Lain Ami Bilong Mekim Pait Em Yu Insait Long En
1 “Namba 6 ensel i winim biugel bilong en.” Bihain long dispela, “ol soldia i sindaun long hos em inap olsem 200 milion” ol i ran i go wantaim bikpela nois olsem klaut i pairap. Dispela em i narapela kain ami. “Het bilong ol hos i olsem het bilong ol laion.” Paia, smok, na ston salfa i kamaut long maus bilong ol, na “tel bilong ol i olsem snek.” Dispela ami long tok piksa i kamapim bikpela bagarap. (KTH 9:13-19) Yu save olsem wanem yu insait long truim bilong dispela narapela kain driman olsem tok profet?
2 Lain remnan na ol poroman bilong ol, ol arapela sipsip, ol i wanbel long autim tok long kot bilong God. Ol i kamapim klia olsem lain Kristendom i dai pinis long ol samting bilong spirit. Nau yumi ken skelim tupela samting bilong dispela driman i kamapim klia i gat wanem as na wok bilong ol wokman bilong God i kamap gutpela.
3 Ol i Skul na Kisim Ol Samting Bilong Autim Tok Bilong God: Long rot bilong Skul Tiokratik Bilong Autim Tok na ol narapela miting bilong kongrigesen, ol wokman bilong God i kisim skul long autim tok bilong God olsem man i gat namba. Ol i bihainim pasin bilong Jisas na ol disaipel bilong em, na ol i go painim ol man i gat gutpela bel, ol i autim tok long wanem wanem hap ol man i stap long en. (Mt. 10:11; Mk. 1:16; Lu. 4:15; Ap. 20:18-20) Dispela pasin bilong autim tok em Baibel i as bilong en i bin karim planti gutpela kaikai!
4 Taim ol wokman Kristen i mekim wok autim tok em God i bin tokim ol long mekim, ol i bin tilim planti bilion Baibel, buk, buklet, na nius. Ol dispela buk samting i stap long klostu 400 tok ples, ol i stori long kain kain samting na i kamapim tok long pasin em kain kain man i amamas long ritim. Olsem wanem? Yu save mekim gutpela wok long ol dispela tul?
5 Lain Bilong Heven i Stiaim na Helpim: Dispela driman olsem tok profet i kamapim klia tu olsem God i helpim wok dispela lain ami i mekim. (KTH 9:13-15) Ol i no mekim wok bilong autim tok long olgeta hap long strong o save bilong ol man, nogat; ol i mekim long strong bilong spirit bilong God. (Sek. 4:6) Jehova i yusim ol ensel bilong stiaim dispela wok. (KTH 14:6) Bikpela wok ol Witnes bilong em i mekim wantaim helpim Jehova i save givim i pulim ol gutpela man i kam long em.—Jo. 6:45, 65.
6 Lain bilong Jehova i skul na i redi gut long autim tok bilong God na ol ensel i stiaim wok bilong ol, olsem na i no gat wanpela samting inap stopim ol. Gutpela sapos yumi mekim hap wok bilong yumi yet bilong truim dispela gutpela driman olsem tok profet.
[Askim Bilong Stadi]
1, 2. Olsem wanem ol wokman bilong God long nau ol i insait long truim bilong driman olsem tok profet i stap long Kamapim Tok Hait 9:13-19?
3. Yu bin kisim wanem skul bilong autim gut tok bilong God?
4. Wanem ol tul i stap long planti pablisa inap yusim bilong mekim wok bilong ol?
5, 6. Wanem samting i soim olsem Jehova i save helpim lain bilong em?