Bilip Bilong Ol i Mekim na Ol Man i Bel Nogut Long Ol
“Olgeta man bai i bel nogut tru long yupela, long wanem, nem bilong mi em i stap long yupela.”—MATYU 10:22.
1, 2. Yu inap kolim sampela stori tru tru bilong ol Witnes Bilong Jehova em ol i bin bihainim ol bilip bilong ol na ol i kisim hevi long en?
WANPELA stretpela man bilong lukautim stua, em i bilong ailan Krit, ol polis i bin holim em planti planti taim, na oltaim ol i bringim em i go long kot bilong kantri Grik. Em i mas lusim meri na 5-pela pikinini bilong em na em i kalabus inap 6-pela yia samting. Long Japan skul i rausim wanpela sumatin i gat 17 krismas, maski em i save mekim pasin i stret na em i winim nambawan mak long klas bilong em i gat 42 sumatin long en. Long Frans ol i pinisim sampela man long wok mani bilong ol, maski ol i gat gutpela nem olsem man bilong wok strong na givim bel long mekim wok bilong ol. Orait wanem samting long stori bilong ol dispela man i wankain?
2 Ol dispela man em ol Witnes Bilong Jehova. Ol i bin mekim wanem “rong”? Ol i bin bihainim bilip bilong lotu bilong ol. Dispela man bilong lukautim stua em i bihainim tok bilong Krais Jisas na em i kamapim bilip bilong em long ol narapela man. (Matyu 28:19, 20) Em i bin kot long wanpela lo bilong kantri Grik i bilong bipo tru na i tambuim man long autim bilip bilong em long ol narapela man. Na skul i rausim dispela sumatin, long wanem, maus bilong bel bilong em, em Baibel i skulim pinis, i no orait long em i insait long kendo (olsem pasin bilong ol Japan long mekim wok long bainat), em ol skulmanki i mas lain long en. (Aisaia 2:4) Na dispela lain ol bos i pinisim ol long wok mani bilong ol long Frans, ol dispela bos i toksave olsem i gat wanpela as tasol na ol i pinisim ol long wok: Ol i bin kamapim long ples klia olsem ol i Witnes Bilong Jehova.
3. Bilong wanem i no planti Witnes Bilong Jehova i bin kisim bikpela pen na hevi long han bilong ol man?
3 Nau long dispela taim, ol kain hevi olsem i bin painim ol Witnes Bilong Jehova long sampela kantri. Tasol i no planti Witnes Bilong Jehova i bin kisim bikpela pen na hevi long han bilong ol man—wan wan tasol. Long olgeta hap bilong graun, lain bilong Jehova i gat nem olsem man bilong bihainim gutpela pasin, olsem na i no gat as tru na ol man i laik mekim nogut long ol. (1 Pita 2:11, 12) Ol i no save wokim toktok bilong mekim nogut long sampela lain o gavman samting, o mekim sampela pasin i givim hevi long sampela man, nogat. (1 Pita 4:15) Ol i wok strong long bihainim tok bilong Baibel long i stap aninit long God pastaim, na bihain long en ol i mas i stap aninit long ol gavman bilong graun. Ol i save tromoi takis olsem gavman i singaut long en, na ol i wok strong long “i stap wanbel wantaim olgeta man.” (Rom 12:18; 13:6, 7; 1 Pita 2:13-17) Taim ol i skulim ol man long tok bilong Baibel, ol i wok long kirapim ol long daun long ol lo, na tingim famili i bikpela samting, na bihainim stretpela pasin. Planti gavman i bin litimapim nem bilong ol, long wanem, ol i save bihainim gut ol lo bilong kantri ol i sindaun long en. (Rom 13:3) Tasol olsem namba wan paragraf i makim, sampela taim ol man i birua long ol—long sampela kantri ol gavman yet i putim tambu long wok bilong ol. Olsem wanem? Yumi ken kirap nogut long dispela?
“Pe” Ol i Mas Tromoi Bilong i Stap Disaipel
4. Olsem Jisas i tok, taim man i kamap disaipel bilong em, dispela man i ken save wanem samting bai painim em?
4 Krais Jisas i kamapim klia tru ol samting bai painim ol man i stap disaipel bilong em. Em i tokim lain bilong em: “Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu.” Ol man i birua “nating” long Jisas. (Jon 15:18-20, 25; Song 69:4; Luk 23:22) Ol disaipel bilong em ol i ken save, kain samting olsem bai painim ol—ol man bai birua nating long ol na i no gat as tru bilong mekim olsem. Jisas i toksave long ol: “Olgeta man bai i bel nogut tru long yupela.”—Matyu 10:22; 24:9.
5, 6. (a) I gat wanem as na Jisas i tokim ol man i laik bihainim em olsem ol i mas “tingim gut pe” ol bai tromoi? (b) Olsem na bilong wanem yumi no ken kirap nogut taim ol man i birua long yumi?
5 Olsem na ol man i laik bihainim Jisas, em i tokim ol olsem ol i mas “tingim gut pe” ol bai tromoi bilong i stap disaipel bilong em. (Luk 14:28) Bilong wanem ol i mas tingim gut dispela samting? I no bilong skelim olsem ol bai kamap disaipel bilong em o nogat. Ol i mas mekim olsem bambai ol i ken tingting strong long inapim tru olgeta samting ol i mas mekim olsem disaipel. Yumi mas redi long karim ol hevi i save kamap long dispela wok. (Luk 14:27) I no gat wanpela man i save subim yumi long mekim wok bilong Jehova olsem wanpela disaipel bilong Krais. Long laik bilong yumi yet yumi bin pasim tok long bel olsem yumi bai mekim olsem, na yumi save pinis long ol samting bilong dispela wok. Yumi save pinis olsem taim yumi dediketim laip bilong yumi long God, bai yumi kisim ol gutpela blesing, tasol i gat sampela samting moa bai painim yumi, olsem olgeta lain bai i “bel nogut tru” long yumi. Olsem na taim ol man i birua long yumi, yumi no tingting planti long dispela. Yumi bin “tingim gut pe” yumi mas tromoi, na yumi redi pinis long tromoi dispela pe.—1 Pita 4:12-14.
6 Bilong wanem sampela lain—na sampela bikman bilong gavman tu—ol i laik birua long ol Kristen tru? Bilong painim bekim bilong dispela askim, yumi ken skelim tupela lain bilong lotu ol i bin stap long taim bilong ol aposel. Ol man i bel nogut long tupela lain wantaim—tasol i gat narapela narapela as na ol i bel nogut long ol.
Bel Nogut Long Ol Narapela Lain
7, 8. Wanem ol tok i kamapim klia olsem ol Juda i tingim ol narapela lain i olsem ol pipia lain tasol? Dispela i mekim na ol Juda i kisim wanem kain tingting?
7 Taim Jisas i stap long graun, Israel i stap aninit long gavman bilong Rom, na lotu Juda i stap aninit long strong bilong ol hetman bilong lotu, olsem ol saveman bilong lo na ol Farisi. (Matyu 23:2-4) Lo Bilong Moses i bin tok long ol Juda i mas i stap longwe long ol narapela lain, tasol ol dispela hetman bilong lotu i strong tumas long bihainim dispela lo na ol i paulim na tok ol Juda i mas tingim ol lain i no Juda olsem ol pipia lain tasol. Dispela pasin bilong ol i kamapim wanpela lotu i kirapim ol Juda long bel nogut long ol manmeri bilong ol narapela lain, na dispela i kirapim ol narapela lain long bel nogut long ol Juda.
8 Long dispela taim ol Juda i tingim ol narapela lain i olsem ol man nogut tru, olsem na i no hatwok long ol hetman bilong lotu Juda i tokim lain bilong ol olsem ol i mas tingim ol narapela lain i olsem pipia nating tasol. Ol hetman bilong lotu Juda i skulim ol man olsem wanpela meri Juda i no ken stap em wanpela tasol wantaim ol manmeri bilong ol narapela lain, long wanem, ‘ol i ting ol dispela lain i man nogut bilong mekim ol pasin i gat sem.’ Wanpela man Juda i no ken “i stap em wanpela tasol wantaim ol, long wanem, ol i ting ol dispela lain i save kapsaitim blut bilong man.” Sapos wanpela bilong ol narapela lain i pulim susu bilong meme samting na i no gat wanpela Juda i bin lukim em i mekim olsem, orait ol Juda i no ken kisim dispela susu na mekim wok long en. Ol Juda i wok long kisim dispela tingting bilong ol hetman bilong ol na ol i kisim pasin bilong i stap longwe long ol narapela lain na ol i no save bung liklik wantaim ol.—Skelim wantaim Jon 4:9.
9. Ol tok em ol hetman bilong ol Juda i bin mekim long ol lain i no Juda, dispela i mekim wanem?
9 Dispela kain pasin ol hetman bilong lotu i skulim ol Juda long mekim long ol lain i no Juda, em i no helpim ol Juda na ol narapela lain long i stap pren wantaim. Ol narapela lain i kirap tingim ol Juda olsem ol man bilong bel nogut long olgeta lain bilong graun. Tasitus, wanpela saveman bilong Rom (mama i bin karim em long yia 56 C.E. samting) em i tok, ol Juda ‘i save bel nogut tru long ol narapela lain, olsem ol birua bilong ol.’ Na Tasitus i tok tu olsem ol manmeri bilong ol narapela lain ol i kirap bihainim lotu bilong ol Juda, ol hetman bilong lotu i skulim ol olsem ol i mas givim baksait long kantri bilong ol na tingim famili na ol pren bilong ol i olsem pipia nating tasol. Ol Rom i larim ol Juda, long wanem, ol i bikpela lain na ol Rom i pret long ol. Tasol taim sampela lain Juda i kirap na pait long ol Rom long yia 66 C.E. em nau, ol Rom i kirap na bekim nogut long ol, na bihain Rom i bagarapim Jerusalem long yia 70 C.E.
10, 11. (a) Lo Bilong Moses i tok ol i mas mekim wanem kain pasin long ol manmeri bilong ol narapela lain i stap namel long ol? (b) Samting i bin painim lotu Juda em i lainim yumi long wanem samting?
10 Tasol dispela tingting bilong ol Juda long ol manmeri bilong ol narapela lain, yu ting em i stret wantaim kain lotu em Lo Bilong Moses i tok ol i mas bihainim? Tru, Lo i tok ol i mas i stap narapela kain long ol narapela lain, tasol dispela lo i bilong lukautim ol Israel na klinpela lotu bilong ol. (Josua 23:6-8) Tasol Lo i tok ol i mas mekim stretpela pasin long ol narapela lain i stap namel long ol na mekim gut long ol sapos ol i no bikhet na sakim ol lo bilong Israel. (Wok Pris 24:22) Pasin ol Juda i mas mekim long ol dispela narapela lain, em i kamap klia long ol samting Lo i makim, tasol ol hetman bilong lotu Juda long taim bilong Jisas ol i no bihainim, olsem na ol i kamapim wanpela kain lotu i kirapim ol Juda long bel nogut long ol narapela lain, na ol narapela lain i bel nogut long ol Juda. Bihain Jehova i no orait moa long dispela lain Juda i stap long taim bilong Jisas.—Matyu 23:38.
11 Olsem wanem? Dispela inap lainim yumi long wanpela samting? Em inap. Sapos yumi ting yumi yet i stretpela man na yumi winim ol narapela lain i no save bihainim ol bilip bilong lotu bilong yumi, orait dispela i no stret wantaim pasin bilong lotu tru long Jehova, na em i no amamas long dispela pasin. Yumi ken tingim ol gutpela Kristen i stap long taim bilong ol aposel. Ol i no bel nogut long ol lain i no Kristen, na ol i no kirap mekim pait long gavman bilong Rom, nogat. Tasol ol man i “bel nogut tru” long ol. Bilong wanem? Na husat tru ol i bel nogut long ol?
Ol Kristen Bilong Pastaim—Husat i Bel Nogut Long Ol?
12. Olsem wanem Baibel i kamapim klia olsem Jisas i laik bai ol disaipel bilong em i gat stretpela tingting long ol lain i no Kristen?
12 Ol tok Jisas i bin skulim ol man long en i kamapim klia olsem em i laik bai ol disaipel i gat stretpela tingting long ol lain i no Kristen. Em i tok, ol disaipel bilong em i no bilong dispela graun—olsem ol bai givim baksait long ol tingting na pasin i save pait wantaim ol stretpela pasin bilong Jehova. Bai ol i no insait long ol pait na wok politik bilong dispela graun. (Jon 17:14, 16) Tasol Jisas i no kirapim ol disaipel long ting ol lain i no Kristen ol i pipia lain tasol, nogat; em i tokim ol long ‘laikim ol birua bilong ol.’ (Matyu 5:44) Aposel Pol i tokim ol Kristen: “Sapos birua bilong yu em i hangre, orait yu mas givim kaikai long em. Sapos em i dai long wara, orait yu mas givim wara long em.” (Rom 12:20) Na em i tokim ol Kristen long “mekim gutpela pasin long ol arapela.”—Galesia 6:10.
13. Bilong wanem ol hetman bilong lotu Juda i birua nogut long ol disaipel bilong Krais?
13 Tasol i no longtaim na pasin birua i painim ol long 3-pela rot. Namba wan rot, em ol hetman bilong lotu Juda. Em nau, kwiktaim pasin bilong ol Kristen i pulim ai bilong ol dispela lain. Ol Kristen i gat ol strongpela lo bilong stretpela pasin na ol i stap gut long ol dispela lo, na ol i givim bel tru long autim tok bilong gutpela samting ol man inap bilip na wet long en. Planti tausen manmeri ol i lusim lotu Juda na ol i kam insait long lotu Kristen. (Aposel 2:41; 4:4; 6:7) Long tingting bilong ol hetman bilong lotu Juda, ol disaipel Juda bilong Jisas ol i olsem man bilong bikhet na lusim bilip! (Skelim wantaim Aposel 13:45.) Ol dispela hetman i kros na ol i ting lotu Kristen i daunim ol tok ol i bin kisim long ol tumbuna. Na lotu Kristen i sakim tingting bilong ol long ol narapela lain! Kirap long yia 36 C.E., ol manmeri bilong ol narapela lain ol inap kamap Kristen, na ol inap holim wankain bilip na mekim ol wankain wok olsem ol Juda Kristen i mekim.—Aposel 10:34, 35.
14, 15. (a) Bilong wanem ol lain bilong lotu haiden i bel nogut tru long ol Kristen? Kolim wanpela as na ol i mekim olsem. (b) Wanem namba 3 lain i “bel nogut tru” long ol Kristen bilong pastaim?
14 Namba 2 samting, em ol lain bilong lotu haiden ol i bel nogut long ol Kristen. Olsem: Long Efesus bilong bipo, ol man i save wok bisnis long wokim ol samting long silva, olsem ol liklik piksa bilong haus lotu bilong god meri Artemis, na ol i kisim bikpela mani long en. Tasol taim Pol i autim tok long dispela hap, planti manmeri bilong Efesus ol i bilip long dispela tok na ol i lusim pasin bilong lotuim Artemis. Em nau, ol dispela man bilong wokim ol samting long silva ol i lukim olsem dispela wok bisnis bilong ol i laik bagarap, na ol i kros na kirapim pait. (Aposel 19:24-41) Wankain samting i bin kamap long taim lotu Kristen i go kamap long Bitinia (nau em not-wes bilong Turki). Bihain liklik long taim ol i pinisim wok bilong raitim Ol Skripsa Grik, namba wan gavman bilong Bitinia, em Plini Namba Tu, em i tok ol haus lotu haiden i stap nating na i no gat man long en, na i no planti man i baim kaikai bilong ol animal ol i save kilim bilong mekim ofa long en. Ol i putim asua bilong dispela i go long ol Kristen—na ol i mekim nogut long ol—long wanem, lotu bilong ol i no orait long kilim ol animal bilong mekim ofa na wokim piksa bilong ol god giaman. (Hibru 10:1-9; 1 Jon 5:21) Tru tumas, taim lotu Kristen i go kamap long planti hap, dispela i nogutim ol wok bisnis bilong ol samting bilong lotu haiden, na ol man em wok bisnis na mani bilong ol i lus, ol i bel nogut tru long dispela samting.
15 Namba 3, em ol Rom i strong long litimapim kantri bilong ol na ol i “bel nogut tru” long ol Kristen. Pastaim, ol Rom i tingim ol Kristen i olsem wanpela liklik lain bilong lotu na ol i strong tumas long bihainim lotu bilong ol. Tasol bihain, sapos man i tok tasol olsem em i wanpela Kristen, dispela em i wanpela rong i gat bikpela strafe bilong en, olsem ol bai kilim em i dai. Tasol i gat wanem as na ol Rom i makim wanpela lain i save stap stret na bihainim pasin Kristen, na ol i mekim nogut long ol na kilim ol i dai?
Bilong Wanem Ol Rom i Bel Nogut Long Ol Kristen Bilong Pastaim?
16. Ol Kristen i stap narapela kain long ol manmeri bilong graun long wanem ol samting? Olsem wanem na dispela i mekim na ol lain bilong Rom i no laikim ol?
16 Ol Rom i bel nogut long ol Kristen, long wanem, ol i save bihainim ol bilip bilong ol. Olsem: Ol i no insait long ol pasin bilong dispela graun. (Jon 15:19) Olsem na ol i no holim sampela wok politik, na ol i no laik go insait long ami. Olsem saveman Augustus Neander i tok, dispela i mekim na long ai bilong ol man ol ‘i stap nating tasol olsem man i dai pinis, na ol i no mekim sampela gutpela wok bilong helpim ol man.’ Na bilong i stap narapela kain long ol man bilong dispela graun, ol i mas abrusim ol pasin nogut ol lain bilong Rom i save mekim. Saveman Will Durant i tok: “Ol liklik lain Kristen i stap nabaut ol i save stap gut na bihainim stretpela pasin, na dispela i sutim bel bilong ol haiden ol i tingting tasol long painim ol amamas bilong skin.” (1 Pita 4:3, 4) Olsem na taim ol Rom i mekim nogut long ol Kristen na kilim ol i dai, ating ol i painim rot bilong pinisim dispela lain Kristen na bai bel bilong ol i no gat tok moa long pasin nogut ol yet i save mekim.
17. Olsem wanem yumi save, ol gutpela samting i bin kamap long wok bilong ol Kristen bilong pastaim long autim tok?
17 Ol Kristen long taim bilong ol aposel ol i wok strong tru long autim gutnius bilong Kingdom bilong God na ol i no surik liklik. (Matyu 24:14) I kam inap long yia 60 C.E. samting, Pol inap tok, ol “i bin autim [dispela gutnius] long olgeta manmeri i stap long graun.” (Kolosi 1:23) I kam inap long yia 100 samting, lain bilong Jisas i bin kamapim ol disaipel long olgeta hap em Rom i bosim—long Esia, Yurop, na Afrika! Na sampela “lain i save mekim wok long haus bilong Sisar” ol tu i kamap Kristen. (Filipai 4:22) Ol i wok strong tru long autim tok, na dispela i mekim na ol man i bel nogut long ol. Neander i tok: ‘Ol man i gat kain kain namba ol i kisim lotu Kristen, na i olsem dispela lotu bai daunim lotu bilong kantri.’
18. Ol Kristen i lotuim Jehova wanpela tasol, na olsem wanem dispela i mekim na gavman bilong Rom i biruaim ol?
18 Lain bilong Jisas ol i lotuim Jehova wanpela tasol. (Matyu 4:8-10) Ating dispela samting yet em i namba wan samting long lotu bilong ol i kirapim ol Rom long bel nogut long ol. Ol Rom i no gat tok long ol narapela lotu sapos lain bilong ol tu i lotuim king bilong Rom. Tasol ol Kristen bilong pastaim ol i no inap tru long mekim kain lotu olsem. Ol i tingim wanpela Man i gat bikpela namba moa, winim gavman bilong Rom, na em bai skelim pasin bilong ol long kot—em God Jehova. (Aposel 5:29) Olsem na maski wanpela Kristen i stap stret olgeta long ol narapela samting, ol Rom bai tingim em olsem birua bilong gavman.
19, 20. (a) Husat ol i as bilong planti tok giaman i bin go nabaut bilong bagarapim gutnem bilong ol gutpela Kristen? (b) Ol i sutim wanem ol tok giaman long ol Kristen?
19 I gat narapela as tu na ol Rom i “bel nogut tru” long ol Kristen i stap gut long God: Ol man i bilip kwik long ol tok giaman ol i sutim long ol Kristen, na ol hetman bilong lotu Juda i as bilong planti tok giaman i bin go nabaut bilong bagarapim gutnem bilong ol. (Aposel 17:5-8) Long yia olsem 60 o 61 C.E., Pol i stap long Rom na wetim kot bilong em i kamap, em King Niro bai mekim, na long dispela taim sampela hetman Juda i tok long ol Kristen olsem: “Mipela i save, long olgeta ples, ol manmeri i save mekim tok nogut long dispela nupela lain i bin kamap namel long yumi Juda.” (Aposel 28:22) Yumi save Niro i bin harim ol dispela stori nogut ol man i mekim long ol Kristen. Long yia 64 C.E., taim Rom i paia na ol man i sutim asua bilong en i go long Niro, em i putim dispela asua i go long ol Kristen, em dispela lain ol man i save tok nogut long ol. Ating dispela i mekim na ol man i kirap mekim nogut tru long ol Kristen na ol i strong long pinisim ol olgeta.
20 Sampela taim ol man i paulim sampela tok bilong bilip bilong ol Kristen na ol i bungim wantaim ol dispela tok giaman ol i sutim long ol. Ol Kristen i lotuim wanpela God tasol na ol i no lotuim king bilong Rom, olsem na ol man i tok ol Kristen i no save bilip long God. Sampela insait long famili bilong ol, ol i no Kristen, na ol i save biruaim ol wanblut Kristen bilong ol. Olsem na ol man i sutim tok long ol Kristen olsem ol i save brukim ol famili. (Matyu 10:21) Sampela i kolim ol olsem man bilong kaikai man, na sampela lain i tok, as bilong dispela, em ol man i bin paulim wanpela tok Jisas i bin mekim long Kaikai Bilong Bikpela.—Matyu 26:26-28.
21. I gat wanem tupela as na ol man i “bel nogut tru” long ol Kristen?
21 Olsem na i gat tupela as na ol Rom i “bel nogut tru” long ol Kristen: (1) ol bilip na pasin bilong ol em Baibel i as bilong en, na (2) ol tok giaman ol man i sutim long ol. Maski i gat wanem as, ol dispela birua bilong ol Kristen i gat wanpela tingting tasol—ol i laik daunim lotu Kristen. Tasol yumi save, lain bilong kirapim tru dispela pasin bilong mekim nogut long ol Kristen, em wanpela lain birua i gat bikpela strong, winim bilong ol man—em ol spirit nogut yumi no inap lukim.—Efesus 6:12.
22. (a) Wanem samting i soim yumi olsem ol Witnes Bilong Jehova i save wok strong long “mekim gutpela pasin long ol arapela”? (Lukim blok long pes 11.) (b) Bai yumi toktok long wanem samting long stori i kamap bihain long dispela?
22 Olsem ol man i bin mekim long ol Kristen bilong pastaim, long nau tu ol man i save “bel nogut tru” long ol Witnes Bilong Jehova long sampela kantri. Tasol ol i no save bel nogut long ol lain i no Witnes; na tu, ol i no bin kirapim ol man long bikhet na pait long ol gavman, nogat. Long olgeta hap ol i gat nem olsem ol man bilong laikim tru ol narapela, maski ol i bilong wanem lain o skin o kantri. Orait yumi laik save, i gat wanem as na ol man i bin mekim nogut long ol? Na taim ol man i birua long ol, ol i save mekim wanem? Bai yumi toktok long ol dispela askim long stori i kamap bihain long dispela.
Bai Yu Bekim Olsem Wanem?
◻ Bilong wanem Jisas i tokim ol man i laik bihainim em olsem ol i mas “tingim gut pe” ol bai tromoi bilong i stap disaipel bilong em?
◻ Tingting bilong ol Juda long ol lain i no Juda, dispela i mekim wanem long lotu Juda? Dispela i lainim yumi long wanem samting?
◻ Wanem 3-pela lain i bin biruaim ol gutpela Kristen bilong pastaim?
◻ I gat wanem sampela as na ol Rom i “bel nogut tru” long ol Kristen bilong pastaim?
[Blok long pes 11]
“Mekim Gutpela Pasin Long Ol Arapela”
Ol Witnes bilong Jehova i save wok strong long bihainim tok bilong Baibel long “mekim gutpela pasin long ol arapela.” (Galesia 6:10) Taim sampela hevi i kamap na ol man i sot long ol samting, pasin bilong laikim tru ol narapela i save kirapim ol Witnes long helpim ol man i no gat wankain tingting olsem ol long ol samting bilong lotu. Olsem: Taim dispela bikpela hevi nogut tru i bin kamap long Ruanda long 1994, ol Witnes bilong Yurop i orait long i go long Afrika bilong helpim ol dispela lain. Kwiktaim ol i kamapim ol kem na ol haus sik na stretim gut ol samting bilong en bilong helpim ol refyuji bilong Ruanda. Ol balus i karim planti klos, na blanket, na kaikai i go long ol. Ol dispela samting i bin helpim planti tausen manmeri, winim namba bilong ol Witnes long Ruanda inap 3-pela taim.
[Piksa long pes 9]
Ol Kristen long taim bilong ol aposel ol i wok strong tru long autim gutnius bilong Kingdom bilong God na ol i no surik liklik