Hau Bai Dai I Pinis?

MASKI fes papamama bilong yumi, Adam na Iv, i sakim tok na bringim sin na dai long olgeta man, dispela i no senisim laik bilong God long ol man. Long Baibel, planti taim God i tokaut olsem laik bilong em i no senis.

• “Ol stretpela man bai kisim graun olgeta, na ol bai stap oltaim long en.”—Buk Song 37:29.

• “Em bai daunim dai olgeta, na Nambawan Bikpela Jehova bai mekim drai aiwara long pes bilong olgeta man.”—Aisaia 25:8.

• “Dai, dispela laspela birua, em bai pinisim olgeta.”​—1 Korin 15:26.

• “Bai i no gat dai moa, na ol bai i no bel hevi moa na krai moa, na ol bai i no inap pilim pen gen.”—Revelesen 21:4.

Olsem wanem God bai “daunim dai” o “pinisim olgeta” dispela birua? Baibel i kamapim klia olsem “ol stretpela man . . . bai stap oltaim.” Tasol em i tok tu olsem “i no gat wanpela stretpela man i stap long graun husat i save mekim gutpela pasin oltaim.” (Eklisiastis 7:20) Bilong daunim dai, yu ting God bai senisim lo bilong em? Nogat tru! Em bai no inap mekim olsem bikos “God . . . i no inap giaman.” (Taitus 1:2) Orait God bai mekim wanem long truim laik bilong em long taim em i bin wokim ol man?

Jehova God i opim rot long kisim bek ol man long dai—long rot bilong pe bilong baim bek man. Pe bilong baim bek man i wankain long pe bilong baim ol samting i bagarap o bilong inapim mak lo i putim. Olgeta man i sinman na ol bai kisim pe bilong sin em dai, Baibel i tok: “I no gat wanpela bilong ol inap baim bek narapela man na i no gat wanpela bilong ol inap givim pe bilong baim bek man long God bilong helpim dispela man, (pe bilong baim bek laip bilong ol, em i antap tumas na ol i no inap tru long baim).”—Buk Song 49:7, 8.

Taim wanpela sinman i dai, em inap givim pe bilong sin bilong em; em i no inap dai bilong kisim bek em yet, o givim pe bilong sin bilong ol narapela. (Rom 6:7) Yumi nidim wanpela man i gutpela olgeta na i no gat sin long givim laip bilong em long baim bek sin bilong yumi, na i no bilong em yet.—Hibru 10:1-4.

God i stretim rot long mekim wankain samting. Em i salim Pikinini bilong em, Jisas, long heven i kam daun na bon long graun olsem man i gutpela olgeta, man i no gat sin. (1 Pita 2:22) Jisas i tok em i kam bilong “givim laip bilong em olsem pe bilong baim bek planti manmeri.” (Mak 10:45) Em i dai bilong daunim dispela birua, em dai, na bai yumi inap kisim laip.—Jon 3:16.

Long nau, tok profet bilong Baibel i kamap tru, yumi stap long ‘taim nogut i givim hatwok long ol man,’ na dispela i soim olsem yumi stap long “taim bilong las de” bilong pasin nogut bilong dispela graun. (2 Timoti 3:1) Las de bai pinis long “de bilong bikpela kot, na ol man i sakim tok bilong God, ol bai bagarap olgeta.” (2 Pita 3:3, 7) Tasol ol man husat i laikim God bai abrusim dispela bagarap na kisim blesing em “laip inap oltaim oltaim.”—Matyu 25:46.

Taim planti milion manmeri i kirap bek, rot bai op long ol inap kisim laip oltaim. Jisas i kirapim bek wanpela man taim em i go long taun bilong Nain. Dispela man em wanpela pikinini tasol bilong wido, Jisas i “sori tru,” na em i kirapim bek dispela pikinini. (Luk 7:11-15) Aposel Pol i tok: “Mi bilip na wet long God . . . olsem bai i gat kirap bek bilong ol man i dai pinis, em ol stretpela man na ol man nogut wantaim.” Dispela bilip i kamapim klia bikpela pasin laikim bilong God long ol man.—Aposel 24:15.

Planti bilion manmeri inap luk fowed long stap oltaim. Baibel i tok: “Ol stretpela man bai kisim graun olgeta, na ol bai stap oltaim long en.” (Buk Song 37:29) Long dispela taim, ol yet bai pilim dispela tok bilong strongim bel em aposel Pol i bin raitim klostu 2,000 yia i go pinis: “Dai, we stap strong bilong yu long winim ol man? Dai, we stap strong bilong yu long givim bikpela pen?” (1 Korin 15:55) Dai, dispela nambawan birua bilong ol manmeri bai pinis olgeta!