Husat Ol i Wokman Bilong God Long Nau?
“Mitupela i salim Timoti, brata bilong yumi na wokman bilong God long gutnius bilong Krais.”—1 TESALONAIKA 3:1, 2.
1, 2. (a) Olgeta man i tok ol i wokman bilong God, yu ting ol i mekim tru wok bilong God? (2 Korin 11:13-15) (b) Bilong wanem i bikpela samting long yumi mas save long ol wokman tru bilong God long nau? (2 Korin 5:18)
LONG dispela taim, long hap bilong Sentral Amerika, sampela pris pasto i helpim ol man long kirapim pait na daunim gavman. Long hap bilong Esia, wanpela pasto i helpim ol soldia long hait na wetim ol birua i kam na tupela man i dai. Long hap bilong saut long Esia, tupela pasto i helpim ol man i wok boi na ol i no gat graun na ol i pait wantaim ol man i “daunim” ol.
2 Ol dispela pris na pasto i tok ol i wokman Kristen bilong God, tasol yu ting ol i mekim wok bilong God? Yu ting ol wokman bilong God i mas mekim kain wok olsem? Em bikpela askim, long wanem, wok bilong ol wokman tru bilong God i save helpim ol man long kisim save long God, na bai ol inap kisim laip i stap oltaim. (1 Korin 3:5; Jon 17:3) Yumi mas save husat ol i wokman tru bilong God. Tasol olsem wanem yumi Inap save? Baibel tasol inap helpim yumi long save.
Dispela Tok “Wokman” long Baibel
3. (a) Ol i kolim tok Grik di.a’ko.nos bilong makim ol man i mekim wanem wanem kain wok? (b) Wanem wok em i nambawan bikpela wok?
3 Orait, Baibel i kolim dispela tok “wokman” bilong makim man i mekim wanem kain wok? Ol i raitim Nupela Testamen pastaim long tok Grik, na ol i kolim wanpela tok Grik di.a’ko.nos em yumi tanim long tok Pisin olsem “wokman.” Ol man i gat kain kain tingting long as bilong dispela tok, tasol planti ol i save long insait bilong en. Insait bilong en i olsem: “Wokboi.” Matyu na Mak na Luk na Jon ol i kolim dispela tok Grik na ol narapela tok olsem bilong makim man i givim kaikai long ol man i sindaun bilong kisim kaikai. (Luk 4:39; Jon 2:5, 9) Tasol long tok Grik long taim bilong Jisas, planti taim dispela tok i makim man i mekim wanpela bikpela wok. Ol man bilong raitim ol narapela buk, i no Baibel, ol i kolim dispela tok long ol man i gat bikpela wok long lotu, olsem ol pris samting. Na namba wan taim ol i tanim tok bilong Olpela Testamen long tok Grik, ol i kolim dispela tok long ol man i gat bikpela wok long haus bilong king bilong Pesia, em ol i stap mankimasta bilong King Seksis. (Esta 1:10; 6:3) Tasol nambawan bikpela wok yumi ol man inap mekim em wok bilong Nambawan Bikpela God Jehova.
4. Wokman tru bilong God i ting olsem wanem long em yet?
4 Man i mekim wok bilong God em i mekim wanpela bikpela wok, tasol wokman tru bilong God i mas ting olsem wanem long em yet? Em i no ken hambak o litimapim nem bilong em yet. Em i no ken larim ol man i kolim bikpela nem long em, olsem “Pater” samting. (Matyu 23:8-12) Jisas i tok, wokman tru bilong God i mas i gat pasin daun. Em i tok: “Man i laik i stap bikpela namel long yupela, em i mas i stap wokboi bilong yupela. Na man i laik i stap namba wan bilong yupela, em i mas i stap olsem wokboi nating bilong yupela.”—Matyu 20:26, 27.
5. Ol wokman bilong God i save bihainim tok bilong husat? Wok bilong ol i helpim husat?
5 Wokboi i mas bihainim tok bilong bos bilong em. Tasol taim em i mekim olsem, ating wok em i mekim bai helpim narapela man. Olsem: Sapos bos bilong em i singautim sampela man i kam long haus bilong em, orait, wokboi i bihainim tok bilong bos bilong em na em i lukautim ol dispela man. Ol wokman Kristen ol i “wokman bilong God” na wokman bilong Krais,” olsem na ol i bihainim ol tok God i givim long ol long rot bilong Pikinini bilong em, Krais Jisas. (2 Korin 6:4; 11:23) Tasol wok ol i mekim i save helpim ol narapela man. Pol em i wokman bilong helpim ol man “bilong ol arapela lain.” (Efesas 3:1-7) Wok em i mekim i helpim tru ol man i harim tok bilong em na ol i bilip. Na dispela wok em i mekim i litimapim nem bilong God Jehova na Krais Jisas, long wanem em i bihainim tok bilong tupela na em i mekim dispela wok.
Nambawan Bikpela Wokman Bilong God
6. (a) Husat i nambawan bikpela wokman bilong God? (b) Em i bihainim tok bilong husat? Em i mekim wok bilong helpim husat?
6 Tasol ol wokman bilong God i mas mekim wanem wok tru? Sapos yumi skelim ol wok Krais Jisas i mekim bai yumi inap bekim tok long dispela askim, long wanem em i nambawan bikpela wokman bilong God. Jisas i tok: “Pikinini Bilong Man i no bin kam bai ol man i helpim em. Nogat. Em i kam bilong helpim ol yet, na bilong givim laip bilong em bilong baim bek planti manmeri.” (Matyu 20:28) Jisas em i wanpela wokman bilong God na em i bihainim tok bilong husat? Em i mekim wok bilong helpim husat? Em i helpim ol olsem wanem? Jisas i bihainim ol tok na lo bilong Papa bilong em long heven. (Jon 8:28) Pastaim em i helpim ol Juda tasol. (Rom 15:8) Tasol bihain ol wok em i mekim i helpim olgeta man i gat stretpela bel.—Jon 3:16.
7. (a) Jisas i mekim wanem wok olsem wanpela wokman bilong God? (Mak 1:38) (b) Jisas i no mekim wanem wok?
7 Jisas i mekim wanem wok olsem wanpela wokman bilong God? Em i no mekim wok politik. Em i klia olgeta long dispela kain wok. Tupela taim em inap insait long wok politik, tasol em i no laik. (Mak 12:13-17; Jon 6:15) Bilong wanem em i no laik insait long wok politik? Long wanem wok bilong em i winim wok gavman bilong ol man bilong dispela graun. Wok bilong em inap helpim tru ol man, na givim laip oltaim long ol tu, olsem na i winim tru wok politik ol man i mekim. Na wanpela wokman bilong God em i no ken kamap wanpela wokman bilong dispela graun. (Matyu 6:24) Olsem na Jisas “i no bilong dispela graun.” (Jon 17:14; Jems 4:4) Jisas i mekim wok bilong autim tok na lainim ol man. Em i autim nem bilong God long ol man. Em i autim tok long kingdom bilong God, em dispela kingdom tasol inap helpim ol man. Jisas i lainim ol disaipel bilong em long ol lo bilong God long stretpela pasin ol i mas bihainim, na em i lainim ol long bihainim em na autim tok. Na bihain tru em i givim laip bilong em bilong helpim ol man.—Matyu 4:17; 5:27-32; 20:28; Jon 17:3-6.
8. Ol wokman tru bilong God long nau, bilong wanem ol i save skelim gut ol wok Jisas i bin mekim?
8 Jisas i soim yumi ‘dispela pasin yumi olgeta i mas bihainim.’ (1 Pita 2:21) Ol manmeri i bihainim tru wok bilong Jisas na mekim wok wankain olsem em i bin mekim, ol tasol inap tok ol i wokman bilong God long nau. Sapos yumi skelim ol wok ol wokman Kristen i bin mekim bihain long taim Jisas i dai, dispela bai helpim yumi long save gut long ol wok ol wokman tru bilong God i mas mekim.
Wokman Kristen
9. Wanem samting i mekim na Jisas wantaim Pol inap kamap wokman bilong God?
9 Orait, long dispela taim bipo ol wokboi bilong God i mas mekim wanem na ol inap kamap wokman bilong God? Long nau ol pris pasto bilong ol misin bilong Krisendom ol i save go long skul o koles bilong kisim pas bilong makim ol inap long mekim dispela wok. Tasol Jisas i no gat kain pas olsem. Em i wanpela wokman bilong God, long wanem God yet i makim em bilong kamap wokman bilong Em. (Luk 4:18, 19) Olsem tasol aposel Pol i tok: “God wanpela tasol i save mekim mipela inap long wok. Na em yet i bin mekim mipela inap, na mipela i stap wokman bilong nupela kontrak.” (2 Korin 3:5, 6) Olsem na God yet i mekim ol wokman bilong em ol inap long wok. Em i save mekim olsem wanem?
10. Olsem wanem Timoti i lain na kamap wokman bilong God?
10 Orait, yumi ken tingim Timoti, em i “wokman bilong God long gutnius bilong Krais.” (1 Tesalonaika 3:2) Pol i raitim pas i go long Timoti na Pol i tok: “Tasol yu, yu mas holim strong dispela tok yu bin kisim na bilipim pinis. Yu save gut long mipela manmeri i bin skulim yu long dispela tok. Na yu save dispela tu: Bipo yu stap liklik pikinini yet na yu stat long kisim save long Buk Holi. Dispela buk em inap long givim gutpela tingting long yu, na bai yu bilip long Krais Jisas, na bai God i kisim bek yu.”—2 Timoti 3:14, 15; lukim tu ves 16 na 17.
11. Husat i helpim Timoti bambai em inap long kamap wanpela wokman bilong God?
11 Olsem wanem? Timoti i kaunim tasol ol tok bilong Baibel na em i kamap wanpela wokman bilong God? Nogat. Pastaim sampela narapela wokman bilong God i bin “skulim” em long ol dispela tok na em i bilip. Husat ol i bin skulim em? Pol i tok, “yu stap liklik pikinini yet na yu stat long kisim save long Buk Holi,” olsem na taim Timoti i liklik yet ating mama bilong em na tumbuna mama bilong em i bin skulim em long sampela tok bilong God. Papa bilong em i no bilip. (2 Timoti 1:5) Na tu, taim Pol i bungim Timoti long namba wan taim, “ol Kristen long Listra na Aikoniam ol i tok long pasin bilong em olsem, ‘Timoti i gutpela man.’” (Aposel 16:2) Olsem na yumi save, Timoti i save bung wantaim ol dispela Kristen na dispela samting i strongim bilip bilong em. Na tu, long dispela taim bipo, sampela brata i gat nem na lain bilong bosim kongrigesen Kristen ol i stap long Jerusalem, ol i save salim pas long ol narapela narapela kongrigesen bilong strongim bilip bilong ol. Na i gat sampela wasman ol i save raun lukim ol kongrigesen na strongim ol.—Hibru 10:23; Aposel 15:22-32; 1 Pita 1:1.
12. Wanem taim Timoti i kamap wanpela wokman bilong God? Na bihain olsem wanem em i wok yet long kamap strong?
12 Timoti i stadi na kisim save na em i bung wantaim ol brata na ol dispela samting i strongim bilip bilong em. Olsem na bihain bilip bilong em i kirapim em 1ong kisim baptais bilong makim em i dediket pinis long God, olsem em i tok promis pinis long mekim wok bilong God i go inap long taim em i dai. (Matyu 28:19, 20; Hibru 10:5-9) Long dispela taim em i kamap wanpela wokman bilong God. Na taim em i baptais pinis em i no slek liklik long wok bilong kamap strong. God i givim wanpela strong long em na aposel Pol i skulim na lainim em na dispela samting i strongim em na helpim em long mekim gut wok bilong em. Na Timoti yet i save stadi na em i save bung wantaim ol narapela Kristen. Dispela samting tu i helpim em long kamap strong moa. (1 Timoti 4:14; 2 Timoti 2:2) Long dispela rot Timoti i kamap wanpela ‘wokman bilong God long gutnius.’ Orait, em i save mekim wanem wok?
13. Timoti i gat wanem ol wok long wok bilong God?
13 Timoti i gat sampela bikpela wok long wanem em i save raun wantaim Pol. Na em i wanpela elda, olsem na em i save wok strong long lainim na strongim ol brata. Em hap wok bilong God em i mas mekim. (1 Timoti 4:6) Tasol nambawan bikpela wok bilong em, em wok bilong autim dispela gutnius. Em nambawan bikpela wok Jisas i bin mekim. (Matyu 4:23) Aposel Pol i tokim Timoti: “Yu mas tingting klia oltaim. Yu mas karim hevi. Yu mas mekim wok bilong autim gutnius long ol man. Yu gat wok bilong helpim ol man, dispela wok yu mas mekim tru.”—2 Timoti 4:5.
14. Baibel i tok wanem long bilip na wok bilong autim tok?
14 Pol na Timoti i save mekim wok Kristen na autim tok bilong God, tasol husat moa i mas mekim dispela wok? Yu ting ol elda o ol brata i raun lukim ol kongrigesen ol tasol i mas mekim? Nogat. Aposel Pol i tok, bilip i save kirapim man long autim dispela gutnius, na olgeta Kristen i gat dispela bilip. Pol i tok: “Long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi.”—Rom 10:10.
15, 16. Husat ol i mas insait long wok Kristen na autim tok? Bilong wanem yu bekim tok olsem?
15 Olsem wanem? Olgeta manmeri i holim tru bilip Kristen ol i mas kamap wokman Kristen bilong God na autim dispela gutnius? Tru tumas. Pol i raitim dispela tok i go long olgeta brata sista long kongrigesen bilong Rom, i no bilong ol elda tasol. (Rom 1:1, 7) Kongrigesen olgeta long Efesas ol i mas “redi long autim gutnius bilong God i laik wanbel wantaim man.” Ol i mas kisim dispela pasin olsem “su” ol i pasim long lek bilong ol. (Efesas 6:15; 1:1) Na olgeta manmeri i harim tok bilong pas Pol i raitim long ol Hibru, ol i mas ‘tokaut long bilip bilong ol na long gutpela samting ol i wetim i stap, na ol i no ken surik long mekim.’ (Hibru 10:23) Na yu no ken lusim tingting long dispela samting, olsem: Long de Pentikos olgeta, ol man wantaim ol meri, ol i “telimautim tok bilong ol strongpela wok bilong God.”—Aposel 2:1-21; 1:14.
16 Na tu, paslain liklik long taim Jisas i go bek long heven, em i tokim ol disaipel: “Yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Ol manmeri long olgeta lain, em ol i harim tok, ol i no ken harim nating. Nogat. Ol i mas kamap disaipel na mekim olgeta wok ol disaipel i mas mekim.—Luk 10:1; 14:27, 33; Jon 13:35; 15:8; Aposel 1:8.
Ol Wokman Bilong God long Nau
17. Wanem sampela bikpela samting wokman Kristen tru i mas mekim? (Matyu 22:37-39)
17 Nau yumi save, wokman Kristen tru em i save klia long olgeta wok politik na em i no save insait long ol samting bilong dispela graun. Em i gat pasin daun na em i save bihainim ol stretpela lo Jisas i bin lainim ol disaipel long en. Em i wokman bilong God, em i bihainim pasin bilong Krais. Olsem na em i no ken bihainim tingting bilong em yet o senisim tok i tru bambai ol narapela man i ken laikim. Nogat. Tasol wok bilong God em i mekim, dispela wok i helpim ol narapela man, ol man i bilip na ol man i no bilip.—Matyu 20:28; 26:39; 1 Pita 4:8-10.
18. Husat ol i wokman tru bilong God long nau? Bilong wanem yu bekim tok olsem?
18 Wok bilong autim tok em i nambawan bikpela wok bilong Jisas na Timoti, na em i nambawan bikpela wok bilong ol Kristen long nau tu. Ol i mas autim wanem tok? Ol i mas tokim ol man, ofa bilong Krais i as bilong kisim bek ol man. Na ol man i laik bai God i kisim bek ol, ol i mas kolim nem bilong Jehova na i singaut long em. (Aposel 4:12; Rom 10:13) Na kingdom bilong God tasol em i rot bilong helpim yumi ol manmeri i karim pen na hevi. Olsem na Jisas i tok profet olsem: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap” (Matyu 24:14) Ol wokman tru bilong God ol tasol i truim dispela tok profet na autim ol dispela tok i tru long ol man. Orait, husat ol i mekim dispela wok God i givim long ol? Em Ol Witnes Bilong Jehova tasol.—Aisaia 43:10-12.
19. I gat wanem wanem ol samting na man i ken kamap wanpela wokman bilong God long nau?
19 Olsem wanem yumi inap kamap wanpela wokman bilong God long nau? Yumi mas mekim ol samting olsem Timoti i bin mekim. Yumi mas wok long strongim bilip bilong yumi bambai yumi bilip tru long ol samting God i laik mekim. Olsem na yumi mas stadi na lainim tok bilong Baibel; yumi mas bung wantaim ol narapela Kristen; yumi mas dediket long God, olsem beten long God na tok promis long mekim wok bilong em kirap long dispela taim na i go, na yumi mas kisim baptais bilong makim dispela samting; yumi mas larim Lain Bilong Bosim kongrigesen Kristen ol i stiaim tingting bilong yumi na soim rot long yumi. (Hibru 10:23-25; Matyu 24:45-47) Husat ol i save insait long dispela wok bilong God? Olgeta manmeri i bilip tru long ol samting God i laik mekim na dispela bilip i kirapim ol long mekim wok na ol i kisim stretpela save. Taim yumi autim tok bilong Jehova, olsem ol witnes Kristen bilong em, dispela samting i kamapim bilip bilong yumi, yumi bilip tru.—Jems 2:17.
20, 21. (a) Olsem wanem long wok bilong ol misin bilong Krisendom na i gutpela God i bin kirapim sampela manmeri bilong mekim wok bilong Em? (b) Ol dispela wokman tru bilong God i save mekim wok long wanem wanem ol hap?
20 Ol pris pasto bilong ol misin bilong Krisendom ol i tok ol i wokman bilong God, tasol nau long las taim ol i save autim tok long wok sori narapela man i mas mekim long narapela man na ol i autim ol tok politik, na ol i gat askim long God em i stap o nogat na Baibel em inap helpim ol man bilong nau o nogat. Na lain bilong ol misin bilong Krisendom ol i no gat tingting long mekim wok bilong God. Olsem na yumi mas tenkyu tru long God, long wanem em i bin kirapim sampela man bilong mekim wok bilong em na tokim ol narapela man long nem bilong Em. Ol dispela wokman tru bilong God ol i helpim ol man i gat gutpela bel. Ol i lainim ol long ol bikpela tok i tru bilong God long Baibel. Ol dispela wokman tru bilong God ol inap olsem 2 milion samting. God i helpim ol na ol i mekim wok bilong helpim ol manmeri bilong olgeta hap.
21 Tasol man i mas mekim wanem na bai ol man i ken save em i wanpela wokman tru bilong God? Orait, narapela tok i kamap bihain bai stori long dispela samting.
Ol dispela ves bilong Baibel i tok wanem long wok Kristen yumi mas mekim?
□ Mak 1:38
[Piksa long pes 18]
Yu ting ol wokman bilong God i mas mekim dispela kain wok?
[Piksa long pes 19]
Sampela man i mekim wok bilong God ol i mekim wok tisa insait long kongrigesen tu
[Piksa long pes 20]
Olgeta manmeri i bilip tru ol i mas mekim wok olsem ol wokman Kristen bilong God