Tok Bilong God i Pait Long Tok Bilong Ol Spirit Nogut
“Sampela man bai i lusim bilip bilong ol, long wanem, ol bai i putim yau long tok bilong . . . ol spirit nogut.”—1 TIMOTI 4:1.
OLSEM WANEM sapos long olgeta taim yu stap laip yu stap long ples i gat pait. Taim yu go slip long nait, yu harim ol gan i pairap, na taim yu kirap long moningtaim, yu harim. Sori tru, long sampela hap bilong graun, ol man i stap olsem. Na long olgeta hap bilong graun, ol Kristen i stap long wanpela bikpela pait bilong spirit. Dispela pait i stap inap 6,000 yia pinis na i kamap strong moa long nau. Dispela pait i olsem: Tok i tru i pait long ol tok giaman; tok bilong God i pait long tok bilong ol spirit nogut. Dispela pait i nogut moa yet, long wanem, wanpela lain insait long pait i mekim pasin nogut tru na ol i no sori liklik.
2 Aposel Pol i makim wanem tupela lain i pait. Em i tokim Timoti: “Holi Spirit i tok klia olsem, long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong . . . ol spirit nogut.” (1 Timoti 4:1) Tok bilong ol spirit nogut bai paulim tingting bilong ol man moa yet long “dispela taim i laik kamap bihain” long taim bilong Pol, em dispela taim nau. Na Pol i makim olsem tok bilong ol spirit nogut i laik daunim “bilip,” em ol tok God i skulim ol man long en na Baibel i as bilong en. Dispela bilip i helpim man long kisim laip. Em i skulim ol Kristen long bihainim laik bilong God. Em tok i tru i bringim man i go bilong kisim laip i stap oltaim.—Jon 3:16; 6:40.
3 Ol man i lusim dispela bilip, ol i no inap kisim laip i stap oltaim. Ol i larim tok bilong ol spirit nogut i paulim ol na ol i bagarap long dispela pait! (Matyu 24:24) Olsem wanem yumi ken abrusim bagarap? Yumi mas givim baksait olgeta long ol dispela tok giaman i helpim wok bilong Satan, em i “hetman bilong ol spirit nogut.” (Matyu 12:24) Ol tok bilong Satan i giaman, long wanem, em i “papa tru bilong pasin bilong tok giaman.” (Jon 8:44) Orait, nau yumi ken stori long wok em i bin mekim long tok giaman bilong paulim namba wan tumbuna papamama bilong yumi.
Tok Bilong Ol Spirit Nogut i Kamap Ples Klia
4 Long Stat 3:1-5, Baibel i tok, long maus bilong wanpela snek, Satan i askim Iv: “Ating God i tambuim yutupela long kaikai pikinini bilong olgeta diwai bilong gaden, a?” Em i olsem wanpela askim nating. Tasol lukim gen. Satan i tok, “Ating God i tambuim yutupela.” Em i mekim olsem em i kirap nogut long dispela tok bilong God.
5 Iv i no save Satan i laik giamanim em na em i tok, tru God i tambuim tupela. Em i save God i bin tokim Adam, sapos tupela i kaikai long pikinini bilong diwai bilong save long wanem samting i gutpela na wanem samting i nogut, bai tupela i dai. (Stat 2:16, 17) Dispela askim bilong Satan i kirapim Iv long putim yau long bikpela tok Satan i laik kamapim, em i tok: “Yutupela i no inap i dai.” Em i mekim tok nogut tru! Em i tok, God i giamanim tupela, tasol God em i no man bilong giaman; em i bin wokim ol, na em i laikim ol tru.—Song 31:5; 1 Jon 4:16; KTH 4:11.
6 Na Satan i tok: “Sapos yutupela i kaikai pikinini bilong dispela diwai, bai . . . yutupela i kamap wankain olsem God. God i save long dispela, olsem na em i tambuim yutupela.” God Jehova i bin givim planti samting long ol, tasol Satan i tok, God i laik pasim ol long kisim gutpela samting tru—bai ol i no inap kamap olsem ol god. Satan i sutim tok long God na tok, God i no mekim gutpela pasin. Satan i kirapim ol long bihainim laik bilong ol yet, na long bikhet na sakim ol lo bilong God. Em i tok, sapos ol i mekim olsem, dispela bai helpim ol. I olsem Satan i gat tok long God i stap bos bilong ol samting em i bin wokim, na Satan i tok, i no stret God i putim sampela tambu long ol man.
7 Dispela tok bilong Satan em namba wan taim ol man i harim sampela tok bilong ol spirit nogut. Ol dispela tok nogut i kamapim yet ol pasin nogut. Long gaden Iden, Satan i tok, i no stret God i makim pasin ol man i mas bihainim. Satan i wok yet long daunim wok bos bilong Jehova, na long kirapim ol man long bikhet long Papa bilong ol long heven, na nau sampela spirit moa i wok wantaim em, em ol tu i bikhet.—1 Jon 3:8, 10.
8 Em namba wan taim tok bilong God i pait long tok bilong ol spirit nogut, na long dispela taim Adam tupela Iv i bihainim tingting kranki na ol i lus long kisim laip i stap oltaim. (Stat 3:19) Bihain skin bilong tupela i wok long bagarap na ol inap save tru, husat i bin mekim tok giaman long Iden na husat i bin mekim tok i tru. Taim ol i no i dai yet, inap planti handet yia paslain, ol i kamap namba wan man na meri bilong bagarap long dispela pait bilong tok i tru na ol tok giaman. Man bilong wokim ol na em i As bilong laip, em i kotim ol na ol i no inap kisim laip i stap oltaim. Long ai bilong em i olsem ol i dai pinis.—Song 36:9; lukim tu Efesus 2:1.
Tok Bilong Ol Spirit Nogut Long Nau
9 Spirit holi i givim tingting long aposel Jon na em i lukim ol samting i kamap long “de bilong Bikpela” i kirap long yia 1914. (KTH 1:10) Long dispela taim, Satan na ol spirit nogut i raus long heven na ol i kam daun klostu long graun—dispela i daunim tru Satan, dispela birua bilong Man bilong wokim yumi. Ol i no harim moa maus bilong em long heven i wok long kotim ol wokboi bilong Jehova. (KTH 12:10) Tasol olsem wanem long tok bilong ol spirit nogut long graun bihain long Iden? Baibel i tok, Satan em i “man bilong giamanim olgeta manmeri bilong graun.” (KTH 12:9) Em i giamanim olgeta manmeri! Olsem na yumi no kirap nogut long Baibel i kolim Satan olsem “hetman i save bosim dispela graun”!—Jon 12:31; 16:11.
10 Taim ol i rausim Satan long heven, em i tok olsem em i lus long pait? Nogat tru! Em i wok strong yet long pait long tok bilong God na ol manmeri i holim strong dispela tok. Taim ol i rausim Satan long heven, “em i belhat long dispela meri, na em i go na i laik pait long ol arapela pikinini bilong en, em ol dispela manmeri i save bihainim ol lo bilong God, na ol i save autim tok bilong Jisas.”—KTH 12:17.
11 Long nau Satan i pait long ol wokboi bilong God, na tu, em i autim planti tok gris na tok giaman bambai em i ken bosim yet ol manmeri. Long Kamapim Tok Hait, aposel Jon i stori long de bilong Bikpela, na em i tok em i lukim 3-pela wel animal, em ol i makim Satan, na oganaisesen politik bilong em long graun, na nambawan bikpela gavman i stap long taim bilong yumi. Ol spirit nogut olsem rokrok i kamap long maus bilong 3-pela. Ol i mekim wanem? Jon i tok: “Ol dispela spirit nogut tru i save wokim ol kain kain mirakel, na ol i . . . laik mekim ol king i bringim ol ami bilong ol i kam bung, bai ol i ken kirapim pait long dispela bikpela de bilong God I Gat Olgeta Strong.” (KTH 16:14) Tok bilong ol spirit nogut i mekim bikpela wok tru long graun long nau. Satan na ol spirit nogut i wok strong long daunim tok bilong God, na ol bai mekim olsem i go inap long taim King Krais Jisas i pasim ol.—KTH 20:2.
Luksave Long Tok Bilong Ol Spirit Nogut
12 Ol man i aninit long God, yu ting ol inap sakim tok bilong ol spirit nogut? Yes, ol inap. I gat tupela as na ol inap mekim: (1) Tok bilong God i gat bikpela strong moa, na (2) God i tokim ol pinis long pasin bilong Satan bambai ol i ken sakim. Pol i tok: “Yumi save pinis long tingting na pasin bilong em.” (2 Korin 2:11) Yumi save, Satan i save mekim nogut long ol wokboi bilong God bilong pundaunim ol. (2 Timoti 3:12) Na em i save mekim pasin hait bilong paulim tingting na laik bilong ol. Em i giamanim Iv na putim laik nogut long bel bilong em. Em i mekim wankain pasin long nau. Pol i tokim ol Korin: “Mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul, na yupela i lusim pasin bilong i stap klin na tingting long Krais tasol.” (2 Korin 11:3) Tingim ol samting em i mekim bilong paulim tingting bilong planti man.
13 Satan i tokim Iv, Jehova i giaman na sapos ol man i sakim tok bilong dispela Man bilong wokim ol, bai ol inap kamap olsem ol god. Long nau ol man i gat sin na ol i stap nogut, olsem na yumi save, Satan i giaman; Jehova i no giaman. Long nau ol man i no stap olsem ol god! Bihain Satan i kamapim ol narapela tok giaman. Em i kamapim tingting olsem yumi gat tewel i no inap i dai. Em i grisim ol man long ting olsem ol inap kamap olsem ol god long dispela rot. Long as bilong dispela tok giaman, em i kamapim planti narapela tok giaman, olsem tok bilong bikpaia, na klinpaia, na olkain marila na posin, na pasin bilong lotuim ol tumbuna. Ol dispela tok giaman i kalabusim yet planti milion manmeri.—Lo 18:9-13.
14 Ol tok Jehova i givim long Adam i tru. Taim Adam i mekim rong long God, em i dai. (Stat 5:5) Taim Adam na ol lain bilong em i dai, ol i save dai tru; ol i no gat tingting na ol i no inap mekim wanpela samting; ol i no i stap moa. (Stat 2:7; Saveman 9:5, 10) Yumi kisim sin long Adam na yumi olgeta i save dai. (Rom 5:12) Tasol long Iden, Jehova i bin mekim wanpela tok promis long wanpela pikinini bai kam na pinisim ol wok bilong Satan. (Stat 3:15) Dispela Pikinini em Krais Jisas, em dispela wanpela Pikinini God yet i bin kamapim. Jisas i no gat sin na em i dai, na laip bilong em inap baim bek ol man long i dai. Ol manmeri i bilip long Jisas na bihainim tok bilong em, ol inap kisim laip i stap oltaim, dispela laip Adam i bin lusim.—Jon 3:36; Rom 6:23; 1 Timoti 2:5, 6.
15 Yumi no ken ting yumi gat tewel na bai yumi stap oltaim; nogat; ofa bilong Krais tasol inap helpim yumi long i stap oltaim. God i skulim yumi olsem, na dispela tok i tru. Dispela tok i kamapim klia sori na gutpela save bilong God. (Jon 3:16) Yumi mas tenkyu long em, long wanem, yumi kisim save long dispela tok i tru na yumi no kalabus moa long ol tok giaman bilong ol spirit nogut!—Jon 8:32.
16 Ol tok giaman Satan i mekim long Gaden Iden i kirapim Adam na Iv long bikhet long God na bihainim save bilong ol yet. Nau yumi lukim ol samting i kamap long dispela: Pasin raskol, planti man i stap rabis, i gat ol bikpela pait, sampela man i gat planti samting na sampela i lus olgeta. I gat as tru na Baibel i tok: “Gutpela save bilong dispela graun em i olsem longlong pasin tasol long ai bilong God.” (1 Korin 3:19) Planti man i mekim pasin longlong—ol i no laik bihainim ol tok bilong Jehova, olsem na ol i karim pen na hevi. (Song 14:1-3; 107:17) Tasol ol Kristen i larim God i skulim ol na ol i no pundaun olsem.
17 Pol i tokim Timoti: “Givim baksait long olkain toktok nabaut i no bihainim tingting bilong God. Na stap longwe long ol man i ting ol i gat gutpela save na ol i mekim kain kain toktok i pait long tingting bilong God. Sampela man i bihainim dispela kain save na ol i lusim pinis pasin bilong bilip.” (1 Timoti 6:20, 21) Dispela kain ‘giaman save’ i makim tu tok bilong ol spirit nogut, na bilip kranki bilong sampela long ol kongrigesen long taim bilong Pol, em ol i lusim tok i tru. (2 Timoti 2:16-18) Bihain, giaman save i bagarapim kongrigesen, em olkain giaman save olsem bilong ol Grik na ol man i tok ol i gat narapela kain save long ol samting bilong spirit. Long nau sampela man i tok, i no gat God, o ol i no save i gat God o nogat, na ol i tok, yumi bin kamap nating long rot bilong ol animal, na planti man i daunim tok bilong Baibel—ol dispela kain tok i olsem ‘giaman save.’ Long nau, tok bilong ol man i givim baksait long tok i tru, na tingting bilong ol i no stret long Baibel, dispela tu em i ‘giaman save.’ Olgeta dispela kain ‘giaman save’ i bin kamapim kaikai nogut—ol man bilong dispela graun bilong Satan ol i no sem moa, na ol i bikhet, na tingim ol yet tasol.
Holim Strong Tok Bilong God
18 Bihain long Iden, Satan i mekim na tok bilong ol spirit nogut i pulap long graun. Tasol long olgeta taim, i gat sampela man ol i laik save long tok bilong God. Long nau ol i bikpela lain, inap sampela milion. Em hap lain bilong ol Kristen God i makim bilong wok king wantaim Krais long Kingdom bilong heven, em ol i stap yet long graun, na bikpela lain “arapela sipsip” ol i wet long kisim laip oltaim long graun aninit long Kingdom. (Matyu 25:34; Jon 10:16; KTH 7:3, 9) Nau ol i bung wantaim olsem wanpela bikpela lain, na long maus bilong Aisaia, Jehova i tokim ol: “Bai mi yet mi skulim ol pikinini bilong yu, na bai ol i gat gutpela sindaun tru.”—Aisaia 54:13.
19 Jehova i skulim yumi na yumi save long ol tok i tru; em bikpela samting. Tasol em i skulim yumi tu long rot bilong bihainim ol dispela tok. Em i skulim yumi long pasin yumi mas bihainim. Olsem na yumi save sakim pasin bilong tingim yumi yet tasol, na pasin pamuk, na pasin bikhet, em ol dispela pasin i pulap long graun. Yumi save, pasin bilong bungim planti mani kago i save bagarapim man. (Jems 5:1-3) Yumi save tingim gut tok bilong God em aposel Jon i kamapim: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa.”—1 Jon 2:15.
20 Pol i kolim klia ol samting tok bilong ol spirit nogut i mekim long ol man, em i tokim ol Korin: “Satan, em giaman god bilong dispela graun, em i bin pasim tingting bilong ol dispela man i no bilip, na lait bilong gutnius . . . i no inap i go insait long bel bilong ol.” (2 Korin 4:4) Olsem tasol Satan i laik pasim tingting bilong ol Kristen tru. Long Iden, em i mekim wok long snek bilong giamanim wanpela wokboi bilong God. Long nau em i mekim wok long ol piksa na tok bilong pait na pasin sem long televisen na redio na ol buk na musik tu. Wanpela strongpela samting em i mekim wok long en, em ol poroman nogut. (Sindaun 4:14; 28:7; 29:3) Yu mas save, ol spirit nogut i mekim wok long ol dispela samting bilong kamapim tok bilong ol na pundaunim yumi.
21 Yu mas save, ol tok Satan i mekim long Iden, em ol tok giaman; tok bilong Jehova i bin kamap tru. Wankain pasin i stap yet: Satan i save giaman, na God i mekim tok tru oltaim. (Rom 3:4) Sapos yumi holim strong Tok bilong God, bai yumi win long dispela pait bilong tok i tru na ol tok giaman. (2 Korin 10:4, 5) Yumi mas givim baksait tru long olgeta tok bilong ol spirit nogut, na bai yumi inap sanap strong i go inap long pinis bilong pait. Tok i tru bai win. Satan bai pinis, na tok bilong God tasol bai pulap long graun.—Aisaia 11:9.
Yu Inap Stori Long Dispela?
◻ Wanem namba wan taim ol man i harim sampela tok bilong ol spirit nogut?
◻ Wanem sampela tok giaman em Satan na ol spirit nogut i kamapim?
◻ Satan i mekim wanem ol wok long nau?
◻ Satan i mekim wok long wanem ol samting bilong kamapim tok bilong ol spirit nogut?
◻ Ol man i holim strong tok bilong God bai kisim wanem ol blesing?
[Askim Bilong Stadi]
1. Ol Kristen i insait long wanem pait?
2. (a) Wanem tupela lain i pait, olsem Pol i tok? (b) Wanem dispela “bilip” Pol i tok long en?
3. (a) Ol man i bagarap long dispela pait bilong tok i tru na ol tok giaman, ol i no inap kisim wanem samting? (b) Husat i as bilong ol tok bilong ol spirit nogut?
4, 5. Satan i mekim wanem tok giaman long Iv? Olsem wanem dispela tok i nogut tru?
6. Olsem wanem Satan i sutim tok long wok bos na gutpela pasin bilong God?
7. Wanem namba wan taim ol man i harim sampela tok bilong ol spirit nogut? Olsem wanem tok i wankain long nau?
8. Long Iden, Adam tupela Iv i lus long kisim wanem samting? Tasol olsem wanem tok bilong Jehova i kamap tru?
9. Tok bilong ol spirit nogut i bin giamanim planti man o olsem wanem?
10, 11. Satan na ol spirit nogut i mekim wanem ol wok long nau?
12. (a) Olsem wanem yumi inap sakim tok bilong ol spirit nogut? (b) Satan i mekim wanem bilong pundaunim ol wokboi bilong God?
13. Bihain long Iden, Satan i bin kamapim wanem ol tok giaman?
14, 15. Wanem samting tru i painim man i dai? Na yumi inap kisim wanem samting long bihain?
16. Ol man i bihainim save bilong ol yet na bihain wanem kain pasin i kamap?
17. Satan i bin kamapim wanem ol kain ‘giaman save’? Dispela kain save i kamapim wanem kaikai?
18. Husat long nau i laik save long ol tok bilong God?
19. Jehova i skulim yumi long wanem ol samting?
20, 21. (a) Satan i mekim wok long wanem ol samting bilong pasim tingting bilong ol man? (b) Ol man i holim strong ol tok bilong God, ol i kisim wanem ol blesing?
[Piksa long pes 9]
Tok bilong ol spirit nogut i kamap pastaim long Iden
[Piksa long pes 10]
Tok bilong God long ofa bilong Krais na long Kingdom, dispela tasol inap helpim ol man