Husat Bai Abrusim Bagarap Long Taim Bilong “Bikpela Hevi Tru”?
‘Olgeta man i singaut long nem bilong Jehova, bai em i kisim bek ol.’—JOEL 2:32.
1. Wanem samting i olsem mak bilong ol manmeri God bai kisim bek ol long taim bilong “bikpela hevi tru,” olsem Daniel na Malakai i tok?
DANIEL i tok profet long taim bilong yumi olsem: “Na dispela man i olsem yumi man bilong graun, em i tok moa long mi Daniel olsem, ‘Long dispela taim namba wan ensel Maikel bai i kamap, em ensel i save lukautim yupela ol Israel. Long dispela taim bikpela hevi tru bai i kamap. Bipo kain hevi olsem i no bin kamap long wanpela kantri bilong graun. Taim dispela hevi i kamap, God bai i kisim bek olgeta manmeri bilong lain bilong yu, nem bilong ol i stap pinis long buk bilong em, na bai ol i stap gut.’ ” (Daniel 12:1) Dispela tok i strongim tru bel bilong yumi! Ol manmeri bilong lain Jehova i orait long en, em bai tingim ol, olsem Malakai 3:16 i tok: “Bihain ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long [nem bilong] em oltaim.”
2. Man i tingting long nem bilong Jehova, dispela i kirapim em long mekim wanem?
2 Ol man i tingting long nem bilong Jehova, dispela i kirapim ol long kisim stretpela save long em, na long Krais, na long olgeta gutpela wok em i laik kamapim long rot bilong Kingdom. Ol i lain long lotu long em, na ol i dediket long em na kamap pren bilong em, na ol i laikim em tumas ‘long bel olgeta na long save olgeta na long strong olgeta bilong ol.’ (Mak 12:33; Kamapim Tok Hait 4:11) Jehova i marimari long yumi, na long ofa bilong Krais Jisas em i opim rot bambai ol manmeri bilong pasin daun ol inap kisim laip i stap oltaim. Olsem na ol dispela manmeri inap bilip tru na mekim tok wankain olsem bikpela lain ensel long heven i bin mekim bilong litimapim nem bilong God taim mama i karim Jisas. Ol i tok: “Litimapim nem bilong God i save stap antap tru. Na long graun ol manmeri [God i belgut long ol] i ken stap bel isi.”—Luk 2:14.
3. Jehova i mas kirap mekim wanem samting pastaim, na bihain bai taim bilong bel isi i kamap long graun?
3 Dispela taim bilong stap bel isi i klostu nau na planti man i no save. Tasol pastaim strafe bilong Jehova i mas painim ol man nogut. Sefanaia, em wanpela profet bilong Jehova, i tok: “De bilong Bikpela i mekim kot bilong en, em i klostu nau na dispela De bai i kamap kwiktaim tru.” Em wanem kain de? Sefanaia i tok moa olsem: “Long dispela De nogut, maski ol man i strongpela soldia, ol tu bai i pret nogut na krai moa yet. Long dispela De, belhat bilong God bai i kamap ples klia, na bai ol manmeri i gat bikpela hevi na bel nogut, na bai ol samting i bagarap nabaut. Na ol klaut bai i karamapim san na bikpela tudak bai i kamap. Long dispela De ol biugel bai i krai na ol soldia bai i bikmaus na singaut long taim ol i mekim save pait long ol taun i gat strongpela banis na long ol longpela haus bilong ol wasman. Bikpela i tok olsem, ‘Ol manmeri i bin mekim sin long mi, olsem na bai mi mekim ol kain kain bagarap nogut tru i kamap long ol na bai ol i wokabaut olsem ol aipas.’ ”—Sefanaia 1:14-17; lukim tu Habakuk 2:3; 3:1-6, 16-19.
4. Husat long nau ol i bihainim singaut bilong kisim save long God na mekim wok bilong em?
4 Gutpela tru, long nau planti milion i bihainim singaut bilong kisim save long God na mekim wok bilong em. Baibel i tok profet long ol Kristen em God i makim ol na ol i insait long nupela kontrak, olsem: “Yupela i mas save long [Jehova].” (Jeremaia 31:34) Dispela liklik lain i bin go pas long wok bilong autim tok long taim bilong yumi. Nau planti moa bilong liklik lain remnan ol i wok long i dai na pinis long mekim wok bilong ol long graun, tasol planti “arapela sipsip” bilong ‘bikpela lain’ ol i kam bilong ‘mekim wok bilong God long san na long nait long haus bilong em.’ (Kamapim Tok Hait 7:9, 15; Jon 10:16) Olsem wanem? Yu insait long dispela gutpela wok tru yumi inap mekim?
“Ol Gutpela Samting” i Kam Insait
5, 6. Jehova bai mekim olgeta lain bilong graun i guria na bagarap, tasol wanem wok bilong kisim bek sampela man bai kamap pastaim?
5 Orait, nau yumi ken lukim tok bilong Hagai 2:7 (Baibel New World Translation). Long dispela ves Jehova i stori long haus bilong lotuim em, em bilong spirit, na em i tok em bai mekim olgeta lain “i guria.” Na “ol gutpela samting” bilong ol lain man bai pulap long haus bilong em. Ol tok profet bilong Baibel i makim olsem Jehova bai mekim olgeta lain “i guria” taim em i givim strafe long ol. (Nahum 1:5, 6; Kamapim Tok Hait 6:12-17) Olsem na Jehova bai pinisim dispela wok, em Hagai 2:7 i tok profet long en, taim Em i mekim olgeta lain i guria na bagarap—bai ol i pinis olgeta. Tasol olsem wanem long “ol gutpela samting” bilong ol dispela lain, olsem ol gutpela manmeri i kam pulap long haus bilong em? Yu ting ol i mas wetim dispela bagarap i kamap pastaim na bai ol i kam insait? Nogat.
6 Long Joel 2:32 Jehova i tok, “olgeta manmeri i askim mi long helpim ol, bai mi kisim bek ol. Mi Bikpela, mi tok pinis olsem, sampela manmeri i stap long Jerusalem bai i no ken lus. Ol dispela manmeri mi makim bilong mi yet, ol bai i stap gut.” Jehova i makim ol dispela manmeri bilong em yet, olsem em i singautim ol i kam, na ol i askim em long helpim ol, olsem singaut long nem bilong em, na ol i bilip long ofa bilong Jisas. Ol i mekim ol dispela samting paslain long taim bilong bikpela hevi tru, em taim Jehova bai mekim olgeta lain i guria na bagarap. (Skelim Jon 6:44; Aposel 2:38, 39.) Gutpela tru, ‘bikpela lain,’ nau ol i winim 4 milion, ol i ‘kam insait’ long haus bilong lotuim Jehova, long wanem ol i save, em bai mekim olgeta lain “i guria” long Armagedon.—Kamapim Tok Hait 7:9, 10, 14.
7. Man i mas mekim wanem na bai i olsem em i “singaut long nem bilong Jehova”?
7 Ol dispela man i abrusim bagarap, olsem wanem ol i askim Jehova long helpim ol, o “singaut long nem bilong Jehova” (Joel 2:32, NW)? Jems 4:8 i helpim yumi long save. Dispela ves i tok: “Yupela i mas i go klostu tru long God, na em bai i kam klostu tru long yupela. Yupela man bilong sin, bel bilong yupela i mas kamap klin, olsem man i wasim han bilong en na i kamap klin. Yupela man i gat tupela tingting, yupela i mas rausim dispela tingting nogut long bel bilong yupela.” Olsem lain remnan i bin mekim, olsem tasol olgeta manmeri i laik insait long ‘bikpela lain’ i abrusim bagarap long Armagedon, ol i mas lusim pasin bilong holim tupela tingting—ol i mas kirap tasol na mekim wok. Sapos yu laik abrusim bagarap, yu mas save gut long ol tok bilong Jehova long Baibel, em inap mekim yu i kamap klin, na yu mas kirap bihainim ol stretpela lo bilong Jehova. Yu mas givim laip bilong yu long Jehova, olsem dediket long em, na yu mas kisim baptais long wara bilong makim dispela. Na tu, sapos yu bilip na singaut long nem bilong Jehova, yu mas autim tok bilong em long ol man. Olsem na long Rom sapta 10 ves 9 na 10, Pol i raitim tok olsem: “Sapos yu tokaut klia long Jisas em i Bikpela, na sapos long bel bilong yu yu bilip long God i bin kirapim bek em long matmat, orait bai God i kisim bek yu. Long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi.” Na long ves 13 Pol i kamapim tok profet bilong Joel na em i tok klia olsem: “Olgeta manmeri i askim Bikpela long helpim ol [singaut long nem bilong Jehova], em bai i kisim bek ol.”
‘Mas, Mas, Mas’
8. (a) Yumi mas mekim wanem, olsem Sefanaia i tok, na bai Jehova i kisim bek yumi? (b) Sefanaia i tok, “sapos yupela i mekim olsem,” na dispela tok i givim wanem tingting long yumi?
8 Long hap bilong Baibel ol i kolim Sefanaia, long sapta 2, ves 2 na 3, Baibel i kolim ol samting Jehova i tok yumi mas mekim na bai em i kisim bek yumi, olsem: “Nogut God i kamapim belhat bilong en na wantu bai yupela i bagarap olsem ol plaua i drai. Nogut belhat bilong Bikpela i kamap na kukim yupela olsem paia. Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.” Yu lukim dispela tok “sapos yupela i mekim olsem”? Dispela i givim tingting long yumi olsem: Man i bilip pinis, i no olsem em i no inap lus. Bilong abrusim bagarap, i gat 3-pela samting yumi mas wok oltaim long mekim. Yumi mas kam long Jehova, na yumi mas daunim yumi yet, na yumi mas mekim pasin i stret.
9. Ol man i wok long daunim ol yet ol i kisim wanem gutpela pe?
9 Ol man i wok long daunim ol yet ol i kisim gutpela pe tru! Long Buk Song 37, ves 9 i go 11, Baibel i tok: “Ol manmeri i bilip na wetim Bikpela i helpim ol, bai ol i stap gut long graun bilong ol. I no longtaim na bai ol man nogut i lus olgeta. . . . Tasol ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.” Na olsem wanem long mekim pasin i stret? Buk Song 37 Ves 29 i tok: “Ol stretpela man bai i kisim graun God i givim ol, na bai ol i stap oltaim long en.” Na olsem wanem long i kam long Jehova? Buk Song 37 Ves 39 na 40 i tokim yumi: “Bikpela yet i save kisim bek ol stretpela man. Long taim hevi i kamap long ol, ol i save ran i go long em na em i lukautim ol. Ol i save bilip long em. Olsem na em i save helpim ol, na em i save kisim bek ol long han bilong ol man nogut, na ol i stap gut.”
10. Husat ol i no bin kam long Jehova o daunim ol yet, na ol i strong moa yet long bikhet olsem?
10 Ol kain kain lotu i holim nating nem Kristen ol i no bin wok long painim Jehova—ol i no kam long Em. Ol pris pasto bilong ol i bin givim baksait long gutpela nem bilong em; ol i bikhet na rausim dispela nem long Baibel bilong ol. Ol i laik lotuim wanpela Bikpela o God i no gat nem bilong em, na ol i lotuim god bilong ol haiden, em God Triwan. Na ol lotu i holim nating nem Kristen ol i no save wok long mekim pasin i stret. Planti man na meri long lain bilong ol i save bihainim pasin i no stret, o ol i kirapim ol man long orait long kain kain pasin nogut. Ol i no save daunim ol yet, olsem Jisas i bin mekim; ol i hambak long ai bilong ol man, olsem long televisen, na wok long kisim planti gutpela samting bilong helpim sindaun bilong ol, na planti ol i mekim pasin pamuk. Ol pris pasto i pulim mani samting long ‘ol sipsip’ na ol yet i stap gutpela, tasol ‘ol sipsip’ i stap rabis. Olsem Jems 5:5 i tok, ol i bin “kisim ol gutpela gutpela samting” na wok long kisim ol amamas bilong skin. De bilong Jehova i wok long i kam klostu na bai ol i save, tok bilong Baibel i stret, em Baibel i tok: “Maski yu gat planti mani, em i no inap helpim yu long taim Bikpela i laik bekim ol rong bilong yu.”—Sindaun 11:4.
11. Husat long nau ol i olsem wanpela “man bilong sakim lo”? Olsem wanem dispela lain i gat bikpela asua long blut?
11 Long namba 2 pas Pol i raitim long ol Tesalonaika em i tok, long taim bilong em tingting bilong sampela Kristen i kirap kwik na ol i ting de bilong Jehova i kam klostu pinis long dispela taim. Tasol Pol i toksave long ol olsem pastaim bai planti man i lusim bilip tru; bai ol i bikhet na givim baksait long God; na bai “man bilong sakim lo” i kamap. (2 Tesalonaika 2:1-3) Nau, long taim bilong yumi, yumi save planti man tru i bikhet na givim baksait long God; na yumi save, long ai bilong God ol pris pasto bilong ol misin i holim nating nem Kristen ol i olsem wanpela “man bilong sakim lo.” Nau long las taim, kirap long yia 1914, ol dispela pris pasto i gat bikpela asua tru long blut, long wanem, ol i bin helpim ol bikpela pait—ol i bin helpim wok bilong ‘paitim ol bikpela ain bilong brukim graun i kamap olsem bainat.’ (Joel 3:10) Na ol i wok yet long lainim ol man long ol tok giaman, olsem yumi gat tewel i no save dai, na i gat klinpaia, na pen long bikpaia, na givim baptais long ol bebi, na tok bilong God Triwan samting. Orait, taim Jehova i givim strafe long ol man nogut, olsem wanem long ol dispela pris pasto? Sindaun 19:5 i tok, ‘man i mekim tok giaman, em bai i kisim pe nogut.’
12. (a) Wanem dispela “skai” na “graun” bilong ol man na klostu nau bai i pinis? (b) Pasin nogut bilong graun bai pinis na dispela i lainim yumi long wanem samting?
12 Long 2 Pita 3:10, Baibel i tok: “De bilong Bikpela bai i kamap wantu tasol olsem ol stilman i save kam. Long dispela De skai bai i pairap bikpela na i pinis olgeta. Na olgeta liklik samting God i bin wokim graun long en, paia bai i kukim ol na ol bai i pinis. Olsem na graun wantaim olgeta samting ol i wokim i stap long en, ol bai i no i stap moa.” Ol gavman nogut i bin stap antap long ol man olsem skai i stap antap long graun. Ol dispela gavman nogut wantaim olgeta liklik samting nogut bilong dispela graun, olgeta bai pinis. Ol man i wokim ol samting nogut nogut bilong pait em inap bagarapim olgeta man meri pikinini i stap long graun, na ol man bilong baim ol dispela samting i go long ol man, na ol man i save giamanim ol man na pulim mani bilong ol, na ol man bilong lotu i olsem man bilong tupela maus wantaim ol pris pasto bilong ol—olgeta dispela lain bai pinis long graun. Belhat bilong Jehova bai kukim ol, olsem paia, na bai ol i pinis olgeta. Tasol long 2 Pita 3 ves 11 na 12, Pita i givim toksave long ol Kristen, olsem: “Orait tingim. Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas [tingim gut de bilong Jehova].”
Maikel i Kirap Mekim Wok!
13, 14. Husat em i Bikpela Man bilong kamapim klia olsem Jehova em i King? Em i bin mekim wanem ol wok kirap long yia 1914?
13 Olsem na husat inap abrusim bagarap long “bikpela hevi tru” Jehova bai kamapim? God Jehova i makim wanpela Man na long rot bilong em yumi inap abrusim bagarap. Dispela Man em namba wan ensel Maikel. Insait bilong nem bilong em i olsem “Husat i Kain Olsem God?” Olsem na i stret em i mekim wok olsem Man bilong kamapim long ples klia olsem Jehova em i King, na Jehova wanpela tasol em i God tru, na i stret Jehova i stap Nambawan Bikpela bilong olgeta samting long heven na long graun.
14 Kamapim Tok Hait sapta 12 ves 7 i go 17 i stori long ol narapela kain samting i bin kamap long “de bilong Bikpela” kirap long yia 1914! (Kamapim Tok Hait 1:10) Namba wan ensel Maikel i bin tromoi bikhetman Satan i kam daun long graun. Bihain, long Kamapim Tok Hait sapta 19 ves 11 i go 16, Baibel i kolim Maikel olsem “Man i save mekim pasin i tru tasol,” na i tok, em i “krungutim ol pikinini wain long bikpela tang ston i makim bikpela belhat bilong God I Gat Olgeta Strong.” Dispela strongpela man bilong pait em bilong heven na Baibel i kolim em olsem “King bilong olgeta king, na Bikpela bilong olgeta bikman.” Bihain moa, olsem long Kamapim Tok Hait sapta 20 ves 1 na 2, Baibel i stori long wanpela strongpela ensel i tromoi Satan i go daun long hul i no gat as na em i pasim Satan i stap long dispela hul inap 1,000 yia. Olgeta dispela tok bilong Baibel i makim olsem i gat wanpela Man tasol bilong kamapim klia olsem Jehova em i Nambawan Bikpela, em Krais Jisas, na long 1914 Jehova i bin putim em i stap king long heven.
15. Klostu nau bai Maikel i “kamap” bilong mekim wanem narapela kain wok?
15 Kirap long taim Maikel i bin kamap King long 1914, em i bin “kamap,” olsem Daniel 12:1 i tok, bilong helpim lain bilong Jehova. Klostu nau bai em i “kamap” bilong mekim narapela kain wok—em wok God i givim long em bilong pinisim olgeta pasin nogut i stap long graun, na kisim bek ol manmeri bilong God. Long dispela taim bai “bikpela hevi tru” i kamap, olsem Jisas i tok long Matyu 24:21, 22: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen. Na sapos God i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis. Olsem na bai em i sotim dispela taim.”
16. Ol manmeri i abrusim bagarap long taim bilong bikpela hevi tru, ol i husat?
16 Yumi ken amamas tru long sampela manmeri bai abrusim bagarap long dispela taim! Ol dispela manmeri i no olsem ol Juda i bikhet na ol i kalabus insait long Jerusalem long yia 70 na sampela ol birua i kisim i go wok kalabus long Rom. Ol manmeri i abrusim bagarap long “taim bilong las de” bai ol i olsem ol Kristen bilong bipo, em ol i bin ranawe lusim Jerusalem taim ol birua i no banisim yet taun na bagarapim. Ol dispela manmeri em ol manmeri bilong God yet, olsem ol planti milion manmeri bilong ‘bikpela lain’ wantaim ol wan wan man na meri bilong liklik lain remnan ating ol i stap yet long graun. (Daniel 12:4) Bikpela lain i lusim taim bilong “bikpela hevi” na i kam. Ol i bin mekim wanem na ol i abrusim bagarap long dispela taim? Ol i bin “wasim ol klos bilong ol long blut bilong Pikinini Sipsip.” Ol i bilip long strong bilong blut bilong Jisas em i bin kapsaitim olsem ofa bilong baim bek ol. Na ol i kamapim dispela bilip bilong ol—ol i mekim wok bilong God na ol i stap gut long dispela wok. Jehova, em i ‘sindaun long sia king,’ em i stap wantaim ol na lukautim ol long nau tu, na Pikinini Sipsip, em Krais Jisas, em i stap wasman bilong ol na em i bringim ol i go long ol hul i gat wara i kamap, em wara bilong givim laip.—Kamapim Tok Hait 7:14, 15.
17. Wanem samting i strongim tru ‘bikpela lain’ long mekim ol samting ol i mas mekim bilong abrusim bagarap long taim bilong bikpela hevi tru?
17 Ol planti milion manmeri bilong ‘bikpela lain’ ol i mas kam long Jehova, na mekim pasin i stret, na daunim ol yet, na ol i mas strong long laikim tok i tru olsem long taim ol i bilip nupela! Sapos yu wanpela bilong ol dispela manmeri i kain olsem sipsip, yu mas mekim wanem? Yu mas mekim ol samting olsem Kolosi sapta 3 ves 5 i go 14 i tok. Yu mas rausim olgeta “pasin bilong dispela graun i stap long bel bilong yupela.” Yu mas askim God long helpim yu na wok long “kamap nupela man.” Yu mas kisim nupela pasin em stretpela save i as bilong en. Yu mas daunim yu yet na wok long kamap strong long wok bilong litimapim nem bilong Jehova na tokim ol narapela man long ol gutpela samting em i laik mekim, na yu no ken slek liklik long mekim dispela wok. Long dispela rot bai God i lukautim yu long taim bilong “bikpela hevi tru,” em de bilong ‘belhat bilong Jehova.’
18, 19. Olsem wanem pasin bilong sanap strong i bin kamap bikpela samting bilong helpim yumi long abrusim bagarap na i stap laip?
18 Dispela de i kam klostu pinis! Em hariap i kam. Inap olsem 57 yia pinis ol i bin wok long bungim ol manmeri bilong ‘bikpela lain.’ Ol wan wan man na meri bilong ‘bikpela lain,’ planti liklik ol i bin dai na ol i wet long kirap bek. Tasol tok profet bilong Kamapim Tok Hait i strongim yumi long bilip olsem dispela lain yet bai winim taim bilong bikpela hevi tru, na bai ol i kamap olsem as bilong “nupela graun.” (Kamapim Tok Hait 21:1) Bai yu stap long dispela nupela graun? Yu inap i stap, long wanem, long Matyu 24:13 Jisas i tok: “Ol manmeri i stap strong inap long las de, God bai i kisim bek ol.”
19 Ol hevi na traim i painim lain bilong Jehova nau long dispela taim nogut inap i go bikpela moa. Na taim dispela “bikpela hevi tru” i kamap, ating bai yu karim hevi tu na yu mas sanap strong. Tasol yu mas i stap klostu long Jehova na oganaisesen bilong em. Yu mas was i stap! Jehova i tok: “Yupela i no ken tingting planti. Yupela i ken wet tasol long dispela De mi bai kotim ol manmeri bilong olgeta kantri. Long wanem, mi kros long ol na mi pasim tingting pinis long mekim olgeta lain i kam bung na bai mi mekim save long ol. Na belhat bilong mi bai i kamap olsem bikpela paia na bagarapim olgeta hap bilong graun.”—Sefanaia 3:8.
20. Taim bilong “bikpela hevi tru” i wok long i kam klostu na yumi mas mekim wanem?
20 Bilong lukautim yumi na strongim yumi, Jehova i marimari long yumi na givim ‘gutpela tok ples’ long yumi, em gutpela tok bilong Kingdom bilong em i kam klostu em hap tok bilong en. Dispela ‘gutpela tok ples’ i helpim yumi long singaut long nem bilong Jehova na stap “wanbel na bihainim tok bilong [God].” (Sefanaia 3:9) Dispela taim bilong “bikpela hevi tru” i wok long i kam klostu hariap hariap, olsem na yumi mas wok strong long mekim wok bilong God, na helpim ol narapela man i gat pasin daun, na bai ol tu i ken askim Jehova long helpim ol, olsem singaut long nem bilong em, na bai em i kisim bek ol.
Yu Tingim?
◻ Jehova bai mekim wanem pastaim na bihain bai gutaim i kamap long graun?
◻ Yumi mas mekim wanem na bai Jehova i kisim bek yumi, olsem Joel i tok?
◻ Ol man i gat pasin daun i mas mekim wanem, olsem Sefanaia i tok, na bai Jehova i lukautim ol long taim em i kamapim belhat bilong em?
◻ Husat ol i olsem wanpela “man bilong sakim lo”? Olsem wanem dispela lain i gat bikpela asua long blut?
◻ Olsem wanem pasin bilong sanap strong i bikpela samting bilong helpim yumi long kisim laip?