Nupela Wok Bilong Save Bilong God
“ORAIT God i tokim Moses, ‘MI MAS MEKIM KAMAP LAIK BILONG MI YET.’ Na God i tok moa, olsem: ‘Yu mas tokim ol Isrel, “MI MAS MEKIM KAMAP em nem bilong God. Na em i bin salim mi na mi kam long yupela.”’” (Eksodas 3:14, NW ) Jehova i tokim Moses, bipo ol wokboi bilong Em i no bin save long insait tru bilong nem bilong Em, tasol nau ol i mas save, em i gat laik bilong Em na em i save kamapim laik bilong em. Olgeta samting em i tingting long mekim, em i save mekim kamap tru. Sapos sampela samting i kamap na em i mas senisim pasin o rot bilong em long kamapim laik bilong em, orait em inap senisim, tasol bai em i kamapim laik bilong em. Em i gat bikpela save tru inap long mekim olsem!
Seten yet i no pilim insait tru bilong nem bilong God. Ating em i no save long diwai bilong givim laip, em dispela diwai i stap long Gaden Iden. Sapos em i bin pulim Adam tupela Iv i go long dispela diwai, bai Jehova i truim tok bilong em olsem wanem? Long wanem em i bin tok, sapos tupela i mekim sin, ol i mas dai, tasol em i tok dispela diwai em i diwai bilong givim laip. (Jenesis 2:9; 3:1-6) Maski wanem samting i kamap, bai Seten i lus.
Nau God i kirap long kamapim gutpela save bilong em bipo i stap hait na ol pikinini spirit bilong em i no bin save long en. (Lukim Efesas 3:10.) Em i kirap long mekim sampela tok na sampela samting, em bihain bihain bai kamapim long ples klia bikpela save bilong em na strong bilong em bilong kamapim laik bilong em, em i laik bai ol gutpela man i pulap long graun na ol i ken i stap amamas na i stap oltaim long Paradais. (Jenesis 1:27, 28) Seten i mekim planti samting bilong pasim rot bambai God i no ken kamapim laik bilong em, tasol God i daunim ol dispela wok bilong Seten.
Tok i Stap Hait Em i Kamap Ples Klia
Pasin bikhet i kamap pinis long namba wan taim na wantu God i kirap mekim sampela samting. Pastaim em i mekim kot long namba wan man na meri, em tupela i gat asua, na em i bihainim lo bilong em i tok tupela i mas i dai, long wanem tupela i bin sakim tok. Na olsem wanem long Adam na Iv na dispela diwai bilong givim laip? “Bihain Yawe God i tok, ‘Man i save pinis long wanem samting i gutpela na wanem samting i nogut, na em i kamap olsem yumi. Orait yumi no ken larim em i go klostu long dispela diwai bilong givim laip. Nogut em i kaikai pikinini bilong dispela diwai tu na em i stap oltaim.’ Olsem na Yawe God i rausim man long gaden i stap long Iden.”—Jenesis 3:17-23.
Long dispela taim God i kirap tu long mekim wok olsem wanpela Evanselis o Man bilong autim gutpela tok. Em i kirap mekim namba wan tok profet: “Na Yawe God i tok long snek olsem: ‘․․․ bai mi mekim yu birua long meri, na meri i birua long yu. Na bai mi mekim ol lain bilong yu i birua long lain bilong meri. Bai em i krungutim het bilong yu, na bai yu kaikaim lek bilong em.”’ (Jenesis 3:14, 15) Sampela handet yia bihain, aposel Pol i stori gut olsem: “Nau olgeta [man] i stap nogut na i save bagarap. I no long laik bilong ol yet. Nogat. God yet i kalabusim ol i stap olsem, bai ol i wetim gutpela samting God i laik mekim long ol.”—Rom 8:20.
Yes, bai ol man i kalabus long i dai ol i kisim long Adam, tasol God i tokaut long gutpela samting em i laik mekim, em i laik kisim bek ol lain bilong Adam ol i bihainim tok. Tasol olsem wanem em i ken kisim bek ol man na bihainim yet lo bilong em i tok i dai em i pe bilong sin? Gutpela save bilong God bipo i stap hait, nau em i mas kamap ples klia. “Long olgeta taim bipo dispela tok i stap hait long ai bilong olgeta lain man.” (Kolosi 1:26; 1 Korin 2:7, 8) Ol bilipman bilong bipo i no save long dispela tok i stap hait, tasol ol i save God bai wokim rot na kisim bek ol. Ol ensel tu i laik save olsem wanem bai Jehova i kamapim laik bilong em! (1 Pita 1:10-12) Yu save long dispela tok i stap hait?
Baim Bek Ol
Insait long planti handet yia, Jehova i wok long skruim sampela tok moa long tok promis em i bin mekim long pastaim. Em i tokim bilipman Ebraham, Ebraham bai kamapim wanpela pikinini na long rot bilong dispela pikinini, olgeta man i bihainim tok bai ol i kisim blesing. (Jenesis 22:15-18) Long rot bilong Jekop, God i tokaut olsem dispela pikinini bai kamap king na em bai kamap long lain bilong Juda. (Jenesis 49:10) Long dispela taim bipo, ol bilipman i bilip olsem ol man i dai pinis bai ol i kirap bek, tasol ol i no save gut olsem wanem dispela samting bai kamap. (Jop 14:14, 15; Hibru 11:19) Bihain tru, God i mekim tok promis bilong Devit na em i tok, dispela King o Mesaia bai kamap long lain bilong Devit, na em bai stap king inap long taim bihain bihain.—2 Samuel 7:16.
Olgeta profet i mekim sampela tok i givim sampela save long ol man long dispela tok i stap hait, tasol ol i no save olgeta long en. Bihain, Mesaia o Krais i kam, na nau dispela kain kain gutpela save bilong God i kamap ples klia. Dispela tok i makim Krais Jisas na wok em i mekim bilong givim laip bilong em bilong baim bek ol man. Dispela i olsem as na nau olgeta samting Jehova i laik mekim long rot bilong Kingdom em inap kamap. Yu save gut long dispela pe bilong baim bek ol man?
Long Rom sapta 5 na 6, Pol i stori gut long dispela samting. Long Rom 5:12 em i stori long Adam i bin mekim sin na long dispela rot sin na i dai i kisim yumi olgeta man. Na Pol i tok, long dispela wanpela sin bilong Adam, em man i gutpela olgeta, yumi olgeta lain bilong em i save dai. Na i gat wanpela rot bilong stretim dispela samting, em olsem: Narapela man i gutpela olgeta em i mas givim laip bilong em bilong baim bek ol samting i lus. Dispela man em Jisas Krais. (Rom 5:15-21; lukim tu 1 Timoti 2:5, 6.) Olsem wanem Jisas inap givim dispela pe bilong baim bek ol man? Long wanem em i Pikinini bilong God, olsem na “em i holi, na i no gat wanpela rong i stap long em. Em i klin olgeta. Em i no olsem sinman liklik. Nogat. Em i narakain tru.” (Hibru 7:26; Luk 1:32, 33) Yumi no ken stori long olsem wanem Jisas i kamap man long graun. Ensel Gebriel i tokim Maria, mama bilong Jisas, i no gat wanpela samting God i no inap mekim. (Luk 1:37) Olsem na tru, wanpela meri bilong lain bilong Adam em i karim Jisas, tasol Jisas em i Pikinini bilong God, olsem na em i gutpela olgeta. Blut o laip bilong em i winim tru blut bilong ol planti planti animal ol pris long lain bilong Eron i bin kilim olsem ofa long haus lotu long Jerusalem. Jisas em i “Pikinini Sipsip Bilong God. Em i tekewe sin bilong olgeta manmeri long graun.”—Jon 1:29; 3:16.
Tasol olsem wanem? God inap mekim dispela wok long rot bilong Jisas na bihainim yet stretpela pasin? Sapos God i kirapim bek Pikinini bilong em long namba tri de na givim laip gen long em, orait westap dispela pe bilong baim bek ol man? Pol i tok, God i kamapim long ples klia stretpela pasin bilong em. Pol i tok: “God i marimari long yumi. Na long wok Krais Jisas i mekim bilong baim bek yumi, God i save kolim yumi stretpela manmeri. Yumi no baim dispela. God i givim nating long yumi long han bilong Krais Jisas. Bipo God i bin makim Jisas bai i dai na blut bilong en i kam daun bilong tekewe sin bilong olgeta man i bilip long em. Long dispela pasin God i soim yumi pasin em i mekim bilong kolim yumi stretpela manmeri. Bipo God i isi long ol manmeri na i no bekim kwik pe nogut bilong sin ol i mekim. Tasol nau long dispela taim em i soim yumi stretpela pasin bilong em long ples klia [em i mekim pasin marimari na lusim sin ol man i bin mekim bipo]. Na yumi ken save, God yet i stretpela olgeta. Na olgeta manmeri i bilip long Jisas em i save kolim ol stretpela manmeri.” (Rom 3:24-26) Wanem insait bilong dispela tok? I olsem: Jisas em i kamap wanpela man bilong graun em i gutpela olgeta, na em i dai olsem man, na inap long olgeta taim bihain em i no ken kisim bek laip olsem man. Em i dai olsem ofa “wanpela taim tasol.” (Hibru 7:27) Olsem na i gat pe bilong baim bek ol man. Jisas i dai olsem man, na long namba tri de “long spirit em i kirap na i stap laip.”—1 Pita 3:18.
Nupela Kontrak na Nupela Lain
Nau yumi lukim bikpela samting bilong dispela tok i stap hait em i kamap tru. Jisas i stap gut long God i go inap long taim em i dai, olsem na Jehova inap makim em i kamap Hetpris na King. Blut bilong em i kapsait na dispela i strongim nupela kontrak. Dispela nupela kontrak i bilong kamapim nupela lain ol i bilong mekim wok king na wok pris wantaim Jisas long heven. (Revelesen 5:9, 10; 20:4, 6) God i mekim ol i kamap “nupela man”—em gutpela samting tru!—Galesia 6:15, 16.
Yu tingim: Long rot bilong Krais Jisas, God i makim sampela man na meri bilong graun. Em i mekim pasin i stret wantaim lo na em inap kolim ol stretpela manmeri na singautim ol bilong kamap pikinini spirit bilong em. Taim ol i dai pinis na long taim God i makim, em i kirapim bek ol na givim laip long ol long heven, olsem em i bin mekim long Jisas, em laip i no inap bagarap. (1 Pita 1:3, 4) Em i bilip tru long dispela lain ol i olsem “nupela man”; em i bilip tru olsem ol bai stap gut long em! Dispela i bekim tru tok bilong dispela man i bin sutim tok giaman long ol na kotim ol long ai bilong God. (Revelesen 12:10) Ol i kisim laip long heven wantaim Jisas, em laip i no inap bagarap, na ol i no ken lusim Jehova. Nogat tru. Tasol i gat sampela samting moa tu.
Paradais long Graun
Krais Jisas wantaim ol dispela wanwok bilong em long heven, bai ol i mekim wok king na wok pris na bai ol i kamapim laik bilong Jehova long graun long taim bilong 1,000 yia. Jisas bai mekim wok long pe em i bin givim bilong baim bek ol man na bai em i kirapim bek ol man i stap long matmat. Ol man i kirap bek na ol i stap gut long God, na ol manmeri i abrusim bagarap taim dispela pasin nogut bilong nau i pinis, bai skin na tingting bilong ol i kamap gutpela olgeta. Na bai graun i kamap gutpela ples paradais. Olgeta man i winim laspela traim Seten i kamapim, God bai givim laip i stap oltaim long ol. Seten na ol lain nogut bilong em bai pinis olgeta. Gutaim bai kamap, na bai olgeta man i stap wanbel. Dispela samting bai stretim bek nem bilong em, em i Bos tru bilong heven na graun na i stret em i bosim ol samting long pasin bilong sori. Bai ol ensel na ol man i kamapim pinis bel bilong ol, ol i givim bel tru long God, em i Man bilong wokim ol.—Revelesen, sapta 20.
Nau yumi inap save gut long dispela tok i stap hait. Yumi lukim save bilong God long ol diwai na ol animal samting em i bin wokim, tasol nau yumi lukim gutpela save tru bilong em. I gat gutpela as na yumi ken tok: “Olaman! Tingting bilong God na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. ․․․ Em i as bilong olgeta samting. Na em i papa bilong olgeta samting. Na olgeta samting i bilong em wanpela tasol. Yumi mas litimapim nem bilong em oltaim oltaim. Tru.”—Rom 11:33-36.
[Piksa long pes 7]
I gat rot bilong stretim ol samting i kamap long dispela wanpela sin Adam, man i gutpela olgeta, i mekim. Em wanem rot? Narapela man i gutpela olgeta em i mas givim laip bilong em. Dispela man em Jisas.