Lukaut Long Olkain Giaman
“Yupela i mas lukaut gut, nogut wanpela man i autim olkain giaman save . . . long yupela na em i mekim yupela i bihainim tingting bilong en.”—KOLOSI 2:8.
1-3. (a) Wanem samting i soim olsem ol man i save mekim pasin giaman long klostu olgeta samting ol i mekim? (b) Bilong wanem yumi no kirap nogut long dispela samting?
“HUSAT bilong yupela i no gat man i bin tok giaman long yu, em ol man i baim yupela long mekim wok?” Sampela yia i go pinis wanpela profesa bilong lo i bin askim ol loya olsem. Ol loya i tok wanem? Em i tok: “Mi bin givim dispela askim long planti tausen loya, na wanpela tasol i tok i no gat wanpela man husat i baim em long mekim wok i bin tok giaman long em.” Wanem as na i no gat wanpela i bin giamanim dispela loya? “Nau tasol em i bin kirap mekim wok loya na em i no bin toktok yet wantaim wanpela man i laik baim em long mekim wok.” Sori tru—dispela stori i kamapim klia olsem pasin bilong giaman i kamap bikpela long nau.
2 I gat kain kain pasin giaman na ol man i save giaman long klostu olgeta samting ol i mekim long nau. Ol niuspepa i save stori planti long dispela—ol lain politik i giaman long samting ol i mekim, ol loya na ol man i lukautim ol akaun i giaman long hamas winmani ol kampani i kisim, ol bisnisman i giamanim ol man husat i baim ol samting bilong ol, ol man i giamanim ol insurens kampani, na ol kain samting olsem. Na tu, i gat ol giaman bilong ol lotu. Ol pris pasto i giamanim ol man taim ol i lainim ol long ol bilip giaman, olsem taim man i dai em i no dai tru tru, bikpaia, na God Triwan.—2 Timoti 4:3, 4.
3 Olsem wanem? Yumi kirap nogut long ol dispela pasin giaman? Nogat. Baibel i tok long “taim bilong las de” olsem: “Ol man nogut na ol giaman profet ol bai i wok long giamanim ol manmeri.” (2 Timoti 3:1, 13) Yumi ol Kristen i mas was gut, nogut ol tingting giaman i kirapim yumi long lusim tok i tru. I gat tupela askim i kamap: Bilong wanem olkain giaman i kamap bikpela long nau, na yumi inap mekim wanem na dispela olkain giaman i no ken giamanim yumi?
Bilong Wanem Pasin Giaman i Go Bikpela Long Nau?
4. Olsem wanem Baibel i kamapim klia as na dispela graun i pulap long olkain giaman?
4 Baibel i kamapim klia as na dispela graun i pulap long olkain giaman. Aposel Jon i tok “dispela graun olgeta em i stap aninit long strong bilong Satan.” (1 Jon 5:19) Jisas i tok long Satan olsem: “Em i no bihainim pasin i tru, long wanem, pasin i tru em i no i stap long em. Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” Olsem na yumi no kirap nogut olsem dispela graun i bihainim ol pasin giaman bilong hetman bilong en, a?—Jon 8:44; 14:30; Efesus 2:1-3.
5. Olsem wanem Satan i wok strong tru long mekim olkain giaman nau long dispela taim bilong pinis? Em i wok strong moa yet long giamanim husat?
5 Long dispela taim bilong pinis, Satan i save wok strong moa yet. Em i bin raus long heven na i stap hia long graun. Em i save em i gat sotpela taim tasol na em i “belhat nogut tru.” Em i laik bagarapim ol man, olsem na em i “giamanim olgeta manmeri bilong graun.” (KTH 12:9, 12) Satan i no wok long giamanim ol man long sampela taim tasol. Nogat. Em i save wok oltaim long giamanim olgeta man.a Em i save yusim olgeta kain pasin bilong giaman na pasin trik bilong pasim tingting bilong ol man i no bilip na bai ol i no inap go klostu long God. (2 Korin 4:4) Em i wok strong moa yet long bagarapim ol man husat i lotuim God “long strong bilong Holi Spirit na long pasin i tru.” (Jon 4:24; 1 Pita 5:8) Yumi no ken lusim tingting long Satan i bin mekim kain tok olsem: ‘Mi inap pulim olgeta man long lusim God.’ (Jop 1:9-12) Nau yumi laik skelim sampela “pasin bilong trik na giaman” bilong Satan, na olsem wanem yumi ken sakim ol.—Efesus 6:11.
Lukaut Long Olkain Giaman Bilong Ol Apostet
6, 7. (a) Ol apostet i save mekim wanem tok? (b) Olsem wanem Baibel i kamapim klia samting ol apostet i laik mekim?
6 Inap longtaim tru Satan i bin yusim ol man i tromoi tok i tru, ol i kolim ol apostet, bilong grisim na pulim ol wokman bilong God. (Matyu 13:36-39) Ol apostet i tok ol i lotuim Jehova na ol i bilip long Baibel, tasol ol i givim baksait long oganaisesen bilong em hia long graun. Sampela i kirap gen long bilipim ol bilip i save bagarapim nem bilong God, em ol bilip bilong “Bikpela taun Babilon,” em olgeta lotu giaman. (KTH 17:5; 2 Pita 2:19-22) Spirit bilong God i stiaim ol man i raitim Baibel na ol i raitim ol strongpela tok i kamapim klia tingting na pasin ol apostet i save bihainim bilong pulim ol man.
7 Ol apostet i laikim wanem samting? Ol i no amamas tasol long lusim lotu em pastaim ol i ting em i lotu tru. Planti taim ol i laik pulim ol narapela i go wantaim ol. Ol i no mekim wok autim tok bilong kamapim ol disaipel bilong ol yet, nogat; planti apostet i laik “pulim ol manmeri bilong God [em ol disaipel bilong Krais] i go bihainim ol.” (Aposel 20:29, 30) Pol i stori long ol dispela tisa giaman, na em i tok: “Yupela i mas lukaut gut, nogut wanpela man i . . . mekim yupela i bihainim tingting bilong en.” (Kolosi 2:8) Dispela i makim stret samting planti apostet i laik mekim, a? Olsem man i stilim narapela man husat i stap isi wantaim famili bilong em na kisim em i go longwe long ol, ol apostet i laik kisim ol brata sista husat inap bilipim tok bilong ol na ol i kirapim ol long lusim kongrigesen.
8. Ol apostet i save mekim wanem bilong kamapim laik bilong ol?
8 Ol apostet i save mekim wanem bilong kamapim laik bilong ol? Planti taim ol bai paulim tok, kamapim sampela tok em hap bilong en tasol i tru, o kamapim tok i giaman stret. Jisas i bin save ol man bai “sutim kain kain tok giaman” long ol disaipel bilong em. (Matyu 5:11) Ol dispela birua nogut bai kamapim ol tok i no tru bilong giamanim ol narapela. Aposel Pita i bin tok lukaut olsem ol apostet bai “mekim planti tok giaman,” na kamapim ol giaman bilip, na ‘paulim tok i stap long buk bilong God’ bilong kamapim laik bilong ol. (2 Pita 2:3, 13; 3:16) Sori tru, sampela taim ol apostet i “bagarapim bilip bilong sampela manmeri.”—2 Timoti 2:18.
9, 10. (a) Yumi ken mekim wanem na ol apostet i no inap giamanim yumi? (b) Bilong wanem yumi no bel hevi sapos yumi mas stretim tingting bilong yumi long samting God i tingting pinis long mekim?
9 Yumi ken mekim wanem na ol apostet i no inap giamanim yumi? Yumi ken bihainim gutpela tok Baibel i kamapim, em i tok: “Yupela i mas lukaut gut long ol man i save sakim dispela tok yupela i bin kisim na i save mekim ol kain kain toktok na ol pasin bilong brukim sios. . . . Ol i save mekim ol manmeri bilong sios i pundaun na bagarap. Yupela i mas i stap longwe long ol dispela kain man.” (Rom 16:17) Yumi “stap longwe long ol” taim yumi no putim yau long tok bilong ol—em tok ol i mekim long maus, long ol buk samting, o long Intenet. I gat wanem as na yumi save mekim olsem? Namba wan, Tok Bilong God i tokim yumi long mekim olsem, na yumi bilip olsem oltaim Jehova i save tingim tru ol samting bilong helpim yumi.—Aisaia 48:17, 18.
10 Namba tu, yumi laikim oganaisesen i bin lainim yumi long ol gutpela tok i tru, em ol dispela tok i tru i mekim na yumi narapela kain olgeta long Bikpela Babilon. Tasol tu, yumi luksave olsem tingting bilong yumi long ol samting God i tingting pinis long mekim i no klia olgeta; kirap long bipo na i kam inap nau tingting bilong yumi long sampela samting i bin senis liklik. Ol Kristen i stap gut long Jehova ol i amamas long wetim em long stretim tingting bilong ol. (Sindaun 4:18) Tasol yumi no inap lusim dispela oganaisesen em God i amamas long yusim, long wanem, yumi lukim long ples klia em i save blesim dispela oganaisesen.—Aposel 6:7; 1 Korin 3:6.
Lukaut Long Pasin Bilong Giamanim Yu Yet
11. Wanem as na ol man bilong graun i gat dispela pasin bilong giamanim ol yet?
11 Ol man bilong graun i gat wanpela pasin em Satan i save hariap long yusim—em pasin bilong giamanim ol yet. Jeremaia 17:9 i tok: “Bel bilong olgeta man i save tingting oltaim long mekim pasin giaman. Tingting bilong man em i nogut tru.” Na Jems i tok: “Bel bilong yumi olgeta wan wan i save kirap na pulim yumi.” (Jems 1:14) Sapos bel bilong yumi i kirap, em inap pulim yumi long mekim sin, na kirapim yumi long ting em i gutpela samting na i no inap bagarapim yumi. Kain tingting olsem i save giaman, long wanem, sapos yumi kirap mekim sin bai yumi bagarap long bihain.—Rom 8:6.
12. Olsem wanem pasin bilong giamanim yumi yet inap pundaunim yumi?
12 Pasin bilong giamanim yumi yet inap kalabusim yumi. Bel bilong yumi inap giaman na tokim yumi olsem wanpela pasin nogut bilong yumi i no nogut tumas o bel inap kamapim kain kain eskius taim yumi mekim wanpela bikpela rong. (1 Samuel 15:13-15, 20, 21) Bel bilong yumi inap painim rot bilong tok olsem i gat as na yumi mekim ol pasin i no gutpela tumas long mekim. Olsem: Pasin bilong painim amamas. Sampela amamas i gutpela na yumi laik mekim. Tasol planti amamas bilong nau—olsem ol piksa long TV na vidio na samting long Intenet—i doti na i stori long pasin sem. I no hatwok long giamanim bel bilong yumi yet na ting yumi inap lukim ol kain amamas nogut na dispela i no inap bagarapim yumi. Sampela i tok: “Bel bilong mi i no gat tok long dispela, olsem na no gat hevi.” Tasol ol man husat i tok olsem ol i ‘giamanim ol yet.’—Jems 1:22.
13, 14. (a) Stori bilong husat long Baibel i soim olsem bel bilong yumi i save giaman sampela taim? (b) Yumi ken mekim wanem na pasin bilong giamanim yumi yet i no ken kamap long yumi?
13 Yumi ken mekim wanem na pasin bilong giamanim yumi yet i no ken kamap long yumi? Pastaim yumi mas save olsem bel bilong yumi i save giaman sampela taim. Tingim samting i bin painim aposel Pol. Taim em i no kamap Kristen yet, em i bin mekim nogut long ol disaipel bilong Krais. (Aposel 9:1, 2) Ating bel bilong em i no gat tok long dispela taim. Yumi save bel bilong em i no bin kisim stretpela skul. Pol i tok: “Mi no bin save gut long em na mi no bilip long em.” (1 Timoti 1:13) Olsem na sapos bel bilong yumi i no gat tok long sampela amamas yumi laikim, dispela i no makim olsem samting yumi laik mekim i stret. Bel em Tok Bilong God i bin skulim, em tasol i stap olsem gutpela stia.
14 Sapos yumi laik abrusim pasin bilong giamanim yumi yet, i gat sampela samting yumi mas tingim. Beten skelim yu yet. (Song 26:2; 2 Korin 13:5) Taim yu skelim gut yu yet ating bai yu kisim save olsem yu mas senisim sampela tingting na pasin bilong yu. Harim tok bilong ol narapela. (Jems 1:19) Taim yumi skelim yumi yet, ating yumi no lukim tumas rong bilong yumi, olsem na em i savepasin long putim gut yau long tok bilong wanpela strongpela Kristen. Sapos yu luksave olsem ol samting yu tingting pinis long mekim o wokabaut bilong yu i no gutpela tumas long ai bilong ol strongpela wanbilip, orait ating yu mas askim yu yet olsem, ‘Olsem wanem? Mi no bin skulim gut bel bilong mi o bel bilong mi i wok long giamanim mi?’ Oltaim stadi long Baibel na ol buk Baibel i as bilong en. (Song 1:2) Taim yu mekim olsem dispela bai helpim yu long bosim tingting bilong yu, na ol samting yu pilim long bel na bai ol i stret wantaim ol stiatok bilong God.
Lukaut Long Ol Tok Giaman Bilong Satan
15, 16. (a) Bilong giamanim yumi, Satan i save kamapim wanem ol tok giaman? (b) Yumi ken mekim wanem na ol dispela tok giaman i no inap giamanim yumi?
15 Satan i save yusim kain kain tok giaman bilong giamanim yumi. Em i laik bai yumi bilip olsem ol mani kago samting i save mekim yumi amamas, tasol planti taim dispela i mekim man i bel hevi. (Saveman 5:10-12) Em i laik bai yumi bilip olsem pasin nogut bilong nau i no gat pinis bilong en, maski yumi inap lukim ol samting i kamapim klia yumi stap long “taim bilong las de.” (2 Timoti 3:1-5) Satan i kirapim ol man long ting i no gat rong long mekim pasin pamuk, maski ol man husat i kisim amamas long dispela rot i save kisim pe nogut. (Galesia 6:7) Yumi ken mekim wanem na ol dispela tok giaman i no giamanim yumi?
16 Kisim save long ol stori i stap long Baibel. Baibel i stori long ol samting i bin painim ol man husat i bin bilipim ol tok giaman bilong Satan. Ol i bin laikim tumas ol samting bilong skin, ol i no tingim ol samting i bin wok long kamap long taim bilong ol, o ol i kirap mekim pasin pamuk—na hevi i painim ol. (Matyu 19:16-22; 24:36-42; Luk 16:14; 1 Korin 10:8-11) Kisim save long ol samting i painim ol man long nau. Sori tru, sampela Kristen i no pilim moa olsem taim i sot na ol i ting taim ol i mekim wok bilong God ol i lus long kisim sampela gutpela samting. Ating ol i lusim tok i tru na wok long painim amamas tasol. Tasol ol kain man olsem i “wokabaut long rot i wel moa yet,” long wanem, bihain ol bai karim hevi long ol pasin nogut ol i bin mekim. (Song 73:18, 19) Yumi bihainim savepasin taim yumi larim popaia bilong ol narapela i skulim yumi.—Sindaun 22:3.
17. I gat wanem as na Satan i mekim ol samting bilong strongim dispela tok giaman olsem God i no laikim yumi o tingim yumi?
17 I gat narapela tok giaman Satan i bin yusim na i wok gut tru—em dispela tok giaman olsem Jehova i no laikim yumi na em i no tingim yumi. Inap planti tausen yia Satan i bin skelim gut ol man. Em i save gut olsem pasin bilong bel hevi inap mekim na yumi no gat strong. (Sindaun 24:10) Olsem na em i mekim ol samting bilong strongim dispela tok giaman olsem God i no save tingim yumi. Sapos yumi karim ol hevi na kirap bilip olsem Jehova i no tingim yumi, dispela inap kirapim yumi long givap. (2 Korin 4:9) Satan i laik bai yumi mekim olsem! Olsem na yumi ken mekim wanem na dispela tok giaman bilong Satan i no ken giamanim yumi?
18. Olsem wanem Baibel i strongim yumi long bilip olsem Jehova i save laikim yumi?
18 Tingim tingim long bel ol tok Baibel i mekim long pasin bilong God long laikim yumi. Tok Bilong God i kamapim sampela gutpela tok i kamapim long ples klia olsem Jehova i tingim yumi na em i laikim yumi wan wan. Em i save lukim na tingim yu taim yu hatwok long stap gut long em na yu krai. (Song 56:8) Em i save long taim yu “gat hevi” na em i save stap klostu long yu long kain taim olsem. (Song 34:18) Em i save long olgeta samting bilong yu, em i ‘kaunim pinis olgeta gras long het bilong yu.’ (Matyu 10:29-31) Na nambawan bikpela samting, God “i givim dispela wanpela Pikinini” bilong helpim yu. (Jon 3:16; Galesia 2:20) Ating sampela taim bai yu hatwok long bilip olsem ol dispela skripsa i stret long yu yet. Tasol yumi mas bilipim tok Jehova i mekim. Em i laik bai yumi bilip olsem em i laikim yumi olsem wanpela lain, na tu, em i laikim yumi wan wan.
19, 20. (a) Bilong wanem em i bikpela samting long luksave na sakim tok giaman bilong Satan olsem Jehova i no laikim yu? (b) Wanpela wasman raun i save mekim wanem bilong helpim ol man i bel hevi?
19 Luksave long dispela tok giaman na sakim. Sapos yu save man i tok giaman long yu, orait yu inap mekim ol samting na em i no inap giamanim yu. Na olsem tasol, taim yu save Satan i laik giamanim yu na bai yu bilip olsem Jehova i no laikim yu, dispela save inap helpim yu tru. Wanpela Kristen i stori long wanpela Wastaua i bin mekim tok lukaut long ol trik bilong Satan, em i tok: “Mi no bin save Satan i save mekim wok long samting mi pilim long bel bilong mekim mi bel hevi. Nau mi save long dispela samting, olsem na bai mi strong long daunim ol dispela tingting i stap long bel.”
20 Skelim stori bilong wanpela wasman raun long wanpela kantri bilong Saut Amerika. Taim em i mekim visit bilong wasman long ol wanbilip husat i bel hevi, em i save askim ol, ‘Yu bilip long God Triwan?’ Brata i bel hevi i save bekim olsem, ‘Nogat,’ long wanem, em i save em wanpela tok giaman bilong Satan. Orait nau wasman raun i askim, ‘Yu save bilip long helpaia?’ Brata bai bekim, ‘Nogat!’ Nau wasman raun i tokim brata olsem i gat narapela tok giaman bilong Satan, em planti i no luksave long en. Em i tokim ol long lukim pes 249, paragraf 21, bilong buk Draw Close to Jehovah,b em long dispela hap buk i kamapim ples klia dispela tok giaman olsem Jehova i no laikim yumi wan wan. Wasman raun i tok dispela pasin bilong helpim ol brata husat i bel hevi long luksave na sakim dispela tok giaman bilong Satan i helpim tru ol brata.
Lukautim Yu Yet Long Olkain Giaman
21, 22. Olsem wanem yumi save long olkain giaman bilong Satan? Yumi mas tingting strong long mekim wanem?
21 Nau long dispela taim bilong pinis, yumi save Satan bai wok yet long kamapim planti tok giaman na trik. Yumi ken tenkyu long Jehova long em i bin stori gut long yumi long olgeta pasin bilong Satan long giamanim ol man. Baibel na ol buk samting em Baibel i as bilong en, em “wokboi i gat gutpela tingting” i kamapim, i save kamapim long ples klia ol pasin nogut bilong Satan. (Matyu 24:45) Taim yumi save pastaim long ol pasin bilong em, dispela i helpim yumi long sakim em.—2 Korin 2:11.
22 Olsem na yumi mas lukaut long ol tingting bilong ol apostet. Yumi mas strong long sakim pasin bilong giamanim yumi yet. Na yumi mas luksave long ol tok giaman bilong Satan na sakim. Taim yumi mekim, bai yumi lukautim pasin bilong yumi long pas gut wantaim “God bilong mekim pasin tru tasol,” em i God i no laikim tru olkain giaman.— Song 31:5; Sindaun 3:32.
[Ol Futnot]
a Wanpela buk i tok dispela tok ol i tanim olsem “bilong giamanim” long Kamapim Tok Hait 12:9 “i makim samting man i mekim long olgeta taim na i kamap olsem pasin bilong em.”
b Ol Witnes Bilong Jehova i wokim.
Yu Inap Tingim?
• I gat wanem as na pasin bilong giaman i kamap bikpela tru long nau?
• Yumi ken mekim wanem na ol apostet i no ken giamanim yumi?
• Yumi ken mekim wanem bilong sakim pasin bilong giamanim yumi yet?
• Yumi ken mekim wanem na ol tok giaman bilong Satan i no inap giamanim yumi?
[Piksa long pes 17]
No ken giamanim yu yet long ol samting bilong painim amamas
[Ol Piksa long pes 18]
Bilong abrusim pasin bilong giamanim yu yet, yu mas beten skelim yu yet, harim tok bilong ol narapela, na oltaim stadi long Baibel