Wok Misineri Kristen Em God i As Bilong En
“Bihainim pasin bilong mi . . . olsem mi tu mi save bihainim pasin bilong Krais.”—1 KORIN 11:1.
1. Wanem sampela samting bilong Jisas i makim gutpela pasin em lain bilong em i ken bihainim? (Filipai 2:5-9)
JISAS i makim gutpela pasin ol disaipel bilong em i ken bihainim! Em i lusim heven na i kam daun long graun na i stap wantaim ol man i gat sin. Em i orait long karim bikpela pen na hevi na bai em i ken helpim ol man na mekim gut nem bilong Papa bilong em long heven. (Jon 3:16; 17:4) Taim ol i laik kilim em i dai em i tok: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.”—Jon 18:37.
2. Taim Jisas i kirap bek, bilong wanem i stret long em i ken tokim ol disaipel long mekim yet dispela wok em i bin kirapim?
2 Taim Jisas i no dai yet em i bin lainim ol disaipel bilong em long mekim yet dispela wok bilong autim tok i tru bilong Kingdom. (Matyu 10:5-23; Luk 10:1-16) Olsem na taim em i kirap bek long i dai em inap tokim ol olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.”—Matyu 28:19, 20.
3. Wok bilong kamapim disaipel, dispela i go bikpela olsem wanem? Tasol dispela wok i stap long wanem hap tasol?
3 Inap 3-pela yia na 6-pela mun ol disaipel bilong Jisas i bihainim dispela tok bilong em, tasol ol i mekim insait long ol Juda tasol na ol man i bihainim lotu Juda na ol Samaria i bin katim skin bilong ol. Na long yia 36 C.E. God i tokim ol long autim tok long Kornilius wantaim famili bilong em, em ol i no bin katim skin bilong em. Inap 10-pela yia moa ol narapela man i no Juda ol i kam insait long kongrigesen. Ol dispela wok i kamap long hap klostu long biksolwara Mediterenian tasol.—Aposel 10:24, 44-48; 11:19-21.
4. Wanem samting i bin kamap long yia 47-48 C.E.?
4 I mas i gat sampela samting bilong opim rot na bai ol Kristen i ken painim sampela disaipel moa long lain Juda na ol narapela lain em ol i stap long ol longwe hap. Olsem na long yia 47 o 48 samting, ol elda bilong kongrigesen Antiok i kisim wanpela tok bilong God olsem: “Yupela i mas makim Barnabas wantaim Sol bilong mekim dispela wok mi bin singautim tupela long mekim.” (Aposel 13:2) Long dispela taim Pol i holim olpela nem bilong em, olsem Sol. Na God i kolim nem bilong Barnabas pastaim na nem bilong Sol bihain, long wanem, ating long dispela taim Barnabas i olsem namba wan na Pol i namba tu.
5. Bilong wanem stori bilong wok misineri bilong Pol tupela Barnabas i gutpela samting bilong helpim ol Kristen bilong nau?
5 Stori bilong wok misineri bilong Pol tupela Barnabas em i bikpela samting bilong strongim bel bilong ol Witnes Bilong Jehova long nau na ol misineri na painia i bin lusim kantri bilong ol na i go mekim wok bilong God long narapela kantri. Na sapos yumi kaunim Aposel sapta 13 na sapta 14 ating em bai kirapim yumi long mekim bikpela wok moa long autim tok na kamapim disaipel.
Ailan Saiprus
6. Wanem gutpela pasin bilong Barnabas tupela Pol na yumi ken bihainim?
6 Barnabas tupela Sol i no lusim taim long kalap long sip long Selusia long kantri Siria na i go long ailan Saiprus. Ol i lusim sip long Salamis, na tupela i no larim wanpela samting i pulim ai o tingting bilong ol, nogat; “tupela i go long ol haus lotu bilong ol Juda na autim tok bilong God.” Tupela i bihainim pasin bilong Krais na ol i no tingting long painim gutpela sindaun long dispela taun na wetim ol man i kam long tupela na bai tupela i ken autim tok long ol, nogat. Tupela i kirap raun autim tok “long olgeta hap bilong ailan Saiprus.” Tupela i mas wokabaut long lek i go longwe, na slip nabaut long ol narapela narapela ples, long wanem, ol i bin go long planti hap bilong dispela bikpela ailan.—Aposel 13:5, 6.
7. (a) Wanem gutpela samting i kamap long Pafos? (b) Dispela stori i ken kirapim yumi long tingim wanem samting?
7 Tupela i amamas tru long gutpela samting i bin kamap long Pafos. Bikman bilong Saiprus, em Sergius Paulus, em i harim tok bilong tupela na “em i bilip.” (Aposel 13:7, 12) Bihain Pol i tok: “Ol brata, yupela i mas tingim taim God i bin singautim yupela na yupela i kamap Kristen. Planti bilong yupela i no bin i stap olsem saveman long ai bilong ol man bilong dispela graun. Na planti bilong yupela i no bin i gat strong. Na planti bilong yupela i no bilong ol lain famili i gat biknem.” (1 Korin 1:26) Sergius Paulus i gat biknem, tasol em i bin harim tok, olsem na ol misineri na yumi olgeta i ken tingim dispela na yumi ken autim tok long ol bikman tu, olsem 1 Timoti 2:1-4 i tok. Sampela taim ol bikman i bin helpim gut lain bilong God.—Nehemia 2:4-8.
8. (a) Wanem senis i kamap long wok bilong Pol tupela Barnabas? (b) Wanem gutpela pasin bilong Barnabas na yumi tu i ken bihainim?
8 Spirit bilong Jehova i bosim Pol, na em i mekim bikpela wok moa long helpim Sergius Paulus long tanim bel. (Aposel 13:8-12) Na bihain long dispela taim Pol i bosim wok bilong em tupela Barnabas. (Skelim Aposel 13:7 wantaim Aposel 13:15, 16, 43.) Dispela samting i stret wantaim wok em God i bin givim long Pol taim Pol i bin tanim bel bipo. (Aposel 9:15) Ating dispela i traim bel bilong Barnabas, em i gat pasin daun o nogat. Tasol em i orait long dispela samting; em i no ting Pol i laik winim em, nogat. Em i truim insait bilong nem bilong em, olsem “Man Bilong Mekim Gut Bel Bilong Ol Man,” na em i helpim Pol long mekim wok misineri. Wanpela taim sampela Juda Kristen i gat tok long Pol tupela Barnabas i autim tok long ol man i no bin katim skin bilong ol, na Barnabas i helpim Pol long bekim tok long ol. (Aposel 15:1, 2) Barnabas i makim gutpela pasin yumi olgeta i ken bihainim, na ol brata sista i stap long ol haus misineri na haus Betel tu! Sapos nupela lo i kamap, o ol i makim narapela wasman bilong bosim wok, yumi mas daun yet na bihainim tok bilong ol.—Hibru 13:17.
Ples Antap Long Distrik Esia
9. Pol tupela Barnabas i orait long wokabaut i go long Pisidia long Antiok, na yumi kisim wanem save long dispela?
9 Tupela misineri hia i lusim Saiprus na ol i kisim sip na i go long Esia, tasol ol i no sindaun long hap bilong nambis, nogat; ol i wokabaut i go longwe inap 180 kilomita long rot nogut na ol i kamap long Pisidia long Antiok namel long kantri Esia. Ol i mas wokabaut i go antap long maunten, na bihain ol i go daun gen long wanpela hap i stap 1,100 mita antap long mak bilong solwara. Wanpela saveman bilong Baibel, em J. S. Hawson, i stori long dispela rot ol i mas wokabaut long en na em i tok: ‘I gat planti raskol long dispela hap, na ol i save bagarapim ol man na stilim ol samting bilong ol.’ Na i gat ol narapela samting nogut tu long dispela hap. Hawson i tok: ‘Long dispela ples maunten long Pisidia i gat planti tait wara i save kamap taim ol wara i kapsait aninit long ol bikpela maunten ston na sut i go daun long ol baret i no op tumas.’ Dispela stori i helpim yumi long save long ol ples nogut tupela misineri hia i orait long wokabaut long en na bai ol i ken bringim gutpela tok long ol man. (2 Korin 11:26) Long nau tu, planti wokman bilong Jehova i save strong long i go painim ol man na autim gutpela tok bilong Kingdom long ol, na maski i gat birua o hevi samting i laik pasim rot bilong ol, ol i no surik long mekim dispela wok.
10, 11. (a) Pol i mekim wanem na bai ol man i ken givim yau long tok bilong em? (b) Bilong wanem ol Juda i kirap nogut taim Pol i tokim ol long ol bikman bilong lotu i bin kilim Krais i dai? (c) Pol i tokim ol man long ol inap wetim wanem samting?
10 Haus lotu bilong ol Juda i stap long Pisidia, na tupela misineri i go long dispela haus lotu pastaim na bai tupela i ken givim tok bilong Baibel long ol man long dispela hap em ol i save long Baibel, na ol i ken bilip long gutpela tok bilong Kingdom sapos ol i laik. Ol i tokim Pol long mekim tok, na em i sanap na givim gutpela pablik-tok long ol. Em i mekim kain tok ol Juda na ol narapela bilong lotu Juda ol i ken orait long en na ol i no ken kros. (Aposel 13:13-16, 26) Pastaim Pol i mekim liklik tok bilong kirapim stori, na nau em i stori long ol samting bilong lain Juda long bipo, na em i tok, Jehova i bin makim ol tumbuna long ol long kamap lain bilong em yet, na em i bin helpim ol long lusim Isip, na em i helpim ol tu long rausim ol man i bin stap long Graun Bilong Promis. Na nau Pol i stori long ol samting Jehova i bin mekim long Devit. Ol dispela tok i swit long yau bilong ol dispela Juda, long wanem, ol i stap wetim taim bilong God i kamapim wanpela man bilong lain bilong Devit na em i ken stap oltaim olsem king bilong ol na helpim ol. Pol i tok olsem, orait, nau em i kirap na i tok: “Long lain bilong dispela man Devit, God i makim wanpela man bilong kisim bek yumi, na i salim em i kam long Israel. Dispela man em Jisas.”—Aposel 13:17-23.
11 Tasol ol dispela Juda i no wetim man kain olsem Jisas—ol i wetim man kain olsem strongpela soldia samting na bai em i ken daunim ol Rom na helpim ol Juda long winim ol narapela lain. Olsem na ol i kirap nogut taim Pol i tok ol bikman bilong lotu bilong ol dispela Juda yet ol i kilim i dai Krais Jisas. Na nau Pol i tokim ol: “Tasol God i kirapim em bek long matmat.” Em i tokim ol long gutpela samting bai painim ol sapos ol i bilip. Em i tok: “Mipela i autim tok long yupela olsem. Yupela i ken save gut, dispela man em i kam bilong lusim ol sin bilong yupela. Lo bilong Moses i no inap long lusim sin bilong yupela na kolim yupela stretpela man. Tasol dispela man em i save lusim olgeta sin bilong olgeta man i bilip long em, na em i kolim ol i stretpela man.” Na bilong pinisim tok Pol i tokim ol, nogut ol i stap olsem ol man bilong givim baksait long dispela gutpela samting God i mekim bilong helpim ol.—Aposel 13:30-41.
12. Taim ol man i harim tok bilong Pol ol i mekim wanem? Dispela stori i mas mekim wanem long yumi?
12 Pol i givim gutpela tok tru long ol man, na ol tok bilong Baibel i as bilong en! Taim ol man i harim pinis dispela tok, ol i mekim wanem? Baibel i tok: “Ol i lusim haus lotu na i go ausait, na planti Juda wantaim planti manmeri bilong ol arapela lain . . . ol i bihainim Pol wantaim Barnabas.” (Aposel 13:43) Dispela stori i strongim bel bilong yumi ol man bilong nau! Yumi tu i mas givim bel long kamapim gut tok long ol man na bai ol i ken pilim, olsem long taim yumi raun autim tok long ol, o yumi bekim tok long miting o mekim wanpela tok long miting.—1 Timoti 4:13-16.
13. Bilong wanem tupela misineri i mas lusim Pisidia? Yumi laik save long wanem samting bilong ol nupela disaipel?
13 Ol dispela nupela man i kam insait long tok i tru long Pisidia ol i amamas na ol i kirap autim ol gutpela tok ol i harim pinis, olsem na “long de Sabat bihain, klostu olgeta manmeri bilong dispela taun ol i kam bung bilong harim Pol tupela Barnabas i autim tok bilong God.” Bihain liklik, tok i kamap tu long ol man ausait long taun, na “ol i kisim tok bilong Bikpela i go nabaut long olgeta hap bilong dispela distrik.” (Aposel 13:44, 49) Tasol sampela i no amamas long ol dispela samting. Sampela Juda i kirapim ol man long rausim Pol tupela Barnabas long taun. (Aposel 13:45, 50) Na olsem wanem long ol nupela disaipel? Ol i bel hevi long dispela samting?
14. Bilong wanem ol birua i no inap long mekim i dai wok ol misineri i bin kirapim? Dispela i givim wanem save long yumi?
14 Nogat, long wanem, em wok bilong God. Na tupela i bin skulim gut ol man na bai ol i bilip strong long Krais i Bikpela bilong ol na i no tupela misineri, nogat. Baibel i tok, “Holi Spirit i pulap long ol manmeri bilong Antiok i bilip long Jisas, na ol i amamas tru.” (Aposel 13:52) Dispela i strongim ol misineri bilong nau na ol narapela tu ol i gat wok long kamapim disaipel! Sapos yumi gat pasin daun na yumi givim bel long wok bilong yumi, God Jehova na Krais Jisas bai mekim gut dispela wok.—1 Korin 3:9.
Aikoniam, na Listra, na Derbe
15. Tupela misineri i mekim wanem long Aikoniam? Na wanem samting i kamap?
15 Nau Pol tupela Barnabas i wokabaut inap 140 kilomita i go long hap bilong saut-is na ol i kamap long taun Aikoniam. Ol i no pret long ol man i putim hevi long ol, na ol i mekim wankain pasin olsem ol i bin mekim long Antiok, olsem na Baibel i tok: “Bikpela lain Juda na Grik ol i bilip.” (Aposel 14:1) Na ol Juda i no laikim gutpela tok, na ol tu i kirapim ol man long biruaim Pol tupela Barnabas, tasol tupela i karim dispela hevi na tupela i wok strong long helpim ol nupela disaipel bilong Aikoniam. Tasol tupela i harim olsem sampela Juda i birua long ol na i laik tromoi ston long ol, olsem na ol i ranawe i go long “Listra na Derbe, na long ol ples i stap klostu long dispela tupela taun.”—Aposel 14:2-6.
16, 17. (a) Wanem samting i painim Pol long Listra? (b) Ol samting God i larim i painim Pol, dispela i mekim wanem long wanpela yangpela man long Listra?
16 Tupela i strongim bel “na tupela i wok long autim gutnius long ol dispela [nupela] ples.” (Aposel 14:7) Tasol taim ol Juda long Pisidia na Aikoniam i harim, ol i kam long Listra na kirapim ol man long tromoi ston long Pol. Em i no inap ranawe, na ol i kilim em, na ol i ting em i dai pinis, na ol i pulim skin bilong em i go ausait long taun.—Aposel 14:19.
17 Ating ol nupela disaipel long Listra i bel hevi tru long dispela samting, tasol bihain ol i kirap nogut na ol i amamas gen, long wanem, ol i lukim Pol i kirap sanap! Ating yangpela Timoti i stap o nogat, Baibel i no tok, tasol em i wanpela nupela disaipel long dispela taim. Em i save long ol dispela samting God i larim i painim Pol, na em i tingting strong long en. Taim Pol i raitim namba 2 pas long Timoti em i tok: “Yu bin i stap wantaim mi, na yu save pinis long pasin bilong mi long skulim ol manmeri long ol pasin God i laikim . . . , na long olgeta pen mi bin karim long Antiok na Aikoniam na Listra. Yu save long ol samting nogut tru ol i bin mekim long mi long ol dispela taun. Tasol Bikpela i bin helpim mi long dispela olgeta hevi na mi stap gut.” (2 Timoti 3:10, 11) Pol i bin go bek long Listra na em i bungim yangpela Timoti, em wanpela gutpela Kristen, na Pol i tok: “Ol Kristen long Listra na Aikoniam ol i tok long pasin bilong em olsem, Timoti i gutpela man.” (Aposel 16:1, 2) Olsem na Pol i kisim Timoti olsem poroman bilong em long raun autim tok, na ol dispela samting i helpim Timoti long kamap strong long spirit na bai em inap tru long Pol i ken salim em i go helpim sampela kongrigesen. (Filipai 2:19, 20; 1 Timoti 1:3) Na long nau tu ol strongpela wokman bilong God ol i save strongim ol yangpela, na planti ol i kamap wokman bilong God olsem Timoti.
18. (a) Tupela misineri i mekim wanem long Derbe? (b) Ol inap mekim wanem sapos ol i laik? Tasol ol i mekim wanem?
18 Pol tupela Barnabas i lusim Listra na i go long Derbe, na nau i no gat birua, olsem “na tupela i mekim planti manmeri i kamap disaipel.” (Aposel 14:20, 21) Tupela i kamapim kongrigesen long Derbe, na nau tupela i toktok long ol narapela samting ol bai mekim. I gat gutpela rot i go long Tarsus, na Tarsus i stap klostu long Antiok long Siria, na sapos tupela i laik ol i ken go kisim malolo long Antiok. Tasol nogat. Ol i bihainim pasin bilong Bikpela; ol i save i gat bikpela wok i stap, na ol i pilim i no stret sapos ol i go malolo.—Mak 6:31-34.
Mekim Gut Wok Bilong God
19, 20. (a) Olsem wanem Jehova i bin mekim gut long tupela misineri taim tupela i go bek gen long Listra na Aikoniam na Antiok? (b) Dispela i ken skulim lain bilong Jehova long nau long wanem samting?
19 Tupela i no bihainim sotpela rot i go bek long ples bilong ol, nogat. Ol i strongim bel na i go bek gen long ol dispela taun em birua i bin painim ol. Ol i no bihainim laik bilong skin, nogat; ol i laik helpim ol man. Olsem na Jehova i mekim gut long ol. Baibel i tok: “Tupela i strongim bel bilong ol disaipel. Tupela i tok strong long ol olsem, ‘Yupela i mas stap strong long bilip. Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.’ ” (Aposel 14:21, 22) Na tupela i tokim ol tu long bihain ol bai holim wok insait long Kingdom bilong God. Long nau tu yumi mas strongim ol nupela disaipel, olsem na bai ol i ken karim ol hevi—yumi ken tokim ol long ol inap kisim laip oltaim long graun long bihain na ol bai stap aninit long dispela Kingdom bilong God em Pol tupela Barnabas i bin tokim ol man long en.
20 Taim Pol tupela Barnabas i no lusim yet taun ol i helpim ol brata long stretim gut ol wok insait long kongrigesen na bai ol samting i ken wok gut. Tupela i skulim sampela brata na makim ol long holim wok elda na bosim ol wok. (Aposel 14:23) Olsem na ating dispela samting i helpim lain bilong kongrigesen long i go bikpela. Na long nau tu ol misineri na ol narapela ol inap lainim ol brata i no save tumas na bai ol dispela brata i ken kamap strong na lukautim gut ol wok bilong ol. Sampela ol misineri, taim ol i mekim pinis ol gutpela wok olsem, bihain ol i save go long narapela hap i sot long ol Witnes na ol i mekim yet gutpela wok bilong ol long dispela nupela hap tu.
21, 22. (a) Taim Pol tupela Barnabas i raun pinis long mekim wok misineri, wanem samting i kamap? (b) Olsem na i gat wanem tupela askim i kamap long dispela?
21 Taim tupela i go bek long Antiok long Siria ol i amamas, long wanem, “tupela i mekim pinis” dispela wok God i bin givim long tupela bilong mekim. (Aposel 14:26) Tupela i stori long ol brata long Antiok long ol samting tupela i bin mekim, olsem na “ol Kristen i harim dispela tok na ol i belgut tru.” (Aposel 15:3) Tasol nau tupela bai mekim wanem? Tupela bai malolo na amamas tasol long ol samting ol i bin mekim? Nogat, ol i no laik malolo. Ol i go long Jerusalem bilong askim lain bilong lukautim wok bilong God long olsem wanem long pasin bilong katim skin, na bihain ol i kirap gen long mekim wok misineri. Tasol nau tupela i bruk, na Barnabas i kisim Jon Mak na ol i go long Saiprus, na Pol i kisim nupela poroman, em Sailas, na ol i go long Siria na Silisia. (Aposel 15:39-41) Na Pol i kisim Timoti tu long dispela taim.
22 Baibel i no stori long ol samting Barnabas i mekim long dispela namba 2 raun bilong em, tasol Pol i go long ol nupela hap na em i kirapim ol kongrigesen long 5-pela taun, em Filipai, na Beria, na Tesalonaika, na Korin, na Efesus. Wanem as na Pol i bin kamapim gutpela wok tru? Sapos ol Kristen bilong nau i bihainim pasin bilong Pol long kamapim disaipel, ol tu inap mekim gutpela wok?
Yu Tingim Yet?
◻ Jisas i mekim wanem na em i nambawan gutpela piksa yumi ken bihainim?
◻ Wanem gutpela pasin bilong Barnabas na yumi ken bihainim?
◻ Pablik-tok Pol i mekim long Pisidia, yumi ken kisim wanem save long dispela?
◻ Pol tupela Barnabas i mekim wanem bilong inapim tru wok bilong ol?
[Piksa long pes 15]
Yangpela man Timoti i no lusim tingting long ol hevi Pol i bin karim