No Ken Lusim Pasin Bilong Bung Wantaim

Baibel i tok: “No ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:25) Tru tumas, ol man i lotu tru long God ol i mas bung wantaim long wanpela ples bilong lotu na “wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol.”​​—⁠Hibru 10:⁠24.

TAIM aposel Pol i mekim dispela tok, wanpela bikpela tempel long Jerusalem i ples bilong ol Juda long lotu long God. Na i gat ol haus lotu tu. Jisas i bin “skulim ol manmeri insait long ol haus lotu na insait long banis bilong tempel, long ol ples olgeta Juda i save bung long en.”​​—⁠Jon 18:⁠20.

Pol i ting long wanem kain ples bilong bung taim em i tokim ol Kristen long ol i mas bung wantaim na narapela i mas strongim narapela? Ol haus lotu bilong Kristendom i gat sampela samting em tempel bilong Jerusalem i olsem piksa bilong en? Long wanem taim ol i bin kamapim ol bikpela haus lotu bilong ol man i tok ol i Kristen?

‘Wokim Haus Bilong God’

Namba wan taim Baibel i kamapim tok long wokim wanpela haus bilong lotu long God, i stap long Buk Kisim Bek. God Jehova i tokim lain bilong em​​—⁠ol Israel​​—⁠long wokim wanpela “haus sel,” o “haus sel bilong bung wantaim God.” Ol i mas putim bokis kontrak na sampela narapela samting i holi long dispela haus sel. “Klaut bilong Bikpela i karamapim haus sel” taim ol i pinisim long 1512 B.C.E. Winim 400 handet yia dispela haus sel em ol inap brukim na karim i go wantaim ol, em i stap olsem ples Jehova i makim bilong ol man i ken go klostu long God. (Kisim Bek, sapta 25-​27; 40:​33-​38) Baibel i kolim tu dispela haus lotu olsem “haus bilong Bikpela.”​​—⁠1 Samuel 1:​9, 24.

Bihain, taim Devit i stap king long Jerusalem, em i kamapim strongpela laik bilong em long wokim wanpela haus tru bilong givim biknem long Jehova. Tasol Devit em man bilong mekim ol pait, olsem na Jehova i tokim em: “Yu no ken wokim haus bilong mi.” Tasol em i makim pikinini man bilong Devit, em Solomon, long wokim haus bilong Em. (1 Stori 22:​6-​10) Ol i wokim tempel inap 7-pela yia na hap, na Solomon i dediketim dispela tempel long 1026 B.C.E. Jehova i orait long dispela haus, na em i tok: “Mi makim dispela haus yu bin wokim na em bai i stap haus bilong mi, na oltaim ol manmeri i ken kam long dispela haus na kam klostu long mi. Na oltaim bai mi lukluk i kam long dispela haus na tingting long en.” (1 King 9:⁠3) Sapos ol Israel i stap gut long Jehova, em bai orait long dispela haus. Tasol sapos ol i no bihainim stretpela pasin, Jehova bai givim baksait long dispela haus, na “em bai i bagarap.”​​—⁠1 King 9:​4-9; 2 Stori 7:​16, 19, 20.

Bihain ol Israel i lusim lotu i tru. (2 King 21:​1-5) Olsem na “bihain Bikpela i salim king bilong Babilon wantaim ol ami bilong en i kam . . . na ol Babilon i kukim haus bilong God na haus bilong king wantaim olgeta bikpela haus bilong Jerusalem. Na ol i bagarapim olgeta gutpela gutpela samting bilong taun na ol i brukim banis bilong taun olgeta. Na king bilong Babilon i kisim ol manmeri i no bin dai long pait, na bringim ol i go kalabus long Babilon. Na ol Juda i stap olsem wokboi na wokmeri nating bilong ol king bilong Babilon.” Baibel i soim yumi olsem dispela samting i kamap long 607 B.C.E.​​—⁠2 Stori 36:​15-​21; Jeremaia 52:​12-​14.

Olsem Aisaia i tok profet, God i bin kirapim King Sairus bilong Persia long helpim ol Juda long lusim Babilon. (Aisaia 45:⁠1) Taim ol i stap kalabus pinis inap 70 yia, ol i go bek long Jerusalem long 537 B.C.E. bilong wokim gen tempel. (Esra 1:​1-6; 2:​1, 2; Jeremaia 29:10) I gat sampela samting i wok long pasim ol long wokim kwik tempel, tasol bihain ol i pinisim long 515 B.C.E., na lotu i tru i kamap strong gen. Tru, dispela tempel i no naispela olsem tempel bilong Solomon, tasol dispela haus i stap inap 600 yia samting. Tasol dispela tempel tu i laik bagarap, long wanem, ol Israel i no strong long lotuim Jehova. Taim Jisas i kamap long graun, King Herot i wok long wokim gen tempel. Wanem samting bai kamap long dispela tempel?

‘Bai Wanpela Ston i No Stap Antap Long Narapela Ston’

Jisas i toktok long tempel long Jerusalem na em i tokim ol disaipel: “Mi tok tru long yupela, ol bai i no larim wanpela ston i stap antap long narapela ston. Ol bai i brukim olgeta na tromoi i go daun.” (Matyu 24:​1, 2) Olsem Jisas i bin tok, dispela tempel em planti handet yia em i ples bilong lotu long God, ol ami bilong Rom i bagarapim long 70 C.E., em ol i bin kam bilong daunim pasin bikhet bilong ol Juda.a Ol i no wokim gen dispela tempel. Inap 600 yia samting bihain long Jisas, ol Muslim i wokim wanpela haus lotu (Dome of the Rock) long dispela hap, na dispela haus lotu i sanap yet long dispela ples em bipo ol Juda i bin lotu long en.

Orait God bai putim wanem samting bambai ol disaipel bilong Jisas i ken lotu long Em? Olsem wanem? Ol Kristen bilong pastaim em ol i bilong lain Juda ol bai lotu yet long God long dispela tempel klostu bai bagarap? Ol Kristen i no bilong lain Juda ol bai lotu long God long wanem ples? Ol haus lotu bilong Kristendom ol bai i stap olsem senis bilong tempel? Tok Jisas i mekim wantaim wanpela meri Samaria i helpim yumi long kisim save long dispela samting.

Inap planti handet yia ol Samaria i bin lotu long God long wanpela bikpela tempel long maunten Gerisim long Samaria. Dispela meri Samaria i tokim Jisas: “Ol tumbuna bilong mipela ol i save bung long dispela maunten na mekim lotu. Tasol yupela Juda i save tok, ples ol man i mas i go long en na mekim lotu, em i stap long Jerusalem tasol.” Jisas i bekim tok bilong em olsem: “Meri, yu mas bilipim tok bilong mi. Wanpela taim i laik kamap na bai yupela i no lotu long Papa long dispela maunten, na bai yupela i no lotu long em long Jerusalem tu.” I no gat wok moa long wanpela tempel tru bilong lotu long Jehova, long wanem, Jisas i tok: “God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” (Jon 4:​20, 21, 24) Bihain aposel Pol i tokim ol Atens: “God i bin wokim skai na graun wantaim olgeta samting i stap long en, dispela God em i Bikpela bilong heven na bilong graun. Olsem na em i no save sindaun insait long ol haus lotu ol man i wokim.”​​—⁠Aposel 17:⁠24.

Tru tumas, ol haus lotu bilong Kristendom i no gat wankain wok olsem tempel paslain long taim bilong ol Kristen. Na ol Kristen long taim bilong ol aposel i no gat wok long wokim ol kain haus olsem. Tasol taim ol aposel i dai pinis, ol man i lusim ol bilip tru​​—⁠olsem ol i tromoi lotu i tru. (Aposel 20:​29, 30) Planti yia paslain long taim ol i tok King Constantine bilong Rom i tanim bel na kamap Kristen long 313 C.E., ol man i tok ol i Kristen ol i kirap lusim ol tok Jisas i bin skulim ol man long en.

Constantine i helpim wok bilong bungim “ol lotu Kristen” wantaim lotu haiden bilong Rom. Wanpela buk (The Encyclopædia Britannica) i tok: “Constantine yet i putim tok long wokim 3-pela bikpela haus lotu Kristen long Rom: em Sios Bilong Santu Pita, Sios Bilong Paulo Fuori le Mura, na Sios Bilong Giovanni long Laterano. Em i  . . . namba wan man bilong wokim piksa bilong ol bikpela haus lotu i olsem mak bilong kruse, na bihain ol i bin wokim ol haus lotu long kain mak olsem long hap wes bilong Yurop namel long yia 500 i go inap 1500 samting.” Sios Bilong Santu Pita long Rom em ol i bin wokim gen, em i stap yet olsem nambawan bikpela ples bilong Misin Katolik.

Saveman Will Durant i tok: “Misin i kisim sampela pasin bilong lotu em ol man haiden bilong Rom i bin mekim paslain long taim bilong ol Kristen.” Wanpela samting olsem em “pasin bilong ol long wokim ol bikpela haus lotu.” Kirap long yia 900 i go inap 1500 samting, ol i wokim planti bikpela haus lotu, na pasin bilong ol long wokim ol haus lotu i bikpela samting long ol. Long dispela taim ol i bin wokim planti bikpela haus lotu bilong Kristendom ol man bilong nau i ting ol i naispela haus tru.

Olsem wanem? Long olgeta taim ol man i kisim nupela strong long ol samting bilong spirit taim ol i lotu long God long wanpela haus lotu? Francisco bilong Brasil i tok: “Long tingting bilong mi, ol pasin bilong lotu i kamap olsem samting mi les tru long en. Misa i olsem samting i no gat as bilong en, em wanpela pasin ol i mekim oltaim na em i no inapim laik bilong mi long kisim ol samting tru mi mas kisim. Taim misa i pinis mi save amamas.” Tasol Baibel i tok ol bilipman tru ol i mas bung wantaim. Ol i mas bihainim wanem pasin bilong bung wantaim?

‘Ol Manmeri Bilong Sios i Bung Long Haus Bilong Ol Man’

Yumi inap save long pasin bilong ol Kristen long bung wantaim, taim yumi skelim dispela pasin bilong ol bilipman long taim bilong ol aposel. Baibel i kamapim olsem ol i save bung wantaim long haus bilong wanpela man. Olsem: Aposel Pol i tok: “Yupela givim gude bilong mi long Prisila na Akwila, tupela wanwok bilong mi long wok bilong Krais Jisas. Na yupela givim gude bilong mi long ol manmeri bilong sios i save bung long haus bilong tupela.” (Rom 16:​3, 5; Kolosi 4:​15; Filemon 2) Tok Grik ek·kle·siʹa ol i tanim long dispela ves olsem “sios” i makim wanpela lain i bung wantaim bilong mekim sampela wok wantaim, na i no makim wanpela haus. (Aposel 8:1; 13:⁠1) Bilong lotu long God ol Kristen tru i no gat wok long ol haus lotu i gat kain kain bilas.

Ol kongrigesen Kristen bilong bipo ol i bin mekim ol miting olsem wanem? Disaipel Jems i kolim wanpela tok Grik (sy·na·go·geʹ ) bilong makim wanpela miting Kristen. (Jems 2:⁠2) Insait bilong dispela tok Grik i olsem “bungim wantaim” na sampela taim ol i kolim dispela tok ek·kle·siʹa. Tasol bihain, dispela tok (sy·na·go·geʹ ) i makim wanpela haus em ol man i bung wantaim long en. Ol Kristen Juda bilong pastaim i save pinis long ol samting i save kamap long ol dispela haus lotu (sy·na·go·geʹ).b

Ol Juda i bin bung long tempel long Jerusalem bilong lotu long ol bikpela de i kamap long olgeta yia, tasol ol i save bung long ol dispela liklik haus lotu long kisim save long Jehova na lain long Lo. Yumi ken ting olsem long ol dispela haus lotu ol i bin mekim ol beten na ritim Baibel, na ol i skelim gut ol tok bilong Baibel na givim gutpela tok bilong strongim ol Kristen. Taim Pol na sampela wanwok bilong em i go long haus lotu bilong Antiok, ol hetman bilong haus lotu “i tokim wanpela man long i go tokim Pol wantaim ol wanwok bilong en olsem, ‘Ol brata, sapos yupela i gat wanpela tok bilong strongim bel bilong ol manmeri, orait yupela i ken autim.’ ” (Aposel 13:15) Taim ol Kristen Juda bilong pastaim i bung wantaim long haus bilong ol man ol i mekim wankain samting, olsem ol i skulim ol man long Baibel na strongim bilip bilong ol.

Ol Kongrigesen Bilong Strongim Ol Man

Olsem ol Kristen bilong pastaim, ol Witnes Bilong Jehova long nau ol i save bung wantaim long ol ples bilong lotu i no gat planti bilas samting bilong kisim skul long Baibel na ol i amamas long bung wantaim. Inap planti yia ol i bin bung tasol long haus bilong ol man, na long sampela ples ol i mekim yet olsem. Tasol nau namba bilong ol kongrigesen i winim 90,000, na ol nambawan ples bilong ol long bung wantaim ol i kolim Haus Kingdom. Ol dispela haus i no gat planti bilas na ol i no olsem wanpela haus lotu. Ol i olsem haus bilong mekim wok long en, na inap 100 i go 200 manmeri i ken bung long en bilong wokim ol miting bilong olgeta wik bilong putim yau na lain long tok bilong Baibel.

Planti kongrigesen bilong ol Witnes Bilong Jehova i save bung 3-pela taim long olgeta wik. Long wanpela miting ol i save mekim pablik-tok i kamapim sampela tok ol man i gat laik long save long en. Bihain ol i stadi long wanpela tok o wanpela tok profet bilong Baibel long rot bilong nius Wastaua. Narapela miting em skul bilong lainim ol Witnes long autim tok bilong Baibel. Bihain long en ol i wokim wanpela miting bilong givim gutpela tok bilong helpim ol long wok bilong autim tok. Wanpela taim long olgeta wik, ol Witnes i save bung olsem ol liklik grup long haus bilong wanpela brata bilong stadi long Baibel. Ol Witnes i amamas long ol man i kam long olgeta dispela miting. Ol i no save singaut long mani.

Francisco, em pastaim yumi stori long em, em i ting ol miting long Haus Kingdom i bin helpim em gut tru. Em i tok: “Namba wan haus bilong miting mi go long en, em wanpela gutpela haus long hap bilong taun i gat ol bisnis na stua, na taim mi lusim dispela miting mi amamas. Ol manmeri i kam bung ol i mekim pasin pren, na mi pilim olsem narapela i laikim tru narapela. Mi amamas tru long go bek gen. Kirap long dispela taim i kam inap long nau mi no lusim wanpela miting. Ol dispela miting Kristen i save kirapim tru tingting bilong mi, na ol i inapim laik bilong mi long kisim ol samting bilong spirit mi mas kisim. Maski sampela taim mi bel hevi long wanpela samting, mi save go yet long Haus Kingdom, na mi save olsem miting bai strongim bel bilong mi na mi bai amamas taim mi kam bek long haus.”

Sapos yu go long wanpela miting Kristen bilong ol Witnes Bilong Jehova, yu tu inap kisim skul long Baibel, na bung wantaim ol man em narapela i save strongim narapela, na yu inap litimapim nem bilong God. Mipela i laik singautim yu long kam long wanpela Haus Kingdom i stap klostu long yu. Bai yu amamas tru long yu bin kam.

[Ol Futnot]

[Ol Piksa long pes 4, 5]

Haus lotu sel na bihain ol tempel ol i gutpela ples bilong lotu long Jehova

[Piksa long pes 6]

Sios Bilong Santu Pita long Rom

[Piksa long pes 7]

Ol Kristen bilong pastaim i bin bung long haus bilong ol man

[Ol Piksa long pes 8, 9]

Ol Witnes Bilong Jehova i save mekim ol miting Kristen long haus bilong ol man na long ol Haus Kingdom