Yumi Mas Bilip Tru Long Jehova
“Yu mas bilip strong long Bikpela na em bai i banisim yu na lukautim yu.”—SINDAUN 3:26.
1. Tru, planti man i tok ol i bilip long God, tasol olsem wanem yumi ken ting ol i no mekim olsem long olgeta taim?
LONG mani bilong Amerika i gat dispela rait, “Mipela i Bilip Strong Long God.” Tasol olsem wanem? Ol man i mekim wok long dispela mani long Amerika o long narapela kantri, tru ol i bilip olsem God bai helpim ol? O ol i bilip moa long dispela mani yet? Pasin bilong bilip moa long mani bilong dispela kantri o bilong narapela kantri, dispela i no stret wantaim pasin bilong bilip long wanpela God i gat pasin sori na olgeta strong, na em i no save mekim wok nogut long dispela strong na em i no save mangal liklik. Em i bin tokaut klia olsem em i nolaik tru long pasin bilong mangal.—Efesus 5:5.
2. Ol Kristen tru i gat wanem tingting long strong bilong mani?
2 Ol Kristen tru i save bilip strong long God; ol i no bilip strong long mani, em strong bilong en inap giamanim man. (Matyu 13:22, NW) Ol i save, strong bilong mani long helpim ol long kisim amamas na long lukautim laip bilong ol em inap helpim ol liklik tasol. Tasol strong bilong God i Gat Olgeta Strong i no olsem. (Sefanaia 1:18) Olsem na dispela tok i gutpela long bihainim: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru’ ”!—Hibru 13:5.
3 Taim aposel Pol i raitim dispela tok i go long ol Kristen Hibru, em i kamapim ol tok Moses i bin givim long ol Israel klostu long taim em i dai. Moses i tok: “Yupela i mas sanap strong na i no ken guria na pret long ol. God, Bikpela bilong yumi, bai i stap wantaim yupela. Na em bai i no inap lusim tingting long yupela o larim yupela i stap nating.” (Lo 31:6) Ol tok i stap klostu long dispela ves i kamapim klia olsem Moses i laik strongim ol Israel long bilip olsem Jehova bai lukautim ol long sampela samting i winim ol samting bilong skin. Jehova bai mekim olsem wanem?
4. God i mekim wanem bilong kamapim klia olsem ol Israel inap bilip long em?
4 Insait long 40 yia ol Israel i mas raun long ples drai nating, God i bin stap gut long ol na lukautim ol long ol samting bilong skin. (Lo 2:7; 29:5) Na em i wokim rot bilong stiaim ol tu. Olsem: Long san i gat wanpela klaut na long nait i gat wanpela paia, na dispela tupela samting i bringim ol Israel i go long “wanpela bikpela graun i gat planti gris na ol kaikai i save kamap gutpela tumas.” (Kisim Bek 3:8; 40:36-38) Klostu long taim ol i go insait long Graun Bilong Promis, Jehova i makim Josua olsem senis bilong Moses. Ol man bilong dispela kantri ol i laik go long en ol bai wok strong long sakim ol. Tasol inap 40 yia Jehova i bin stap wantaim lain bilong em, olsem na ol i no ken pret. I gat as tru na ol Israel inap save olsem Jehova em i wanpela God ol inap bilip tru long em!
5. Olsem wanem i stap bilong ol Kristen long nau i wankain olsem bilong ol Israel taim ol i laik go insait long Graun Bilong Promis?
5 Ol Kristen long nau i bin wok long wokabaut na brukim ples drai bilong dispela taim nogut bilong nau na ol i laik go insait long nupela taim God bai kamapim. Sampela i bin mekim olsem inap longtaim tru, winim 40 yia. Nau ol i stap long boda bilong dispela nupela taim. Tasol ol birua i stap yet na ol i laik pasim ol na bai ol i no ken go insait long dispela nupela taim, em bihain bai kamap olsem wanpela Graun Bilong Promis i winim dispela Graun Bilong Promis long bipo i gat ol kaikai i save kamap gutpela tumas. Olsem na tok bilong Moses em Pol i kamapim em i stret long ol Kristen long nau: “Bai mi no lusim yu. Bai mi no larim yu i stap nating. Nogat tru”! Ol Kristen i stap strong na i no pret, na ol i bilip tru long Jehova, ol bai kisim gutpela pe.
Save na Pasin Pren
6, 7. (a) Abraham i bilip long Jehova na wanem samting i traim dispela bilip bilong em? (b) Ating Abraham i pilim olsem wanem taim em i wokabaut i go bilong kamap long ples em i mas kilim Aisak olsem ofa?
6 Wanpela taim God i tokim Abraham, em tumbuna bilong ol Israel, long kilim i dai pikinini bilong em, Aisak, olsem wanpela ofa em paia i kukim olgeta. (Stat 22:2) Wanem samting i mekim na dispela gutpela papa i bilip strong tru long Jehova na wantu em i redi long bihainim tok bilong em? Hibru 11:17-19 i bekim dispela askim olsem: “God i bin mekim promis long Abraham olsem, ‘Long Aisak tasol bai ol lain tumbuna pikinini bilong yu i kamap.’ Tasol taim God i traim Abraham, na i tokim Abraham olsem em i mas kilim dispela wanpela pikinini bilong en olsem ofa, orait Abraham i bilip long God na i givim Aisak long God. Abraham i tingting olsem, ‘Sapos Aisak i dai, maski, God em inap long kirapim em bek.’ Olsem na tru tumas, yumi inap tok bokis long dispela samting i bin kamap na tok olsem, Abraham i kisim bek pikinini bilong en long matmat.”
7 Tingim dispela samting tu: Bilong kamap long ples bilong mekim dispela ofa, Abraham na Aisak i mas wokabaut inap 3-pela de. (Stat 22:4) Abraham i gat bikpela hap taim long tingim gen dispela samting God i bin tokim em long mekim na senisim tingting bilong em. Em i pilim olsem wanem? Pastaim em i no bin ting long kamapim wanpela pikinini, olsem na taim Aisak i kamap, em i amamas tru. God yet i mekim na Aisak i kamap, olsem na Abraham wantaim meri bilong em Sara, bipo em i no inap long karim pikinini, nau ol i strong moa yet long givim bel long God. Ol i wetim ol samting i kamap long Aisak na lain tumbuna pikinini bilong em long bihain. Tasol nau i olsem ol samting ol i wet long en i no inap kamap, long wanem, God i tokim Abraham long kilim i dai Aisak.
8. Abraham i bilip olsem God inap kirapim bek Aisak, na em i bilip long wanem samting moa?
8 Tasol Abraham i bilip long God, na as bilong dispela bilip i olsem: Em i save gut long God olsem wanpela gutpela pren. Em i “pren” bilong God, olsem na em “i bilip long God, na God i kolim em stretpela man.” (Jems 2:23) Abraham i bilip strong olsem Jehova inap kirapim bek Aisak, tasol i no dispela samting tasol em i bilip long en. Abraham i bilip tu olsem i stret Jehova i tokim em long mekim dispela samting, maski Abraham i no save long olgeta liklik liklik samting bilong en. I no gat as na bai em i ken ting Jehova i no bihainim stretpela pasin long dispela samting em i tokim em long mekim. Orait nau bilip bilong Abraham i kamap strong moa taim ensel bilong Jehova i pasim em long kilim i dai Aisak olsem ofa.—Stat 22:9-14.
9 Inap 25 yia paslain long taim dispela samting i kamap, Abraham i bin kamapim klia olsem em i bilip strong long stretpela pasin bilong Jehova. Taim God i tokim em olsem Sodom na Gomora bai bagarap, em i tingim ol stretpela man i stap long dispela hap, na Lot tu, em pikinini bilong brata bilong Abraham; nogut ol i kisim bagarap. Abraham i tokim God: “Yu laik kilim ol gutpela man wantaim ol man nogut. Em i no gutpela pasin. Yu no ken mekim wankain pasin long ol gutpela man na long ol man nogut. Jas bilong olgeta graun, em i mas bihainim stretpela pasin.”—Stat 18:25.
9, 10. (a) I gat wanem narapela taim na Abraham i bin kamapim klia olsem em i bilip strong long Jehova? (b) Pasin bilong Abraham inap lainim yumi long wanem bikpela samting?
10 Abraham i bilip olsem Jehova i no save mekim wanpela samting i no stret, nogat tru. Bihain, man bilong raitim Song i tok: “God i save bihainim stretpela pasin na em i save marimari long yumi long olgeta samting em i mekim.” (Song 145:17) I gutpela yumi ken askim skin bilong yumi yet olsem: ‘Mi orait long Jehova i larim ol hevi samting i painim mi na mi no gat tupela tingting long stretpela pasin bilong em? Mi bilip olsem ol samting em i larim i kamap, bihain dispela bai helpim mi yet na ol narapela tu?’ Sapos yumi inap tok yes, orait yumi ken save, pasin bilong Abraham i bin skulim yumi long wanpela bikpela samting.
Bilip Long Ol Man Jehova i Makim
11, 12. (a) I gat wanem narapela samting ol wokboi bilong God i mas bilip long en? (b) Ating sampela taim yumi hatwok long mekim wanem?
11 Ol man i bilip long Jehova ol i mas bilip tu long ol man Jehova i makim ol bilong kamapim laik bilong em. Long ol Israel bipo, dispela i makim olsem ol i mas bilip long Moses, na bihain, long senis bilong em, Josua. Long ol Kristen bilong pastaim, dispela i makim olsem ol i mas bilip long ol aposel na ol hetman long kongrigesen bilong Jerusalem. Long yumi long nau, dispela i makim olsem yumi mas bilip long “wokboi i gat gutpela tingting” em God i makim bilong givim “kaikai long [yumi] long taim bikman i makim,” na yumi mas bilip tu long ol man bilong dispela lain ol i insait long Lain Bilong Bosim Ol Witnes.—Matyu 24:45.
12 Sapos yumi bilip long ol man i go pas long wok bilong lukautim kongrigesen Kristen, dispela bai helpim yumi yet. Baibel i tok: “Ol lida bilong yupela ol i laik helpim yupela, na ol i save was long yupela oltaim. Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.”—Hibru 13:17.
No Ken Skelim Ol Man God i Makim Bilong Mekim Wok
13. I gat wanem as na yumi ken bilip long ol man God i makim bilong i go pas?
13 Baibel i helpim yumi long kisim stretpela tingting long pasin bilong bilip long ol man i go pas long wok bilong lukautim lain bilong Jehova. Yumi ken askim yumi yet: ‘Moses i bin popaia long sampela taim? Long olgeta taim ol aposel i bihainim tingting bilong Krais olsem Jisas i laik bai ol i bihainim?’ Yumi save pinis long bekim bilong ol dispela askim, a? Bilong stiaim lain bilong em, Jehova i bin mekim wok long ol man i stap gut long em na givim bel long em, maski ol i no gutpela olgeta. Ol elda long nau ol tu i no gutpela olgeta, tasol yumi mas save, ‘spirit holi i bin makim ol i stap wasman bilong ol sipsip bilong God.’ I stret yumi mas sambai long ol na daun long ol.—Aposel 20:28.
14. I gat wanem samting yumi ken tingim na Jehova i makim Moses olsem gopas, na em i no makim Aron o Miriam?
14 Aron i bikpela long Moses inap olsem 3-pela krismas, tasol krismas bilong Miriam i winim krismas bilong tupela. (Kisim Bek 2:3, 4; 7:7) Na Aron i save gut long pasin bilong toktok, winim Moses, olsem na God i makim em long stap olsem maus bilong brata bilong em. (Kisim Bek 6:29–7:2) Tasol bilong kamap gopas bilong ol Israel, Jehova i no makim biksusa bilong ol, em Miriam, o man i save gut long pasin bilong toktok, em Aron. Em i makim Moses, na taim em i mekim olsem, em i tingim wanem wanem samting tru bai helpim lain bilong em. Bihain, inap liklik hap taim, Aron tupela Miriam i no tingim gut dispela samting, na tupela i kirap na toktok planti olsem: “Ating Bikpela i bin givim tok long ol manmeri long maus bilong Moses wanpela tasol, a? Nogat ya. Em i givim tok long ol long maus bilong mitupela tu.” Miriam i kisim strafe long dispela pasin bikhet em wantaim Aron i bin mekim long dispela man Jehova i makim—ating Miriam i bin kirapim Aron long mekim olsem. Sapos tupela i bin tingting gut, tupela bai save dispela man God i makim, “em i man bilong daunim em yet, na i no gat wanpela man long dispela graun i save daunim em yet inap olsem [em].”—Namba 12:1-3, 9-15.
15, 16. Kalep i mekim wanem bilong kamapim klia olsem em i bilip tru long Jehova?
15 Taim Moses i salim 12-pela man i go bilong lukstil long Graun Bilong Promis na ol i kam bek, 10-pela ol i toktok planti long dispela ples. Tok bilong ol i mekim ol Israel i pret; ol i tok ol man bilong Kenan “ol i longpela bun tru.” Dispela i mekim na ol Israel i kirap na “tok kros long Moses wantaim Aron.” Tasol i no olgeta man bilong lukstil i kamapim tok i makim olsem ol i no bilip long Moses na Jehova, nogat. Baibel i tok: “Ol Israel i harim dispela tok bilong ol hetman na ol i pret. Na ol i toktok planti long Moses. Tasol wanpela hetman, nem bilong en Kalep, em i sarapim ol na i tok olsem, ‘Watpo yupela i toktok planti? Nau yumi mas i go pait long ol na kisim graun bilong ol, long wanem, yumi gat strong na yumi inap long winim ol na kisim dispela graun.’ ” (Namba 13:2, 25-33; 14:2) Narapela man bilong lukstil, em Josua, em tu i bin sanap strong olsem Kalep. Tupela wantaim i kamapim klia olsem ol i bilip strong long Jehova taim ol i tok: “Sapos Bikpela i amamas long yumi, em bai i kisim yumi i go long dispela kantri na givim dispela gutpela graun i gat planti gris long yumi. Yupela . . . i no ken pret long ol manmeri i stap long hap. . . . Bikpela i stap wantaim yumi . . . Olsem na maski pret long ol.” (Namba 14:6-9) Tupela i bilip strong long Jehova na ol i kisim gutpela pe long en. Kalep na Josua na sampela Livai tasol ol i go insait long Graun Bilong Promis—ol man i bikpela pinis long dispela taim bipo ol i no go insait.
16 Sampela yia bihain, Kalep i tok: “Mi bihainim gut tok bilong God, Bikpela bilong yumi. . . . Harim. Ol Israel i stap yet long ples wesan nating, na Bikpela i tokim Moses long dispela samting. Na nau 45 yia i go pinis. Tasol Bikpela i helpim mi na mi stap yet. Nau mi gat 85 krismas pinis. Tasol strong bilong mi i no pinis. Nogat. Strong bilong mi i stap wankain yet olsem bipo long taim Moses i bin salim mi i go long dispela wokabaut. Strong bilong mi i stap yet na mi inap i go pait na mekim olgeta samting.” (Josua 14:6-11) Tingim: Kalep i gat stretpela tingting long ol samting, na em i stap gut long God, na em i gat strong long skin inap long em i mekim wok. Tasol Jehova i no makim Kalep long kamap senis bilong Moses. Em i bin givim dispela gutpela wok long Josua. Yumi ken bilip olsem i gat as na Jehova i bin makim Josua, na Josua inap tru long mekim dispela wok.
17. Ating wanem samting i mekim na i olsem Pita i no inap kisim bikpela wok?
17 Inap 3-pela taim aposel Pita i tok em i no save liklik long Bikpela bilong em. Na em i no bin tingting gut na em i kirap kwik na katim yau bilong wokboi bilong hetpris. (Matyu 26:47-55, 69-75; Jon 18:10, 11) Ating sampela man bai tok, Pita em i man bilong pret na i no save bihainim stretpela tingting, olsem na em i no inap long kisim ol wok i gat namba. Tasol husat i bin kisim ol ki bilong Kingdom na opim rot long 3-pela kain lain i ken go insait long heven? Em Pita tasol.—Aposel 2:1-41; 8:14-17; 10:1-48.
18. Yumi mas abrusim wanem pasin nogut em Jut i stori long en?
18 Ol dispela samting i kamap bipo i soim olsem yumi mas was gut—nogut yumi skelim ol man long ai tasol. Sapos yumi bilip tru long Jehova, bai yumi no gat tupela tingting long ol man God i makim bilong mekim wok. Insait long kongrigesen bilong God long graun i gat ol man i no gutpela olgeta—ol inap popaia—tasol God i save mekim bikpela wok long ol. Jut, em brata bilong Jisas, em i toksave long ol Kristen long taim bilong em olsem sampela man ol “i save bikhet long Bikpela bilong yumi, na ol i save tok nogut long ol nambawan ensel bilong heven.” (Jut 8-10) Nogut yumi bihainim pasin i wankain olsem ol, a?
19. Bilong wanem yumi no ken skelim ol man God i makim olsem ol inap tru long mekim wok bilong ol o nogat?
19 Ol man Jehova i makim ol long mekim sampela wok, ating ol i gat ol pasin inap long ol i ken stiaim lain bilong em long bihainim rot em i laik bai ol i mas bihainim long dispela taim. Yumi mas wok strong long save long dispela samting—yumi no ken wok long skelim skelim olsem ol man God i makim ol long mekim sampela wok ol inap tru long mekim o nogat. Yumi mas mekim pasin daun na amamas long mekim ol wok Jehova i bin givim long yumi wan wan. Long dispela rot yumi kamapim klia olsem yumi bilip tru long Jehova.—Efesus 4:11-16; Filipai 2:3.
Bilip Long Stretpela Pasin Bilong Jehova
20, 21. Samting God i mekim long Moses inap lainim yumi long wanem samting?
20 Sapos sampela taim yumi bilip strong tumas long yumi yet na yumi no bilip strong long Jehova, yumi mas larim pasin bilong Moses i skulim yumi. Taim em i gat 40 krismas, em yet i kirap na mekim wok bilong helpim ol Israel long lusim wok kalabus long Isip. Em i gat gutpela laik long helpim ol, tasol samting em i mekim i no helpim ol Israel long lusim wok kalabus long dispela taim, na i no helpim em yet. Dispela i mekim na em i mas ranawe lusim Isip. Em i go stap long narapela kantri na em i hatwok i go inap 40 yia, na dispela i lainim em na nau em inap tru long God i ken makim em long mekim dispela wok em i gat laik long mekim bipo. Orait nau Moses inap bilip olsem Jehova bai helpim em long mekim dispela wok, long wanem, nau em bai mekim ol samting long pasin Jehova i laikim na long taim stret Em i makim bilong dispela samting i mas kamap.—Kisim Bek 2:11–3:10.
21 Yumi olgeta wan wan i ken askim yumi yet: ‘Sampela taim mi go pas long Jehova na long ol elda i gat wok insait long kongrigesen bambai mi ken hariapim ol samting o mekim ol samting long pasin mi yet mi laikim? Mi redi long skul yet, o mi pilim olsem ol elda i no tingim mi na ol i givim bikpela wok long narapela?’ Yumi bin larim pasin bilong Moses i skulim yumi long dispela bikpela samting?
22. Maski Moses i lus long mekim wanpela gutpela wok, em i pilim olsem wanem long Jehova?
22 Na pasin bilong Moses inap skulim yumi long narapela samting tu. Namba 20:7-13 i tokim yumi long wanpela popaia em i bin mekim, olsem na em i lus long kisim wanpela bikpela samting, em gutpela wok bilong bringim ol Israel i go insait long Graun Bilong Promis. Olsem wanem? Em i ting dispela samting Jehova i mekim i no stret? Yu ting em i go stap longwe long ol narapela na bel hevi, long wanem, em i ting pasin God i mekim long em i no stret? Yu ting Moses i no bilip moa long stretpela pasin bilong Jehova? Bekim bilong ol dispela askim i stap long ol tok Moses yet i bin mekim klostu long taim em i dai. Moses i stori long Jehova olsem: “Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:4) Tru tumas, Moses i bilip strong long Jehova i go inap long taim em i dai. Olsem wanem long yumi? Yumi olgeta wan wan i save mekim sampela wok bilong strongim bilip bilong yumi long Jehova na long stretpela pasin bilong em? Olsem wanem yumi inap mekim olsem? Orait nau yumi ken stori long dispela.
Bai Yu Bekim Olsem Wanem?
◻ I gat wanem ol as na ol Israel inap bilip long Jehova?
◻ Pasin bilong Abraham inap lainim yumi olsem wanem long pasin bilong bilip long Jehova?
◻ Bilong wanem yumi no ken skelim skelim ol man God i makim bilong mekim wok?
3. Olsem wanem ol tok i stap klostu long Lo 31:6 i kamapim klia tok Pol i mekim long dispela ves?
[Piksa long pes 13]
Sapos yumi bilip long Jehova, yumi mas daun long ol man i save go pas long lukautim wok bilong kongrigesen