Bai Yu Bihainim Ol Tok Lukaut Bilong Jehova?

“Yupela ol manmeri. Dispela em i rot, wokabaut long en.”​—⁠AIS. 30:​21, NW.

 1, 2. Satan i tingting strong long mekim wanem? Olsem wanem Baibel i helpim yumi?

SAPOS yu wokabaut long rot, na i gat wanpela sain long rot i no stret, dispela bai paulim yu na inap kamapim hevi tu. Tingim olsem wanpela pren bilong yu i tok lukaut olsem wanpela man nogut i bin senisim dispela sain, long wanem, em i laik bai ol man i paul long rot. Yu bai putim yau long tok lukaut bilong pren bilong yu, a?

² Baibel i stori long 2-pela rot. Wanpela i go long bagarap na narapela i go long laip oltaim. Em i tok planti i bihainim rot i go long bagarap. Satan, olsem dispela man nogut, i giamanim ol na em i laik giamanim yumi tu. (Rev. 12:⁠9) Long stadi i kamap paslain long dispela, yumi bin stori long ol samting nogut em Satan i save yusim bilong kirapim yumi long sakim tok bilong Jehova na lusim rot i go long laip oltaim. (Mat. 7:​13, 14) Tasol yumi lainim tu olsem pren bilong yumi, Jehova, i givim tok lukaut long yumi long ol trik bilong Satan. Nau bai yumi stori long narapela 3-pela samting Satan i yusim bilong giamanim yumi, na olsem wanem Baibel i helpim yumi long sakim. Taim yumi ritim Baibel, tingim olsem Jehova i stap baksait long yumi na mekim dispela tok: “Yupela ol manmeri. Dispela em i rot, wokabaut long en.” (Ais. 30:​21, NW ) Taim yumi stadi long ol dispela tok lukaut, bai yumi strong moa long bihainim tok bilong Jehova.

No Ken Bihainim “Ol Giaman Tisa”

 3, 4. (a) Olsem wanem ol giaman tisa i olsem ol hulwara i drai pinis? (b) Ol giaman tisa i kam long we? Ol i laik mekim wanem?

³ Tingim olsem yu wokabaut long wanpela ples drai nating na nek bilong yu i drai. Yu lukim wanpela hulwara i stap longwe liklik. Yu ting i gat wara i stap long en, so yu wokabaut i go long en. Tasol taim yu kamap long hulwara, em i drai pinis. Yu bel hevi tru! Yumi ken tok olsem tok i tru i olsem wara na ol giaman tisa i olsem ol hulwara i drai pinis. Ol man husat i ting ol giaman tisa i skulim ol long tok i tru, ol bai bel hevi. Long rot bilong aposel Pol na Pita, Jehova i givim tok lukaut long yumi long ol giaman tisa. (Ritim Aposel 20:​29, 30; 2 Pita 2:​1-3.) Ol dispela giaman tisa ol i husat? Tok bilong Pol na Pita i helpim yumi long save ol dispela giaman tisa i kam long we na hau ol i save giamanim ol man.

⁴ Pol i tokim ol elda long Efesus: “Sampela man long lain bilong yupela yet bai kirap na mekim ol tok kranki.” Na Pita i raitim pas long sampela kongrigesen na tok: “Ol giaman tisa bai kamap namel long yupela.” Olsem na ol giaman tisa inap kamap insait long kongrigesen. Ol dispela giaman tisa em ol apostet.a Ol i laik mekim wanem? Pol i tok taim ol i lusim oganaisesen bilong Jehova, ol i laik “pulim ol disaipel i go bihainim ol.” Ol dispela giaman tisa i no lukluk ausait long kongrigesen bilong kamapim ol disaipel. Nogat. Ol i traim long kisim, o stilim, ol disaipel bilong Jisas Krais i stap insait long kongrigesen. Jisas i tok ol apostet i olsem ol wulf i save kaikai ol sipsip. Ol apostet i laik bagarapim bilip bilong ol bratasista bilong kongrigesen na ol i laik bai ol i lusim tok i tru.​—⁠Mat. 7:15; 2 Tim. 2:⁠18.

 5. Olsem wanem ol giaman tisa i giamanim ol man?

⁵ Olsem wanem ol giaman tisa i giamanim ol man? Ol i mekim long pasin i no stap ples klia. Long “pasin hait” ol apostet i kamapim tingting bilong ol yet insait long kongrigesen, ol i olsem ol raskol husat i bringim ol samting insait long kantri long pasin hait. Ol apostet i save yusim “ol tok giaman.” Ol i mekim ol tok i kirapim ol man long ting olsem tingting bilong ol i tru, olsem ol raskol husat i wokim ol giaman kopi bilong ol pepa na i luk olsem pepa tru. Ol i traim long kirapim planti man long bilipim “ol bilip giaman bilong ol.” Pita i tok tu olsem ol i save paulim tok bilong Baibel. Ol i paulim mining bilong ol ves bilong Baibel bilong kirapim ol man long bilipim tok bilong ol. (2 Pita 2:​1, 3, 13; 3:16) Ol apostet i no tingim yumi. Sapos yumi bihainim ol, bai yumi lusim rot i go long laip oltaim.

 6. Baibel i givim wanem tok lukaut long yumi long ol giaman tisa?

⁶ Olsem wanem yumi inap lukautim yumi yet long ol giaman tisa? Baibel i tokaut long samting yumi mas mekim. (Ritim Rom 16:17; 2 Jon 9-11.) Em i tok: “Stap longwe long ol.” Tok lukaut bilong Baibel i olsem tok lukaut bilong dokta husat i tokim yu long stap longwe long man i gat wanpela sik inap kalap long ol arapela. Dokta i save olsem sapos yu kisim dispela sik, bai yu dai. Tok lukaut bilong em i klia, na yu bai bihainim tok bilong em. Baibel i tok ol apostet i gat laik nogut na ol i yusim tok bilong ol long kirapim ol man long kisim wankain tingting olsem ol. (1 Tim. 6:​3, 4) Jehova i olsem dispela dokta. Em i tok klia olsem yumi mas i stap longwe long ol giaman tisa. Oltaim yumi mas strong long bihainim tok lukaut bilong em.

 7, 8. (a) Yumi mas mekim wanem bilong stap longwe long ol giaman tisa? (b) Bilong wanem yu strong long stap longwe long ol giaman tisa?

⁷ Hau bai yumi stap longwe long ol giaman tisa? Yumi no ken toktok wantaim ol o singautim ol i kam long haus bilong yumi. Yumi no ken ritim ol buk bilong ol, o ritim o bekim ol tok bilong ol long Intenet, o lukim ol long TV. Bilong wanem yumi strong long stap longwe long ol? Long wanem, yumi laikim dispela “God bilong mekim pasin tru tasol.” Yumi no laik putim yau long ol tok giaman i pait wantaim tok i tru bilong Baibel. (Sng. 31:5; Jon 17:17) Na tu, yumi laikim oganaisesen em Jehova i yusim bilong skulim yumi long ol tok i tru. Oganaisesen bilong Jehova i skulim yumi long nem bilong Jehova na mining bilong en, ol samting em i laik mekim long graun, na samting i painim yumi taim yumi dai, na long kirap bek. Yu tingim yet bikpela amamas yu kisim long namba wan taim yu harim ol dispela tok i tru? Sapos olsem yu no ken larim tok bilong ol giaman tisa i kirapim yu long givim baksait long oganaisesen i bin lainim yu long ol dispela tok i tru.​—⁠Jon 6:​66-69.

⁸ Maski ol giaman tisa i mekim wanem kain tok, bai yumi no bihainim ol! I no gat as na yumi putim yau long tok bilong ol man i olsem ol hulwara i drai pinis. Ol man i harim tok bilong ol, ol bai bel hevi. Yumi strong long stap gut long Jehova na oganaisesen bilong em. I no gat wanpela taim dispela oganaisesen i bin mekim yumi bel hevi, na oltaim em i givim yumi planti klinpela wara bilong tok i tru i kam long Baibel.​—⁠Ais. 55:​1-3; Mat. 24:​45-47.

No Ken “Putim Yau Long Ol Giaman Stori”

 9, 10. Pol i givim wanem tok lukaut long Timoti long ol giaman stori? Pol i tingting long wanem ol giaman stori? (Lukim tu futnot.)

⁹ Sapos wanpela i bin tanim sain long rot, dispela inap paulim yumi. Sampela taim i isi long luksave olsem sain i no stret, tasol sampela taim nogat. I wankain long ol tok giaman bilong Satan. Sapos yumi no was gut, em inap giamanim yumi. Aposel Pol i givim tok lukaut long yumi long wanpela samting Satan i save yusim, em “ol giaman stori.” (Ritim 1 Timoti 1:​3, 4.) Ol dispela giaman stori i wanem samting, na yumi ken mekim wanem na bai yumi no putim yau long ol? Yumi mas save long bekim bilong ol dispela askim bambai yumi ken stap yet long rot i go long laip oltaim.

¹⁰ Tok lukaut bilong Pol long ol giaman stori i stap long namba wan pas em i raitim long Timoti, em wanpela elda Kristen. Pol i tokim Timoti long helpim kongrigesen long i stap klin na helpim ol brata na sista long stap gut long Jehova. (1 Tim. 1:​18, 19) Tok Grik Pol i yusim bilong makim “ol giaman stori” i makim “tok giaman” o “stori nating.” Wanpela buk (The International Standard Bible Encyclopaedia) i tok dispela tok Grik i makim ol stori bilong lotu i no gat as bilong en. Ating Pol i tingim ol tok giaman bilong lotu em ol olpela stori nating i as bilong en.b Pol i tok ol dispela stori inap nogutim man, bikos ol i “kamapim ol askim tasol.” Dispela i makim olsem ol man husat i putim yau long ol dispela stori, ol bai i gat ol askim long ol samting i no tru, na yusim taim bilong ol long painim bekim. Satan i yusim ol dispela stori nating na ol tok giaman bilong lotu bilong mekim ol man i lusim tingting long ol bikpela samting. Tok bilong Pol i klia: No ken putim yau long ol giaman stori!

11. Olsem wanem Satan i yusim lotu giaman long giamanim ol man? Yumi mas putim yau long wanem tok lukaut?

¹¹ Wanem sampela giaman stori inap giamanim yumi sapos yumi no was gut? Yumi ken tok olgeta kain tok bilong lotu we i mekim na yumi “no laik harim moa tok i tru,” dispela em ol giaman stori. (2 Tim. 4:​3, 4) Satan i kleva. Em i yusim lotu giaman long giamanim ol man. Olsem na Baibel i tok em i mekim em yet i kamap “ensel bilong lait.” (2 Kor. 11:14) Olsem, ol lotu bilong Kristendom i tok ol i bihainim Krais, tasol ol i lainim ol man long ol tok giaman, olsem God Triwan na helpaia. Ol i save tok tu olsem wanpela samting insait long man i stap laip yet taim man i dai. Planti i ting God i amamas long Krismas na Ista, tasol ol samting ol man i save mekim long dispela taim i kam long lotu giaman. Ol giaman stori bai no giamanim yumi sapos yumi putim yau long tok lukaut bilong God long stap longwe long lotu giaman na “no ken tatsim samting i no klin.”​—⁠2 Kor. 6:​14-17.

12, 13. (a) Wanem 3-pela tok giaman bilong Satan? Wanem 3-pela tok i tru? (b) Yumi mas mekim wanem sapos yumi no laik bai ol giaman stori bilong Satan i giamanim yumi?

¹² I gat ol arapela tok bilong Satan em inap giamanim yumi sapos yumi no was gut. Yumi ken skelim 3-pela tok giaman. Namba 1: Yu ken mekim olgeta samting yu laik mekim; yu yet i ken makim wanem samting i stret o i no stret. Planti taim TV, ol muvi, ol magasin, ol niuspepa, na Intenet i save kamapim dispela tingting. Oltaim yumi save harim dispela tok giaman, olsem na em isi long kisim dispela tingting na bihainim ol pasin nogut bilong dispela graun. Tasol tok tru i olsem: God i mas tokim yumi long wanem pasin i stret na wanem pasin i no stret. (Jer. 10:23) Namba 2: God bai no inap senisim wanpela samting long graun. Dispela i kirapim ol man long tingim ol samting bilong nau tasol. Ol i no wari long taim bihain o long mekim samting i amamasim God. Nogut yumi kisim wankain tingting olsem ol na bihain yumi “stap nating” na yumi no mekim wok bilong God. (2 Pita 1:⁠8) Tasol tok tru i olsem: Klostu nau Jehova bai senisim ol samting hia long graun, na wokabaut bilong yumi i mas soim olsem yumi bilipim tru dispela tok. (Mat. 24:44) Namba 3: God i no save tingim yu. Satan i laik bai yumi ting olsem yumi no gutpela inap long God i ken laikim yumi. Sapos yumi bilipim dispela tok giaman bilong Satan, ating bai yumi lusim wok bilong Jehova. Tasol tok tru i olsem: Jehova i laikim tru olgeta wan wan wokboi bilong em, ol i bikpela samting long em.​—⁠Mat. 10:​29-31.

¹³ Oltaim yumi mas was gut, nogut yumi kisim wankain tingting olsem ol manmeri Satan i bosim. Sampela taim i luk olsem tok ol i mekim na tingting bilong ol i tru. Tasol tingim, Satan i laik giamanim yumi, na em i hapman tru bilong mekim olsem. Sapos yumi no laik bai ol giaman stori bilong Satan i giamanim yumi, orait yumi mas putim yau long ol tok lukaut bilong Baibel.​—⁠2 Pita 1:⁠16.

No Ken “Bihainim Satan”

14. Pol i givim wanem tok lukaut long sampela yangpela wido meri? Bilong wanem yumi olgeta i mas putim yau long dispela tok lukaut?

¹⁴ Tingim olsem wanpela sain long rot i tok: “Bilong Bihainim Satan, Go Long Dispela Rot.” Tru, i no gat wanpela Kristen i laik bihainim dispela sain. Tasol sapos ol Kristen tru i no was gut, ol inap kirap “bihainim Satan.” Paul i givim tok lukaut long olsem wanem dispela inap kamap. (Ritim 1 Timoti 5:​11-15.) Em i tok long sampela yangpela wido meri insait long kongrigesen long taim bilong em, tasol yumi olgeta inap kisim skul long tok em i mekim. Ol dispela wido i no ting ol i bihainim Satan, tasol pasin na toktok bilong ol i kamapim olsem ol i bihainim em. Yumi ken mekim wanem na bai yumi no bihainim Satan? Nau bai yumi skelim tok lukaut Pol i mekim long pasin bilong tok baksait.

15. Satan i laik bai yumi mekim wanem? Olsem Pol i tok, Satan i mekim wok long wanem ol samting bilong kirapim yumi long bihainim laik bilong em?

¹⁵ Satan i no laik bai yumi toktok long ol samting yumi bilip long en. Em i laik bai yumi lusim wok bilong autim gutnius. (Rev. 12:17) Em i laik bai yumi yusim taim bilong yumi long mekim ol samting i no gat as bilong en o i save kirapim kros pait namel long lain bilong Jehova. Pol i tok long sampela samting em Satan i yusim bilong kirapim yumi long bihainim laik bilong em. Pol i tok ol wido meri long taim bilong em ol i “stap nating, na raun nabaut long ol haus.” Ol dispela wido meri i tromoi bikpela hap taim long visitim ol pren na toktok long ol samting nating. Yumi mas was gut nogut yumi mekim wankain samting. Olsem, yumi inap westim bikpela hap taim bilong yumi na bilong ol narapela long ritim na salim ol E-meil i stori long ol samting nating na sampela taim ol stori i no tru. Pol i tok tu olsem ol wido meri i save “toktok nabaut.” Sampela taim ol lain bilong toktok nabaut i save tok baksait. Dispela kain tok inap krungutim gutnem bilong narapela, olsem sutim tok giaman long ol. Planti taim ol dispela tok giaman i kirapim pait. (Snd. 26:20) Ol man i sutim tok giaman long narapela, ol i olsem Satan, em Devil, maski ol yet i no save long dispela.c Orait nau Pol i tok ol wido i save “subim nus bilong ol long ol samting ol arapela i mekim.” Ol i tokim ol narapela long ol samting ol i mas mekim. No gat wanpela i gat rait long mekim olsem. Ol dispela pasin nogut inap mekim na yumi no tingim bikpela wok Jehova i givim long yumi. Yumi mas yusim taim bilong yumi long autim tok bilong Kingdom Bilong God. Sapos yumi lusim wok autim tok, yumi kirap bihainim Satan. Na sapos yumi stap long sait bilong Satan, orait yumi birua long Jehova. Yumi olgeta i mas makim, yumi bai stap long sait bilong husat.​—⁠Mat. 12:⁠30.

16. Sapos yumi no laik bihainim Satan, yumi mas mekim wanem?

¹⁶ Sapos yumi bihainim tok bilong Baibel, bai yumi no bihainim Satan. Pol i kolim sampela samting bilong helpim yumi. Em i tok yumi mas “bisi long mekim planti wok bilong Bikpela.” (1 Kor. 15:58) Taim yumi wok strong long wok bilong Jehova, yumi no gat taim long mekim ol samting nating, na ol samting em inap bagarapim yumi. (Mat. 6:33) Na tu, Pol i tok yumi mas mekim “ol gutpela tok bilong strongim ol man.” (Efe. 4:29) No ken tok baksait, na no ken putim yau long ol tok baksait narapela i mekim. (Lukim blok “Tromoi Gras Bilong Pisin Long Win.”) Trastim ol bratasista na rispektim ol. Sapos yu mekim olsem, oltaim bai yu kamapim ol gutpela pasin bilong ol. Pol i tok tu long samting yumi no ken mekim. Em i tok: “No ken subim nus long ol samting bilong ol arapela.” (1 Tes. 4:11) Soim ol man olsem yu tingim ol, tasol mekim long pasin rispek. Ating i gat ol samting ol i no laik toktok long en na ol i no laik ol narapela i save long en. Na tingim, yumi no ken wokim disisen bilong narapela long ol samting ol yet i mas wokim disisen long en.​—⁠Gal. 6:⁠5.

17. (a) Bilong wanem Jehova i givim ol dispela tok lukaut nau yumi stori long en? (b) Yumi mas strong long mekim wanem?

¹⁷ Yumi tenkyu long Jehova long em i tokaut klia long ol samting yumi no ken bihainim! Oltaim yumi mas tingim olsem Jehova i givim yumi ol dispela tok lukaut bikos em i laikim tru yumi. Em i no laik bai Satan i giamanim yumi na yumi karim pen na hevi. Rot em Jehova i laik bai yumi bihainim i gat hatwok, tasol dispela rot tasol i go long laip oltaim. (Mat. 7:14) Oltaim yumi mas strong long putim yau long tok bilong Jehova taim em i tokim yumi: “Dispela em i rot, wokabaut long en.”​—⁠Ais. 30:​21, NW.

[Ol Futnot]

Wanem Bekim Bilong Yu?

Olsem wanem yu ken bihainim ol tok lukaut em ol dispela skripsa i kamapim?

• 2 Pita 2:​1-3

• 1 Timoti 1:​3, 4

• 1 Timoti 5:​11-15

[Blok/Ol Piksa long pes 19]

Tromoi Gras Bilong Pisin Long Win

Wanpela olpela stori bilong ol Juda i kamapim samting nogut em tok baksait inap mekim.

Wanpela man i raun long taun na sutim tok giaman long saveman bilong taun. Bihain, man i tok baksait i luksave long rong bilong em na em i go askim saveman long fogivim em, na tok em i redi long mekim ol samting bilong stretim rong. Saveman i askim em long mekim wanpela samting: Man i tok baksait i mas kisim wanpela pilo i gat ol gras bilong pisin, katim na tromoi ol gras long win. Em i kirap nogut long dispela tok, tasol em i mekim olsem saveman i tok na bihain em i go bek long saveman.

Em i askim: “Yu fogivim mi nau?

Saveman i tok: “Pastaim yu mas go na bungim olgeta gras bilong pisin.”

“Hau bai mi mekim? Win i karim ol i go nabaut pinis.”

Saveman i tok: “Em i hatwok long stretim hevi em tok bilong yu i bin kamapim, wankain olsem i hatwok long kisim bek ol gras bilong pisin.”

Skul yumi kisim i klia. Tok yumi autim pinis, yumi no inap kisim bek, na ating yumi no inap stretim bel hevi dispela i kamapim. Paslain long yumi mekim tok baksait, i gutpela long tingim olsem tok yumi mekim i kain olsem gras bilong pisin em win i karim i go nabaut.

[Piksa long pes 16]

Olsem wanem sampela i singautim ol apostet i kam insait long haus bilong ol?