“Yupela i Mas Tenkyu”
1 Taim Jisas i oraitim 10-pela lepraman, wanpela tasol bilong ol i kam bek na tok tenkyu. Jisas i tok: “Mi ting 10-pela man i kamap klin. Tasol ol arapela 9-pela man ol i stap we?” (Lu. 17:11-19) Em i bikpela samting long yumi mas kamapim tenkyu bilong yumi long olgeta gutpela samting na olgeta gutpela presen yumi kisim long gutpela Papa bilong yumi long heven, em God Jehova!—Kl. 3:15; Jem. 1:17.
2 Yumi mas tenkyu long wanem ol samting? Yumi tenkyu long pe bilong baim bek ol man, em nambawan bikpela presen God i bin givim long ol manmeri. (Jo. 3:16) Yumi tenkyu tu long Jehova long em i bin stiaim yumi i go long em. (Jo. 6:44) Pasin wanbel Kristen bilong yumi i narapela as na yumi mas tenkyu. (Sng. 133:1-3) Na ating yu ken tingim planti narapela presen em Jehova i bin givim. Yumi no laik kamap olsem lain Israel i no tenkyu na ol i lusim tingting long ol gutpela samting Jehova i bin mekim bilong helpim ol!—Sng. 106:12, 13.
3 Kamapim Tenkyu Bilong Yu: Ating olgeta 10-pela lepraman i amamas long samting Jisas i mekim bilong helpim ol, tasol wanpela tasol i kamapim tenkyu bilong em. (Lu. 17:15) Na olsem tasol, yumi kamapim tenkyu bilong yumi long rot bilong givim bel long wok autim tok. Sapos yumi tenkyu tru long olgeta samting gutpela Papa bilong yumi long heven i bin mekim, bel bilong yumi bai kirap long bihainim pasin bilong em long laikim na givim ol samting long ol man na bai yumi stori long ol man long Em. (Lu. 6:45) Na taim yumi tokim ol narapela man long ol “wok na tingting” bilong Jehova, pasin bilong yumi long tenkyu na laikim em tru bai i go bikpela.—Sng. 40:5.
4 Kirapim Ol Narapela Long Kamapim Tenkyu Bilong Ol: Yumi mas redi long helpim ol pikinini na ol Baibel sumatin bilong yumi long kisim pasin bilong tenkyu. Ol papamama i gat planti rot bilong mekim olsem, olsem taim ol i lukim na toktok wantaim ol pikinini long ol samting Jehova i bin wokim. (Ro. 1:20) Taim yumi mekim wanpela Baibel stadi, yumi ken askim sumatin olsem, “Dispela i skulim yumi long Jehova i wanem kain man?” Taim sumatin i pilim moa yet ol gutpela pasin bilong God, em bai laikim em moa yet na tingting strong long mekim ol samting God i laikim.
5 Long dispela taim bilong las de, planti man i no gat pasin bilong tenkyu. (2 Ti. 3:1, 2) Jehova i amamas tru long lukim ol wokman bilong em i kamapim tenkyu bilong ol long rot bilong givim bel long wok autim tok!—Jem. 1:22-25.