Stap Amamas Insait Long Marit Bilong Yu

“Man i gat gutpela tingting na save, em bai i gat gutpela haus, na famili bilong en bai i kamap strong.”​—SND. 24:3.

 1. Olsem wanem God i kamapim savetingting bilong em long ol samting em i mekim long namba wan man?

PAPA bilong yumi long heven em i gat bikpela save na em i save wanem samting i gutpela bilong helpim yumi. Olsem: God i luksave olsem, bilong kamapim samting Em i tingting pinis long mekim, “i no gutpela long dispela man i stap wanpis” long gaden Iden. Em i laik bai ol manmeri marit i mas kamapim planti pikinini na “i go sindaun long olgeta hap bilong graun.”​—Stt. 1:28; 2:18.

 2. Jehova i kamapim wanem samting bilong helpim ol manmeri?

² Jehova i tok: “Mi mas mekim kamap wanpela poroman bilong helpim em.” God i mekim man i slip i dai tru, na Em i kisim wanpela bun long banis bilong em. Long dispela bun em i wokim wanpela meri. Taim Jehova i bringim Iv, em meri i gutpela olgeta, long Adam, orait Adam i tok: “Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi. God i wokim em long bun bilong mi, olsem na bai mi kolim em ‘meri.’ ” Iv em i helpim tru bilong Adam. Tupela bai kamapim ol narapela narapela pasin, tasol tupela wantaim i gutpela olgeta na God i bin wokim ol i gat ol pasin olsem em yet. Olsem na Jehova i stretim rot bilong namba wan marit. I no hatwok long Adam na Iv long orait long pasin bilong i stap olsem marit, we narapela i ken helpim gut narapela.​—Stt. 1:27; 2:​21-​23.

 3. Planti long nau i gat wanem tingting long marit? Dispela i save kamapim wanem ol askim?

³ Sori tru, long nau pasin bikhet i pulap long dispela graun. God i no as bilong ol hevi dispela pasin i save kamapim. Marit em presen God i givim, tasol planti manmeri i tok bilas long marit na tok em samting bilong bipo na em samting i save kamapim kros na mekim bel i no stap isi. Na planti manmeri husat i marit, bihain ol i save katim marit. Ol papamama i no sori long ol pikinini, na taim tupela marit i kros pait, sampela taim ol i yusim ol pikinini bilong kisim samting ol yet i laikim. Planti papamama i no laik givim wei long narapela narapela, maski pasin bilong givim wei inap kamapim bel isi na pasin wanbel. (2 Ti. 3:3) Olsem wanem yu inap stap amamas insait long marit nau long dispela taim nogut? Olsem wanem pasin bilong givim wei inap helpim marit long i no ken bruk? Yumi ken kisim wanem skul long ol manmeri bilong nau husat i stap amamas insait long marit bilong ol?

Daun Tru Long Lo Bilong Jehova

 4. (a) Pol i givim wanem tok long marit? (b) Olsem wanem ol gutpela Kristen i save bihainim tok bilong Pol?

⁴ Kristen aposel Pol i givim tok long ol wido olsem sapos ol i laik marit gen, ol mas maritim man “i bilip long Bikpela.” (1 Ko. 7:39) Dispela tingting i no nupela long ol Kristen em pastaim ol i insait long lotu Juda. Lo God i givim long ol Israel i tokaut klia olsem ol i no ken “senisim meri wantaim ol” lain i no lotuim Jehova. Jehova i kamapim as na bikpela hevi inap painim ol sapos ol i no bihainim tok bilong em. Em i tok: “Ol [meri i no bilong lain Israel] bai i pulim ol pikinini bilong yupela i go longwe long Bikpela na bai ol i lotu long ol giaman god. . . . Bikpela bai i belhat long yupela na wantu bai em i bagarapim yupela.” (Lo 7:​3, 4) Jehova i laik bai ol wokboi bilong em long nau i mekim wanem taim ol i laik kisim poroman marit? Em i klia tru, wokboi bilong God i mas maritim wanpela man o meri husat “i bilip long Bikpela,” em wanpela wanbilip husat i dediket na baptais pinis. Em savetingting long daun, olsem givim wei, long tok bilong Jehova long dispela samting.

 5. Jehova na ol Kristen i marit i gat wanem tingting long tok promis bilong marit?

⁵ Tok promis bilong marit em i samting i holi long ai bilong God. Jisas, em Pikinini Bilong God, i tok long namba wan marit olsem: “Samting God i pasim pinis, em man i no ken katim.” (Mt. 19:6) Man bilong raitim song i kirapim yumi long tingim ol tok promis yumi mekim em i bikpela samting. Em i tok: “Olgeta presen yupela i tok pinis long givim long mi, God Antap Tru, em yupela i mas givim long mi.” (Sng. 50:14) Taim tupela i marit ol inap kisim bikpela amamas long bihain, tasol tok promis ol i mekim long de ol i marit em i bikpela samting na ol i gat wok long truim.​—Lo 23:21.

 6. Pasin bilong Jepta inap skulim yumi long wanem samting?

⁶ Tingim samting i bin painim Jepta, em man i stap jas long Israel 1,100 yia samting paslain long Krais. Em i mekim strongpela tok promis long Jehova, olsem: “Sapos yu helpim mi na mi winim ol Amon, orait taim mi kam bek long pait, namba wan samting i lusim haus bilong mi na i wokabaut i kam long rot, bai mi givim long yu olsem wanpela ofa bilong paia i kukim olgeta.” Taim em i lukim olsem pikinini meri bilong em i kam bungim em taim em i kambek long as ples Mispa, em dispela wanpela pikinini tasol bilong em, yu ting em i laik brukim tok promis bilong em? Nogat. Em i tok: “Mi mekim strongpela promis long Bikpela na i no inap mi brukim.” (Het. 11:​30, 31, 35) Jepta i truim promis em i bin mekim long Jehova, maski dispela i mekim na em i no gat tumbuna pikinini bilong holim nem bilong famili. Strongpela tok promis bilong Jepta i no wankain olsem tok promis bilong marit, tasol em i stap olsem gutpela piksa long ol man na meri marit long pasin bilong truim tok promis bilong ol.

Wanem Samting i Mekim na Marit i Stap Gut?

 7. I gat wanem ol senis ol nupela marit i mas mekim?

⁷ Planti marit i pilim amamas taim ol i tingim taim ol i bin pren yet paslain long ol i marit. Ol i bin amamas long kisim save long dispela man o meri em bai kamap poroman marit bilong ol! Taim ol i raun wantaim, narapela i save moa long narapela. Tasol maski ol i bin poroman wantaim paslain long marit o famili i bin makim olsem ol bai marit, taim ol i marit pinis i gat ol senis ol i mas mekim. Wanpela man marit i tok: “Nambawan bikpela hevi bilong mipela em mipela i mas luksave olsem mipela i no stap singel moa. Pastaim mipela i hatwok long skelim hamas taim mipela i mas lusim wantaim ol pren na wanblut bilong mipela.” Narapela man marit, em i marit inap 30 yia pinis, i bin luksave hariap olsem bilong skelim stret ol samting em i mas “tingim tupela man.” Paslain long em i tok yes long mekim wanpela samting, em i save toktok wantaim meri bilong em na tupela wantaim i tingim laik bilong narapela narapela na ol i wokim disisen. Long kain taim olsem em i gutpela long bihainim pasin bilong givim wei long narapela.​—Snd. 13:10.

8, 9. (a) Bilong wanem pasin bilong toktok gut wantaim em i bikpela samting? (b) Pasin bilong redi long senisim tingting inap helpim tupela marit long wanem kain taim? Bilong wanem dispela bai helpim ol?

⁸ Sampela taim tupela marit i bin go bikpela long ol narapela narapela ples i no wankain. Long kain marit olsem ol i mas toktok gut wantaim. Ating pasin bilong toktok i narapela narapela. Skelim pasin bilong poroman marit bilong yu taim em i toktok wantaim ol wanblut. Dispela inap helpim yu long kliagut long poroman bilong yu. Sampela taim i no tok man i mekim i kamapim tingting tru bilong em, nogat, em wei bilong em long kamapim dispela tok. Na yu inap kisim planti save long ol tok em i no mekim. (Snd. 16:24; Kl. 4:6) Bilong i stap amamas man i mas i gat pasin bilong skelim gut ol samting.​—Ritim Sindaun 24:3.

⁹ Planti i kisim save olsem taim ol i laik makim ol samting ol bai mekim bilong kisim amamas em i gutpela long redi long senisim tingting bilong ol. Paslain long marit ating poroman bilong yu i bin tromoi hap taim bilong pilai spot o mekim narapela samting bilong kisim amamas. Yu ting nau i stret long kamapim sampela senis long dispela? (1 Ti. 4:8) Ating i gat wankain askim i kamap long hap taim ol i tromoi bilong bung wantaim ol wanblut. Na i stret tupela marit i mas i gat taim bilong stadi long Baibel, mekim lotu, na mekim ol arapela samting wantaim.​—Mt. 6:33.

10. Olsem wanem pasin bilong givim wei bai helpim ol papamama na ol pikinini bilong ol em ol i marit pinis, long pas gut wantaim?

¹⁰ Taim man i marit, em i lusim papamama bilong em, na dispela i wankain long meri. (Ritim Stat 2:24.) Tasol tok bilong God long givim ona long papamama i no gat pinis bilong en. So maski tupela i marit, ol bai tromoi sampela hap taim long i stap wantaim ol papamama na ol tambu. Wanpela man marit, em marit inap 25 yia pinis, i tok: “Sampela taim em hatwok long skelim ol samting poroman marit, papamama, ol bratasusa na ol tambu ol i laik bai mi mekim. Bilong skelim stret samting mi bai mekim mi save tingim tok bilong Stat 2:24. I gat sampela samting yumi mas mekim long ol wanblut, tasol dispela ves i soim mi olsem mi mas tingim meri bilong mi pastaim.” Olsem na ol papamama Kristen husat i save bihainim pasin bilong givim wei long tingting na laik bilong narapela bai soim rispek long ol pikinini bilong ol husat i marit na ol i save olsem ol pikinini yet i insait long wanpela famili na em wok bilong man marit long stiaim dispela famili.

11, 12. Bilong wanem famili stadi na beten i bikpela samting long ol marit?

¹¹ Famili i mas i gat gutpela sediul bilong mekim famili stadi. Samting i painim planti famili Kristen i strongim dispela tok. Ating em i hatwok long kirapim kain stadi olsem na mekim dispela stadi long olgeta taim. Wanpela papa i tok: “Sapos mipela inap go bek long taim mipela nupela marit na senisim wanpela samting, samting mipela i laik senisim em mipela i laik bihainim gut wanpela gutpela sediul bilong mekim famili stadi.” Em i tok moa olsem: “Em i wanpela gutpela presen taim mi lukim amamas meri bilong mi i kamapim taim wanpela samting mipela i stadi long en i kirapim tru bel bilong em.”

¹² Pasin bilong beten wantaim em i narapela helpim. (Ro. 12:12) Taim tupela marit i wanbel long lotuim Jehova, pasin bilong ol long pas gut wantaim God i save strongim pasin bilong ol long pas gut insait long marit. (Jem. 4:8) Wanpela man marit Kristen i tok: “Tok sori kwiktaim taim yu popaia na kamapim ol dispela popaia taim yutupela i beten wantaim. Dispela i soim olsem yu sori tru long popaia i bin mekim poroman i bel hevi, maski dispela popaia em i liklik.”​—Ef. 6:18.

Givim Wei Insait Long Marit

13. Pol i givim wanem tok long ol marit long pasin bilong slip wantaim?

¹³ Taim ol Kristen marit i slip wantaim ol i mas abrusim ol pasin doti, em ol kain kain maritpasin ol manmeri bilong nau i save mekim. Pol i stori olsem long dispela samting: “Bodi bilong man i bilong meri bilong en, na man i no ken pasim. Olsem tasol, bodi bilong meri i bilong man bilong en, na meri tu i no ken pasim. Meri i no bos bilong bodi bilong em yet. Nogat. Man bilong en em i bos. Na olsem tasol, man i no bos bilong bodi bilong em yet. Nogat. Meri bilong en em i bos.” Nau Pol i tokaut klia: “Sapos yutupela i marit, orait wanpela i no ken givim baksait long arapela na pasim bodi bilong en. Tru, sapos yutupela i wanbel na i laik tambuim bodi long sotpela taim, bai yutupela i ken mekim wok bilong prea, orait dispela pasin em i orait. Tasol bihain yutupela i mas bungim bodi gen. Nogut yupela i no inap bosim laik bilong bodi bilong yupela yet, na Satan i traim yupela.” (1 Ko. 7:​3-5) Taim Pol i toktok long prea, dispela i soim ol Kristen wanem samting i mas i stap nambawan. Tasol tu, em i kamapim klia olsem ol Kristen marit i mas tingim laik bilong skin na bel bilong poroman marit bilong ol.

14. Wanem ol stiatok bilong Baibel inap helpim tupela marit long ol samting bilong maritpasin?

¹⁴ Man na meri marit i mas tok stret long poroman marit long ol samting bilong maritpasin na ol i mas luksave olsem sapos narapela i no tingim gut narapela dispela inap kamapim ol hevi. (Ritim Filipai 2:​3, 4; skelim Matyu 7:12.) Hevi i bin kamap insait long sampela marit we tupela i no wanlotu. Maski tupela i no wanbel, poroman marit husat i Kristen inap helpim sindaun bilong tupela taim em i bihainim gutpela pasin, pasin helpim, na pasin bilong wok gut wantaim. (Ritim 1 Pita 3:​1, 2.) Pasin bilong laikim Jehova na poroman marit, na pasin bilong givim wei, bai helpim marit long i stap gut long ol samting bilong maritpasin.

15. Olsem wanem pasin rispek i helpim marit long i stap amamas?

¹⁵ Long ol arapela samting tu, gutpela man marit bai soim rispek long meri bilong em. Olsem: Em bai tingim laik bilong em long ol liklik samting tu. Wanpela man, em i marit inap 47 yia, i tok: “Mi wok long skul yet long dispela samting.” Baibel i tokim ol meri marit Kristen long soim rispek tru long man bilong ol. (Ef. 5:​33, NW) Meri i no soim rispek sapos em i tok bilas o kamapim ol pasin kranki bilong man biong em long ai bilong ol arapela. Sindaun 14:1 i tok: “Meri i gat gutpela tingting, em i save mekim gutpela wok . . . na ol famili bilong en i wok long kamap strong. Tasol meri i no gat gutpela tingting, em yet i save bagarapim . . . famili bilong en.”

No Ken Givim Wei Long Satan

16. Olsem wanem ol marit inap bihainim tok bilong Efesus 4:​26, 27 insait long marit bilong ol?

¹⁶ “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun. Nogut yupela i opim dua long Satan.” (Ef. 4:​26, 27) Taim yumi bihainim dispela tok, dispela inap helpim yumi long stretim o abrusim hevi insait long marit. Wanpela sista i tok: “Taim mitupela i kros i no gat wanpela taim we mitupela i no toktok wantaim na stretim dispela kros, maski mipela i mas toktok inap planti aua.” Taim ol i marit nupela ol i bin pasim tok olsem ol i no ken slip long nait sapos kros i stap yet. “Mitupela i pasim tok olsem, maski em wanem kain hevi, narapela bai fogivim narapela na lusim tingting, na tumora em i nupela de, no gat hevi.” Olsem na ol i no “opim dua long Satan.”

17. Wanem samting inap helpim tupela marit em ol i pilim olsem ol i bin maritim rong man o meri?

¹⁷ Tasol olsem wanem sapos yu pilim olsem yu no bin tingting gut na yu maritim rong man o meri? Ating pasin laikim i no stap strong namel long yutupela olsem i stap namel long sampela marit. Maski i olsem, taim yu tingim laik bilong Jehova long marit dispela bai helpim yu. Holi spirit i kirapim Pol long tokim ol Kristen: “Yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.” (Hi. 13:4) Na tu, yumi mas tingim dispela tok: “Sapos ol i tanim tripela string na wokim baklain, orait dispela baklain i no inap bruk kwiktaim.” (Sav. 4:12) Taim man na meri marit i tingim tru olsem nem bilong Jehova i mas i stap holi, ol i pas gut tru wantaim poroman marit na God. Ol i mas wok strong long mekim marit bilong ol i stap gut. Ol i save dispela bai givim biknem long Jehova, em Man Bilong Kamapim marit.​—1 Pi. 3:11.

18. Long sait bilong marit yumi ken save tru long wanem samting?

¹⁸ Tru, ol Kristen inap stap amamas insait long marit. Bilong i stap olsem ol i mas wok hat na kamapim ol pasin Kristen, wanpela bilong ol em pasin bilong givim wei. Long nau, long ol kongrigesen bilong ol Witnes Bilong Jehova long olgeta hap, i gat planti manmeri marit i stap na ol i kamapim long ples klia olsem ol inap i stap amamas insait long marit.

Bai Yu Bekim Olsem Wanem?

• Bilong wanem yumi save tru olsem yumi inap i stap amamas insait long marit?

• Wanem samting inap helpim marit long i stap amamas?

• Ol man na meri marit i mas wok long kamapim wanem ol pasin?

[Piksa long pes 9]

Paslain long ol i pasim wanpela tok o tok orait long i go long wanpela bung samting, ol marit i save toktok gut wantaim

[Piksa long pes 10]

Wok strong long stretim kros long seim de dispela kros i kamap, no ken “opim dua long Satan”