Krais i No Laikim Tru Pasin Nogut—Olsem Wanem Long Yu?
“Yu save laikim stretpela pasin, na yu no laikim tru pasin nogut. Olsem na God bilong yu yet em i bin . . . makim yu olsem man i gat biknem. Na dispela i mekim yu i amamas moa yet.”—HIBRU 1:9.
1. Olgeta wokboi tru bilong Jehova i mas laikim tumas stretpela pasin na mekim wanem samting moa?
OL WOKBOI tru bilong Jehova i laikim em long bel na spirit na tingting na strong bilong ol olgeta. (Mak 12:30) Ol i laik holimpas lo bilong em na mekim em i belgut. (Sindaun 27:11) Bilong mekim olsem, ol i mas laikim tru stretpela pasin, na ol i mas nolaik tru long pasin nogut. Gutpela Piksa bilong ol, em Krais Jisas, em i bin mekim olsem. Baibel i tok long em olsem: “Yu save laikim stretpela pasin, na yu no laikim tru pasin nogut.”—Hibru 1:9.
2. Pasin nogut, olsem pasin bilong sakim lo, em wanem samting?
2 Pasin nogut, olsem pasin bilong sakim lo, em sin. Aposel Jon i tok: “Man i save mekim sin, em i sakim lo bilong God. Sin em i pasin bilong sakim lo.” (1 Jon 3:4) Man i save sakim lo, em i “no save aninit liklik long lo.” (Webster’s Ninth New Collegiate Dictionary) Olgeta pasin i nogut, na i gat sem, na i no stret, em pasin bilong sakim lo. Dispela pasin i pulap long graun long nau, winim olgeta taim bipo. Tru tumas, yumi stap long taim bilong “planti hevi nogut tru,” olsem Pol i tok profet long en long 2 Timoti 3:1-5. Olsem na gutpela tru yumi gat lo i tok yumi mas nolaik tru long olgeta pasin nogut! Baibel i tok, ol man i laikim tumas Jehova ol i mas nolaik tru long “pasin nogut.” (Buk Song 97:10) Na Baibel i tok: “Lusim pasin nogut, na bihainim gutpela pasin tasol.”—Amos 5:15.
Tripela Kain Pasin Bilong No Laikim Tru Samting
3-5. Long Baibel, dispela tok “no laikim tru” i makim wanem 3-pela pasin?
3 Long Baibel, dispela tok “no laikim tru” i makim 3-pela kain pasin. Wanpela em pasin bilong bel nogut long man na i laik mekim nogut long em. Ol Kristen i mas klia long dispela kain pasin. Dispela kain pasin i bin kirapim Kein long kilim i dai brata bilong em Abel, em stretpela man. (1 Jon 3:12) Ol hetman bilong lotu i bin mekim dispela kain pasin long Jisas—ol i bel nogut long em na ol i laik mekim nogut long em.—Matyu 26:3, 4.
4 Na narapela pasin bilong “no laikim tru” i olsem “birua long,” na dispela i makim pasin bilong no laikim tumas, olsem no gat bikpela laik long wanpela olsem long narapela. Jisas i tok: “Sapos man i kam long mi, tasol em i no birua long papa na mama na meri na ol pikinini na brata na susa bilong em, na long laip bilong em yet tu, orait em i no inap i stap disaipel bilong mi.” (Luk 14:26) Yumi mas laikim ol dispela, tasol insait bilong dispela tok i olsem yumi no ken laikim tumas ol, winim Jisas—yumi mas laikim em moa yet. Baibel i tok, Jekop i “no laikim tumas” Lea. Em i laikim Lea, tasol em i gat bikpela laik moa long Resel.—Stat 29:30, 31.
5 Na namba 3 pasin dispela tok “no laikim tru” i makim, em pasin yumi laik stori long en nau—em pasin bilong nolaik tru long wanpela samting o wanpela man, olsem bel nogut tru long em na klia olgeta long em. Buk Song 139 i stori long dispela pasin, em Devit i tok: “Bikpela, mi no laikim tru ol man i no laikim yu. Na mi bel nogut tru long ol man i save bikhet long yu. Tru tumas, mi no laikim tru ol dispela man. Mi lukim ol i olsem ol birua bilong mi yet.”—Buk Song 139:21, 22.
Bilong Wanem Yumi Mas Nolaik Tru Long Pasin Nogut?
6, 7. (a) Bilong wanem yumi mas nolaik tru long pasin nogut? (b) I gat wanem narapela strongpela as na yumi mas nolaik tru long pasin nogut?
6 Yumi mas nolaik tru long pasin nogut bambai yumi inap amamas long yumi yet na bel bilong yumi i no gat tok. Long dispela rot tasol yumi inap i stap gut wantaim stretpela Papa Jehova, em i save laikim yumi tumas. Devit i stap olsem gutpela piksa long dispela, olsem Buk Song 26 i kamapim. Devit i tok: “Mi no save laik tru long raun wantaim ol man nogut. Mi save abrusim ol.” (Buk Song 26:5) Yumi laikim tumas Jehova na stretpela pasin, olsem na dispela i mas kirapim yumi long bel nogut tru na nolaik tru long olgeta pasin nogut—yumi mas nolaik tu long pasin nogut bilong ol man i no laikim Jehova na ol i sakim tok bilong em. Yumi mas nolaik tru long pasin nogut, long wanem, pasin nogut i save bagarapim nem bilong God.
7 Narapela as na lain bilong Jehova i nolaik tru long pasin nogut, em olsem: Em inap nogutim ol na bagarapim ol. Sapos yumi bihainim pasin bilong olpela bel, olsem mekim pasin nogut, wanem samting bai kamap? Pol i toksave olsem: “Sapos wanpela man i bihainim ol laik bilong olpela bel bilong em yet, . . . em bai i bagarap olgeta. Tasol sapos em i bihainim pasin bilong Holi Spirit, . . . em bai i stap gut oltaim oltaim.” (Galesia 6:7, 8) Olsem na yumi mas nolaik tru long olgeta pasin nogut na klia olgeta long en bambai yumi inap i stap gutpela na i stap bel isi.
Ol Man i No Laikim Tru Pasin Nogut
8. Husat i nambawan gutpela piksa long pasin bilong no laikim tru pasin nogut? Wanem tok bilong Baibel i kamapim klia dispela?
8 God yet i stap olsem piksa tru long pasin bilong no laikim tru pasin nogut. Em i save bel nogut tru long pasin nogut. Baibel i tok: “Bikpela i no laikim tru ol man i mekim dispela 7-pela pasin: Pasin bilong hambak . . . Pasin bilong mekim tok giaman. Pasin bilong kilim nating ol arapela man. Pasin bilong tingting long mekim pasin nogut. Pasin bilong hariap long mekim sin. Pasin bilong tok giaman long kot. Pasin bilong mekim ol man i bel nogut long ol brata bilong ol yet.” Na Baibel i tok: “Man i save aninit long Bikpela, em i no save laikim tru ol pasin nogut. Mi no laik tru long pasin bilong bikhet na pasin bilong man i litimapim nem bilong em yet na pasin bilong mekim olkain samting nogut na pasin bilong tok giaman.” (Sindaun 6:16-19; 8:13) Na tu, Baibel i tok: “Bikpela i tok olsem, ‘Mi save laikim stretpela pasin tasol. Mi no save laikim pasin bilong stil na pasin bilong mekim nogut long ol arapela.’ ”—Aisaia 61:8.
9, 10. Jisas i mekim wanem na em i kamapim klia olsem em i no laikim tru pasin nogut?
9 Krais Jisas i bihainim dispela pasin bilong Papa. Baibel i tok: “Yu save laikim stretpela pasin, na yu no laikim tru pasin nogut. Olsem na God bilong yu yet em i bin . . . makim yu olsem man i gat biknem.” (Hibru 1:9) Jisas i stap gutpela piksa bilong yumi. Em i kamapim klia olsem em i nolaik tru long pasin nogut—em i tokaut long pasin nogut bilong ol man, olsem ol hetman bilong lotu giaman, em ol i bikhet na mekim pasin nogut. Planti taim em i tok, ol i man bilong tupela maus. (Matyu, sapta 23) Na em i tokim ol: “Yupela i pikinini bilong papa bilong yupela, em Satan. Na yupela i strong long bihainim ol laik bilong [em].” (Jon 8:44) Na tupela taim Jisas i mekim wok long strong bilong skin bilong kamapim klia olsem em i nolaik tru long pasin nogut—tupela taim em i rausim ol man bilong mangalim mani ol i wok bisnis insait long tempel.—Matyu 21:12, 13; Jon 2:13-17.
10 Narapela samting Jisas i mekim na i kamapim klia olsem em i nolaik tru long pasin nogut, em olsem: Em yet i no bin mekim wanpela pasin nogut, olsem sakim lo o mekim sin. Olsem na em inap tokim ol birua, ‘Husat inap kamapim wanpela rong bilong mi?’ (Jon 8:46) “I no gat wanpela rong i stap long [Jisas]. Em i klin olgeta long ai bilong God.” (Hibru 7:26) Pita tu i tok, Jisas “i no bin mekim sin, na tu em i no bin mekim wanpela tok giaman.”—1 Pita 2:22.
11. Baibel i stori long wanem ol sinman bilong graun i bin nolaik tru long pasin nogut?
11 Tasol Jisas i gutpela olgeta. Olsem wanem? Baibel i stori long sampela sinman bilong graun ol i bin nolaik tru long pasin nogut? Tru tumas! Moses na ol narapela Livai i nolaik tru long pasin bilong lotuim god giaman na ol i bihainim tok bilong Jehova na kilim i dai olsem 3,000 manmeri i mekim dispela pasin nogut. (Kisim Bek 32:27, 28) Finias i kamapim klia olsem em i nolaik tru long pasin nogut—em i kilim i dai long spia wanpela man na meri i pamuk.—Namba 25:7, 8.
Kamapim Klia Olsem Yu Nolaik Tru Long Pasin Nogut
12. (a) Yumi ken mekim wanem bilong kamapim klia olsem yumi no laikim tru pasin nogut? (b) Wanem sampela samting yumi ken mekim bilong helpim yumi long sakim ol tingting nogut?
12 Orait, olsem wanem long yumi long nau? Yumi ken mekim wanem na bai yumi kamapim klia olsem yumi nolaik tru long pasin nogut? Yumi mas bosim gut tingting, na toktok, na pasin bilong yumi. Yumi mas lain long tingim ol gutpela samting tasol taim yumi no gat wok yumi mas tingim. Sapos long nait yumi no inap slip, nogut yumi wok long tingim ol samting nogut, olsem rong narapela i bin mekim long yumi, o yumi tingting nabaut long ol amamas bilong maritpasin. Lain long daunim kain tingting olsem, na wok long tingim ol gutpela samting. Olsem: Yu ken wok long tingim sampela tok bilong Baibel, o ol 9-pela kain man i ken amamas, o ol 9-pela gutpela pasin em spirit bilong God i save kamapim. (Matyu 5:3-12; Galesia 5:22, 23) Yu inap kolim nem bilong ol 12-pela aposel? Yu save long ol Tenpela Lo? Yu save long ol 7-pela kongrigesen em Kamapim Tok Hait i stori long en? Sapos yu inap tingim ol tok bilong sampela singsing bilong Kingdom, dispela tu inap helpim yu long tingim ol samting i tru, na i gutpela, na i stretpela, na i klinpela, na i naispela, na i nambawan tru.—Filipai 4:8.
13. Sapos yumi no laikim tru pasin nogut, dispela bai kirapim yumi long no laikim tru wanem kain tok?
13 Na sapos yumi klia long olgeta tok doti, dispela bai makim olsem yumi nolaik tru long pasin nogut. Planti man bilong dispela graun i save amamas long skrapim tok nogut na harim kain tok doti olsem. Tasol ol Kristen i no ken mekim kain tok olsem, na ol i no ken laik long harim tu. Sapos ol man i kirap mekim kain tok olsem, yumi mas lusim ol na wokabaut i go. Sapos yumi no inap lusim ol, orait yumi ken pes i drai na bai ol i save, yumi nolaik tru long kain tok olsem. Yumi mas bihainim tok bilong Baibel, olsem: “Yupela i no ken larim ol kain kain tok nogut i kamap long maus bilong yupela. Nogat. Gutpela tok tasol i mas kamap, inap long strongim ol man i slek. Dispela kain tok i save bringim marimari bilong God i kam long ol man i harim.” (Efesus 4:29) Yumi no ken mekim o harim tok doti, nogut yumi kamap doti long ai bilong God.
14. Sapos yumi no laikim tru pasin nogut, dispela bai helpim yumi olsem wanem long was gut long ol pasin bilong wok bisnis na long wok mani bilong yumi?
14 Na yumi mas no laikim tru olgeta pasin nogut. Dispela bai helpim yumi na bai yumi no lusim lo bilong God liklik. Ol Kristen tru i no save bihainim pasin bilong sin. (Lukim 1 Jon 5:18.) Olsem: Yumi mas nolaik tru long olgeta pasin giaman ol man bilong bisnis i save bihainim. Long nau planti Witnes Bilong Jehova i bin karim hevi, long wanem, bos bilong ol i laik subim ol long mekim pasin i no stret na ol i no mekim. Maski bos i rausim ol long wok tu, ol i no laik mekim pasin em bel bilong ol i gat tok long en. Na tu, bilong kamapim klia olsem yumi no laikim tru pasin nogut, yumi no ken kalapim ol lo bilong rot, o giaman na i no baim stret ol kain kain takis.—Aposel 23:1; Hibru 13:18.
No Laikim Tru Pasin Sem
15. I gat wanem gutpela as na God i wokim man na meri i gat strongpela laik long marit?
15 Yumi Kristen na yumi mas nolaik tru long olgeta kain pasin sem, olsem pasin pamuk samting. I gat gutpela as na God i wokim man na meri i gat laik long marit. Long dispela rot ol inap kamapim pikinini na bai ol man i no ken pinis long graun, na ol inap kisim amamas. Ol manmeri i stap rabis, o ol i no inap rit rait, o ol i stap nogut, ol tu inap kisim bikpela amamas insait long marit. Tasol God Jehova i putim ol lo bilong marit, na ol manmeri i mas bihainim ol dispela lo.—Stat 2:24; Hibru 13:4.
16. Yumi mas ting olsem wanem long ol amamas nogut na ol pasin sem?
16 Sapos yumi nolaik tru long pasin nogut, bai yumi wok strong long abrusim olgeta pasin sem na olgeta amamas nogut. Bai yumi klia olgeta long ol buk na nius nogut. Na bai yumi no lukim ol piksa nogut long televisen o long haus piksa samting—bai yumi pasim televisen o lusim haus piksa. Na sapos yumi nolaik tru long pasin nogut, bai yumi was gut long olgeta kain musik na singsing em tok bilong en o pairap bilong en i save mekim bel i kirap long mekim pasin nogut. Bai yumi no laik kisim save long olkain pasin sem. ‘Long olgeta kain pasin nogut bai yumi stap olsem ol liklik pikinini. Tasol tingting bilong yumi i mas i stap olsem bilong bikpela man.’—1 Korin 14:20.
17. Kolosi 3:5 i givim wanem gutpela tok long yumi bilong helpim yumi long i stap stret?
17 Baibel i tok stret olsem: “Yupela i mas kilim i dai olgeta pasin bilong dispela graun i stap long bel bilong yupela. [Olsem] pasin pamuk na pasin doti, na pasin bilong bel i kirap long mekim ol pasin nogut.” (Kolosi 3:5) Tru tumas, yumi mas taitim bun tru bambai yumi inap klia long olkain pasin sem. Wanpela buk (The Expositor’s Bible Commentary) i stori long hap tok Grik ol i tanim olsem “kilim i dai” long dispela ves na buk i tok: “Em i makim olsem yumi no ken daunim tasol o bosim tasol ol pasin na tingting nogut; nogat; yumi mas rausim ol olgeta, yumi mas pinisim tru olpela pasin bilong bipo. Sapos yumi tok, yumi mas ‘kilim i dai,’ ating dispela inap kamapim tru strong bilong dispela tok. . . . Insait bilong [en] i makim samting man i wok strong long mekim, olsem em i tingting pinis long mekim, na i givim pen long em.” Olsem na yumi mas klia long ol buk nogut na piksa nogut i gat sem, long wanem, dispela i olsem wanpela sik nogut em inap bagarapim pasin bilong yumi na kilim yumi i dai long spirit. Krais i mekim wankain tok taim em i tok, sapos han o lek o ai bilong yumi i laik mekim yumi i pundaun, orait yumi mas rausim.—Mak 9:43-48.
No Laikim Tru Lotu Giaman na Pasin Bilong Lusim Bilip
18. Yumi ken mekim wanem na bai yumi tokaut klia olsem yumi no laikim pasin nogut bilong ol lotu giaman?
18 Olsem Jisas i bin mekim, olsem tasol ol Witnes Bilong Jehova long nau i save tokaut long olgeta pasin nogut bilong ol man bilong lotu giaman na kamapim klia olsem ol yet i no laikim tru pasin nogut. Ol i tokaut olsem wanem? Ol i tilim ol buk na nius bilong Baibel long ol man, em ol i kamapim klia pasin bilong Bikpela Babilon, em i olsem wanpela pamukmeri long ol samting bilong lotu. Sapos yumi nolaik tru long pasin nogut bilong ol lotu giaman bai yumi no pret long kamapim pasin nogut bilong Bikpela Babilon, em olgeta lotu giaman. Bai yumi kamapim bilong helpim ol manmeri i gat gutpela bel, em lotu giaman i bin mekim na ol i stap olsem aipas na kalabus long ol samting bilong spirit. Sapos yumi no laikim tru pasin nogut bilong Bikpela Babilon, orait bai yumi wok strong tru insait long olgeta wok bilong autim tok bilong Kingdom.—Matyu 15:1-3, 7-9; Taitus 2:13, 14; Kamapim Tok Hait 18:1-5.
19. Yumi mas ting olsem wanem long ol man i bikhet na lusim bilip? Bilong wanem yumi mas ting olsem?
19 Yumi mas nolaik tru long pasin nogut, olsem na yumi mas sakim olgeta wok bilong ol man i bikhet na lusim bilip, em ol i givim baksait long Jehova. Yumi mas i gat tingting long ol wankain olsem Devit, em i tok: “Bikpela, mi no laikim tru ol man i no laikim yu. Na mi bel nogut tru long ol man i save bikhet long yu. Tru tumas, mi no laikim tru ol dispela man. Mi lukim ol i olsem ol birua bilong mi yet.” (Buk Song 139:21, 22) Ol kain man olsem long nau ol i wok wantaim “man bilong sakim lo,” em ol pris pasto bilong ol misin i holim nating nem Kristen. (2 Tesalonaika 2:3) Olsem na yumi ol Witnes Bilong Jehova i stap gut long God, yumi mas sakim tru ol dispela man. Yumi gat sin na dispela inap kirapim yumi long toknogutim ol brata. Tru, olgeta wan wan brata long lain ‘gutpela wokboi’ i sinman bilong graun. (Matyu 24:45-47) Tasol dispela lain yet i stap gut long wok na i gat gutpela tingting. Ol man i lusim bilip i laik pulim yumi i go bihainim ol na ol i save sutim tok long pasin kranki o popaia i olsem ol brata i go pas long yumi i bin mekim. Olsem na yumi mas was gut na klia olgeta long ol tok bilong ol dispela kain man i olsem marasin nogut.—Rom 16:17, 18.
20, 21. Kolim ol bikpela samting i olsem as na yumi mas nolaik tru long pasin nogut.
20 Pasin nogut i pulap long graun, em pasin bilong sakim lo na sin. Olsem na yumi mas laikim tumas stretpela pasin, tasol yumi mas i go moa na no laikim tru pasin nogut. Sampela man i raus long lain Kristen, ating ol i bin ting olsem ol i laikim tumas stretpela pasin, tasol ol i no strong long no laikim tru pasin nogut. Yumi stori pinis long yumi mas nolaik tru long pasin nogut bambai bel bilong yumi i no gat tok na yumi ken amamas long yumi yet. Na yumi mas sakim ol pasin nogut bambai yumi ken i stap gut long God Jehova. Pasin bilong sakim lo i save kamapim kaikai nogut, olsem bel hevi, na bagarap, na i dai.
21 Na yumi stori pinis long ol samting yumi mas mekim bilong kamapim klia olsem yumi no laikim tru pasin nogut. Yumi mas klia olgeta long olkain pasin giaman na pasin sem, na pasin bilong lusim bilip. Yumi laik mekim ol samting bilong mekim gut nem bilong Jehova na mekim em i belgut, olsem na yumi mas laikim tumas stretpela pasin na mekim wok bilong em, na tu yumi mas nolaik tru long pasin nogut, olsem Hetman bilong yumi Krais Jisas i bin mekim.
Bai Yu Bekim Wanem Tok?
◻ Long Baibel, dispela tok “no laikim tru” i makim wanem ol pasin?
◻ I gat wanem sampela gutpela as na yumi mas nolaik tru long pasin nogut?
◻ Husat sampela ol i stap olsem gutpela piksa long pasin bilong no laikim tru pasin nogut?
◻ Yumi ken mekim wanem bilong kamapim klia olsem yumi nolaik tru long pasin nogut?
[Piksa long pes 8]
Jisas i no laikim tru pasin nogut, olsem na em i rausim ol man i wok bisnis long tempel
[Piksa long pes 10]
Sapos yumi nolaik tru long pasin nogut, bai yumi klia long olkain amamas nogut i gat sem