Strongim Bel, Klostu Nau God Bai Kisim Bek Ol Man
“Mi yet mi stap wantaim yu na bai mi helpim yu. Mi Bikpela mi tok pinis.”—JEREMAIA 1:19.
GOD bai kisim bek ol man! Dispela tok i strongim tru bel bilong ol man! Wok bilong kisim bek man i olsem wok bilong helpim em long kamap fri long samting nogut i painim em na i putim hevi long em, i olsem em bai kisim gutpela samting moa na em bai amamas.
2 Long nau ol man i stap nogut tru, olsem na i mas i gat man bilong kisim bek ol! Long olgeta hap ol bikpela hevi i save painim ol man na i daunim ol na i mekim ol i bel hevi—em ol hevi bilong mani, sindaun, skin, tingting, na bel. Klostu olgeta man i no amamas na ol i bel hevi long ol pasin nogut bilong nau na ol i laik ol samting i mas senis na kamap gutpela.—Aisaia 60:2; Matyu 9:36.
“Planti Hevi Nogut Tru”
3 Long taim bilong yumi ol man i bin karim bikpela pen na hevi, winim olgeta yia bipo, olsem na long nau i gat bikpela wok moa long God i mas kisim bek ol man, winim olgeta taim bipo. Long nau, winim wan bilion man i stap rabis tru, na namba bilong ol i save go antap inap 25 milion man long olgeta wan wan yia. Long olgeta yia 13 milion pikinini i save dai, long wanem, ol i stap rabis na ol i kisim bagarap long dispela o ol i sot long kaikai—winim 35,000 i dai long olgeta wan wan de! Na planti milion man i dai long kain kain sik taim ol i no winim yet bikpela krismas.—Luk 21:11; KTH 6:8.
4 Ol bikpela pait na ol pait insait long ol kantri yet i mekim na bikpela pen na hevi i bin kamap. Buk Death by Government i tok, ol pait, na pasin birua namel long ol lain na lotu, na ol gavman i kilim i dai planti man bilong lain bilong ol yet, ol dispela samting “i bin kilim i dai 203 milion manmeri long taim bilong yumi.” Na buk i tok moa: “Namba tru bilong ol man i bagarap em inap olsem 360 milion manmeri. I olsem yumi lain manmeri bilong nau i wok long bagarap long bikpela sik ol i kolim Blak Det. Na tru tumas, ol manmeri i bagarap, tasol ol i no bagarap long ol binatang jem i kamapim sik bilong man, nogat; ol i bagarap long Strong bilong man long bosim man.” Man bilong raitim ol buk samting, em Richard Harwood, em i tok: “Sapos yumi skelim ol pait bilong bipo bipo wantaim ol pait bilong nau, ol dispela pait bilong bipo i olsem samting nating.”—Matyu 24:6, 7; KTH 6:4.
5 Na sampela hevi moa bilong nau i wok long go bikpela em planti famili i bruk, na pasin nogut bilong bagarapim man, na pasin pamuk i wok long go bikpela. William Bennett, bipo em i Seketeri Bilong Edukesen Bilong Yunaitet Stets, em i tok, insait long 30 yia ol manmeri bilong Yunaitet Stets i go bikpela inap 41 pesen, tasol ol pasin nogut tu i bin go bikpela, olsem: Pasin bilong bagarapim man inap 560 pesen, ol pikinini i kamap nating inap 400 pesen, ol man i katim marit inap 300 pesen, planti yangpela i kilim i dai skin bilong ol yet inap 200 pesen. Profesa John DiIulio, Jr., bilong Yunivesiti Prinston em i tok, planti yangpela moa i kamap “bikpela birua tru” na ol i “kilim man i dai, bagarapim man, reipim meri, hansapim man, stil na bagarapim tru sindaun bilong ol man. Ol i no sem long polis i holim ol, o ol i mas kalabus, o bel bai kotim ol.” Long dispela kantri, namba tu as na ol yangpela i gat 15 i go inap 19 krismas ol i dai, em narapela i kilim ol i dai. Na planti pikinini i no kisim yet 4-pela krismas ol i dai, long wanem, narapela i mekim nogut long ol, winim ol pikinini i dai long sik.
6 Ol dispela pasin nogut i no kamap long wanpela kantri tasol, nogat. Klostu olgeta kantri i tok ol i gat ol dispela hevi. Wanpela samting i mekim na dispela hevi i go bikpela em pasin bilong ol man long kisim ol drak em gavman i tambuim—em samting i save bagarapim planti milion man. Nius Sydney Morning Herald bilong Ostrelia i tok: “Ol man i maketim ol drak long olgeta hap, na dispela i olsem namba tu bikpela wok bisnis ol man i kisim planti mani long en, namba wan wok bisnis em long maketim ol samting bilong pait.” Narapela samting i mekim na ol hevi i go bikpela, em pasin pait na bagarapim man na pasin pamuk i save kamap planti long televisen long nau. Long planti kantri, taim pikinini i gat 18 krismas, em i bin lukim pinis planti tausen taim pasin pait na bagarapim man long televisen na planti taim em i lukim pasin pamuk. Dispela i bikpela samting bilong bagarapim ol man, long wanem, ol samting i go insait long tingting bilong yumi i save stiaim pasin yumi save mekim.—Rom 12:2; Efesus 5:3, 4.
7 Tok profet bilong Baibel i kolim stret ol dispela pasin nogut bai kamap long taim bilong yumi. Em i tok ol bikpela pait bai kamap long olgeta hap, ol bikpela sik, ol bikpela hangre, na pasin nogut bai go bikpela. (Matyu 24:7-12; Luk 21:10, 11) Na taim yumi skelim tok profet bilong 2 Timoti 3:1-5, i olsem yumi harim nius i save kamap long olgeta de long redio o televisen samting. Ol dispela samting i kamapim ples klia olsem yumi stap long “taim bilong las de” na ol man i ‘laikim ol yet tasol, na ol i laikim tumas mani, ol i sakim tok bilong papamama, ol i givim baksait long ol pasin bilong God, ol i no save long pasin bilong i stap pren bilong ol arapela, ol i no bosim laik bilong bodi bilong ol, ol i pait na bagarapim ol man nabaut, ol i tingim ol yet i bikpela man tru, ol i laikim tumas ol kain kain pasin bilong amamas na ol i no laikim God.’ Long nau ol man i kamapim tru ol dispela pasin. I olsem William Bennett i tok: ‘I gat planti samting i makim olsem sindaun bilong ol man i bagarap pinis.’ Sampela man i tok gutpela sindaun bilong ol man i pinis long taim bilong namba wan pait.
8 Long nau ol samting i nogut moa, winim pasin nogut paslain long Bikpela Tait long taim bilong Noa, taim ol man “long olgeta hap bilong graun ol i wok long pait na bikhet tasol.” Long dispela taim bipo, klostu olgeta manmeri i no tanim bel na lusim pasin nogut. Olsem na God i tok: “Olgeta manmeri i wok long pait na bikhet tasol, olsem na mi laik bagarapim ol. Bai mi pinisim tru olgeta lain manmeri.” Bikpela Tait i pinisim ol lain bilong graun ol i bin pait na bikhet.—Stat 6:11, 13; 7:17-24.
Ol Man i No Inap Kisim Bek Yumi
9 Olsem wanem? Ol wok bilong ol man inap kisim bek yumi long ol dispela pasin nogut? Baibel i tok: “Ol king na ol man bilong graun i no inap kisim bek yu. Olsem na nogut yu bilip long ol.” “Mipela man i no inap bosim wokabaut bilong mipela yet na bihainim ol rot mipela i laikim.” (Song 146:3; Jeremaia 10:23) Ol samting i kamap long ol planti tausen yia i go pinis i kamapim long ples klia ol dispela tok tru. Ol manmeri i bin traim ol kain kain gavman, na wok bisnis, na kain kain sindaun, tasol ol samting i go moa nogut. Sapos ol man yet inap stretim ol hevi, ating dispela i kamap ples klia pinis. Tasol nogat, samting tru i kamap i olsem: “Sampela bikman i wok long daunim ol arapela manmeri na mekim nogut long ol.”—Saveman 8:9; Sindaun 29:2; Jeremaia 17:5, 6.
10 Sampela yia i go pinis, Zbigniew Brzezinski, bipo em i wanpela bikman bilong gavman bilong Amerika, em i tok: “Sapos yumi skelim gut pasin i kamap long graun long nau yumi mas tok, kros pait bilong ol man i gat hevi long sindaun bilong ol, na pasin bilong kros long gavman, na planti man i no gat wok mani na mani i no gat strong moa, na pasin birua namel long olgeta lain, ol dispela hevi bai kamap bikpela moa.” Na em i tok moa: “Samting i laik bagarapim tru ol man em olsem: Bikpela pasin bikhet long olgeta hap.” Dispela tingting long ol pasin bilong dispela graun i stret moa long nau. Wanpela stori long nius Register, bilong Nu Haven, Konektikat, i tok long dispela taim bilong pait na bagarapim man i wok long go bikpela olsem: “I luk olsem ol hevi i go bikpela tumas na yumi no inap pasim moa.” Na tru tumas, pasin bilong dispela graun i wok long go nogut moa na i no gat wanpela samting inap pasim dispela, long wanem, tok profet bilong “taim bilong las de” i tok: “Ol man nogut na ol giaman profet ol bai i wok long giamanim ol manmeri. Na Satan bai i giamanim ol yet tu, na pasin bilong ol bai i kamap nogut tru.”—2 Timoti 3:13.
11 Ol man i no inap senisim ol pasin nogut bilong nau na ol samting i kamap gutpela, long wanem, Satan “em giaman god bilong dispela graun.” (2 Korin 4:4) Tru tumas, “dispela graun olgeta em i stap aninit long strong bilong Satan.” (1 Jon 5:19; lukim tu Jon 14:30.) I stret Baibel i tok long taim bilong yumi olsem: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Satan i save klostu nau wok bos na graun bilong em bai pinis, olsem na em i raun olsem “wanpela laion i singaut strong. Oltaim em i save raun bilong painim ol manmeri bilong kaikai.”—1 Pita 5:8.
Klostu Nau God Bai Kisim Bek Husat?
12 Ol bikpela hevi i kamap long graun i kamapim ples klia olsem klostu nau bikpela senis tru bai kamap—God bai kisim bek ol man! Em bai kisim bek husat? Klostu nau God bai kisim bek ol man i putim gut yau long ol mak bilong taim bilong pinis na ol i mekim ol samting i stret long en. Namba wan Jon 2:17 i soim yumi long ol samting yumi mas mekim olsem: “Dispela graun [Satan i bosim] bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”—Lukim tu 2 Pita 3:10-13.
13 Jisas i tok profet olsem i no longtaim na ol pasin nogut bilong nau bai pinis long taim bilong bikpela hevi tru, em “stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Olsem na em i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus, long wanem, dispela de bai i kamap long olgeta manmeri i stap long olgeta hap bilong graun. Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.”—Luk 21:34-36.
14 Ol man i “lukaut gut” na “was i stap” ol bai wok long kisim save long laik bilong God na bihainim. (Sindaun 2:1-5; Rom 12:2) Ol dispela man bai “abrusim” bagarap, em klostu nau i laik kamap long olgeta samting Satan i bosim. Na ol inap bilip tru olsem God bai kisim bek ol.—Song 34:15; Sindaun 10:28-30.
Nambawan Man Bilong Kisim Bek Ol Man
15 Satan na olgeta samting em i bosim i mas pinis pastaim, bambai God inap kisim bek ol wokboi bilong em. Strong bilong man i no inap long mekim olsem, i mas i gat wanpela man i gat bikpela strong moa. God Jehova i gat kain strong olsem, em i Nambawan Bikpela King, na Man bilong wokim olgeta samting. Em i nambawan Man bilong kisim bek ol man: “Mi tasol mi Bikpela, na oltaim mi save kisim bek yupela.”—Aisaia 43:11; Sindaun 18:10.
16 Jehova i nambawan tru olsem man i gat bikpela strong, na gutpela tingting na save, na stretpela pasin, na laikim tru ol narapela. (Song 147:5; Sindaun 2:6; Aisaia 61:8; 1 Jon 4:8) Olsem na taim em i givim strafe long ol man, yumi ken save tru olsem em bai bihainim stretpela pasin. Abraham i tok: “Jas bilong olgeta graun, em i mas bihainim stretpela pasin.” (Stat 18:24-33) Pol i tok: “Ating bai yumi tok God i mekim pasin i no stret, a? Nogat tru.” (Rom 9:14) Jon i tok: “Bikpela, yu God I Gat Olgeta Strong. Yu save skelim pasin bilong ol manmeri long kot, na tru tumas, kot bilong yu em i tru na i stret olgeta.”—KTH 16:7.
17 Taim Jehova i tok promis long kisim bek ol man, em bai mekim tru tru. Josua i tok: “Bikpela i inapim tru olgeta gutpela promis em i bin mekim long ol.” (Josua 21:45) Solomon i tok: “Em i no bin lusim wanpela bilong ol gutpela promis em i bin mekim long yumi.” (1 King 8:56) Aposel Pol i tok olsem Abraham “i ting long dispela promis na em i no tubel na em i no lusim bilip. Nogat. . . . Em i litimapim nem bilong God na em i save pinis olsem, God em inap mekim olsem em i bin promis long mekim.” Na Sara tu “i tingting olsem, . . . God i save tok tru tasol.”—Rom 4:20, 21; Hibru 11:11.
18 Jehova i no olsem ol man, nogat; yumi ken bilip tru long em na ol tok bilong em. “Bikpela I Gat Olgeta Strong i mekim wanpela strongpela tok olsem, ‘Tru tumas, samting mi tingting pinis long mekim, em bai mi mekim.’ ” (Aisaia 14:24) Olsem na taim Baibel i tok “Bikpela i save long rot bilong kisim bek ol long dispela traim. Na Bikpela i save pinis long pasin bilong ol man nogut, na em i save long rot bilong bekim pe nogut long ol, i go inap long De bilong bikpela kot bilong God,” yumi ken bilip tru olsem dispela samting bai kamap tru. (2 Pita 2:9) Maski ol strongpela birua i tok ol i laik bagarapim ol, ol wokboi bilong Jehova i save strongim bel, long wanem, ol i save long tingting bilong Jehova em i kamap long tok promis em i bin givim long wanpela profet bilong em olsem: “Ol dispela man i birua long yu, tasol ol bai i no inap daunim yu. Long wanem, mi yet mi stap wantaim yu na bai mi helpim yu. Mi Bikpela mi tok pinis.”—Jeremaia 1:19; Song 33:18, 19; Taitus 1:2.
Long Bipo God i Kisim Bek Ol Man
19 Taim yumi tingim gen ol wok Jehova i bin mekim bilong kisim bek ol man long bipo, dispela i strongim tru bel bilong yumi. Olsem: Lot i bin “bel hevi tru” taim em i lukim ol kain kain pasin nogut bilong ol manmeri bilong Sodom na Gomora. Tasol Jehova i bin harim ol “planti tok moa i kamap” long ol dispela taun. Long taim stret, em i bin salim ol ensel i go long Lot bilong kirapim em na famili bilong em long lusim dispela hap kwiktaim. Wanem samting i kamap? Jehova “i kisim bek Lot,” na “kukim dispela tupela bikpela taun long paia, na sit bilong paia tasol i stap.” (2 Pita 2:6-8; Stat 18:20, 21) Long nau tu Jehova i harim ol “planti tok moa i kamap” long ol pasin nogut tru bilong graun. Taim ol man bilong autim tok long nau i pinisim wok bilong ol inap long mak God i laikim, em bai bagarapim pasin bilong dispela graun na kisim bek ol wokboi bilong em olsem em i bin mekim long Lot.—Matyu 24:14.
20 Long Isip bilong bipo planti milion manmeri bilong God i bin kalabus. Jehova i tok long ol olsem: “Mi harim pinis dispela singaut na mi save tru long pen na hevi ol i karim. Olsem na mi kam daun bilong kisim bek ol.” (Kisim Bek 3:7, 8) Tasol bihain long King bilong Isip i larim ol manmeri bilong God i go, em i senisim tingting bilong em na kisim bikpela ami bilong em na ranim ol. I luk olsem ol Israel i kalabus long solwara Retsi na ol i no inap ranawe. Tasol Moses i tok: “Maski pret. Sanap strong na nau bai yupela i lukim olgeta samting Bikpela i laik mekim bilong helpim yupela.” (Kisim Bek 14:8-14) Jehova i brukim solwara Retsi na ol Israel inap abrusim bagarap. Ami bilong king i bihainim ol, tasol Jehova i mekim wok long strong bilong em na “solwara i karamapim ol Isip. Na ol i go daun tru olsem ston insait long biksi.” Bihain Moses i litimapim nem bilong Jehova long wanpela singsing olsem: “Yu nambawan king na yu stap holi. Yu antap tru na gutpela olgeta. Na husat inap olsem yu? I no gat wanpela. Yu save wokim olkain mirakel na mekim ol bikpela wok, na ol manmeri i pret tumas long yu.”—Kisim Bek 15:4-12, 19.
21 Long narapela taim, ol lain birua olsem ol Amon, na ol Moap, na ol Seir (Idom) i tok ol i laik bagarapim lain bilong Jehova. Jehova i tok: “Yupela i no ken bel hevi na pret tumas long dispela bikpela lain ami. Nogat. Dispela pait em i samting bilong God tasol. I no samting bilong yupela. . . . Yupela yet i no inap pait. Nogat tru. . . . Yupela i mas sanap na lukluk tasol, na bai yupela i lukim Bikpela i helpim yupela na winim pait.” Jehova i kisim bek lain bilong em taim em i longlongim ol lain birua na ol i paul nabaut na narapela i kilim i dai narapela.—2 Stori 20:15-23.
22 Taim Bikpela Gavman Asiria i kam pait long Jerusalem, King Senakerip i tok bilas long Jehova taim em i tok long ol man i stap antap long banis olsem: “Mipela i bin pait long planti kantri, em ol i gat planti god i stap. Tasol i no gat wanpela god i bin helpim kantri bilong em na mipela i bin lus long pait. Olsem na bilong wanem yupela Jerusalem i ting Bikpela bai i helpim yupela, na mipela i no inap winim yupela?” Long ol wokboi bilong God em i bin tok: “Yupela i no ken harim tok gris bilong Hesekia na yupela i bilip olsem Bikpela bai i helpim yupela.” Nau Hesekia i beten strong long Jehova i kisim bek ol, “na bai olgeta lain manmeri bilong graun i ken save gut olsem, yu tasol yu Bikpela.” Jehova i kilim i dai 185,000 soldia bilong Asiria, na ol wokboi bilong God i abrusim bagarap. Bihain, taim Senakerip i lotu long god giaman bilong em, ol pikinini man bilong em i kilim em i dai.—Aisaia, sapta 36 na 37.
23 Long bipo Jehova i mekim ol bikpela samting bilong kisim bek lain bilong em, na taim yumi tingim dispela samting yumi ken strongim tru bel. Olsem wanem long nau? Klostu nau wanem bikpela hevi bai painim ol gutpela wokboi bilong Jehova na em i mas wokim mirakel bilong kisim bek ol? Bilong wanem em i wet inap long nau bilong kisim bek ol? Wanem truim bai kamap long tok bilong Jisas olsem: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.” (Luk 21:28) Na olsem wanem God bai kisim bek ol wokboi bilong em i dai pinis? Stori i kamap bihain long dispela bai skelim ol dispela askim.
Ol Askim Bilong Tingim Gen
◻ Bilong wanem i mas i gat man bilong kisim bek ol man?
◻ Bilong wanem yumi no ken ting ol man bilong graun inap kisim bek yumi?
◻ Klostu nau God bai kisim bek husat?
◻ Bilong wanem yumi ken bilip tru olsem Jehova bai kisim bek yumi?
◻ Long bipo God i kisim bek husat na dispela i strongim bel bilong yumi?
[Askim Bilong Stadi]
1, 2. Bilong wanem i mas i gat man bilong kisim bek ol man?
3, 4. Bilong wanem i mas i gat man bilong kisim bek ol man long nau, winim olgeta taim bipo?
5, 6. Wanem samting i mekim na nau i gat planti hevi i stap?
7. Olsem wanem Baibel i tok profet long ol samting nogut i kamap long nau?
8. Bilong wanem God i kamapim Bikpela Tait long taim bilong Noa? Na olsem wanem dispela i wankain long taim bilong yumi?
9, 10. Bilong wanem yumi no ken ting ol man bilong graun inap kisim bek yumi?
11. Bilong wanem ol man i no gat strong bilong senisim ol pasin nogut na bai ol samting i kamap gutpela?
12. Klostu nau God bai kisim bek husat?
13, 14. Jisas i tok wanem bilong makim olsem yumi mas was i stap?
15, 16. Husat i nambawan Man bilong kisim bek ol man? Bilong wanem yumi save em bai bihainim stretpela pasin taim em i givim strafe long ol man?
17. Olsem wanem ol wokboi bilong Jehova bilong bipo ol i kamapim bilip bilong ol long ol tok promis bilong Jehova?
18. Bilong wanem ol wokboi bilong Jehova long nau ol i ken bilip tru olsem God bai kisim bek ol?
19. Olsem wanem Jehova i kisim bek Lot? Olsem na em bai mekim wanem long taim bilong yumi?
20. Stori olsem wanem Jehova i kisim bek ol Israel long Isip bilong bipo.
21. Olsem wanem Jehova i kisim bek lain bilong em long ol Amon, na ol Moap, na ol Seir?
22. Jehova i wokim wanem mirakel bilong kisim bek lain Israel long ol Asiria?
23. I gat wanem ol askim yumi laik save long bekim bilong en long God bai kisim bek ol man long nau?
[Piksa long pes 10]
Abraham i wanpela bilong ol man i bilip tru long Jehova