Olgeta Man Bai Sindaun Aninit Long Diwai Fik Bilong Ol Yet

PLES kol em i wanpela gutpela samting tru long taim bilong hatpela san long ol hap bilong Midel-Is. Ol man i laikim tru ol diwai i kamapim ples kol, na moa yet sapos kain diwai olsem i kamap klostu long haus bilong ol. Diwai fik i gat ol bikpela lip na ol han bilong diwai i go nabaut, olsem na ples kol em i kamapim i winim tru ples kol bilong ol narapela diwai bilong dispela hap.

Buk Plants of the Bible i tok “ples kol [bilong diwai fik] i gutpela na kol moa winim bilong haus sel.” Ol diwai fik i kamap long arere bilong ol gaden wain long Israel bilong bipo i kamapim gutpela ples kol ol wokman bilong gaden i ken malolo long en.

Long pinis bilong longpela de em san i hat long en, ol famili inap sindaun aninit long diwai fik bilong ol na amamas long bung wantaim. Na tu, diwai fik i save kamapim planti gutpela kaikai olsem pe bilong man i bin planim dispela diwai. Olsem na kirap long taim bilong King Solomon, taim ol i tok long man i sindaun aninit long diwai fik bilong em yet, dispela i makim bel isi, gutpela sindaun, na man i gat planti samting.​—⁠1 King 4:​24, 25.

Winim 400 yia paslain long dispela, profet Moses i tok Graun Bilong Promis i olsem ‘kantri i save kamapim diwai fik.’ (Lo 8:⁠8) Ol 12-pela man bilong lukstil i bin kamapim klia olsem dispela graun i gat gutpela gris taim ol i bringim ol fik na ol narapela prut i kam bek long kem bilong Israel. (Namba 13:​21-23) Winim wan handet yia i go pinis, wanpela man husat i bin go raun long ol hap bilong Midel-Is, em i tok diwai fik i pulap tru long dispela hap. Olsem na yumi no kirap nogut long Baibel i stori planti long ol fik na diwai fik!

Diwai i Kamapim Kaikai Tupela Taim Long Yia

Diwai fik inap kamap long kain kain graun, na ol rop bilong diwai i planti, olsem na diwai i no save dai long taim bilong bikpela san bilong Midel-Is em ren i no save pundaun planti taim long en. Dispela diwai i narapela kain, long wanem, sampela pikinini bilong en i save mau pastaim long Jun, na long Ogas i go diwai i save kamapim planti kaikai. (Aisaia 28:⁠4) Kaikai em diwai i kamapim pastaim, ol Israel i save kisim na kaikai nupela yet. Na ol kaikai i kamap bihain, ol i save draim na yusim isi isi long ol mun i kam bihain. Ol i save yusim ol fik ol i draim pinis bilong wokim ol raunpela kek, na sampela taim ol i save miksim wantaim amon. Ol dispela kek i isi long kaikai, gutpela bilong helpim skin, na i swit long maus.

Abigel i gat gutpela tingting na em i bin givim Devit 200 kek ol i wokim long ol fik ol i bin draim. Ating em i save olsem dispela i gutpela kaikai bilong givim long ol ranawe man. (1 Samuel 25:​18, 27) Ol fik ol i bin bengim na rausim wara bilong en i gutpela tu bilong yusim olsem marasin. Taim King Hesekia i kisim strongpela sua long skin i laik bagarapim em, ol i bin memeim sampela fik i drai pinis na putim long sua bilong em, tasol God yet i bin mekim na Hesekia i kamap orait gen.a​​—⁠2 King 20:​4-7.

Long ol taim bipo long olgeta hap bilong Mediterenian, fik ol i bin draim pinis em samting i dia tumas. Wanpela bikman bilong gavman Rom, em Cato, em i bin soim wanpela fik bilong kirapim gavman Rom long i go pait wantaim Carthage long Namba Tri Pait Bilong Punik. Long Rom ol nambawan gutpela fik ol i draim, ol i bin kisim long Caria, Esia Maina. Olsem na long tok Latin ol i kolim fik ol i draim pinis olsem carica. Dispela wankain hap em Turki i stap long en long nau, i save kamapim yet ol nambawan gutpela fik ol i draim pinis.

Planti fama bilong Israel i save planim ol diwai fik long gaden wain bilong ol, tasol ol i save katim na rausim ol diwai i no karim kaikai. Ol i sot tu long gutpela graun bilong kamapim kaikai, olsem na ol i no inap larim ol kain diwai olsem i pinisim nating gris bilong graun. Long tok piksa bilong Jisas long diwai fik i no karim kaikai, fama i tokim wokman bilong gaden: “Harim. Tripela yia nau mi kam bilong painim ol pikinini fik long dispela diwai, tasol em i no karim pikinini. Olsem na yu mas katim dispela diwai. Watpo em i pinisim nating gris bilong graun?” (Luk 13:​6, 7) Long taim bilong Jisas, gavman i putim takis long ol diwai i save karim kaikai, olsem na sapos diwai i no karim kaikai, dispela inap mekim na man bai tromoi mani nating.

Fik i bikpela samting tu long kaikai bilong lain Israel. Sapos diwai fik i no karim planti kaikai​—⁠ating em strafe bilong Jehova​—⁠dispela inap kamapim bikpela hevi. (Hosea 2:12; Amos 4:⁠9) Profet Habakuk i tok: “Sapos ol diwai fik i no karim pikinini fik na ol diwai wain i no karim pikinini wain, na sapos ol diwai oliv i no karim pikinini na i no gat kaikai long gaden, . . . orait maski dispela olgeta hevi i kamap, bai mi amamas na belgut. Long wanem, Bikpela em i God na em i save kisim bek mi.”​​—⁠Habakuk 3:​17, 18.

Samting i Makim Lain i No Gat Bilip

Sampela taim Baibel i stori long ol fik na diwai fik long ol tok piksa. Olsem: Jeremaia i tok ol Juda i kalabus na i stap gut long God, ol i olsem basket i gat ol gutpela fik long en, em ol fik i save mau pastaim na ol man i save kaikai nupela yet. Tasol ol Juda i no stap gut long God, ol i olsem ol fik nogut em ol man i no inap kaikai, olsem na ol i mas rausim.​​—⁠Jeremaia 24:​2, 5, 8, 10.

Long tok piksa bilong em long diwai fik i no karim kaikai, Jisas i kamapim pasin isi God i mekim long lain Juda. Olsem mipela i bin kamapim pinis, em i stori long wanpela man husat i bin planim diwai fik long gaden wain bilong em. Dispela diwai i no karim kaikai inap tripela yia olgeta, na papa bilong gaden i laik katim na rausim. Tasol wokman bilong gaden i tok: “Bikman, larim em i stap dispela wanpela yia moa. Bai mi brukim graun long as bilong en na putim pekpek bilong bulmakau. Ating em bai inap karim kaikai long yia bihain. Na sapos nogat, orait yu ken katim.”​​—⁠Luk 13:​8, 9.

Long taim Jisas i mekim dispela tok piksa, em i bin autim tok inap tripela yia pinis, na em i bin mekim wok bilong kirapim ol lain Juda long kisim bilip. Jisas i wok strong moa long mekim dispela wok, olsem putim gris long diwai fik bilong tok piksa​​—⁠em lain Juda​​—⁠na em i givim rot long diwai i ken karim planti kaikai. Tasol long wik paslain long Jisas i dai, ol samting i kamapim klia tru olsem ol lain Juda i sakim Mesaia.​​—⁠Matyu 23:​37, 38.

Long narapela taim gen Jisas i mekim tok piksa long diwai fik bilong kamapim klia olsem lain Juda i stap nogut tru long ol samting bilong spirit. Taim em i lusim Betani bilong i go long Jerusalem inap fopela de paslain long indai bilong em, em i lukim wanpela diwai fik i gat planti lip long en tasol i no gat wanpela kaikai. Ol namba wan fik i save kamap wantaim ol lip​​—⁠na sampela taim ol i save kamap paslain long ol lip i kamap​​—⁠tasol dispela diwai i no gat kaikai long en na dispela i makim olsem em i diwai nogut.​​—⁠Mak 11:​13, 14.b

Olsem dispela diwai fik i luk gutpela, tasol i no gat kaikai long en, lain Juda tu i giaman tasol long kamapim gutpela kaikai. Tasol ol i no bin kamapim ol pasin God i amamas long en, na bihain ol i sakim Pikinini bilong Jehova yet. Jisas i krosim dispela diwai i no gat kaikai long en, na long de bihain ol disaipel i lukim olsem dispela diwai i drai pinis. Dispela diwai i drai i makim olsem God bai sakim lain Juda na bai ol i no stap moa olsem lain em i bin makim bilong em yet.​​—⁠Mak 11:​20, 21.

“Kisim Save Long Diwai Fik”

Jisas i mekim wok tu long diwai fik bilong skulim ol man long wanpela bikpela samting bilong taim em i kam i stap. Em i tok: “Yupela i ken kisim save long diwai fik. Taim han bilong en i gat wara na ol nupela lip i kamap, yupela i save, taim bilong gutpela san i laik kamap nau. Olsem tasol, taim yupela i lukim dispela olgeta samting i kamap pinis, orait yupela i ken save, Pikinini Bilong Man i kam klostu pinis, na i stap long dua.” (Matyu 24:​32, 33) Taim diwai fik i putim ol grinpela lip, dispela i save makim olsem taim bilong san i laik kamap. Olsem tasol, bikpela tok profet bilong Jisas long Matyu sapta 24, Mak sapta 13, na Luk sapta 21 i kamapim klia tru olsem Jisas i kam i stap pinis na em i gat bikpela strong long Kingdom bilong heven.​​—⁠Luk 21:​29-​31.

Yumi stap long taim bilong planti hevi tru, olsem na i gutpela yumi laik kisim save long diwai fik. Sapos yumi mekim olsem na yumi no slip long ol samting bilong spirit, bai yumi inap lukim truim bilong dispela bikpela tok promis: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.”​​—⁠Maika 4:⁠4.

[Ol Futnot]