Beten
5 Em i Bikpela Samting Long Wanem Hap na Wanem Taim?
ATING yu lukim olsem planti lotu i gat ol haus bilong beten we i gat kain kain bilas long en na ol i makim stret taim bilong de em ol man i mas beten. Tasol olsem wanem? Baibel i makim stret long wanem hap na wanem taim yumi mas beten?
Baibel i soim olsem i gat ol taim stret bilong beten. Olsem: Paslain long Jisas i kaikai wantaim ol disaipel bilong em, Jisas i beten na i tok tenkyu long God. (Luk 22:17) Na taim ol disaipel bilong em i bung bilong mekim lotu, ol i beten wantaim. Olsem na ol i bihainim wanpela pasin i bin stap bipo yet long ol haus lotu bilong ol Juda na long tempel long Jerusalem. God i laik bai tempel i stap olsem “haus bilong ol manmeri bilong olgeta kantri i ken i kam long en na beten.”—Mak 11:17.
Taim ol wokman bilong God i bung wantaim na beten, ol beten bilong ol i gat bikpela strong. Sapos ol manmeri i wanbel, na wanpela i makim maus bilong ol na i beten, na dispela beten i stret wantaim ol stiatok bilong Baibel, orait God i amamas long en. Dispela beten inap kirapim God long mekim ol samting em pastaim em i no gat tingting long mekim. (Hibru 13:18, 19) Olgeta taim ol Witnes Bilong Jehova i save mekim ol beten long ol miting bilong ol. Mipela i laik singautim yu i kam long Haus Kingdom i stap klostu long hap bilong yu na harim kain beten olsem.
Tasol Baibel i no makim stret taim na ples yumi mas beten. Long Baibel yumi lukim olsem ol wokman bilong God i save beten long kain kain taim na ples. Jisas i tok: “Taim yu laik mekim prea, yu mas i go insait long rum bilong yu na pasim dua na beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim pe long yu.”—Matyu 6:6.
Dispela singaut i mekim gut bel bilong yumi, a? Yu ken toktok wantaim King bilong heven na graun long kain kain taim, olsem long taim yu wanpela i stap, na yu ken save tru olsem em bai harim beten bilong yu! Olsem na planti taim Jisas i save painim rot bambai em wanpela tasol i ken stap na beten! Wanpela taim, long nait olgeta em i beten long God na em i askim God long stiaim em long mekim wanpela bikpela disisen.—Luk 6:12, 13.
Sampela narapela man na meri em Baibel i stori long ol, ol i bin beten taim ol i mas mekim ol bikpela disisen o taim ol i gat hevi. Sampela taim ol i kolim strong beten na sampela taim ol i beten long tingting tasol; ol i beten taim ol i bung wantaim ol narapela na taim ol yet tasol i stap. Bikpela samting em ol i beten. God i singautim ol wokman bilong em olsem: “Yupela i mas beten oltaim.” (1 Tesalonaika 5:17) Long olgeta taim em i amamas long harim beten bilong ol manmeri i bihainim laik bilong em. Em i wanpela gutpela samting tru, a?
Nau long dispela taim we ol man i no bilip tumas, planti man i ting beten i no save helpim tumas ol man. Ating yu inap askim olsem, ‘Tru beten inap helpim mi?’
[Rait long pes 9]
Yumi inap beten long kain kain taim na ples