“Ol Sip Bilong Kitim” i Save Raun Long Solwara
PLANTI pait i bin kamap long hap is bilong solwara Mediterenian. Piksaim long tingting wanpela pait olsem i bin kamap 500 yia paslain long Krais. Wanpela sip i no hatwok long stiaim na i gat 3-pela lain pul—long antap, namel, na daunbilo—na em i spit tru. I gat olsem 170 man i taitim bun tru long pul. Ol i sindaun antap long wanpela kain pilo em ol i taitim strong long ol.
Sip i ron spit tru—inap 13 i go 17 kilomita insait long wanpela aua tasol—em i katim biksi na i go stret long sip bilong ol birua. Sip bilong ol birua i laik ranawe tasol long dispela taim stret em i hatwok long tanim, na nau samting olsem kom i stap daunbilo long poret bilong narapela sip i bamim strong sait bilong dispela sip na brukim. Pairap bilong ol hap hap plang i bruk, na nois bilong wara i go insait long hul bilong sip, i pretim ol man bilong pul. Liklik lain paitman bilong sip i kalap i go long sip ol i bin bamim na pait wantaim ol. Tru tumas! Sampela sip bilong bipo i strongpela stret.
Ol sumatin bilong Baibel i laik save moa long ples ‘Kitim’ na ‘ol sip bilong Kitim’ em sampela tok profet i stori long en. (Daniel 11:30, NW; Namba 24:24; Aisaia 23:1) Tasol Kitim i stap we? Ol sip bilong en i luk olsem wanem? Na bilong wanem yumi laik save long bekim bilong ol dispela askim?
Josephus, wanpela saveman Juda, i stori long ailan Saiprus na em i kolim dispela nem “Chethimos” bilong makim Kitim. Taun Kition (o, Citium) i stap long hap saut-is bilong ailan Saiprus. Dispela taun i stap klostu long Kitim na Saiprus. Ailan Saiprus i stap long rot em ol man bilong bipo i save go i kam bilong baim na salim ol samting. Dispela ailan Saiprus i stap klostu long ol taun i stap long nambis long hap is bilong Mediterenian we ol sip i save karim kago i go long en. Saiprus i stap long hap we taim pait bilong politik na bilong graun i kirap namel long ol kantri, sampela taim em i strong long sapotim wanpela kantri, o em i stap olsem birua. Em i mas helpim wanpela kantri, o em i kamap olsem samting i pasim narapela kantri long pait bek.
Ol Man Bilong Saiprus na Solwara
Ol saveman bilong painim ol samting bilong bipo, ol i bin painim sampela samting insait long solwara na ol matmat, na tu, ol i painim sampela rait bilong bipo na ol sospen graun i gat ol piksa long en. Ol dispela samting ol i bin painim inap helpim yumi long piksaim long tingting ol sip bilong Saiprus i luk olsem wanem. Ol Saiprus bilong bipo, ol i hapman bilong wokim ol sip. Ailan bilong ol i gat ol bikpela bikbus na ol pasis bilong en i insait tru na i stap gut. Ol i katim ol diwai bilong wokim ol sip, na bilong kukim kopa—em samting ol i kisim long graun, na dispela samting i mekim Saiprus i gat nem long dispela taim bipo.
Ol Saiprus i save wok strong long salim ol kago bilong ol i go long ol narapela kantri. Olsem na ol Fonisia i luksave long dispela na sampela lain bilong ol i go sindaun klostu long ol dispela hap we ol i save salim na baim ol samting. Wanpela bilong ol dispela ples em Kition, long ailan Saiprus.—Aisaia 23:10-12.
Bihain long taim Tair i bagarap, em biktaun bilong ol Fonisia, sampela man bilong dispela ples i go sindaun long Kitim. Ol man Fonisia i sindaun long dispela hap, ol i hapman bilong solwara, olsem na i luk olsem ol i bin mekim bikpela wok long wokim ol nupela kain sip samting bilong nevi bilong Saiprus. Hap we Kition i stap long en em gutpela ples hait bilong ol sip bilong ol Fonisia.
Salim na Baim Ol Samting Long Ol Narapela Kantri
Long dispela taim bipo, i gat planti wok bisnis long hap is bilong Mediterenian. Sip i save karim planti ol gutpela samting bilong Saiprus i go long Krit, Sardinia, na Sisili na ol ailan bilong Ijien. Ol i bin painim ol dis na sospen graun samting bilong Saiprus long ol dispela hap. Ol i bin painim planti gutpela sospen graun bilong ol Maisini (ol Grik) long Saiprus. Ol i skelim ol kopa ol i bin painim long Sardina, na sampela saveman i ting ol dispela samting i kam long Saiprus.
Long 1982, ol i bin painim wanpela sip bilong yia 1390 B.C.E. samting, long nambis bilong sauten Teki. Ol man bilong painim ol samting bilong bipo, ol i digim graun aninit long solwara na painim kain kain gutpela samting—ol kopa em ol i ting i kam long Saiprus, ol ston emba, ol sospen graun bilong ol Kenan, ol samting ol i wokim long diwai eboni, ol tit bilong elefan, ol bilas gol na silva bilong ol Kenan, na sampela kain ston bilong ol Isip, na ol narapela samting bilong Isip. Ol i skelim ol sospen graun em ol i bin kisim long sip, na sampela i tok ating dispela sip i bilong ol Saiprus.
Ol i ting dispela sip i bin bagarap long seim yia em Balam i stori long ol sip bilong Saiprus long “tok profet” bilong em. (Namba 24:15, 24) Olsem na ol man bilong Midel Is i save long ol dispela sip bilong Saiprus. Ol dispela sip i luk olsem wanem?
Ol Sip Bilong Wok Bisnis
Ol i bin painim planti liklik sip na bot em ol i bin wokim long graun, long ples matmat long taun Amathus bilong bipo long Saiprus. Ol dispela samting i helpim yumi long save, ol sip bilong ol Saiprus i luk olsem wanem. Sampela i stap long ol haus tumbuna.
Ol dispela liklik sip ol i wokim long graun i soim olsem bipo ol i save yusim ol dispela sip bilong mekim wok bisnis tasol. Inap olsem 20 man i save pul long ol liklik sip. Ol i wokim ol bikpela sip em insait bilong en i go daun tru, em bilong karim ol kago na ol pasindia i go klostu tasol long ol nambis bilong Saiprus. Pliny Namba 1 i tok olsem ol Saiprus i bin wokim wanpela liklik sip em i no hevi na ol man i save pul long en, na em inap karim 90 ton kago.
Na i gat ol bikpela sip bilong wok bisnis, kain olsem dispela sip ol i bin painim long nambis bilong Teki. Sampela bilong ol inap karim 450 ton kago na raun long biksolwara. Ol bikpela sip tru i gat olsem 50 man bilong pul—25 long wanpela sait, na 25 long narapela sait—na longpela bilong en em inap olsem 30 mita na mas bilong sip em i longpela inap olsem 10 mita.
Tok Profet Bilong Baibel Long Ol Sip Bilong “Saiprus” Bilong Pait
Spirit bilong Jehova i as bilong dispela tok: “Ol Saiprus bai i kisim ol sip long kantri bilong ol na i kam pait long ol Asiria.” (Namba 24:2, 24) Olsem wanem? Dispela tok profet i bin kamap tru? Olsem wanem na ol sip bilong Saiprus i insait long truim bilong dispela tok profet? Ol dispela ‘sip bilong Saiprus’ i no ol sip bilong wok bisnis em ol i save raun long nambis bilong solwara Mediterenian, nogat. Em ol sip bilong pait ol i kam bilong pait.
Ol samting bilong mekim pait i bin senis, olsem na ol i senisim tu pasin bilong wokim ol sip. Ol i wokim ol strongpela sip em ol inap ron spit tru. Wanpela sip bilong pait bilong ol Saiprus i luk wankain olsem wanpela piksa ol i bin painim long Amathus. Piksa i soim olsem sip i longpela na nus long baksait i go antap na i tanim i kam insait liklik, wankain olsem sip bilong ol Fonisia bilong pait. Sip i gat kom bilong bamim ol sip bilong birua na i gat ol raunpela banis long tupela sait bilong sip klostu long stan na i go long poret bilong sip.
Long yia 700 B.C.E. samting, ol i wokim tupela namba wan sip (sip i gat tupela lain pul, antap na daunbilo) long Grik. Longpela bilong ol dispela sip inap olsem 24 mita na braitpela bilong en inap olsem 3 mita. Pastaim ol i save yusim ol dispela sip bilong karim ol man bilong pait, tasol ol i save mekim pait antap long graun. I no longtaim na ol i kisim save long nupela pasin bilong wokim sip i gat namba 3 lain pul, na daunbilo long poret bilong sip, ol i putim wanpela kom ol i karamapim long bras. Dispela nupela sip i kisim nem olsem 3-pela lain pul, em yumi bin stori pinis long en. Dispela sip i kisim nem long pait i bin kamap long Salamis (480 B.C.E.) taim ol Grik i winim nevi bilong Persia.
Bihain, Bikpela King Aleksander i strong long kisim planti hap graun olsem na em i bungim ol dispela kain sip bilong em long hap is. Ol i wokim ol dispela sip bilong pait. Ol i no wokim long raun i go longwe long biksolwara, long wanem, i no gat planti rum bilong karim kago. Olsem na ol i save sua long ol ailan bilong Ijien bilong kisim ol kaikai samting. Strongpela tingting bilong Aleksander em bilong bagarapim lain sip bilong Persia. Tasol pastaim em i mas daunim strongpela taun Tair bambai em i ken bagarapim lain sip bilong Persia. Saiprus em hap ol i save sua long en paslain long ol i go long Tair.
Long taim Bikpela King Aleksander i banisim Tair (332 B.C.E.), ol Saiprus i helpim em na givim em 120 sip. Tripela king bilong Saiprus i kisim lain sip bilong ol i go bilong helpim Aleksander. Olgeta wantaim i banisim Tair inap 7-pela mun. Tok profet bilong Baibel i kamap tru taim Tair i pundaun. (Esekiel 26:3, 4; Sekaraia 9:3, 4) Aleksander i givim bikpela namba long ol king bilong Saiprus bilong tok tenkyu long ol.
Truim Bilong Tok Profet
Strabo em wanpela saveman i stap long taim bilong ol aposel, em i stori olsem Aleksander i salim tok long ol sip bilong Saiprus na Fonisia long kam helpim em long i go kisim ol hap bilong ol Arebia. Ol dispela sip i no hevi tumas na i isi long ol i kamautim, olsem na insait long 7-pela de tasol, ol dispela sip i kamap long Thapsacus (Tipsa) long noten Siria. (1 King 4:24) Na long hap, i no hatwok long ol i go daun long Babilon.
Samting olsem wan tausen yia bihain, tok Baibel i mekim i kamap tru! Wankain olsem tok bilong Namba 24:24 i kamapim, ol sip bilong pait bilong Bikpela King Aleksander i lusim Masedonia na i go olsem long hap is na kisim graun bilong ol Asiria, na bihain em i daunim strongpela gavman Midia na Persia.
Maski Baibel i no mekim planti stori long ol ‘sip bilong Saipus,’ dispela stori i kolim stret ol samting i truim ol tok profet bilong Baibel. Kain ol stori bilong bipo i strongim tru bilip bilong yumi long ol tok profet i stap long Baibel. Planti tok profet olsem i makim samting bai painim yumi bihain. Olsem na yumi mas tingim tru ol dispela tok profet.
[Mep long pes 16, 17]
(Bilong save ol dispela rait i stap we long pes, lukim buk o magasin)
ITALI
Sardinia
Sisili
Solwara Ijien
GRIK
Krit
LIBIA
TEKI
SAIPRUS
Kition
Tair
ISIP
[Piksa long pes 16]
Piksa bilong wanpela sip bilong pait bilong ol Grik, sip i gat 3-pela lain pul
[Kredit Lain]
Pictorial Archive (Near Eastern History) Est.
[Piksa long pes 17]
Piksa bilong wanpela olpela sip bilong pait bilong ol Fonisia, sip i gat 2-pela lain pul
[Kredit Lain]
Pictorial Archive (Near Eastern History) Est.
[Piksa long pes 17]
Wanpela sospen graun i gat piksa bilong sip bilong ol Saiprus
[Kredit Lain]
Published by permission of the Director of Antiquities and the Cyprus Museum
[Piksa long pes 18]
Ol kago sip bilong bipo, wankain olsem ol sip em Aisaia 60:9 i stori long en