Ol Tisa Kristen Bilong Bipo​​—⁠Yu Ting Ol i Kamapim Tru Tok Bilong Ol Aposel?

IRAP long yia 100 C.E. samting, ol bilip giaman i kirap long paulim tok i tru bilong lotu Kristen, i olsem graun malumalum i miks wantaim klinpela wara. Olsem Baibel i tok profet long en, taim ol aposel i dai pinis, sampela i lusim tok i tru na ol i putim yau long “ol kain kain stori nating.” (2 Timoti 4:​3, 4) Long 98 C.E. samting, Jon, em laspela aposel i stap laip, em i tok lukaut long ol dispela kain tok giaman na long ol man “i laik giamanim” ol Kristen husat i stap gut long God.​—⁠1 Jon 2:26; 4:​1, 6.

I no longtaim na ol man ol i kolim olsem Ol Tisa Kristen Bilong Bipo, ol i kamap. Ol i mekim wanem long ol dispela bilip giaman i bin kamap? Olsem wanem? Ol i putim yau long ol tok lukaut em holi spirit i bin kirapim aposel Jon long raitim?

Ol i Husat?

Dispela tok “Ol Tisa Kristen Bilong Bipo,” i makim ol man bilong raitim ol tok bilong lotu, ating ol i bin save long wanpela aposel bilong Jisas, o ol i bin kisim skul long sampela disaipel em ol aposel i bin skulim ol. Dispela lain i bin stap klostu long yia 100 C.E. i go inap long yia 150 samting.a Sampela em Klemen bilong Rom, Ignatius bilong Antiok, Papias bilong Hierapolis, na Polikap bilong Smerna. Insait long dispela haptaim i gat sampela man yumi no save long nem bilong ol, em ol i bin raitim ol buk bilong lotu, olsem The Didache, Epistle of Barnabas, Martyrdom of Polycarp, na namba tu pas bilong Klemen.

Long nau i hatwok long skelim olsem ol tok bilong ol dispela Tisa Kristen Bilong Bipo i klostu wankain olsem ol tok bilong Jisas o nogat. Ating ol dispela man i tingting long helpim wanpela kain lotu Kristen na bai lotu i no ken i dai. Ol i no orait long pasin bilong lotuim imis na pasin pamuk samting. Ol i skulim ol man olsem Jisas em i Pikinini Bilong God na em i bin kirap bek long indai. Tasol ol i no inap pasim ol tok bilong ol apostet long kamap bikpela. Na sampela i bin skruim sampela tok giaman bilong ol yet i go long en.

Yu Ting Em Ol Liklik Senis Tasol?

Sampela tok bilong ol dispela tisa “Kristen” i no bihainim stret tok bilong Krais na ol aposel, i olsem wara i tait na i kirap bihainim narapela rot. Olsem: Man bilong raitim buk The Didache i tok, long taim bilong mekim Kaikai Bilong Bikpela, em sampela man i kolim olsem Laspela Kaikai, ol i mas tilim wain paslain long ol i tilim bret, tasol dispela i narapela kain long pasin Jisas i bin kirapim. (Matyu 26:​26, 27) Na dispela man i tok, sapos i no gat wanpela bikpela wara bilong putim man i go insait tru long en na baptaisim em, orait ol i ken kapsaitim liklik wara long het bilong em. (Mak 1:​9, 10; Aposel 8:​36, 38) Na dispela buk i kirapim ol Kristen long tambu long kaikai tupela taim long olgeta wik na kolim dispela beten Papa Bilong Mipela tripela taim long olgeta de.​—⁠Matyu 6:​5-13; Luk 18:⁠12.

Ignatius i tok, i mas i gat nupela pasin bilong bosim kongrigesen Kristen, olsem wanpela bisop tasol i mas i stap wasman, olsem “senis bilong God.” Dispela bisop bai holim namba bilong bosim planti pris. Ol dispela nupela pasin i kamapim planti tok giaman na bilip giaman.​—⁠Matyu 23:​8, 9.

Bilasim Tok, Dai Bilong Holimpas Bilip, Lotuim Imis

Sampela bilong ol dispela Tisa Kristen ol i bin wok long bilasim tok i tru na paulim sampela tok. Papias i givim bel long painim tok i tru bilong Baibel, na oltaim em i kamapim ol tok bilong Ol Skripsa Grik. Tasol em i bilip olsem, long Taim Bilong Wan Tausen Yia Bilong Krais i Stap King, ol diwai wain bai kamapim 10,000 han diwai, na ol wan wan han bai i gat 10,000 liklik han, na ol wan wan liklik han bai putim 10,000 kru, na ol wan wan kru bai putim 10,000 rop i karim ol grep, na ol wan wan rop i gat 10,000 grep long en, na ol wan wan grep em inap olsem 1,000 lita wain.

Polikap i redi long dai olsem man bilong holimpas bilip; em i no laik lusim bilip Kristen bilong em. Ol rait i stori long em i tok sampela aposel na ol narapela i save long Jisas, ol i bin skulim em. Em i save kamapim ol tok bilong Baibel, na i luk olsem em i bin strong long bihainim ol stiatok Kristen.

Tasol sampela i bin givim bel tru long Polikap na klostu ol i adorim em olsem wanpela god. Buk Martyrdom of Polycarp i stori long dai bilong em na i tok, taim em i dai pinis, “ol bilipman” i strong long kisim ol bun bilong em. Ol i ting ol bun bilong em “i winim tru ol naispela ston i dia tumas, na i klin moa, winim gol.” Em nau, wara i gat marasin nogut long en, olsem ol tok giaman na bilip giaman bilong ol apostet, i wok long kamap planti moa.

Ol Tok i No Stap Long Baibel

Sampela Tisa Kristen i bin kisim ol tok i no hap bilong Baibel olsem ol tok em holi spirit yet i bin kamapim. Long ol rait bilong em, Klemen bilong Rom i kamapim tok bilong tupela buk (Wisdom na Judith), em ol i no hap bilong Baibel. Man bilong raitim buk (The Epistle of Polycarp) i kolim nem Tobit bilong strongim dispela bilip olsem, sapos man i givim mani bilong helpim ol rabisman, dispela bai i gat strong inap long kisim em bek long indai.

Inap 150 yia samting bihain long Krais, ol i kamapim sampela stori giaman long i stap na wok bilong Jisas, na ol Tisa Kristen i kisim olsem tok i tru na planti taim ol i kamapim long ol rait bilong ol. Ignatius i kamapim sampela tok bilong buk Gospel of the Hebrews. Na wanpela rait i tok long Klemen bilong Rom olsem: “I luk olsem Klemen i save long Krais, tasol i no long rot bilong ol Gutnius, nogat​—⁠em i kisim dispela save long ol rait i no hap bilong Baibel.”

Planti Bilip Giaman i Kamap

Taim ol i stori long ol bilip Kristen, ol dispela man i kamapim ol stori nating, na olkain tingting i kam long ol spirit nogut, na ol tok bilong ol saveman, na dispela i opim rot long planti bilip giaman i kamap, olsem traipela si i bruk i kam insait long ples. Olsem: Klemen i kamapim stori nating bilong wanpela kain pisin ol i kolim finiks, bilong strongim bilip bilong kirap bek long dai. Ol i bilip olsem dispela pisin i bin i dai na em i kirap bek. Na tu, long ol stori nating bilong ol Isip, dispela pisin i insait long pasin bilong lotuim san.

Man bilong raitim buk Epistle of Barnabas, em tu i laik daunim tok i tru bilong Baibel. Em i skulim ol man olsem Lo Bilong Moses i olsem tok piksa tasol. Em i tok, ol klinpela animal​—⁠kapa bilong hanlek i bruk tupela hap, na ol i save kaikai gras olsem bulmakau​—⁠ol i makim ol man husat i tingim tingim Tok Bilong God long bel, olsem man i wok long brukim gut kaikai long tit. Na em i tok, kapa bilong hanlek bilong animal i bruk tupela hap, em i makim olsem stretpela man i “stap long dispela graun” tasol em i tingting long kisim laip long heven long bihain. Tasol Baibel i no as bilong ol dispela kain tok.​—⁠Wok Pris 11:​1-3.

Tokaut Bilong Aposel Jon

Aposel Jon i bin tok lukaut olsem: “Ol pren, planti giaman profet i save raun nabaut long graun. Olsem na yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit, bai yupela i ken save, ol i kam long God, o nogat.” (1 Jon 4:⁠1) Tok bilong em i stret tru!

I kam inap long yia 100 samting, planti man em ol i tok ol i Kristen ol i lusim pinis ol tok bilong Jisas na bilong ol aposel. Ol dispela Tisa Kristen i no sakim tok bilong ol dispela lain i lusim bilip​—⁠i olsem ol i larim tait wara i karim ol i go. Ol i tanim tok i tru wantaim marasin nogut. Aposel Jon i tok long ol olsem: “Sapos wanpela man i no holim strong tok bilong Krais, na em i kalap i go long narapela tok, orait God i no i stap wantaim em.” (2 Jon 9) Long olgeta man i gat gutpela bel na i laik painim tok i tru bilong Baibel, dispela tok lukaut em spirit bilong God i as bilong en, em i klia tru​—⁠long bipo na long nau tu.

[Futnot]

[Rait long pes 29]

Long ol rait bilong ol, sampela Tisa Kristen, olsem Klemen na sampela moa, ol i bin kamapim ol stori nating, olkain tingting i kam long ol spirit nogut, na ol tok bilong ol saveman

[Piksa long pes 28]

Polikap i redi long dai olsem man bilong holimpas bilip

[Kredit Lain]

The Granger Collection, New York