Klostu Nau Ol Pen na Hevi Bai Pinis!

“God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44.

Kingdom Bilong God em wanpela gavman long heven. King bilong en Jisas Krais bai kisim ples bilong olgeta bikman bilong graun na em bai mekim laik bilong God i kamap long heven na long graun wantaim. (Matyu 6:9, 10) I no gat wanpela gavman bilong graun bai senisim dispela gavman bikos em i “kingdom bilong Jisas Krais, em Bikpela na Seivia bilong yumi, na dispela kingdom bai stap oltaim oltaim.” Olsem na yumi ken bilip tru olsem bel isi bai stap oltaim.—2 Pita 1:11.

“Satan yet i save giaman olsem em i ensel bilong lait. Olsem na mi no kirap nogut sapos ol wokman bilong em tu i giaman olsem ol i wokman bilong stretpela pasin. Samting bai painim ol long bihain bai i stret long wok ol i mekim.”—2 Korin 11:14, 15.

Lotu giaman bai kamap ples klia olsem wanpela wok bilong Satan na God bai rausim olgeta lotu giaman long graun. Pasin bilong ol lotu long bel nogut long narapela narapela na kilim man i dai bai i no stap moa. Dispela bai givim rot long ol man husat i laikim tru “God i gat laip, em God tru,” na ol bai lotuim em long “wanpela bilip” na “long spirit na long pasin i tru.” Tru tumas, dispela bai kamapim tru bel isi na pasin wanbel!—1 Tesalonaika 1:9; Efesus 4:5; Jon 4:23.

“God yet bai i stap wantaim ol. Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:3, 4.

God Jehova bai givim ol dispela blesing long ol man long rot bilong Pikinini bilong em Jisas husat i givim laip bilong em bilong baim bek ol man. (Jon 3:16) Aninit long wok bos bilong Jisas, ol man bai kamap gutpela olgeta. Ol man bai i no inap karim pen na hevi moa bikos “God yet bai i stap wantaim ol” na em bai rausim “aiwara i stap long ai bilong ol.” I no longtaim na ol pasin kranki bilong ol man na ol pen na hevi bai i kamap olsem samting bilong bipo, na “ol stretpela man bai i kisim graun God i givim ol, na bai ol i stap oltaim long en.”—Song 37:29.

“Em [Jisas Krais] i holimpas dispela traipela snek, em dispela snek bilong bipo yet, em ol i kolim em Devil na Satan. Na ensel i pasim em long sen na em bai stap olsem inap 1,000 yia. Na ensel i tromoi em i go daun long hul i no gat as na em i pasim hul na putim mak antap long en. Ensel i mekim olsem bai dispela snek i no ken giamanim moa olgeta lain manmeri.”—Revelesen 20:2, 3.

Olgeta kain wok bilong Satan bai pinis na Jisas bai pasim Satan wantaim ol spirit nogut bilong en na tromoi ol i go daun long “hul i no gat as,” na ol bai i no mekim moa wanpela wok. Ol i no inap bosim moa ol man long mekim ol pasin nogut, nogat. Em bai gutpela samting tru long stap long graun we i no gat moa ol wok bilong Satan na ol spirit nogut, a?

“Taim bilong las de” bai pinis long wanpela haptaim em Jisas i kolim olsem “traipela hevi tru.” Em i tok: “Long dispela taim bai i gat traipela hevi tru. Kirap long taim God i wokim graun na i kam inap long nau, kain hevi olsem i no bin kamap, nogat, na bai i no inap kamap gen.”—Matyu 24:21.

Dispela hevi i kamap bai traipela tru, dispela i makim olsem i no gat kain hevi olsem i bin kamap bipo. Dispela traipela hevi bai pinis long pait bilong “bikpela de bilong God i Gat Olgeta Strong,” em “Armagedon.”—Revelesen 16:14, 16.

Ol man long olgeta hap husat i laikim stretpela pasin, ol i amamas long wetim dispela taim we olgeta pasin nogut bai pinis. Tingim sampela gutpela blesing ol bai kisim aninit long Kingdom Bilong God.

“Bikpela lain manmeri” bai abrusim bagarap na go insait long nupela taim we bel isi tasol i stap long en: Baibel i tok olsem “bikpela lain manmeri” bai “winim dispela traipela hevi tru” na ol bai go insait long nupela taim we stretpela pasin tasol bai stap long en. (Revelesen 7:9, 10, 14; 2 Pita 3:13) Ol bai tenkyu long Jisas Krais i kisim bek ol, em “Pikinini Sipsip bilong God husat i tekewe sin bilong olgeta manmeri!”—Jon 1:29.

Save i kam long God bai kamapim ol gutpela samting: Long nupela taim, “olgeta samting long graun bai i save tru long Bikpela.” (Aisaia 11:9) Long dispela save bai i gat tu ol tok long pasin bilong sindaun gut wantaim olgeta kain man na long pasin bilong lukautim gut ol animal na bus samting. God i tok promis olsem: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17.

Ol famili bilong yumi i dai pinis bai kirap bek long matmat: Taim Jisas i stap long graun, em i kirapim bek pren bilong em Lasarus. (Jon 11:1, 5, 38-44) Taim em i mekim olsem em i soim samting em bai mekim bihain we em bai kirapim bek planti tausen manmeri taim Kingdom Bilong God i bosim graun.—Jon 5:28, 29.

Bel isi na stretpela pasin bai stap oltaim oltaim: Taim Jisas i mekim wok bos, olgeta kain pasin nogut bai i no stap moa. Olsem wanem yumi save long dispela? Bikos Jisas inap lukim tingting i stap long bel bilong ol man na em bai yusim dispela save long skelim ol stretpela man na ol man nogut. Ol manmeri husat i no laik lusim ol pasin nogut bilong ol, Jisas bai i no larim ol i stap long nupela taim God bai kamapim.—Song 37:9, 10; Aisaia 11:3, 4; 65:20; Matyu 9:4.

Yumi skelim sampela tasol bilong planti tok profet bilong Baibel i tokim yumi long gutpela taim em klostu nau bai kamap. Taim Kingdom Bilong God i bosim graun, ol manmeri bai “sindaun gutpela tumas na amamas i stap” inap oltaim oltaim. (Song 37:11, 29) Olgeta samting i save kamapim pen na hevi na i save givim bikpela bel hevi long ol man, ol bai pinis olgeta. God yet i promisim yumi olsem: “Harim! Mi mekim olgeta samting i kamap nupela. . . . Ol man inap bilip tru long ol dispela tok na ol dispela tok i tru olgeta.”—Revelesen 21:5.