Jehova—Em i Gat Olgeta Strong
“Em i gat olgeta strong, olsem na i no gat wanpela bilong ol dispela samting inap lus.”—AISAIA 40:26.
1, 2. (a) Wanem samting long ples antap i save kamapim bikpela strong em yumi olgeta i mas kisim? (b) Stori long olsem wanem Jehova i As bilong olgeta strong.
STRONG em wanpela samting planti bilong yumi i no tingim tumas. Olsem: Yumi no save tingim tumas ol samting strong bilong paua i mekim—em i givim lait long yumi na hatim ol samting, na mekim ol masin samting bilong yumi i wok. Tasol taim paua i dai long wanpela taim yumi no tingim, em nau, yumi pilim tru olsem sapos i no gat paua, ol samting long ol biktaun i no inap wok moa. Klostu olgeta paua yumi mekim wok long en, em i kam long rot bilong san.a Long olgeta wan wan sekon, san i save mekim wok long 5 milion ton strongpela samting bilong en na i kamap olsem paua, na hap bilong dispela paua i save kam long graun na helpim ol samting long i stap laip.
2 Bikpela strong san i kamapim em i kam long we? Husat i wokim san? God Jehova i wokim. Song 74:16 i stori long em olsem: “Yu putim san na mun i stap antap.” Tru tumas, Jehova i As bilong olgeta strong, olsem em i As bilong laip bilong olgeta samting. (Song 36:9) Olsem na nogut yumi ting strong bilong em i samting nating. Long rot bilong profet Aisaia, Jehova i kirapim yumi long lukluk i go long ol samting long ples antap, olsem san na ol sta, na tingim olsem wanem ol i bin kamap. “Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus.”—Aisaia 40:26; Jeremaia 32:17.
3. Ol samting Jehova i mekim long strong bilong em inap helpim yumi olsem wanem?
3 Jehova i gat olgeta strong, olsem na yumi ken bilip tru olsem san bai wok yet long givim lait long yumi na hatim ol samting na bai yumi ken i stap laip. Tasol i gat sampela narapela samting strong bilong God inap helpim yumi long en—i no ol samting bilong skin tasol. Em ol samting olsem: kisim bek yumi long sin na indai, yumi inap wetim gutpela samting i kamap bihain, na yumi bilip tru long Jehova. (Song 28:6-9; Aisaia 50:2) Baibel i stori long planti samting i kamapim klia olsem Jehova i gat strong long wokim ol samting na long kisim bek ol man, na long helpim ol manmeri bilong em long abrusim bagarap na long bagarapim ol birua bilong em.
Strong Bilong God i Kamap Ples Klia Long Ol Samting Em i Bin Wokim
4. (a) Taim Devit i lukluk i go long ples antap, dispela i mekim wanem long em? (b) Ol samting long ples antap i kamapim wanem samting bilong strong bilong God?
4 Aposel Pol i tok, ‘long rot bilong ol samting God i bin wokim, ol man inap save long bikpela strong bilong em i stap oltaim oltaim.’ (Rom 1:20) Sampela handet yia paslain long dispela, man bilong raitim Song, em Devit, em i stap wasman bilong ol sipsip na ating planti taim em i lukluk i go long ples antap, na taim em i mekim olsem, em i pilim tru ol gutpela gutpela samting bilong en na bikpela strong bilong Man bilong wokim ol dispela samting. Em i tok: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating. Bilong wanem yu save was gut long mipela?” (Song 8:3, 4) Maski Devit i no gat planti save long ol samting long ples antap, em i save olsem em i samting nating taim em i skelim em yet wantaim Man bilong wokim dispela traipela ples antap. Long nau, ol saveman bilong glasim ol sta samting ol i gat planti save long bikpela bilong ples antap na long dispela strong i helpim ol samting long en long i stap. Ol i tok, long olgeta wan wan sekon, strong i save lusim san i olsem strong bilong 100,000 milion megaton marasin TNT i pairap.b Liklik hap tasol bilong dispela strong i save kam long graun; tasol em inap tru long helpim olgeta samting long graun long i stap laip. Tasol sampela sta i strongpela moa yet, winim san. Strong i save lusim san insait long wanpela de, sampela sta i save lusim insait long wanpela sekon tasol. Orait tingim bikpela strong bilong Man i wokim ol dispela samting long ples antap! Elihu i tok stret olsem: “God I Gat Olgeta Strong, em i antap tru . . . Em i gat bikpela strong.”—Jop 37:23.
5. Yumi inap lukim strong bilong Jehova long wanem ol samting em i bin wokim?
5 Sapos yumi wok long ‘save gut long ol wok bilong God’ olsem Devit i bin mekim, orait long olgeta samting—long win na biksi, long klaut i pairap, long ol bikpela wara na ol bikpela maunten—bai yumi lukim strong bilong God. (Song 111:2; Jop 26:12-14) Na tu, olsem Jehova i kirapim Jop long tingim, ol animal i save kamapim klia strong bilong Em. Wanpela animal olsem em hipopotamus. Jehova i tokim Jop: “Bodi bilong ol i bikpela na ol i gat bikpela strong. . . . Hanlek bilong ol i strong tru olsem ol bikpela ba ain.” (Jop 40:15-18) Long taim bilong ol man i bin raitim Baibel, ol man i save tu long bikpela strong bilong wel bulmakau, na Devit i beten long God long kisim em bek long han bilong ‘laion, na long ol wel bulmakau i laik sutim em long kom bilong ol.’—Song 22:21; Jop 39:9-11.
6. Long Baibel, bulmakau man i makim wanem samting? Na bilong wanem i olsem? (Lukim sta antap.)
6 Bulmakau man i gat bikpela strong, olsem na long Baibel, bulmakau man i makim strong bilong Jehova.c Long driman, aposel Jon i lukim sia king bilong Jehova na 4-pela samting i stap laip, na wanpela i gat pes olsem pes bilong bulmakau man. (KTH 4:6, 7) Wanpela bilong 4-pela bikpela pasin bilong Jehova ol dispela ensel serap i makim, em strong. Ol narapela em pasin sori, gutpela tingting na save, na stretpela pasin. Strong em i wanpela bikpela pasin bilong God, olsem na sapos yumi save gut long dispela strong bilong em na olsem wanem em i save mekim wok long en, dispela bai helpim yumi long go klostu moa long em, na bihainim pasin bilong em, olsem mekim gut wok long strong yumi i holim.—Efesus 5:1.
Jehova Bilong Ol Bikpela Lain Ami
7. Olsem wanem yumi ken save pasin i gutpela bai daunim pasin i nogut?
7 Baibel i tok Jehova em i “God I Gat Olgeta Strong,” na dispela biknem i helpim yumi long tingim strong bilong em—yumi no ken ting strong bilong em i samting nating o ting em i no inap daunim ol birua bilong em, nogat. (Stat 17:1; Kisim Bek 6:3) Maski i luk olsem pasin nogut bilong Satan long graun i stap strong, long ai bilong Jehova “ol manmeri . . . i olsem das bilong graun na i olsem liklik wara i pundaun. Na hevi bilong olgeta ailan i olsem hevi bilong das tasol.” (Aisaia 40:15) God i gat olgeta strong, olsem na pasin i gutpela bai daunim pasin i nogut. Pasin nogut i go bikpela long olgeta hap, tasol yumi ken amamas olsem “Jehova bilong ol bikpela lain ami,” em “dispela strongpela God bilong Israel,” em bai pinisim olgeta pasin nogut.—Aisaia 1:24; NW; Song 37:9, 10.
8. Jehova i bosim wanem ol lain ami long heven? Wanem samting i bin kamap i soim olsem ol i gat bikpela strong?
8 Dispela tok, “Jehova bilong ol bikpela lain ami,” em i stap 285 taim long Baibel, na em i helpim yumi long tingim bikpela strong bilong God. “Ol bikpela lain ami” i makim ol ensel Jehova i bosim. (Song 103:20, 21; 148:2) Long wanpela nait tasol, wanpela bilong ol dispela ensel i kilim i dai 185,000 soldia bilong Asiria em ol i laik daunim Jerusalem. (2 King 19:35) Sapos yumi bilip olsem ol ami bilong Jehova long heven ol i gat bikpela strong, bai yumi no pret tumas long ol birua. Taim wanpela lain ami i kam bilong holimpas profet Elisa, em i no tingting planti, long wanem, long tingting em i lukim bikpela lain ami long heven i lukautim em—wokboi bilong em i no lukim olsem.—2 King 6:15-17.
9. Olsem Jisas, bilong wanem yumi inap bilip olsem God bai lukautim yumi?
9 Taim bikpela lain i holim ol bainat na stik ol i kam na holimpas em long gaden Getsemani, Jisas tu i save ol ensel i stap bilong strongim na helpim em. Bihain long em i tokim Pita long putim bainat i go bek long paus bilong en, Jisas i tok em inap askim Papa bilong em long salim “planti ensel moa, i winim 12-pela lain ami,” i kam helpim em. (Matyu 26:47, 52, 53) Sapos yumi tu i bilip olsem i gat ol lain ami long heven em God inap mekim wok long en, orait bai yumi bilip strong olsem God bai helpim yumi. Aposel Pol i tok: “Bai yumi tok wanem long dispela ol samting God i mekim? Sapos God i helpim yumi, orait husat bai i birua long yumi?”—Rom 8:31.
10. Jehova i save mekim wok long strong bilong em bilong helpim husat?
10 Olsem na i gat as tru na yumi inap bilip olsem Jehova bai lukautim yumi. Wok em i mekim long strong bilong em i save kamapim gutpela samting tasol na oltaim dispela wok i stret wantaim ol narapela pasin bilong em—stretpela pasin, gutpela tingting na save, na pasin sori. (Jop 37:23; Jeremaia 10:12) Bilong helpim ol yet, ol bikman i save daunim ol man i stap rabis na ol man i gat pasin daun, tasol Jehova i save “helpim ol man i sot long ol samting” na ‘em i gat strong bilong kisim bek ol.’ (Song 113:5-7; Aisaia 63:1) Maria, mama bilong Jisas, em i save “God i gat bikpela strong” em i save helpim ol man i pret long em, na em i litimapim ol man i no gat nem, tasol em i daunim ol man i gat pasin antap.—Luk 1:46-53.
Jehova i Kamapim Strong Bilong Em Long Ol Wokboi Bilong Em
11. Long yia 1513 B.C.E. ol Israel i lukim wanem ol samting i kamapim bikpela strong bilong God?
11 Long ol narapela narapela taim Jehova i bin kamapim strong bilong em long ol wokboi bilong em. Wanpela taim olsem, em long maunten Sainai long yia 1513 B.C.E. Tasol long dispela yia i gat sampela bikpela samting i bin kamap na i kamapim strong bilong God em lain Israel i lukim pinis. Tenpela bikpela hevi i bin kamapim klia olsem Jehova i gat bikpela strong na ol god bilong ol Isip ol i no gat strong. Bihain liklik, long rot bilong wanpela mirakel, ol i brukim solwara Retsi na ami bilong king bilong Isip i bagarap, na ol dispela samting tu i kamapim klia bikpela strong bilong God. Tripela mun bihain, klostu long maunten Sainai, Jehova i singautim ol Israel long kamap ‘lain manmeri bilong em stret.’ Ol i tok promis: “Mipela bai mekim olgeta samting olsem Bikpela i bin tok.” (Kisim Bek 19:5, 8) Nau Jehova i mekim wanpela bikpela samting tru bilong kamapim strong bilong em. Long maunten Sainai klaut i pairap, na lait bilong klaut i sut nabaut, na biugel i krai bikpela, na smok i kamap na maunten i guria. Ol manmeri, ol i sanap longwe long maunten, ol i pret nogut tru. Tasol Moses i tokim ol olsem dispela samting i mas skulim ol long pret long God—kain pret olsem bai kirapim ol long bihainim tok bilong God bilong ol, em Jehova, em wanpela tasol i God tru na i gat olgeta strong.—Kisim Bek 19:16-19; 20:18-20.
12, 13. Wanem ol samting i mekim na Elaija i lusim wok bilong em? Jehova i mekim wanem bilong strongim em?
12 Sampela handet yia bihain long dispela, long taim bilong Elaija, Jehova i kamapim gen strong bilong em long maunten Sainai. I gat sampela samting i kamap pinis em profet Elaija i bin lukim na i kamapim strong bilong God. Inap 3-pela yia hap God i bin “pasim ren,” long wanem, lain Israel i bin bikhet na lusim Jehova. (2 Stori 7:13) Long dispela taim i no gat ren, ol kotkot i bringim kaikai i kam long Elaija em i stap klostu long liklik wara Kerit. Bihain, Jehova i wokim mirakel na oltaim wanpela meri, em man bilong em i dai pinis, em i gat plaua na wel bilong wokim bret bilong Elaija. Na tu, taim pikinini man bilong dispela meri i dai, Jehova i givim strong long Elaija long kirapim bek dispela pikinini. Na las tru, long maunten Karmel, bilong kamapim klia husat i God tru, paia i lusim heven na kam daun na kukim ofa bilong Elaija. (1 King 17:4-24; 18:36-40) Tasol bihain liklik, Elaija i pret na bel hevi taim Jesebel i tok long kilim em i dai. (1 King 19:1-4) Em i ranawe lusim kantri; em i ting wok bilong em olsem wanpela profet em i pinis. Bilong strongim bel bilong em, Jehova i mekim gutpela pasin na kamapim bikpela strong bilong em long Elaija.
13 Taim Elaija i hait insait long wanpela hul bilong maunten, em i lukim 3-pela samting Jehova i gat strong long bosim: strongpela win, guria, na paia. Tasol taim Jehova i toktok long Elaija, em i “toktok isi tru.” Em i givim sampela wok moa long em na tokim em i gat 7,000 manmeri long Israel ol i stap gut long lotuim Jehova. (1 King 19:9-18) Sapos olsem Elaija yumi tu i bel hevi, long wanem, yumi lukim olsem wok bilong yumi long autim tok i no kamap gutpela, orait yumi ken beten askim Jehova long givim “bikpela strong” long yumi, em “strong bilong God”—dispela kain strong inap strongim yumi long mekim yet wok bilong autim gutnius na yumi no lusim.—2 Korin 4:7.
Jehova i Gat Strong na Dispela i Makim Olsem Em Bai Truim Ol Tok Promis Bilong Em
14. Nem bilong Jehova i kamapim klia wanem samting? Olsem wanem strong bilong em i makim em bai kamapim ol samting olsem nem bilong em i makim?
14 Na tu, strong bilong Jehova i makim olsem em bai kamapim laik bilong em na ol samting olsem nem bilong em i makim. Insait bilong nem Jehova i olsem “Em i Mekim i Kamap.” Dispela nem i kamapim klia olsem em i mekim em yet i kamap Man bilong truim ol tok promis bilong em. I no gat wanpela samting o wanpela man i ken pasim God long kamapim ol laik bilong em, maski sampela man i ting ol dispela samting i no inap kamap. Jisas i tokim ol aposel bilong em: “God em inap long mekim olgeta samting.”—Matyu 19:26.
15. Olsem wanem Jehova i soim Abraham na Sara olsem i no gat wanpela samting em i no inap mekim?
15 Olsem: Bipo, Jehova i tok promis long Abraham na Sara olsem em bai mekim ol tumbuna pikinini bilong ol i kamap wanpela bikpela lain. Tasol inap planti yia tupela i no kamapim pikinini. Tupela i lapun pinis taim Jehova i tokim tupela klostu bai truim bilong dispela tok promis i kamap, na Sara i lap. Ensel i tok: “I no gat wanpela samting Bikpela i no inap long mekim?” (Stat 12:1-3; 17:4-8; 18:10-14) Inap 400 handet yia bihain long dispela, taim Moses i singautim ol tumbuna pikinini bilong Abraham—nau ol i wanpela bikpela lain—long kam bung long ples daun bilong ol Moap, em i kirapim tingting bilong ol olsem God i truim pinis tok promis bilong em. Moses i tok: “[Jehova] i bin laikim tru ol tumbuna papa bilong yupela na em i makim yupela i kamap lain bilong em yet. Olsem na long bikpela strong bilong em yet, em i kisim yupela long Isip na bringim yupela i kam. Na taim yupela i wokabaut i kam, em i bin rausim ol bikpela lain manmeri i strongpela moa na strong bilong ol i winim strong bilong yupela. Em i mekim olsem bilong em i ken kisim yupela i kam na givim graun bilong ol long yupela. Em dispela graun nau yupela i stap long en.”—Lo 4:37, 38.
16. Bilong wanem ol Sadyusi i no bilip olsem ol man i dai pinis bai kirap bek?
16 Planti handet yia bihain long dispela, Jisas i givim strongpela tok long ol Sadyusi, em ol i no bilip long kirap bek. Bilong wanem ol i no laik bilip long tok promis bilong God olsem em bai kirapim bek ol man i dai pinis? Jisas i tokim ol: “Yupela i no save long ol tok i stap long buk bilong God. Na yupela i no save long strong bilong God tu.” (Matyu 22:29) Baibel i tok, “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:27-29) Sapos yumi save long ol tok bilong Baibel long kirap bek, na yumi bilip tru olsem God i gat strong, dispela bai strongim bilip bilong yumi olsem ol man i dai pinis bai kirap bek. God “bai i pinisim dai tru na bai dai i no kamap moa . . . Bikpela i tok pinis long mekim olsem.”—Aisaia 25:8.
17. Bihain, wanem samting bai kamap na yumi mas bilip strong long Jehova?
17 Klostu nau, wanpela taim bai kamap na yumi olgeta wan wan i mas bilip tru olsem God i gat strong long lukautim yumi. Satan bai kirap na pait long lain bilong God ol i luk olsem ol i no gat helpim. (Esekiel 38:14-16) Orait nau God bai kamapim bikpela strong bilong em bilong helpim yumi, na olgeta manmeri bai save, em i Jehova. (Esekiel 38:21-23) Nau em i taim bilong strongim bilip bilong yumi long God i Gat Olgeta Strong bambai yumi no surik liklik taim dispela samting nogut i kamap.
18. (a) Taim yumi tingim tingim long bel bikpela strong bilong Jehova, dispela i save helpim yumi olsem wanem? (b) Stori i kam bihain long dispela bai bekim wanem askim?
18 Olsem na i gat planti as bilong tingim tingim long bel bikpela strong bilong Jehova. Taim yumi tingim ol samting em i bin mekim, dispela i kirapim yumi long litimapim nem bilong Bikpela Man bilong wokim yumi, na tenkyu long em i save bihainim gutpela tingting na pasin sori taim em i mekim wok long strong bilong em. I no gat wanpela samting i ken pretim yumi sapos yumi bilip long Jehova bilong ol bikpela lain ami. Bilip bilong yumi long ol tok promis bilong em bai stap strong. Tasol tingim, God i wokim yumi i kamap olsem em yet. Olsem na yumi tu i gat strong, maski dispela strong i no bikpela tumas. Orait taim yumi mekim wok long strong yumi holim, olsem wanem yumi inap bihainim pasin bilong Man bilong wokim yumi? Stori i kam bihain long dispela bai toktok long dispela samting.
[Ol Futnot]
a Planti man i bilip olsem ol samting olsem wel na blakpela ston (kol)—em ol nambawan samting ol paua-stesin i mekim wok long en—ol i save kisim strong bilong ol long san.
b Tasol pairap bilong nambawan bikpela bom nuklia ol i pairapim i olsem strong bilong 57 megaton TNT tasol.
c Wel bulmakau man em Baibel i toktok long en, ating em ol urus (tok Latin). Inap 2,000 yia bipo, ol dispela animal i stap long Gol (nau Frans), na Julius Sisar i stori long ol olsem: “Bikpela bilong ol dispela urus i wankain olsem elefan, tasol pasin, na kala, na lukluk bilong ol i wankain olsem bulmakau man. Ol i gat bikpela strong na ol i save ran spit tru: Taim ol i lukim wanpela man o animal, ol i bagarapim.”
Yu Inap Bekim Ol Dispela Askim?
• Ol samting God i bin wokim, olsem wanem dispela i kamapim klia strong bilong Jehova?
• Jehova inap mekim wok long wanem ol ami bilong helpim na strongim lain bilong em?
• Kolim sampela taim Jehova i bin kamapim strong bilong em.
• Wanem samting i makim olsem Jehova bai truim ol tok promis bilong em?
[Ol Piksa long pes 10]
“Yupela lukluk i go antap long skai na lukim ol sta samting i stap antap. Husat tru i bin wokim ol?”
[Kredit Lain]
Photo by Malin, © IAC/RGO 1991
[Ol Piksa long pes 13]
Pasin bilong tingim tingim long bel ol samting Jehova i bin mekim bilong kamapim bikpela strong bilong em i save strongim bilip long ol tok promis bilong em