. 7-wcgr) A
Bank of Cyprus Cultural Foundation Collection
Piksa A: Wanpela koin bilong taim Klodius i stap king. Em i bin stap king long taim Barnabas na Sol i go long Saiprus. I gat dispela tok “gavana” long en, em king bilong dispela ailan.
4. Wai na yumi no kirap nogut olsem ol manmeri bilong Listra i laik mekim sakrifais bilong welkamim Barnabas na Pol? (bt 97, blok)
Tingim Skul Yu Lainim
Long wanem ol rot yumi inap bihainim pasin bilong Barnabas long givim samting?
Maski i luk olsem pastaim Barnabas i go pas long ol misineri raun bilong em wantaim Pol, bihain Pol i kisim planti wok moa long Barnabas. Tasol Barnabas i no jeles long Pol. Long wanem ol taim yumi inap bihainim eksampel bilong Barnabas? B
Piksa B
Long wanem ol rot yu inap bihainim pasin bilong Barnabas long strongim bel long laip bilong yu?
Tingim Tingim Long Bel Ol Bikpela Tok
Dispela stori i skulim mi olsem wanem long Jehova?
Olsem wanem dispela stori i stret wantaim samting Jehova i tingting pinis long mekim long ol man na long graun?
Wai na yu amamas olsem God i makim Barnabas long mekim wok king wantaim Krais long heven?
Kisim Sampela Save Moa
Olsem wanem pasin pren namel long Barnabas na Pol i skulim yumi olsem ol manmeri i gat narapela narapela pasin inap wok gut wantaim?
Long dispela vidio, lukim hau ol brata long nau inap stretim ol hevi namel long ol yet olsem Barnabas na Pol i bin mekim.