Jehova i Save Givim Gutpela Pe Long Ol Man i Strongim Bel na Bilip Tru
“God bilong mipela, em mipela i mekim wok bilong em, em inap helpim mipela. Yes king, em bai kisim bek mipela long dispela draipela paia na long han bilong yu. O king, tru tumas em bai helpim mipela.”−DANYEL 3:17, NW
1. Long tok i kamap paslain long dispela, yumi bin stori long God i skulim ol man long wanem samting? Bilong wanem i gutpela yumi skelim gen ol dispela stori?
GOD JEHOVA em i King bilong heven na graun na em i bin skulim ol king bilong graun bambai ol i save, em yet em i Nambawan Bikpela. Danyel sapta 1 i go inap sapta 6 i stori long sampela taim God i bin mekim olsem, na yumi bin skelim ol dispela stori long tok i kamap paslain long dispela. Nau yumi ken skelim gen ol dispela stori bambai ol i ken skulim yumi olsem aposel Pol i tok: “Olgeta tok ol i bin raitim bipo, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na bilip na wetim God i kisim yumi.”−Rom 15:4.
2, 3. Husat ol i stap long dispela lain em King Nebukatnesa i kisim ol i go kalabus long Babilon? Sapos yumi skelim insait bilong nem bilong ol, yumi ken save long wanem samting?
2 Long yia 617 paslain long Krais, long taim Jehoiakin, em pikinini man bilong King Jehoiakim, em i stap king inap liklik taim, King Nebukatnesa i tok ol i mas kisim sampela yangpela man bilong lain Juda i go long Babilon, em ol yangpela man i gat gutpela skin na gutpela save na tingting. Danyel, na Hananaia, na Misel, na Asaraia, ol i insait long dispela lain.−Danyel 1:3, 4, 6.
3 Sapos yumi skelim insait bilong nem bilong fopela, yumi ken save, papamama bilong ol i save lotuim God Jehova, maski planti man long Juda long dispela taim ol i mekim pasin nogut. Insait bilong nem “Danyel” i olsem “God Em i Jas Bilong Mi.” Insait bilong nem bilong Hananaia i olsem “Jehova i Bin Mekim Pasin Marimari; Jehova i Bin Mekim Pasin Sori.” Na insait bilong nem bilong Misel i olsem “Husat i Kain Olsem God?” o “Husat Em i Bilong God?” Na insait bilong nem bilong Asaraia i olsem “Jehova i Bin Helpim [Mi].” Ating nem bilong ol i helpim ol long i stap gut long dispela wanpela God em i God tru. Ol Babilon i senisim nem bilong fopela na kolim ol Beltesasa, na Satrak, na Misak, na Abetnigo. Ol i stap kalabus long han bilong gavman bilong narapela lain, olsem na ol i no inap makim wanem nem ol i mas kolim long ol.−Danyel 1:7.
Traim Bilip Bilong Ol na Pasin Bilong Ol long Sanap Strong
4. Wanem samting i makim olsem Jehova i laik bai lain bilong em i mas tingim gut ol lo bilong em i makim abus ol i ken kaikai na abus ol i no ken kaikai?
4 Papamama bilong dispela fopela yangpela Hibru ol i lotuim God Jehova na ol i bin helpim gut pikinini bilong ol, long wanem ol i givim gutpela nem long ol na ol i bin lainim ol gut long ol lo bilong Moses, em sampela lo i tambuim sampela kaikai. God Jehova yet i tingim ol dispela lo i bikpela samting tru, olsem na em i kolim planti kain tambu olsem na bihain em i tok: “Mi stap holi, olsem na yupela tu i mas i stap holi.”−Levitikas 11:44, 45, NW.
5. Papamama i bin lainim gut dispela fopela yangpela Hibru long ol lo bilong Jehova, tasol bihain wanem traim i painim fopela long dispela?
5 Papamama i bin lainim gut dispela fopela yangpela Hibru long ol lo bilong Jehova, tasol liklik taim na traim i painim ol, bai ol i stap gut long ol dispela lo o nogat. Traim i painim ol olsem wanem? Long wanem “king i makim kaikai bilong ol bilong wanpela wanpela de, em sampela kaikai na wain bilong king yet.” (Danyel 1:5, NW ) Fopela i save, Lo bilong Moses i tambuim ol kain abus olsem pik na rabit na kina na maleo. Na maski Lo i orait long sampela abus em ol lain long haus bilong king bilong Babilon i save kaikai, tasol fopela i mas was gut, long wanem ol i no save dispela abus i gat blut long en o nogat, o ol Babilon i bin ofaim long ol god giaman samting.−Levitikas 3:16, 17.
6. Traim i painim fopela, tasol fopela i mekim wanem?
6 Dispela fopela yangpela Hibru i ken mekim wanem? Baibel i tok Danyel, na ating narapela tripela tu, i pasim tok long bel bilong em long em i no ken kaikai ol dispela kain abus na bai em i ken i stap klin. Olsem na em i “wok long tokim” ol long givim kumu sayor tasol long em na ol i no ken givim ol gutpela gutpela kaikai bilong king long em, na em i tokim ol em i laik dring wara nating, maski wain bilong king. Dispela fopela yangpela Hibru i no tingting liklik long wanem kain kaikai i swit moa. Ol i tingting tasol long bihainim lo bilong Jehova. Ol i mas strongim bel na bilip tru bambai ol inap sanap strong olsem. Jehova i tingim fopela, olsem na em i kirapim tingting bilong hetman bilong haus bilong king na em i sori long Danyel. Tasol hetman i pret, nogut em i orait long Danyel i kaikai kumu sayor tasol na skin bilong Danyel i bagarap na em i gat sik. Olsem na Danyel i tok, gutpela sapos ol i larim fopela i kisim dispela kain kaikai inap 10-pela de na bihain ol i ken skelim, dispela i nogutim skin bilong ol o nogat. Danyel i gat strongpela bilip. Em i bilip tru olsem sapos em i bihainim Lo bilong God, dispela bai helpim em bambai bel bilong em i no gat tok, na dispela bai helpim skin bilong em tu. Fopela i laik holimpas lo bilong God na ating dispela i kirapim ol man long mekim planti tok bilas long ol, tasol fopela i sanap strong long dispela traim.−Danyel 1:8-14, NW; Aisaia 48:17, 18.
7. Dispela fopela yangpela Hibru i sanap strong na ol i kisim wanem gutpela pe?
7 Fopela hia i mas strongim bel na bilip tru bambai ol inap sanap strong na bihainim lo bilong God long kaikai. Tasol God Jehova i givim gutpela pe long ol! Tenpela de pinis na skin bilong ol i kamap gutpela moa, winim tru skin bilong ol narapela. Na Jehova i wok long givim gutpela save na tingting long ol, olsem na taim 3-pela yia bilong ol i pinis na ol i go sanap long ai bilong king, king i kisim save olsem: “Ol i gat gutpela save na tingting, winim inap 10-pela taim save bilong olgeta glasman na olgeta saveman i stap long olgeta hap em i bosim.”−Danyel 1:20, NW.
8. Dispela samting i kamap long bipo inap givim wanem tingting long ol wokboi bilong Jehova long nau?
8 Ol samting i painim fopela i mas givim tingting long olgeta wokboi bilong Jehova long nau. Dispela fopela yangpela Hibru inap ting olsem ol tambu bilong kaikai long Lo bilong Moses i no bikpela samting olsem o1 Tenpela Lo o ol lo i makim ol ofa na ol bikpela bung ol i mas mekim long olgeta yia. Tasol fopela i no ting olsem. Fopela i tingting strong long bihainim olgeta liklik liklik hap bilong Lo bilong God. Dispela i kirapim yumi long tingim lo Jisas i kolim long Luk 16:10, em i tok: “Sapos wanpela man i save lukaut gut long liklik samting, orait bai em i save lukaut gut long bikpela samting tu. Na man i no save wok stret long liklik samting, bai em i no save wok stret bai em i no save long bikpela samting tu.”−Lukim tu Matyu 23:23.
9. Olsem wanem sampela Witnes long nau tu i bin sanap strong olsem?
9 Planti taim ol Witnes Bilong Jehova long nau tu ol i mekim wankain strongpela pasin. Ol i strongim bel na bilip tru, olsem na ol i no pret long tokim bos ol i laik kisim de-of bambai ol inap i go long kibung distrik. Planti taim bos i orait long ol Witnes i kisim de-of olsem, tasol em i no orait long ol narapela i kisim. Na ol Witnes i laik kamap painia oltaim o mekim wok painia haptaim, ol i strong long tokim bos ol i laik wok long sampela de tasol long wik, olsem wok haptaim tasol, na planti taim bos i orait long dispela.
10. Olgeta dispela samting inap skulim ol papamama Witnes long wanem samting?
10 Papamama bilong dispela fopela yangpela Hibru ol i bin lainim gut ol dispela pikinini bilong ol. Dispela samting inap skulim gut ol papamama long nau, em ol i save lotuim God na aninit long em! Taim papamama Kristen i tingting tru long helpim ol pikinini bilong ol long ol samting bilong spirit, ol i save tingim dispela samting pastaim, olsem Matyu 6:33 i tok. Na taim ol i mekim olsem, orait ol i ken bilip olsem bai ol pikinini bilong ol inap sanap strong na sakim ol hevi na traim i kam long ol long rot bilong ol wanlain bilong ol o ol tisa long skul, em ol i laik pulim ol long mekim ol samting bilong betde na ol bikpela de o mekim narapela samting i kalapim lo bilong Baibel. Long dispela rot ol dispela papamama i lotuim God na aninit long em ol i kamapim long ples klia olsem tok bilong Provep 22:6 em i stret.
Em i No Pret long Kamapim As Bilong Ol Driman Bilong Nebukatnesa
11. Olsem wanem yumi ken bihainim pasin bilong Danyel na tripela poroman bilong em long nau?
11 Danyel sapta 2 i stori long narapela taim Danyel wantaim tripela poroman bilong em i bin strongim bel na bilip tru. Taim Danyel i harim tok olsem king i laik kilim i dai olgeta saveman bilong Babilon, long wanem ol i no inap tokim em long driman bilong em na kamapim as bilong en, yu ting Danyel wantaim tripela poroman bilong em i pret? Nogat tru! Danyel i bilip tru olsem Jehova bai givim save long em long driman bilong king, olsem na em i go askim king long givim liklik hap taim long em bambai em inap kisim dispela save. King i orait long em, na nau Danyel wantaim tripela poroman bilong em i beten strong long Jehova. Ol i bilip tru, olsem na Jehova i harim beten bilong ol na givim dispela save long Danyel. Na nau Danyel i beten tok tenkyu long Jehova. (Danyel 2:23) Na taim Danyel i kamapim as bilong driman, em Danyel sapta 4 i stori long en, em i mas tokim King Nebukatnesa, inap7-pela yia bai Nebukatnesa i stap olsem wanpela animal wantaim ol wel abus. Danyel i mas strongim bel na bilip tru bambai em inap autim kain tok olsem. Na olsem tasol long nau, ol manmeri bilong God i mas strongim bel na bilip tru bambai ol i no pret long autim strongpela tok olsem God bai bekim pe nogut long ol lain bilong Seten.
“Mekim Draipela Paia i Dai”
12, 13. Danyel sapta 3 i stori long wanem traim i painim tripela poroman bilong Danyel?
12 Long Danyel sapta 3 i gat wanpela bikpela stori bilong Baibel long gutpela pasin Jehova i save mekim long ol wokboi bilong em i bilip tru long em na ol i no pret. Danyel sapta 3 i stori long strongpela bilip bilong tripela poroman bilong Danyel, em ol i no pret liklik. Long tingting bilong yu, lukim piksa olsem: Olgeta bikman bilong Babilon ol i bung long ples Dura. Long ai bilong ol wanpela draipela piksa gol i sanap i stap, em i go antap inap 27 mita na em i braitpela inap 2.7 mita. Bilong kirapim bel bilong ol, king i putim ol lain bilong winim biugel samting. Taim ol i winim biugel, olgeta man i mas ‘brukim skru na lotuim dispela piksa gol em King Nebukatnesa i bin sanapim. Na ol man i no brukim skru na lotuim dispela samting, bai ol i tromoi ol i go insait long draipela paia.’−Danyel 3:5, 6.
13 Tru tumas, ol man i sakim dispela tok ol i mas strongim bel na bilip tru. Tasol dispela tripela Hibru i bin ‘lukaut gut long liklik samting,’ olsem na dispela inapim ol long ‘lukaut gut long bikpela samting tu.’ Tru, taim ol i sakim tok bilong king, dispela inap givim hevi long ol narapela Juda, tasol ol i no ken brukim skru na lotuim dispela piksa. Sampela man i bel nogut long tripela na ol i lukim tripela i sakim tok bilong king, olsem na kwiktaim i go toksave long king.
14. Taim tripela i no laik lotuim dispela piksa, Nebukatnesa i tok wanem? Na tripela i bekim wanem tok long em?
14 Nebukatnesa i “belhat nogut tru” na em i tokim ol man long kisim tripela Hibru hia i kam long em. Em i tokim tripela: “Tru yupela i no laik lotuim . . . dispela piksa gol?” Olsem na yumi save em i kirap nogut tru long dispela pasin ol i mekim, em ol i no laik brukim skru na lotuim dispela piksa gol. Em i tok, em bai givim taim long ol, tasol sapos wanpela taim moa ol i no lotuim dispela piksa, bai em i tromoi ol i go insait long draipela paia. Na dispela king bilong Babilon i hambak na tok olsem: “Wanem god em inap kisim bek yupela long han bilong mi?” Tripela Hibru hia i no pret. Ol i strongim bel na bilip tru long Jehova, na long pasin isi ol i bekim tok long king, olsem: “I no gat lo i tok mipela mas bekim tok long yu. Tasol sapos yu mekim dispela samting, God bilong mipela, em mipela i mekim wok bilong em, em inap helpim mipela. Yes king, em bai kisim bek mipela long dispela draipela paia . . . O king, tru tumas em bai helpim mipela. Na sapos nogat, O king yu mas save, mipela i no save bihainim ol god bilong yu, na dispela piksa gol yu bin sanapim, mipela i no ken lotuim.”−Danyel 3:13-18, NW.
15. Olsem na Nebukatnesa i mekim wanem?
15 Pastaim Nebukatnesa i belhat long tripela, tasol nau em i belhat moa moa yet na “pes bilong em i senis olgeta.” (Danyel 3:19, NW ) Olsem na em i tok long mekim paia i hat moa yet. Na sampela strongpela man long ami bilong em ol i holim tripela na tromoi ol i go insait long dispela draipela paia. Paia i bikpela tru na i kilim i dai ol man i tromoi tripela.
16. Tripela Hibru i bilip tru na God i givim wanem gutpela pe long ol?
16 Tasol king i kirap nogut, long wanem em i lukim fopela man i wokabaut insait long paia na paia i no bagarapim ol liklik! King i singautim tripela Hibru i kam ausait na em i lukim olsem i no gat wanpela liklik hap gras long het bilong ol em paia i bin kukim, na i no gat smel bilong paia long klos bilong ol. Ol i no pret, ol i bilip tru long Jehova na em i givim gutpela pe long ol! Ating aposel Pol i tingim tripela hia taim em i stori long ol bilipman bilong bipo na em i tok, sampela “i mekim draipela paia i dai.” (Hibru 11:34) Ol i stap olsem gutpela piksa bilong olgeta wokboi bilong Jehova i kamap bihain long ol!
17. Sampela wokboi bilong Jehova long nau i mekim wanem na ol tu i stap olsem gutpela piksa?
17 Long nau ol man i no tok long tromoi ol wokboi bilong Jehova i go insait long draipela paia, tasol i gat wankain bikpela traim i bin painim planti, long wanem ol i no laik lotuim ol samting i olsem mak bilong kantri. Na bikpela traim i painim sampela, long wanem ol i holimpas lo bilong God na ol i no baim kat bilong makim ol i bilong wanpela lain politik o ol i no insait long ami. Jehova i bin helpim olgeta dispela wokboi bilong em, olsem na ol inap long sanap strong na winim ol dispela traim. Long dispela rot ol i kamapim long ples klia olsem Seten em i man bilong giaman na Jehova em i God tru.
Narapela Gutpela Piksa Bilong Pasin Bilong Strongim Bel na Bilip Tru
18. Olsem Danyel 5:3, 4 i tok, Belsasa i mekim wanem na i olsem em i ting Jehova, em God bilong ol Juda, em i samting nating?
18 Danyel sapta 5 i stori long narapela gutpela piksa bilong pasin bilong strongim bel na bilip tru. Belsasa, em king bilong Babilon, em i wokim bikpela kaikai na singautim wan tausen bikman na ol meri na ol namba tu meri bilong em i kam. Long dispela kaikai ol i dring long ol kap holi ol i bin stilim. Wantu narapela kain rait .i kamap long banis. King i lukim na em i pret nogut tru na olgeta skru bilong lek bilong em i guria. Long dispela taim tu ol i singautim Danyel, em wokboi bilong God tru, bilong kamapim as bilong dispela rait, long wanem i no gat wanpela saveman bilong Babilon em inap mekim.
19. Taim Danyel i kamapim as bilong rait i kamap long banis, wanem samting i kamap ples klia?
19 Danyel i kam sanap em wanpela tasol long ai bilong ol dispela bikpela man i birua long em. Tasol Danyel i no pret o haitim sampela tok; em i tingim gut bikpela wok em i mas mekim. Em i stap isi na long gutpela pasin em i autim klia ol tok bilong God bilong em. Danyel i no kamapim tasol as bilong dispela rait. Nogat. Em i kirapim tingting bilong king bambai king i tingim gen ol samting God Jehova i bin mekim bilong daunim tumbuna bilong king, em God i bin mekim tumbuna bilong em i stap olsem wanpela animal bilong bus bambai em i ken save, God Antap Tru em i Bos bilong ol man. Danyel i tokim Belsasa: “Yu bin save long olgeta dispela samting, tasol yu no bihainim pasin daun.” ‘Yu bagarapim ol kap holi bilong haus lotu bilong Jehova, na yu litimapim nem bilong ol god ol i bin wokim long silva na gol na bras na ain na diwai na ston, em ol god nating na ol i no inap lukim samting o harim tok na ol i no save long wanpela samting. Yu no litimapim nem bilong dispela God em i makim olgeta rot bilong yu. Olsem na em i givim dispela tok long yu, olsem: Em i skelim yu pinis na yu sot, na em i brukim kingdom bilong yu na givim pinis long ol Midia na Pesia.’ Long dispela taim tu Danyel i strongim bel na bilip tru, olsem na em i stap olsem gutpela piksa bilong ol wokboi bilong God long nau i ken bihainim pasin bilong em.−Danyel 5:22-28, NW.
20. Taim Darias i stap king, Danyel i mekim wanem na em i kamapim gen strongpela bilip bilong em?
20 Danyel sapta 6 tu i stori long gutpela pasin bilong strongim bel na bilip tru, em yumi ken bihainim. Nau Darias i stap king na em i givim bikpela namba long Danyel wantaim tupela man moa bilong bosim ol man. Sampela man i bel nogut long Danyel, long wanem em i kisim dispela bikpela namba, olsem na ol i kirapim king long putim lo na tok, inap 30 de ol man i no ken beten askim long wanpela god o wanpela man; ol i mas askim long king tasol. Ol i save i no gat narapela rot bilong painim rong long Danyel. Danyel i sakim dispela lo. Em i go long rum antap long rup bilong haus na opim windo na lukluk i go long Jerusalem na beten olsem em i save mekim long olgeta taim. Em i kalapim lo bilong king, olsem na ol i tromoi em go long hul bilong ol laion, em strafe dispela lo i kolim bilong man i kalapim dispela lo. Tasol Jehova i givim gutpela pe long Danyel, long wanem Danyel i bilip tru na em i no pret. God i mekim wanem? Olsem Hibru 11:33 i tok, Jehova i “pasim maus bilong ol laion.”
21. Stori bilong ol man i bin strongim bel na bilip tru, olsem i stap long Danyel sapta 1 i go inap long sapta 6, ol dispela stori i mas kirapim tingting bilong yumi na bai yumi tingting strong long mekim wanem?
21 Danyel sapta 1 i go inap sapta 6 i stori long ol samting em inap strongim tru bilip bilong yumi! God Jehova i givim gutpela pe long ol man i strongim bel na ol i bilip tru! Ol man i litimapim nem bilong ol, na God i wokim mirakel bilong lukautim ol na ol i no bagarap. Tru tumas, ol samting i bin painim ol dispela gutpela witnes long taim bilong traim em inap strongim bel bilong yumi, na mekim yumi sanap strong na bilip na wetim God i kisim yumi. Ol i bin raitim stori bilong ol dispela samting long Baibel bilong skulim yumi olsem! Olsem na yumi mas tingting strong long bihainim pasin bilong ol dispela man i. bin strongim bel na bilip tru.−Rom 15:4; Hibru 6:12.
Sampela Askim Bilong Kamapim Gen Ol Bikpela Tok
◻ Nem bilong fopela yangpela Hibru i helpim yumi long save, papamama bilong ol i bin mekim wanem?
◻ Ol Hibru i winim traim bilong kaikai na dispela i skulim yumi long wanem samting?
◻ Wanem ol traim i bin painim sampela wokboi bilong Jehova long nau kain olsem i bin painim tripela Hibru long bipo?
◻ Taim Danyel i autim tok long Belsasa, olsem wanem em i kamapim long ples klia olsem em i bilip tru na em i no pret?
[Piksa long pes 21]
Danyel na ol poroman bilong em i sakim samting i tambu