Trenim Ol Arapela Long Mekim Sampela Wok
“Sumatin i kisim skul i nambawan olgeta, em bai kamap wankain olsem tisa bilong en.”—LUK 6:40.
1. Long taim Jisas i mekim wok autim tok hia long graun, em i mekim wanem bilong trenim sampela man na bihain ol i kamap planti tausen?
LONG pinis bilong gutnius aposel Jon i raitim, em i tok: “Tru tumas, i gat planti arapela samting Jisas i bin mekim, na sapos ol i raitim stori bilong olgeta dispela samting, mi ting graun yet bai i no inap holim ol skrol ol i raitim.” (Jon 21:25) Insait long sotpela haptaim Jisas i stap long graun, em i wok strong long mekim wok autim tok. Long dispela taim, em i mas painim ol man we em i mas trenim long mekim wok bilong em bihain long em i go bek long heven. Long yia 33 C.E., Jisas i trenim sampela man tasol bilong autim tok, na kwiktaim em i bihain ol i kamap planti tausen.—Apo. 2:41, 42; 4:4; 6:7.
2, 3. (a) Bilong wanem i gat nid long ol brata i mas mekim wok insait long ol kongrigesen? (b) Bai yumi skelim wanem samting long dispela stadi?
2 Long nau, i gat winim 7 milion manmeri bilong autim gutnius em ol i stap long winim 100,000 kongrigesen long olgeta hap bilong graun. Olsem na i gat nid long ol brata i mas go pas bilong mekim wok insait long ol dispela kongrigesen. Olsem: Yumi sot tru long ol elda. Ol brata husat i wok long winim ol mak bilong mekim sampela wok moa insait long kongrigesen, ol i laikim “gutpela wok.”—1 Tim. 3:1.
3 I gat ol samting ol brata i mas mekim paslain long ol i inapim mak bilong lukautim sampela wok insait long kongrigesen. Ediukesen, na save bilong mekim sampela wok skin, i no inap redim man long mekim dispela kain wok, nogat. I stap na wokabaut bilong em i mas stret wantaim ol mak em Baibel i kolim bilong ol brata i holim wok insait long kongrigesen. Olsem wanem yumi inap helpim ol brata long kamap strong long tok i tru na inapim ol mak bilong mekim wok insait long kongrigesen? Jisas i tok: “Sumatin i kisim skul i nambawan olgeta, em bai kamap wankain olsem tisa bilong en.” (Luk 6:40) Long dispela stadi, bai yumi stori long sampela rot Jisas i bin trenim ol disaipel bilong em na yumi ken kisim wanem skul long dispela trening.
“Mi Kolim Yupela Pren”
4. Olsem wanem Jisas i stap olsem gutpela pren bilong ol disaipel bilong em?
4 Jisas i tingim ol disaipel bilong em olsem ol pren bilong em, na em i no ting em i winim ol. Em i stap wantaim ol na i trastim ol na em i tokim ol long ‘olgeta samting em i bin harim long Papa bilong em.’ (Ritim Jon 15:15.) Tingim amamas ol disaipel i pilim taim em i bekim askim bilong ol: “Wanem sain bai kamap bilong soim olsem yu kam i stap na pinis bilong dispela taim i kamap pinis?” (Mat. 24:3, 4) Na tu, em i laik bai ol i save long tingting na ol samting em i pilim long bel. Olsem: Long nait paslain long ol i bin arestim Jisas, em i kisim Pita, Jems, na Jon i go long gaden bilong Getsemani. Long dispela taim, bel bilong em i hevi tru, na em i mas beten. Ating 3-pela aposel bilong em i no harim ol tok em i bin kolim long beten, tasol ol i luksave olsem em i bel hevi stret. (Mak 14:33-38) Na long narapela taim, em i strongim ol taim “em i senis na kamap narakain” long ai bilong ol. (Mak 9:2-8; 2 Pita 1:16-18) Pasin bilong Jisas long pas gut wantaim ol disaipel i strongim ol long mekim yet dispela bikpela wok ol i mas mekim.
5. Olsem wanem ol elda i save helpim ol arapela?
5 Olsem Jisas, ol elda long nau i helpim ol brata na sista na ol i laik i stap olsem pren bilong ol. Ol i laikim ol na soim olsem ol i tingim tru ol. Sampela taim, i gat sampela samting em ol elda i no inap toktok long en wantaim ol bratasista. Tasol ol i save toktok wantaim ol long ol samting em ol yet i bin lainim long Tok Bilong God. Ol elda i trastim ol brata. Ol i no ting olsem ol i winim ol kongrigesen sevan husat i yangpela long ol. Ol elda i save olsem ol yangpela kongrigesen sevan tu i bin kamap strong long tok i tru na ol i wok yet long mekim olsem. Ol i save olsem ol dispela yangpela brata i laikim Jehova na ol i wok wantaim ol long lukautim ol bratasista.
“Mi Soim Pasin Long Yupela”
6, 7. Olsem wanem Jisas i stap olsem gutpela piksa long ol disaipel bilong em? Olsem wanem gutpela piksa bilong em i helpim ol?
6 Maski ol disaipel bilong Jisas i laikim tru Tok Bilong God, sampela taim ples em ol i kamap bikpela long en na sindaun bilong ol long bipo i save stiaim tingting bilong ol. (Mat. 19:9, 10; Luk 9:46-48; Jon 4:27) Tasol Jisas i no save daunim o krosim ol. Em i no save askim ol long mekim wanpela samting we i hatwok long ol long mekim. Na em i no askim ol long mekim samting we em yet i no inap mekim. Em i stap olsem gutpela piksa na dispela i skulim ol disaipel bilong em.—Ritim Jon 13:15.
7 Olsem wanem Jisas i stap olsem gutpela piksa long ol disaipel bilong em? (1 Pita 2:21) Em i no holim planti samting bilong skin, olsem na em inap yusim taim bilong em long helpim ol narapela. (Luk 9:58) Ol samting Jisas i lainim long Jehova, em i skulim ol narapela long en, na em i no skulim ol man long tingting bilong em yet. (Jon 5:19; 17:14, 17) Em i save mekim gutpela pasin, olsem na i no hatwok long ol man i toktok wantaim em. Ol samting em i mekim i soim olsem em i laikim ol narapela. (Mat. 19:13-15; Jon 15:12) Gutpela piksa bilong Jisas i bin helpim ol aposel bilong em, na dispela i bin helpim Jems long strongim bel na mekim wok bilong God i go inap long ol man i kilim em i dai. (Apo. 12:1, 2) Na Jon i stap gut long wok bilong God winim 60 yia.—Rev. 1:1, 2, 9.
8. Olsem wanem ol elda i ken stap gutpela piksa long ol yangpela brata na ol narapela?
8 Ol elda i ken stap gutpela piksa long ol yangpela brata. Ol i mekim olsem long rot bilong mekim pasin daun, pasin laikim, na yusim taim na strong bilong ol long helpim ol narapela. (1 Pita 5:2, 3) Na tu, ol elda husat i stap gutpela piksa, ol i amamas taim ol narapela i bihainim pasin bilong ol long bilip, skulim gut ol man, autim tok, na stap olsem gutpela Kristen.—Hib. 13:7.
‘Jisas i Givim Tok na Salim Ol i Go’
9. Olsem wanem yumi save olsem Jisas i bin trenim ol disaipel long mekim wok autim tok?
9 Bihain long Jisas i mekim wok autim tok inap 2-pela yia, em i salim 12-pela aposel bilong em i go bilong autim tok. Tasol paslain long em i mekim olsem, em i givim instraksen long ol. (Mat. 10:5-14) Long narapela taim, paslain long Jisas i wokim mirakel na givim kaikai long planti tausen manmeri, em i givim instraksen long ol disaipel. Em i tokim ol long olsem wanem ol inap bungim ol man na bai olgeta i ken kisim kaikai. (Luk 9:12-17) Em i trenim ol disaipel long rot bilong tokim ol long wanem samting stret ol i mas mekim na olsem wanem ol i ken mekim. Trening ol disaipel i bin kisim long Jisas, na helpim ol i kisim long holi spirit, i bin helpim ol long stretim gut ol samting bilong mekim bikpela wok bilong autim tok i kirap long yia 33 C.E.
10, 11. Olsem wanem ol elda na ol narapela i ken trenim ol brata long mekim wok insait long kongrigesen?
10 Long nau, yumi kirap skulim man taim yumi stadi wantaim em long Baibel. Ating yumi mas helpim em long ritim gut ol tok. Taim yumi wok yet long stadi wantaim em, yumi helpim em long ol narapela rot tu. Taim em i kirap long i go long ol miting, em bai kisim save long samting em i mas mekim bilong insait long Skul Tiokratik Bilong Autim Tok na long kamap wanpela pablisa i no baptais. Bihain long em i baptais, ol brata bai givim em sampela moa trening. Olsem: Ol i ken trenim em long stretim sampela samting i bagarap long Haus Kingdom. Na tu, ol elda i ken helpim em long kliagut long samting em i mas mekim bilong kamap kongrigesen sevan.
11 Taim ol elda i givim wanpela wok bilong kongrigesen long wanpela baptais brata, ol i save helpim em long mekim gut dispela wok. Ol i stori gut long pasin ol brata i bihainim bilong mekim dispela wok insait long ol kongrigesen na ol i soim em gut long samting em i mas mekim. Sapos em i hatwok long mekim dispela wok em, orait ol elda i no ken hariap long ting olsem em i no inap mekim dispela wok. Long gutpela pasin, ol bai stori gut gen long em long samting em i mas mekim na olsem wanem em i ken mekim. Ol elda i amamas long helpim wanpela brata long mekim ol wok ol i givim long em, long wanem, ol i save olsem pasin bilong helpim ol narapela insait long kongrigesen bai givim bikpela amamas long em.—Apo. 20:35.
Man i Gat Gutpela Tingting i Save Harim Tingting Bilong Ol Arapela
12. Wanem samting i mekim na tok bilong Jisas i helpim man?
12 Jisas i trenim ol disaipel long rot bilong givim tok i stret bilong helpim ol. Olsem: Taim Jems na Jon i laik bai paia i kam daun long heven na bagarapim sampela Samaria, Jisas i tok strong long tupela olsem i no stret ol i gat dispela tingting. (Luk 9:52-55) Long narapela taim, mama bilong Jems na Jon i askim Jisas sapos tupela pikinini bilong em i ken holim bikpela wok insait long Kingdom bilong em. Tasol Jisas i save olsem Jems na Jon yet i laik holim ol dispela wok, olsem na em i tokim tupela: “Husat bai sindaun long han sut o han kais bilong mi, em i no wok bilong mi long makim. Papa bilong mi bai makim husat bai sindaun long ol dispela sia.” (Mat. 20:20-23) Oltaim Jisas i save givim tok we i klia na inap helpim ol man long save long samting ol i ken mekim. Tok bilong Baibel i as bilong ol tok em i mekim. Em i laik bai ol disaipel i mas lain long pasin bilong wokim tingting na mekim ol pasin i stret wantaim Tok Bilong God. (Mat. 17:24-27) Jisas i save olsem ol disaipel i no gutpela olgeta na i gat sampela samting ol i no inap mekim. Em i givim tok bilong helpim na stretim ol, long wanem, em i laikim tru ol.—Jon 13:1.
13, 14. (a) Husat i nidim tok bilong helpim ol? (b) Kamapim sampela samting we inap kirapim ol elda long givim tok long brata.
13 Long sampela taim, ol brata husat i laik winim ol mak long mekim sampela wok insait long kongrigesen, ol bai nidim tok bilong Baibel long helpim ol. Sindaun 12:15 i tok: “Ol man i gat gutpela tingting, ol i save larim ol arapela man i givim tingting long ol.” Wanpela yangpela brata i tok olsem em i bin pilim olsem em i no gutpela inap long mekim wok insait long kongrigesen. Tasol wanpela elda i helpim em long luksave olsem, i no olsem em i mas kamap stretpela man olgeta bilong mekim wok insait long kongrigesen.
14 Sapos ol elda i luksave olsem pasin bilong wanpela brata i pasim em long kamap strong, orait kwiktaim “long pasin isi,” ol bai helpim em. (Gal. 6:1) Sampela taim, ol elda i mas givim tok bilong helpim wanpela long stretim pasin bilong em. Olsem: Ating ol elda i luksave olsem wanpela brata inap mekim sampela wok moa, tasol em i no mekim. Ol bai kirapim em long tingim pasin bilong Jisas. Jisas i wok strong long mekim wok autim tok na em i tokim ol disaipel long bihainim pasin bilong em. (Mat. 28:19, 20; Luk 8:1) Ating wanpela brata i laik winim ol narapela long mekim sampela wok. Ol elda i ken kamapim klia olsem Jisas i bin skulim ol disaipel long ol i no ken kisim pasin bilong stap nambawan. (Luk 22:24-27) O ating i hatwok long wanpela brata i fogivim narapela. Ol elda i ken helpim em long rot bilong tok piksa bilong wokboi husat i no laik fogivim man i gat liklik dinau long em maski narapela i bin fogivim bikpela dinau bilong em. (Mat. 18:21-35) Sapos i gat wok long ol elda i mas givim tok bilong helpim ol brata, orait kwiktaim ol i mas mekim.—Ritim Sindaun 27:9.
“Trenim Yu Yet”
15. Olsem wanem famili bilong brata inap sapotim em long mekim wok insait long kongrigesen?
15 Ol elda i wok strong long trenim ol brata long mekim wok insait long kongrigesen, tasol ol arapela tu inap helpim ol. Olsem: Famili bilong brata yet inap helpim em long mekim wok. Na sapos brata i kamap elda pinis, orait meri pikinini bilong em i ken sapotim em taim em i mekim wok insait long kongrigesen. Ol i save olsem em i mas lusim sampela hap taim na strong bilong helpim ol narapela. Em i amamas taim famili bilong em i redi long lusim sampela samting bilong ol yet bambai em i ken mekim gut ol wok bilong em. Yumi tenkyu tru long famili bilong ol elda long ol inap mekim olsem.—Snd. 15:20; 31:10, 23.
16. (a) Husat i mas soim olsem em i gat laik long helpim ol narapela? (b) Brata i mas mekim wanem sapos em i laik kamap kongrigesen sevan o elda?
16 Tru, ol narapela inap helpim brata, tasol brata yet i mas kamapim olsem em i gat laik long helpim ol narapela. (Ritim Galesia 6:5.) I no olsem brata i mas kamap wanpela kongrigesen sevan o elda bambai em i ken helpim ol narapela na givim bel long mekim wok autim tok, nogat. Sapos brata i laik mekim wok kongrigesen sevan o elda, em i mas wok strong long winim ol mak em Baibel i stori gut long en. (1 Tim. 3:1-13; Tai. 1:5-9; 1 Pita 5:1-3) Sapos brata i laik kamap kongrigesen sevan o elda, tasol ol i no makim em long mekim dispela wok, orait em i ken tingim sampela samting em inap mekim bilong winim mak. Wanem samting inap helpim em? Oltaim em i mas ritim na stadi long Baibel, tingim tingim long bel ol tok em i ritim na beten. Na em i mas givim bel long autim tok. Sapos em i mekim ol dispela samting, em bai bihainim tok Pol i givim long Timoti: “Trenim yu yet long kamapim pasin bilong givim bel tru long God, dispela i ken i stap olsem mak yu laik winim.”—1 Tim. 4:7.
17, 18. Brata i ken mekim wanem sapos em i pilim olsem em i no gutpela inap long mekim wok long kongrigesen, o em i no gat laik long mekim olsem?
17 Tasol olsem wanem sapos brata i pilim olsem em i no gutpela inap long kamap kongrigesen sevan o elda? I gutpela sapos em i tingim planti gutpela samting Jehova na Jisas i save mekim bilong helpim yumi. Jehova i tok promis olsem em bai “karim ol hevi bilong yumi.” (Sng. 68:19) Olsem na Jehova bai helpim brata long kisim wok insait long kongrigesen. Sapos brata i no wanpela kongrigesen sevan o elda, i gutpela em i tingim olsem i gat bikpela nid long ol brata i lukautim ol wok insait long ol kongrigesen. I gutpela em i askim Jehova long holi spirit, long wanem, dispela bai helpim em long stap bel isi na em inap bosim gut bel. Na tu, dispela bai helpim em long daunim tingting olsem em i no gutpela inap long mekim wok insait long kongrigesen. (Luk 11:13; Gal. 5:22, 23) Yumi ken bilip tru olsem Jehova bai blesim ol brata husat i gat stretpela tingting na i laik winim ol mak bilong mekim sampela wok insait long kongrigesen.
18 Ating brata i no gat laik long winim ol mak bilong mekim wok insait long kongrigesen. Wanem samting inap helpim em? Aposel Pol i tok: “God i mekim samting em i amamas long en, em i kirapim laik bilong yupela na i strongim yupela long mekim ol samting em yet i laikim.” (Fili. 2:13) God tasol i save givim strong na helpim man long kisim dispela laik bilong helpim ol narapela na mekim laik bilong em. (Fili. 4:13) Na tu, Kristen inap beten long God long helpim em long mekim samting i stret.—Sng. 25:4, 5.
19. Wanem insait bilong dispela tok olsem Jehova bai makim “ol strongpela lida tru”?
19 Jehova bai blesim wok ol elda i mekim bilong trenim ol narapela. Em i blesim tu ol brata husat i gat laik long winim ol mak bilong mekim sampela wok insait long kongrigesen. Baibel i tok olsem Jehova bai makim “ol strongpela lida tru.” Dispela i makim olsem bai i gat ol man em ol inap tru long lukautim oganaisesen bilong em. (Mai. 5:5) Long nau, i gat planti brata husat i gat pasin daun na ol i gat laik long mekim sampela wok insait long kongrigesen, na ol i wok long kisim trening bilong mekim dispela wok. Dispela i litimapim nem bilong Jehova na i bringim planti blesing long yumi.
Bai Yu Bekim Olsem Wanem?
• Olsem wanem Jisas i bin trenim ol disaipel bilong em long mekim bikpela wok bilong autim tok?
• Olsem wanem ol elda inap bihainim pasin bilong Jisas taim ol i helpim ol brata long mekim sampela wok insait long kongrigesen?
• Olsem wanem famili bilong brata inap helpim em long mekim sampela wok insait long kongrigesen?
• Brata i mas mekim wanem bilong soim olsem em i laik mekim sampela wok insait long kongrigesen?
[Ol Piksa long pes 31]
Yu inap givim wanem trening long sumatin taim em i wok long kamap strong?
[Piksa long pes 32]
Olsem wanem ol brata inap soim olsem ol i wok long winim ol mak?