Ol i Mekim Laik Bilong Jehova

Ol i Amamas Long Jisas Olsem Man God i Makim na King!

BIKPELA lain i singaut singaut na ol i go insait long Jerusalem long Nisan 9, long yia 33 C.E., dispela i mekim na planti Juda i kirap nogut. Em i no narapela kain samting long lukim planti manmeri i go insait long taun paslain long Pasova, tasol ol dispela manmeri i narapela kain. Namel long ol dispela manmeri wanpela man i sindaun antap long donki. Dispela man em Krais Jisas, na ol manmeri i wok long lainim klos bilong ol na lip bilong diwai pam long rot em i kam long en na ol i singaut: “Amamas long Pikinini Bilong Devit. God i ken mekim gut long dispela man i kam long nem bilong Bikpela. Litimapim nem bilong God Antap Tru.” Planti man i stap pinis long Jerusalem, taim ol i lukim ol manmeri i mekim olsem, ol tu i kirap bihainim ol.​—⁠Matyu 21:​7-9; Jon 12:​12, 13.

Maski nau ol i amamas long em, Jisas i save hevi bai painim em. Man! Faipela de bihain ol bai kilim em i dai long dispela taun yet! Yes, Jisas i save olsem Jerusalem em i ples nogut, na maski em i save long dispela samting em i stretim rot bilong i go insait long dispela taun na olgeta man i ken lukim em.

Wanpela Tok Profet Bilong Bipo i Kamap Tru

Long yia 518 B.C.E., Sekaraia i tok profet long Jisas bai i go insait long Jerusalem olsem king. Em i tok: “Yupela ol manmeri bilong taun Saion, yupela i mas amamas moa yet na singaut. Lukim. King bilong yupela em i kam nau. Em i gat biknem . . . Tasol em i no save litimapim nem bilong em yet. Nogat. Em i kam olsem man i no gat nem, na em i sindaun antap long wanpela donki. . . . King bilong yupela bai i mekim olgeta kantri i lusim pasin bilong pait na i stap wanbel, na em bai i bosim olgeta manmeri long bikpela hap graun. Dispela graun i stat long bikpela solwara na i go inap long solwara i stap longwe.”​—⁠Sekaraia 9:​9, 10.

Olsem na taim Jisas i go insait long Jerusalem long Nisan 9 dispela i truim tok profet bilong Baibel. Dispela samting i no bin kamap nating, nogat; em i bin stretim gut ol samting bilong mekim olsem. Pastaim, taim ol i stap ausait long Jerusalem, Jisas i bin tokim tupela disaipel bilong em: “Yutupela go long dispela ples nau yumi lukluk long en. Na wantu bai yutupela i lukim wanpela donki ol i pasim i stap, na pikinini bilong en i stap wantaim em. Lusim rop na bringim tupela i kam long mi. Na sapos wanpela man i mekim wanpela tok long yutupela, orait yutupela i mas tok olsem, ‘Bikpela i gat wok long tupela. Na kwiktaim bai em i salim tupela i kam bek.’ ” (Matyu 21:​1-3) Tasol bilong wanem Jisas i laik i go insait long Jerusalem antap long wanpela donki, na dispela samting ol manmeri i mekim i makim wanem samting?

Wanpela Toksave Long Wok King

Sampela taim piksa yu lukim long ai i gat strong moa, winim tok ol man i mekim. Olsem na sampela taim Jehova i tokim ol profet long mekim sampela samting na dispela i strongim tok profet bilong ol. (1 King 11:​29-​32; Jeremaia 27:​1-6; Esekiel 4:​1-​17) Dispela pasin bilong mekim samting ol man inap lukim long ai, em i mekim na ol man bilong sakim tok ol tu i no inap lusim tingting long ol dispela tok. Long wankain pasin, taim Jisas i sindaun antap long wanpela donki na em i go insait long Jerusalem, em i mekim samting i olsem wanpela strongpela toksave. Em i mekim olsem wanem?

Long taim bilong ol man i bin raitim Baibel ol bikman i save mekim wok long ol donki. Olsem: Solomon i sindaun antap long wanpela yangpela donkia bilong papa bilong em na em i go bilong ol i ken makim em olsem king. (1 King 1:​33-40) Olsem na taim Jisas i go insait long Jerusalem antap long wanpela donki dispela i makim olsem em i wanpela king. Ol samting ol manmeri i bin mekim i strongim dispela toksave. Planti bilong dispela lain ol i bilong Galili, na ol i putim klos bilong ol long graun bilong Jisas i ken wokabaut antap long en​—⁠wankain olsem ol man i bin mekim bilong toksave olsem Jehu i kisim wok king. (2 King 9:13) Ol i kolim Jisas olsem “Pikinini Bilong Devit” na dispela i makim i stret em i ken stap king. (Luk 1:​31-33) Na lip bilong diwai pam ol i mekim wok long en i makim olsem ol i laik i stap aninit long wok king bilong em.​—⁠Skelim wantaim Kamapim Tok Hait 7:​9, 10.

Dispela lain i bin wokabaut i go insait long Jerusalem long Nisan 9 i kamapim klia olsem Jisas em Man God i Makim na King. Tru, i no olgeta man i amamas long lukim ol manmeri i tokaut long Jisas long dispela pasin. Ol Farisi i ting em i no stret olgeta long Jisas i kisim nem olsem king. Ating ol i kros taim ol i tok: “Tisa, yu mas krosim ol dispela disaipel bilong yu.” Jisas i bekim tok olsem: “Mi tokim yupela, sapos ol i pasim maus, ol ston yet bai i singaut na litimapim nem bilong God.” (Luk 19:​39, 40) Yes, Kingdom bilong God em bikpela tok Jisas i bin autim. Em i strong long autim dispela tok maski ol man i laik harim o nogat.

Sampela Save Yumi Kisim Long En

Jisas i strongim tru bel bilong i go insait long Jerusalem long pasin em Sekaraia i bin tok profet long en. Em i save taim em i mekim olsem, em i mekim ol birua bilong em i kros nogut tru. Paslain long taim Jisas i go long heven, em i tokim ol disaipel bilong em long autim gutnius bilong Kingdom bilong God na long “mekim olgeta lain manmeri i kamap disaipel bilong [em].” (Matyu 24:14; 28:​19, 20) Bilong mekim dispela wok yumi tu i mas strongim bel. I no olgeta man i amamas long harim tok. Sampela i les long harim na sampela i birua long en. Sampela gavman i pasim sampela rot bilong yumi long autim tok o ol i tambuim olgeta.

Tasol ol Witnes Bilong Jehova i save, ol i mas autim yet dispela gutnius bilong Kingdom bilong God i kamap pinis, maski ol man i harim o ol i no laik harim. (Esekiel 2:⁠7) Taim ol i mekim yet dispela wok bilong helpim man long kisim laip, tok promis bilong Jisas i strongim ol, em i tok: “Harim. Mi save stap wantaim yupela olgeta de, i go inap long dispela taim i pinis.”​—⁠Matyu 28:⁠20.

[Futnot]