Jerusalem Long Taim Bilong Baibel—Ol Samting Ol i Painim Insait Long Graun
KIRAP long 1967 na i kam inap nau, ol saveman bilong painim ol samting bilong bipo insait long graun ol i mekim bikpela wok tru long hap bilong Jerusalem. Long nau ol man i ken go lukim planti bilong ol dispela hap ol i bin digim bilong painim ol samting bilong bipo, olsem na nau yumi ken go lukim sampela na yumi ken save, olsem wanem ol samting ol i painim i wankain olsem Baibel i stori long en.
Jerusalem Long Taim Bilong King Devit
Hap bilong maunten Saion, em bipo Taun Bilong Devit i bin stap long en, long nau em i olsem liklik samting tru insait long traipela taun Jerusalem bilong nau. Profesa Yigal Shiloh, em i dai pinis, em i bin go pas long digim graun long Taun Bilong Devit namel long yia 1978 na 1985, na ol i painim wanpela traipela banis ston i olsem lata lata, long hap is bilong maunten.
Profesa Shiloh i tok, dispela em i hap bilong wanpela traipela banis ston i olsem lata lata em ol Jebus (ol man i bin stap long dispela hap paslain long taim Devit i bin kisim) i bin wokim wanpela strongpela haus was antap long en. Em i tok dispela traipela banis ston em i bin painim na i stap antap long narapela traipela banis i olsem lata lata, em bilong nupela strongpela taun em Devit i bin wokim long hap bilong dispela strongpela haus was bilong ol Jebus. Namba 2 Samuel 5:9 i tok: “Devit i go sindaun long Saion, na i givim nem long dispela taun olsem, Taun Bilong Devit. Na Devit i tok, na ol wokman i wokim ol haus i raunim dispela taun. Ol i stat long wokim ol dispela haus long dispela ples ol i bin pulimapim graun long wanpela ples daun.”
Klostu long dispela banis i gat ol dua bilong ol baret em wara bilong taun i bin ran long en, na yumi ken ting sampela hap bilong en ol i bin wokim long taim bilong Devit. Sampela tok bilong Baibel long ol baret wara bilong Jerusalem i bin kamapim sampela askim. Olsem: Devit i bin tokim ol man bilong em: “Sapos yumi laik kisim dispela taun, orait yumi mas i go insait long dispela hul [olsem baret wara insait long graun] ol Jebus i save go i kam long en bilong kisim wara.” (2 Samuel 5:8) Joap, em kepten bilong ami bilong Devit, em i bin mekim olsem. Wanem insait tru bilong dispela tok “hul” bilong wara?
Na ol i kamapim sampela askim long Baret Bilong Siloam, ating ol ensinia bilong King Hesekia i bin wokim long yia 730 B.C.E. samting na stori bilong en i stap long 2 King 20:20 na 2 Stori 32:30. Olsem wanem tupela lain wokman ol inap kirap digim graun, narapela lain long hap i go na narapela lain long hap i kam, na ol inap wokim baret i go i go na bung long namel? Bilong wanem ol i wokim baret i baut baut na baret i kamap longpela moa, winim baret i go stret? Ol i bin mekim wok long ol lam i gat wel, orait olsem wanem ol wokman i gat win bilong pulim?
Nius Biblical Archaeology Review i kamapim sampela bekim bilong ol dispela askim. Dan Gill, em saveman bilong wok bilong digim graun na painim ol samting bilong bipo, em i tok: ‘Aninit long Taun Bilong Devit i gat samting ol i kolim karst. Em i olsem ol hul na baret baret nabaut em wara insait long graun i wokim taim em i ran namel long ol ston samting. Taim mipela i skelim gut ol baret wara i ran insait long graun aninit long Taun Bilong Devit, mipela i lukim olsem ol man i bin mekim wok long ol baret na hul samting i stap pinis na ol i wokim i go bikpela na kamapim ol baret wara bilong bringim wara i kam insait long taun.’
Dispela tok inap helpim yumi long save, olsem wanem ol i bin wokim dispela baret wara bilong Siloam. Ating ol wokman i bin bihainim rot bilong wanpela baret i baut baut na i stap aninit long dispela maunten. Tupela lain wokman i stap long tupela hapsait, ating ol i bin senisim liklik sampela baret em ol i stap pinis na ol i wokim wanpela baret i olsem helpim tasol. Orait nau ol i wokim wanpela baret i go daun isi isi inap wara i ken ran, kirap long Gihon long wanpela wara i kamap insait long graun na i ran i go long raunwara Siloam, em i stap insait long banis bilong taun. Ol ensinia i mekim dispela wok ol i mas i gat bikpela save tru long wokim, long wanem, maski em i longpela baret tru inap olsem 533 mita, dispela baret i go daun liklik tru, inap 32 sentimita tasol.
Inap longtaim pinis ol saveman i bin kisim save olsem as tru bilong bikpela wara i save kam insait long taun em dispela wara i kamap long graun long Gihon. Dispela wara i stap ausait long banis bilong taun, tasol em i klostu liklik inap long ol i ken wokim baret na wanpela hul i go daun inap 11-pela mita, em bilong ol man bilong taun i ken kisim wara long en na ol i no gat wok long go ausait long banis bilong taun na kisim wara. Ol i kolim dispela hul olsem Hul Bilong Waren, long wanem, wanpela man nem bilong em Charles Warren em i bin painim ol dispela baret wara long 1867. Tasol wanem taim ol i bin wokim dispela baret wara na dispela hul? Ol i bin stap long taim bilong Devit o nogat? Ating em dispela baret wara Joap i bin mekim wok long en long bipo? Dan Gill i bekim ol dispela askim, em i tok: “Bilong save olsem dispela Hul Bilong Waren em i wanpela hul em yet i kamap na i no gat wanpela man i bin wokim, mipela i kisim hap samting olsem ston i pas long arere bilong hul insait na mipela i glasim bilong painim kabon-14. Tasol mipela i no painim sampela, na dispela i makim olsem dispela samting olsem ston long arere bilong hul em i gat olsem 40,000 krismas samting. Dispela i kamapim klia tru olsem i no gat wanpela man i bin wokim dispela hul.”
Long Taim Bilong Hesekia
King Hesekia i bin stap long taim kantri Asiria i wok long daunim ol narapela kantri. Long namba 6 yia bilong Hesekia i stap king, ol Asiria i kisim Samaria, em biktaun bilong hap bilong Israel i gat 10-pela lain bilong en. Inap 8-pela yia bihain (732 B.C.E.) ol Asiria i kam bek na i laik kisim Juda na Jerusalem. Namba 2 Stori 32:1-8 i stori long ol samting Hesekia i mekim bilong sakim ol. Olsem wanem? I gat sampela samting ol i bin painim bilong dispela taim bipo na i stret wantaim dispela stori?
I gat. Long 1969 Profesa Nahman Avigad i painim sampela hap pipia ston samting bilong dispela taim bipo. Taim ol i digim graun ol i painim hap bilong wanpela traipela banis, longpela bilong namba wan hap bilong en em 40 mita, na braitpela bilong en em 7-pela mita, na sampela i tok em i go antap inap 8-pela mita. Wanpela hap bilong banis ol i wokim antap long ston insait long graun, na wanpela hap bilong en ol i wokim antap long sampela nupela haus ol i bin brukim bilong wokim dispela banis. Husat i bin wokim dispela banis? Na em i wokim long wanem taim? Wanpela nius i tok: “Tupela ves bilong Baibel i helpim Avigad long kisim save long yia ol i bin wokim dispela banis, na i gat wanem as na ol i wokim.” Tupela ves bilong Baibel i tok: “Hesekia i strong . . . na ol wokman i wokim gen hap banis i bruk pinis, na ol i wokim ol taua antap long banis . . . na ausait long bikpela banis bilong taun ol i wokim narapela banis i raunim taun olgeta.” (2 Stori 32:5) “Yupela i [mas] brukim sampela haus na kisim ston bilong ol dispela haus na stretim banis bilong taun.” (Aisaia 22:10) Long nau ol man i kam raun long dispela hap ol inap lukim hap bilong dispela banis ol i kolim Braitpela Banis long hap bilong Olpela Taun ol Juda i sindaun long en.
Pastaim ol saveman i ting Jerusalem long dispela taim bipo i no bikpela taun, tasol sampela hap ol i digim graun long en i kamapim klia olsem long dispela taim bipo Jerusalem em i bikpela taun, long wanem, taim ol Asiria i kam daunim Israel long hap not, planti refyuji bilong dispela hap ol i ranawe i kam long Jerusalem. Profesa Shiloh i ting dispela taun bilong ol Jebus em inapim bikpela hap graun olsem 6-pela hekta. Long taim bilong Solomon dispela taun em inapim 16 hekta. Tasol long taim bilong King Hesekia, olsem 300 yia bihain, hap bilong taun ol i bin wokim ol strongpela haus long en, em i go bikpela inap olsem 60 hekta.
Taim Bilong Namba Wan Tempel
Ol i bin painim sampela ples matmat bilong taim bilong Namba Wan Tempel, em paslain long taim ol Babilon i bin bagarapim Jerusalem long yia 607 B.C.E., na dispela tu i bin givim sampela save long ol saveman bilong painim ol samting bilong bipo. Long 1979 i go inap 1980 ol i bin digim graun long arere bilong Ples Daun Bilong Hinom na ol i lukim sampela matmat i stap, na ol i kirap nogut long ol samting ol i painim. Saveman Gabriel Barkay em i tok: “Ol saveman bilong painim ol samting insait long graun long hap bilong Jerusalem, i no planti taim ol i bin painim sampela samting [olsem sospen samting] bilong taim bilong Namba Wan Tempel olsem nau ol i painim, na olgeta samting i stap yet insait long en. I gat planti samting i stap insait, winim wan tausen.” Na em i tok moa olsem: “Olgeta saveman bilong painim ol samting bilong bipo insait long graun bilong Israel, ol i gat bikpela laik tru long painim ol pepa samting i gat rait long en, na ol i laik moa yet long painim long Jerusalem.” Ol i painim tupela samting olsem pepa ol i bin wokim long silva na ol i pasim. I gat wanem rait i stap long en?
Barkay i tok: ‘Taim mi putim aninit long glas bilong glasim gut, mi lukim samting olsem rait long en, em ol i bin wokim long samting i gat sap. Nem bilong God i stap ples klia long rait bilong en, na ol i bin raitim long 4-pela leta Hibru long rait Hibru bilong bipo yet, olsem yod-he-waw-he.’ Long wanpela buk bilong Barkay bihain long dispela, em i tok: ‘Mipela i kirap nogut long lukim olsem dispela tupela pepa silva wantaim i gat ol rait long en i kolim ol gutpela blesing, wankain olsem Blesing Bilong Pris em Baibel i kolim.’ (Namba 6:24-26) Dispela em i namba wan taim ol i bin lukim nem bilong Jehova long wanpela rait ol i bin painim long Jerusalem.
Bilong save olsem dispela tupela pepa silva i gat hamas krismas bilong en, ol saveman i mekim wanem? Ol i lukim ol narapela samting i stap insait long dispela liklik rum samting. I gat olsem 300 samting olsem botol o plet graun em ol inap skelim krismas bilong en, na taim ol saveman i skelim, ol i lukim olsem ol dispela samting i bilong yia olsem 600 na 500 samting paslain long Krais. Ol i skelim kain rait i stap long tupela pepa silva wantaim ol narapela rait ol i save pinis long krismas bilong en, na ol i lukim olsem dispela tupela pepa silva i bilong wankain yia olsem ol dispela botol o plet graun ol i bin painim wantaim. Nau dispela tupela pepa silva i stap long Haus Tumbuna Bilong Israel long Jerusalem na ol man inap lukim.
Taim Jerusalem i Bagarap Long 607 B.C.E.
Long 2 King sapta 25, na 2 Stori sapta 36, na Jeremaia sapta 39, Baibel i stori long taim Jerusalem i bagarap long yia 607 B.C.E. na i tok, ami bilong Nebukatnesar i kukim dispela taun long paia. Orait yumi laik save, ol samting nau ol i painim taim ol i digim graun long dispela hap, em i kamapim klia olsem dispela stori i tru? Profesa Yigal Shiloh i tok: “Ol samting ol i painim pinis insait long graun . . . i strongim tru dispela stori bilong Baibel [long ol Babilon i bin bagarapim Jerusalem]; sampela bikpela haus i bagarap olgeta, na bikpela paia i bin kukim ol hap bilong ol haus ol i bin wokim long plang.” Na em i tok moa olsem: “Long olgeta ples ol i bin digim graun long en long Jerusalem, ol i bin painim ol mak bilong dispela bagarap.”
Ol man i kam raun long dispela hap ol inap lukim ol samting bilong dispela bagarap i bin kamap inap 2,500 yia samting bipo. Haus Taua Bilong Israel, na Rum i Paia, na Haus Bulai, em nem bilong sampela ples ol i bin painim na ol man inap i go lukim. Long wanpela buk (Ancient Jerusalem Revealed), Jane M. Cahill na David Tarler, em tupela i save mekim wok bilong painim ol samting bilong bipo insait long graun, ol i tok: ‘I gat ol mak i stap bilong makim olsem ol Babilon i bin bagarapim Jerusalem—yumi inap lukim ol samting i paia olgeta insait long ol haus olsem Rum i Paia na Haus Bulai, em ol i bin painim taim ol i digim graun; na tu, ol i painim planti pipia ston bilong ol haus i bin bruk na pundaun, em ol i stap long arere bilong ples daun long hap bilong is. Ol stori bilong Baibel long Jerusalem i bin bagarap, i stret wantaim ol samting ol man i painim taim ol i digim graun long dispela hap.’
Olsem na planti samting ol man i bin painim insait long graun insait long 25 yia i go pinis, dispela i stret wantaim ol stori Baibel i mekim long Jerusalem, kirap long taim bilong Devit na i kam inap long yia 607 B.C.E. Tasol olsem wanem long Jerusalem long taim bilong ol aposel?
Jerusalem Long Taim Bilong Jisas
Long rot bilong ol samting ol i bin painim insait long graun, na long rot bilong Baibel, na ol stori bilong Josifas, em wanpela Juda bilong taim bilong ol aposel, na sampela samting moa, ol saveman inap kisim sampela save long Jerusalem bilong taim bilong Jisas, paslain long taim ol Rom i bin bagarapim long yia 70 C.E. Ol i wokim wanpela piksa bilong Jerusalem bilong bipo na ol i putim long baksait bilong wanpela bikpela hotel long Jerusalem na bai ol man i ken kam lukim, na long olgeta taim ol i wok long senisim sampela samting bilong en na bai i stret wantaim ol nupela samting ol i wok long painim taim ol i digim graun long dispela hap. Bikpela samting tru bilong dispela taun em wanpela traipela samting ol i kolim Pletfom Bilong Tempel. Long taim bilong Solomon em i no bikpela olsem, tasol Herot i wokim i go bikpela tru. Long bipo i no gat narapela pletfom ol man i bin wokim i bikpela olsem dispela—longpela bilong en i olsem 480 mita, na braitpela bilong en i olsem 280 mita. Sampela ston ol i bin wokim dispela samting long en, hevi bilong ol inap olsem 50 ton, tasol i gat wanpela ston em klostu olsem 400 ton, na wanpela saveman i tok, “long olgeta hap bilong graun long dispela taim bipo, i no gat wanpela ston i bikpela olsem dispela.”
Em nau, yumi inap save bilong wanem sampela man i kirap nogut taim ol i harim Jisas i tok: “Yupela brukim dispela tempel, na long tripela de bai mi kirapim gen.” Ol i ting em i toktok long dispela traipela tempel, tasol tempel Jisas i tok long en “em bodi bilong em yet.” Olsem na ol i tok: “Olaman. Inap long 46 yia ol i bin mekim wok bilong sanapim dispela tempel, na long tripela de tasol bai yu kirapim gen, a?” (Jon 2:19-21) Ol i bin kamautim graun long hap bilong dispela Pletfom Bilong Tempel, olsem na ol man i kam raun long dispela hap nau ol inap lukim sampela hap banis na ol narapela samting ol i bin wokim long taim bilong Jisas, na ol inap wokabaut long lata em i bin wokabaut long en bilong go antap long ol dua bilong banis bilong tempel, i stap long hap saut.
Klostu liklik long banis bilong dispela Pletfom Bilong Tempel long hap wes, insait long hap ol Juda i sindaun long en long Olpela Taun, i gat tupela ples i bin stap long taim bilong ol aposel em ol i bin painim taim ol i digim graun long dispela hap, na ol i stretim gut olsem bilong pastaim; wanpela em haus ol i kolim Haus i Paia, na wanpela ples i gat sampela haus long en ol i kolim Hap Bilong Taim Bilong Herot. Taim ol i painim pinis dispela Haus i Paia, Nahman Avigad i tok: “Nau ol i save ol Rom i bin kukim dispela haus long yia 70 A.D., taim ol i bagarapim Jerusalem. Long olgeta wok ol i bin mekim bilong digim graun long hap bilong Jerusalem bilong painim ol samting bilong bipo, dispela em i namba wan taim ol i lukim long ples klia tru ol samting i makim olsem ol Rom i bin kukim dispela taun.”—Lukim ol piksa long pes 12.
Sampela bilong ol dispela samting ol i bin painim, ol i givim save long yumi long sampela samting. Sampela haus ol i bin painim, ol i stap long hap ol i kolim Taun Antap, em ol maniman bilong Jerusalem na ol hetpris i bin sindaun long en. Insait long ol dispela haus ol i painim planti ples waswas bilong mekim man i kamap klin long ol samting bilong lotu. Wanpela savemeri i tok: ‘Ol dispela planti ples waswas i kamapim klia olsem ol man i sindaun long hap bilong Taun Antap long taim bilong Namba 2 Tempel, ol i strong long bihainim ol lo bilong kamap klin long ol samting bilong lotu. (Ol dispela lo i stap long Misna, i gat 10-pela sapta long en i stori long mikveh.)’ Taim yumi kisim save long dispela samting, dispela i helpim yumi long pilim tru ol tok Jisas i bin givim long ol Farisi na saveman bilong lo long ol dispela pasin bilong lotu.—Matyu 15:1-20; Mak 7:1-15.
Na ol i painim planti bikpela botol o sospen samting long Jerusalem ol i bin wokim long ston. Nahman Avigad i tok: ‘Orait, olsem wanem na ol dispela samting i kamap ples klia long dispela taim tasol long ol haus bilong Jerusalem na i gat planti tru olsem? Bilong bekim dispela askim, yumi ken tingim ol lo bilong ol Juda long pasin bilong i stap klin olgeta long ol samting bilong lotu (halakhah). Misna i tok, ol botol o sospen ston em ol samting i no save kamap doti. Ston i no save kamap doti long ol samting bilong lotu.’ Ol i ting em dispela as tasol na dispela wara Jisas i bin tanim i kamap wain ol i bin pulimapim long ol sospen ston, na sospen graun nogat.—Wok Pris 11:33; Jon 2:6.
Long Haus Tumbuna Bilong Israel i gat tupela samting olsem bokis bilong putim bun bilong man i dai pinis, na ol dispela bokis i narapela kain. Wanpela buk (Biblical Archaeology Review) i tok: ‘Ol dispela bokis samting ol i bin mekim wok long en inap olsem wan handet yia paslain long taim ol Rom i bagarapim Jerusalem long yia 70 C.E. Taim man i dai, ol i save putim skin bilong em insait long hul ol i bin wokim insait long bikpela hul bilong maunten ston i olsem ples matmat; taim skin bilong em i sting pinis, ol i save bungim ol bun na putim long bokis ol i save wokim long wanpela kain ston na ol i bilasim.’ Dispela tupela bokis ol man inap i go lukim, ol i bin painim long Novemba 1990 insait long wanpela hul bilong maunten ston i olsem ples matmat. Wanpela saveman, em Zvi Greenhut, em i tok: “Wanpela tok . . . olsem ‘Kaiafa’ i stap long tupela bokis insait long ples matmat, em namba wan taim ol saveman i bin painim dispela kain tok taim ol i digim graun bilong painim ol samting bilong bipo. Yumi ken ting em i nem bilong famili bilong Hetpris Kaiafas, em . . . Nupela Testamen i stori long em . . . Ol i bin kisim Jisas i go long haus bilong dispela hetpris long Jerusalem na putim em long han bilong nambawan gavman Pontus Pailat bilong Rom.” Insait long wanpela bokis ol i painim bun bilong wanpela man i gat olsem 60 krismas samting. Ol saveman i wok long tingting—ating em bun bilong Kaiafas o nogat. Wanpela saveman i ting ol dispela samting ol i painim i bilong taim bilong Jisas. “Wanpela mani ol i bin painim insait long wanpela bokis, em Herot Agripa (yia 37-44 C.E.) i bin wokim. Tupela bokis i gat nem bilong Kaiafas long en, ating em i bilong yia 2 C.E. o bihain liklik long en.”
Profesa William G. Dever bilong Yunivesiti Bilong Arisona, em i stori long Jerusalem olsem: ‘Mipela i no giaman taim mipela i tok, insait long 15 yia i go pinis, mipela i kisim bikpela save moa long ol samting bilong dispela taun long bipo, winim ol save ol i bin kisim insait long 150 yia paslain long en.’ Long planti bikpela wok ol i bin mekim long nau bilong digim graun long hap bilong Jerusalem, ol i bin painim sampela bikpela samting i helpim yumi long kisim gut ol stori bilong Baibel long ol samting i bin kamap bipo.
[Piksa Kredit Lain long pes 9]
Ol i wokim piksa bilong makim Biktaun Jerusalem long taim bilong Namba 2 Tempel – em i stap long hap bilong Holyland Hotel, Jerusalem
[Ol Piksa long pes 10]
Antap: Kona bilong Pletfom Bilong Tempel long Jerusalem long hap saut-wes
Han sut: Ol i go daun insait long Hul Bilong Waren