Go Klostu Long God
“Em i Daunim Em Yet Long Ai Bilong God”
“MI PILIM olsem mi samting nating.” Em tok bilong wanpela man husat i no bihainim moa ol lo bilong God em i bin lainim taim em i pikinini. Taim em i kirap mekim ol senis long i stap bilong em, em i pret olsem God bai i no inap lusim rong bilong em. Tasol stori bilong Manase i stap long 2 Stori 33:1-17 i mekim gut bel bilong dispela sinman husat i tanim bel. Sapos yu tu i save pilim olsem yu no gutpela inap long lotuim Jehova, long wanem, yu bin mekim ol rong long bipo, stori bilong Manase inap mekim gut bel bilong yu tu.
Manase i kamap bikpela insait long wanpela famili i save lotuim God. Papa bilong em Hesekia, em i wanpela bilong ol gutpela king bilong Juda. Hesekia i bin kamapim Manase inap 3-pela yia bihain long Jehova i bin wokim mirakel na skruim laip bilong Hesekia. (2 King 20:1-11) Olsem na ating Hesekia i tingim dispela pikinini bilong em olsem presen i kam long pasin marimari bilong Jehova, na em i traim long putim long bel bilong Manase pasin bilong laikim lotu i tru. Tasol i no long olgeta taim ol pikinini bilong ol papamama i save aninit long God, ol i save bihainim gutpela pasin bilong papamama bilong ol, nogat. Manase em kain pikinini olsem.
Taim Manase i gat 12-pela krismas samting, papa bilong em i dai. Sori tru, Manase i wok long “mekim pasin nogut tru long ai bilong Bikpela.” (Ves 1, 2) Olsem wanem? Ol hetman husat i no save tingim lotu i tru, ol i stiaim tingting bilong dispela yangpela king? Baibel i no stori long dispela. Tasol Baibel i tokim yumi olsem Manase i kirap lotuim ol god giaman na mekim nogut long ol man. Em i wokim ol ples lotu bilong ol giaman god, givim ol pikinini bilong em olsem ofa, wokim posin na marila samting, na putim wanpela imis bilong god giaman insait long tempel bilong Jehova long Jerusalem. Bikhetman Manase i sakim ol tok lukaut i kam long Jehova, em God husat i wokim mirakel na dispela i opim rot long mama i karim Manase.—Ves 3-10.
Bihain, Jehova i larim ol birua i pasim hanlek bilong Manase long sen na kisim em i go kalabus long Babilon. Taim Manase i stap kalabus, em i gat rot long tingim gen ol pasin em i save bihainim. Olsem wanem? Nau em i luksave olsem ol dispela god bilong em i no gat laip na strong bilong lukautim em? Em i tingim bek ol samting em papa bilong em husat i save aninit long God i bin skulim em long en? Maski wanem samting i bin kamap, Manase i bin senisim pasin bilong em. Baibel i tok: “Em i pilim hevi nogut tru na em i daunim em yet long ai bilong God . . . na i askim God long helpim em.” (Ves 12, 13) Tasol yu ting God inap lusim sin bilong kain man olsem husat i bin mekim bikpela sin tru?
Jehova i pilim tru pasin bilong Manase long tanim bel tru. Manase i beten askim God long marimari long em na God i harim beten bilong em “na larim em i go bek long Jerusalem na bosim kantri gen.” (Ves 13) Bilong kamapim klia olsem em i tanim bel pinis, Manase i kirap stretim bek ol rong em i bin mekim, rausim ol alta bilong ol giaman god i stap long kantri bilong em, na kirapim ol lain manmeri long “lotu long God.”—Ves 15-17.
Sapos yu bin mekim ol rong long bipo na yu pilim olsem yu no gutpela inap long God bai fogivim yu, orait larim stori bilong Manase i mekim gut bel bilong yu. Dispela stori i stap olsem hap bilong Tok Bilong God em holi spirit i bin kirapim ol man long raitim. (Rom 15:4) Tru tumas, Jehova i laik yumi mas save olsem em i redi long “rausim sin” bilong yumi. (Song 86:5) Jehova i save tingim tru tingting i stap long bel bilong ol sinman. Olsem Manase i bin mekim, sapos wanpela sinman i pilim tru rong bilong em na beten, lusim ol pasin nogut bilong em, na wok strong long bihainim stretpela pasin, dispela inap mekim na Jehova i marimari long em.—Aisaia 1:18; 55:6, 7.
Baibel Ritim Bilong Janueri: