Tanim Bel Tru i Makim Wanem Samting?

1-2. (a) Olsem wanem tupela king i no wankain? (b) Bai yumi skelim wanem ol askim?

YUMI ken stori long tupela king em ol i bin stap long bipo. Wanpela i bosim tenpela traib bilong Israel na narapela i bosim tupela traib bilong Juda. Maski ol i stap long narapela narapela haptaim, planti samting i wankain long tupela. Tupela king wantaim i bikhet long Jehova na kirapim ol manmeri bilong Em long bihainim ol. Tupela wantaim i gat asua long lotuim ol giaman god na kilim i dai ol narapela man. Maski i olsem, i gat wanpela samting i no wankain long dispela tupela man. Wanpela i mekim ol pasin nogut i go inap long em i dai, tasol narapela i tanim bel na God i fogivim em long ol pasin nogut tru em i bin mekim. Husat dispela tupela man?

² Nem bilong tupela em, Ahap, king bilong Israel, na Manase, king bilong Juda. Samting i no wankain long dispela tupela man inap skulim yumi long wanpela bikpela samting—pasin bilong tanim bel. (Apo. 17:30; Rom 3:23) Pasin bilong tanim bel i makim wanem samting, na olsem wanem yumi ken soim olsem yumi tanim bel tru? Yumi laik save long dispela bikos yumi laik Jehova i fogivim yumi taim yumi mekim sin. Bilong kisim bekim bilong ol dispela askim, yumi bai skelim ol samting dispela tupela king i bin mekim na lukim skul yumi inap kisim long ol samting ol i bin mekim. Na bai yumi stori long ol tok Jisas i bin skulim ol man long en long pasin bilong tanim bel.

 3. Ahap em i wanem kain king?

³ Ahap em i namba 7 king bilong tenpela traib bilong Israel. Em i maritim Jesebel, pikinini meri bilong king bilong Saidon, em wanpela kantri i gat planti mani kago na i stap long hap not. Dispela marit i opim rot long wok bisnis, olsem na kantri Israel i gat planti mani samting. Tasol em i bagarap pasin bilong lain Israel long pas gut wantaim Jehova. Jesebel i save lotuim god Bal, na em i kirapim Ahap long strongim dispela lotu giaman. Long dispela lotu giaman, ol i save mekim pasin pamuk insait long tempel na kukim ol pikinini olsem ofa. Taim Jesebel i stap kwin, em i wok long kilim i dai ol profet bilong Jehova. Em i kilim i dai planti profet pinis. (1 Kin. 18:13) Ahap “i mekim ol pasin nogut long ai bilong Jehova na ol pasin em i mekim i nogut moa winim ol king i stap paslain long em.” (1 Kin. 16:30) Jehova i no aipas, em i lukim olgeta samting Ahap na Jesebel i mekim. Tasol Jehova i mekim pasin marimari na salim profet Elaija i go givim tok lukaut long ol manmeri bilong Em olsem ol i mas senisim ol pasin bilong ol paslain long em i kamapim bagarap. Tasol Ahap na Jesebel i no laik harim tok.

 4. God i tok em bai mekim wanem long Ahap? Na Ahap i mekim wanem?

⁴ Bihain pasin marimari bilong Jehova i kamap long pinis bilong en. Em i salim Elaija i go tokaut long strafe em bai givim long Ahap na Jesebel. God i tok long pinisim olgeta lain famili bilong tupela. Ahap i pilim tru tok bilong Elaija! Em narapela kain olsem, dispela man i gat pasin antap “i daunim em yet.”​—1 Kin. 21:19-29.

5-6. Wanem samting i soim olsem Ahap i no tanim bel tru?

⁵ Maski Ahap i daunim em yet long dispela taim, ol pasin em i mekim bihain i soim olsem em i no tanim bel tru. Em i no mekim samting bilong rausim pasin bilong lotuim Bal long kingdom bilong em. Na em i no kirapim ol manmeri long lotuim Jehova. Ol narapela samting Ahap i mekim tu i soim olsem em i no tanim bel tru.

⁶ Bihain taim Ahap i singautim gutpela King Jehosafat bilong Juda long joinim em long pait long ol Siria, Jehosafat i tok i gutpela ol i askim wanpela profet bilong Jehova long dispela samting paslain long ol i go pait. Pastaim, Ahap i sakim dispela tingting na em i tok: “I gat wanpela man moa i stap em yumi ken kisim tingting bilong Jehova long em; tasol mi save heitim em, bikos em i no save mekim wanpela gutpela tok profet long mi. Em i save mekim tok long ol samting nogut tasol i mas kamap long mi.” Maski i olsem, ol i kisim tingting bilong profet Mikaia. Olsem Ahap i bin tok long en, dispela profet bilong Jehova i tokaut long samting nogut bai painim Ahap! Dispela king nogut Ahap i no laik daunim em yet na askim Jehova long fogivim em, nogat, em i tok na ol i putim dispela profet long kalabus. (1 Kin. 22:7-9, 23, 27) Maski king i tok na ol i kalabusim profet bilong Jehova, em i no inap stopim dispela tok profet long kamap tru. Long pait i kamap bihain long dispela, ol i kilim i dai Ahap.​—1 Kin. 22:34-38.

 7. Jehova i tok wanem long Ahap bihain long em i dai?

⁷ Bihain long Ahap i dai, Jehova i tokaut long tingting em i gat long dispela man. Taim gutpela King Jehosafat i no kisim bagarap long pait na em i kam bek long ples bilong em, Jehova i salim profet Jehu i go bilong stretim em long em i bin go helpim Ahap long pait. Profet bilong Jehova i tok: “Yu ting em i stret long helpim ol man nogut na laikim ol man i heitim Jehova, a?” (2 Sto. 19:1, 2) Tingim dispela: Sapos Ahap i bin tanim bel tru, orait dispela profet i no inap tok em i man nogut na em i save heitim Jehova. Maski Ahap i soim olsem em i bel hevi tru long rong bilong em, em i no tanim bel tru.

 8. Yumi inap kisim wanem skul long stori bilong Ahap long pasin bilong tanim bel tru?

⁸ Yumi inap kisim wanem skul long stori bilong Ahap? Taim em i harim Elaija i tok hevi bai painim lain famili bilong em, long dispela taim Ahap i daunim em yet. Dispela em gutpela pasin. Tasol ol pasin em i mekim bihain i soim olsem long bel em i no tanim bel tru. Pasin bilong tanim bel tru i makim olsem yumi sori long rong bilong yumi, na tu, yumi mas mekim sampela samting moa. Yumi ken skelim narapela stori we inap helpim yumi long kliagut long pasin bilong tanim bel tru i makim wanem samting.

 9. Manase em i wanem kain king?

⁹ Inap 200 yia bihain, Manase i kamap king bilong Juda. Ol pasin bilong em i nogut moa winim Ahap! Baibel i tok: “Em i mekim ol pasin nogut tru long ai bilong Jehova na mekim em i kros.” (2 Sto. 33:1-9) Manase i wokim ol alta bilong ol god giaman, na tu, em i wokim imis bilong pos bilong lotu—ating em piksa bilong wanpela god meri—insait long tempel bilong Jehova! Em i insait long wok mejik, kisim save long ol samting bai kamap bihain, na wok posin. Na em “i kapsaitim planti blut bilong ol man i no gat asua.” Em i kilim i dai ol narapela man, na tu, “em i kukim ol pikinini man bilong em long paia,” olsem sakrifais i go long ol god giaman.​—2 Kin. 21:6, 7, 10, 11, 16.

10. Jehova i mekim wanem bilong stretim Manase, na King Manase i mekim wanem?

¹⁰ Olsem Ahap, Manase i bikhet na em i sakim ol tok lukaut Jehova i givim em long rot bilong ol profet bilong Em. I no longtaim, “Jehova i salim ol kepten bilong ami bilong king bilong Asiria i kam pait long [Juda] na ol i holimpas Manase na putim huk long em na pasim em long tupela kopa sen na kisim em i go long Babilon.” Long dispela hap, taim Manase i stap kalabus long kantri bilong ol narapela lain, em i wokim gut tingting. Em i “wok strong long daunim tru em yet long ai bilong God bilong ol tumbuna papa bilong em.” Na em i mekim sampela samting moa. “Em i askim Jehova, God bilong em, long orait long em.” Na Manase “i wok yet long beten long God.” Dispela man nogut i wok long senisim ol pasin bilong em. Em i kirap long luksave long Jehova olsem “God bilong em,” na em i beten oltaim long em.​—2 Sto. 33:10-13.

11. Olsem 2 Stori 33:15, 16 i kamapim, olsem wanem Manase i soim olsem em i tanim bel tru?

¹¹ Bihain Jehova i bekim ol beten bilong Manase. Em i lukim olsem long bel, Manase i mekim ol senis, na dispela i kamap ples klia long ol beten bilong em. Jehova i putim yau long singaut bilong Manase na larim em i kirap gen long mekim wok king. Taim rot i op, Manase i mekim olgeta samting bilong soim olsem em i tanim bel tru. Em i mekim samting em Ahap i no bin mekim. Em i senisim ol pasin bilong em. Em i rausim lotu giaman na strongim lotu i tru. (Ritim 2 Stori 33:15, 16.) Dispela i makim olsem em i mas i gat strongpela bel na bilip, long wanem, inap planti yia Manase i stap piksa nogut long famili bilong em yet, ol bikman insait long wok king bilong em, na ol manmeri bilong em. Tasol nau long ol laspela yia bilong em long stap king, Manase i wok strong long rausim sampela bilong ol pasin nogut em i bin mekim. So i luk olsem em i stap gutpela eksampel long tumbuna pikinini man bilong em Josaia, husat i kamap gutpela king long bihain.​—2 Kin. 22:1, 2.

12. Yumi inap kisim wanem skul long stori bilong Manase long pasin bilong tanim bel tru?

¹² Yumi inap kisim wanem skul long stori bilong Manase? Em i daunim em yet, na em i mekim sampela samting moa. Em i beten na askim God long marimari long em. Na em i senisim ol pasin bilong em. Em i wok strong long rausim ol samting nogut em i bin kamapim, na em i wok strong long lotuim Jehova na helpim ol narapela long mekim wankain samting. Stori bilong Manase i stap olsem gutpela eksampel long ol man em ol i bin mekim ol bikpela sin tru. Dispela i kamapim klia olsem Jehova God em i “gutpela tru na [em] save redi long fogivim ol sin” bilong yumi. (Sng. 86:5) God inap fogivim ol man em ol i tanim bel tru.

13. Stori long wanpela tok piksa long pasin bilong tanim bel tru.

¹³ Manase i sori long ol sin bilong em na em i mekim sampela samting moa. Dispela i skulim yumi long wanpela bikpela samting long pasin bilong tanim bel. Tingim dispela tok piksa: Yu go long stua na askim long keik. Tasol meri long stua i no givim yu wanpela keik, em i givim yu wanpela kiau. Bai yu amamas long dispela? Nogat! Olsem wanem sapos meri long stua i tok kiau em namba wan samting yu bai yusim long wokim keik? Yu bai no laik kisim bikos yu laikim keik! Olsem tasol, Jehova i askim sinman long tanim bel. Sapos sinman i sori tru long sin bilong em, dispela em i gutpela. Dispela em namba wan samting long pasin bilong tanim bel, tasol em i no makim olsem man i tanim bel tru. Em i mas mekim wanem samting moa? Yumi ken kisim planti skul long wanpela gutpela tok piksa em Jisas i bin mekim.

14. Long tok piksa bilong Jisas, wanem fes samting pikinini i bin lusim papa i mekim bilong soim olsem em i tanim bel?

¹⁴ Jisas i stori long wanpela pikinini i lusim papa, dispela stori i stap long Luk 15:11-32. Wanpela pikinini man i bikhet long papa bilong em, em i lusim haus, na go long “wanpela longwe ples.” Na em i insait long kain kain hambak pasin. Tasol taim bikpela hevi tru i painim em, em i wokim gut tingting. Em i tingim bek olsem em i bin stap gut taim em i stap long haus bilong papa bilong em. Olsem Jisas i tok, dispela yangpela man i “kisim stretpela tingting.” Em i wokim tingting long go bek long haus na askim papa long fogivim em. Long dispela taim we pikinini i luksave olsem em i bin mekim ol bikpela rong, dispela em bikpela samting. Tasol yu ting dispela em inap? Nogat. Em i mas senisim ol pasin bilong em!

15. Long tok piksa bilong Jisas, pikinini i lusim papa i mekim wanem bilong soim olsem em i tanim bel tru?

¹⁵ Pikinini i lusim papa i soim olsem em i tanim bel tru long pasin em i bin mekim. Em i wokabaut long longpela rot i kam bek long haus. Na taim em i kam bungim papa bilong em, em i tok: “Mi mekim sin long God na long yu. Mi no gutpela moa inap long yu kolim mi pikinini bilong yu.” (Luk 15:21) Dispela yangpela man i pilim tru long bel taim em i autim ol rong bilong em, na dispela i kamapim klia olsem em i laik stretim bek pasin pren bilong em wantaim Jehova. Na tu, em i luksave olsem ol pasin em i bin mekim i bagarapim tru bel bilong papa bilong em. Olsem na em i redi long wok hat na bai papa i ken laikim em gen, na em i askim tu long stap olsem wanpela wokboi nating bilong papa bilong em! (Luk 15:19) Dispela tok piksa em i no wanpela gutpela stori nating, nogat. Ol stiatok i stap long dispela stori i ken skulim ol elda bilong kongrigesen taim ol i laik skelim sapos wanpela wanbilip husat i bin mekim wanpela bikpela rong i tanim bel tru o nogat.

16. Wai na i hatwok long ol elda long skelim sapos wanpela i tanim bel tru o nogat?

¹⁶ Em hatwok long ol elda long skelim sapos wanpela i bin mekim wanpela bikpela rong i tanim bel tru o nogat. Bilong wanem? Long wanem, ol elda i no inap lukim bel bilong man, so ol i mas lukluk long ol samting dispela brata i mekim bilong soim olsem em i heitim tru ol pasin nogut em i bin mekim na em i tanim bel tru o nogat. Sampela taim, wanpela i mekim bikpela sin inap planti taim, so taim ol elda i sindaun wantaim em ol i no inap save sapos em i tanim bel tru o nogat.

17. (a) Wanem eksampel i soim olsem pasin bilong tok sori tasol i no makim olsem man i tanim bel tru? (b) Olsem 2 Korin 7:11 i kamapim, man i tanim bel tru i mas mekim wanem?

¹⁷ Tingim wanpela eksampel. Wanpela brata i mekim pasin adaltri inap planti yia. Em i no askim long kisim helpim, nogat. Em i haitim dispela pasin nogut bilong em long meri bilong em, ol pren bilong em, na ol elda. Bihain ol elda i kisim save long dispela samting. Taim ol elda i tokim em long rong bilong em, em i tokaut olsem tru tru em i bin mekim pasin adaltri na em i sori long rong bilong em. Tasol yu ting dispela i makim olsem em i tanim bel tru? Nogat. Tru em i sori long rong bilong em, tasol ol elda i mas lukim sampela moa evidens. Dispela em i no sin em i mekim wanpela taim tasol, nogat, em i mekim olsem inap planti yia. Dispela brata i mekim sin, em yet i no tokaut long sin bilong em; ol narapela i painimaut na tokim ol elda. So ol elda i mas lukim ol samting i pruvim olsem dispela brata i senisim tru tingting bilong em, bel bilong em, na pasin bilong em. (Ritim 2 Korin 7:11.) Ating sampela haptaim i mas lus long em i ken mekim ol senis em i gat wok long mekim. So i luk olsem, ol i mas rausim em long kongrigesen Kristen inap sampela haptaim.​—1 Kor. 5:11-13; 6:9, 10.

18. Rausman i mas mekim wanem bilong soim olsem em i tanim bel tru, na wanem samting inap kamap?

¹⁸ Bilong rausman i ken soim olsem em i tanim bel tru, em i mas kam oltaim long ol miting na bihainim tok bilong ol elda long bihainim gutpela sediul bilong beten na stadi long Baibel. Na tu, em i mas wok strong long abrusim ol samting we i bin pulim em long mekim sin. Sapos em i wok strong long stretim bek pasin pren bilong em wantaim Jehova, em i ken bilip tru olsem Jehova bai fogivim em na ol elda bai helpim em long kam bek insait long kongrigesen. Taim ol elda i laik painimaut sapos wanpela i tanim bel tru o nogat, ol i save olsem olgeta wan wan keis i no wankain so ol i save skelim gut olgeta wan wan keis na ol i no save skelim man long hatpela pasin.

19. Pasin bilong tanim bel tru i makim wanem samting? (Esekiel 33:14-16)

¹⁹ Olsem yumi bin lainim, man i mekim bikpela sin em i no ken sori tasol long sin em i bin mekim, nogat, em i mas mekim sampela samting moa. Em i mas senisim tru bel na tingting bilong em na mekim ol samting bilong soim olsem em i tanim bel tru. Dispela i makim olsem em i mas tanim na lusim rot nogut em i bihainim na wokabaut gen long rot Jehova i makim. (Ritim Esekiel 33:14-16.) Nambawan samting man i mekim sin i mas tingim em long stretim bek pasin pren bilong em wantaim Jehova.

20-21. Olsem wanem yumi ken helpim wanpela husat i bin mekim bikpela sin?

²⁰ Long wok autim tok bilong Jisas, em i kamapim klia wanpela bikpela samting taim em i tok: “Mi kam bilong singautim ol sinman long tanim bel.” (Luk 5:32) Yumi tu i mas holim wankain tingting. Sapos yumi save long wanpela gutpela pren bilong yumi i mekim wanpela bikpela sin. Bai yumi mekim wanem?

²¹ Sapos yumi traim long haitim sin bilong pren bilong yumi, dispela inap bagarapim em. Kain pasin olsem i no save kamapim gutpela samting bikos Jehova i lukluk i stap. (Prov. 5:21, 22; 28:13) Yu ken helpim pren bilong yu long tingim olsem ol elda i laik helpim em. Sapos pren bilong yu i no laik tokaut long rong bilong em long ol elda, orait yu mas go na tokim ol elda long dispela samting. Taim yu mekim olsem, yu soim olsem yu laik tru long helpim em. Sapos em i no tokaut long sin bilong em, dispela inap bagarapim pasin pren bilong em wantaim Jehova!

22. Bai yumi skelim wanem samting long neks atikol?

²² Olsem wanem sapos wanpela i bin mekim sin inap longpela taim na ol elda i mekim disisen olsem em i mas raus long kongrigesen? Yu ting dispela i makim olsem ol i no mekim pasin marimari long em? Long neks atikol, yumi bai stori long pasin bilong Jehova long marimari taim em i stretim ol sinman na hau yumi ken bihainim pasin bilong em.