Soim Olsem Yupela i Tenkyu
“Krais i save givim bel isi long yumi . . . na dispela bel isi i ken bosim tru bel bilong yupela. . . . Na yupela i mas tenkyu long God oltaim.”—KOLOSI 3:15.
1. Olsem wanem kongrigesen Kristen i stap narapela kain long ol man bilong dispela graun em Satan i bosim?
LONG 94,600 kongrigesen bilong ol Witnes Bilong Jehova i stap long olgeta hap bilong graun, i gat pasin bilong tenkyu. Ol i kirapim na pinisim olgeta miting long beten i tok tenkyu long Jehova. Planti taim yumi harim dispela tok “tenkyu” i kamap long maus bilong ol yangpela na lapun, na tu, ol nupela na ol Witnes bilong longtaim, taim ol i bung wantaim long lotu long God. (Song 133:1) Dispela em i narapela kain tru long pasin bilong tingim ol yet tasol em planti man “i no laik save long God na i no bihainim gutnius” i save mekim! (2 Tesalonaika 1:8) Dispela graun yumi stap long en i no gat pasin bilong tenkyu. Yumi ken save dispela i olsem, long wanem, god bilong dispela graun, Satan, em man i go pas long kirapim olgeta man bilong dispela graun long tingim ol yet tasol na hambak na bikhet!—Jon 8:44; 2 Korin 4:4; 1 Jon 5:19.
2. Yumi mas bihainim wanem tok lukaut? Bai yumi stori long wanem ol askim?
2 Yumi stap namel long ol man bilong dispela graun bilong Satan, olsem na yumi mas was gut, nogut yumi kirap bihainim tingting bilong ol. Aposel Pol i tokim ol Kristen long Efesus: “[Bipo] yupela i bin wokabaut long pasin nogut bilong dispela graun. Yupela i bin bihainim pasin bilong hetman bilong ol spirit nogut i stap long skai, em dispela strongpela spirit i wok yet insait long bel bilong ol man i save sakim tok bilong God. Bipo yumi olgeta i bin i stap wantaim dispela lain, na yumi bihainim laik nogut bilong olpela bel bilong yumi tasol. Yumi bihainim laik bilong dispela olpela bel na laik bilong tingting bilong yumi yet.” (Efesus 2:2, 3) Dispela tok i makim stret planti man long nau tu. Orait olsem wanem yumi inap holimpas pasin bilong tenkyu? Jehova i givim wanem helpim long yumi? Yumi ken mekim wanem bilong soim olsem yumi tenkyu tru?
Sampela As na Yumi Ken Tenkyu
3. Yumi tenkyu long Jehova long wanem ol samting?
3 Yumi gat wok long givim tenkyu long God Jehova, em Man bilong wokim yumi na Man bilong givim laip na planti gutpela presen long yumi. (Jems 1:17) Olgeta de yumi save tenkyu long Jehova long yumi stap laip. (Song 36:9) Yumi lukim planti gutpela samting em i bin wokim, olsem san, mun, na ol sta. Insait long graun bilong yumi i gat kain kain gutpela samting bilong helpim ol samting long i stap laip, na win bilong graun i stret tru, na i gat rot bilong givim wara na ren na win oksijen samting long yumi long olgeta taim—olgeta dispela samting i soim olsem yumi gat bikpela dinau tru long gutpela Papa bilong yumi long heven. King Devit i tok: “God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru. Sapos mi autim tok long ol man na tokim ol long wok na tingting bilong yu, olaman! Dispela i moa moa yet! Mi no inap kaunim ol samting yu bin mekim bilong helpim mipela.”—Song 40:5.
4. Bilong wanem yumi mas tenkyu long Jehova long pasin amamas i save stap insait long ol kongrigesen bilong yumi?
4 Maski ol wokboi bilong Jehova long nau i no stap long wanpela paradais tru, ol i amamas ol i stap long wanpela paradais bilong spirit. Long Haus Kingdom na Haus Kibung yumi lukim ol gutpela pasin holi spirit i kamapim i stiaim ol wanbilip. Sampela Witnes, taim ol i autim tok long ol man i no save tumas long lotu, ol i stori long ol tok Pol i bin raitim long ol Galesia. Pastaim ol i kamapim lista bilong “pasin bilong olpela bel” na askim ol dispela man long stori long ol samting ol yet i bin lukim. (Galesia 5:19-23) Planti i wanbel long tok olsem dispela kain pasin i stap long nau. Taim ol i lukim lista bilong ol gutpela pasin holi spirit i kamapim na ol Witnes i askim ol long kam long Haus Kingdom na bai ol yet i ken lukim ol dispela pasin, kwiktaim planti i tok: “Tru tumas, God i stap namel long yupela.” (1 Korin 14:25) Na i no long Haus Kingdom long hap bilong yu tasol, nogat. Maski wanem wanem hap yu go long en, taim yu bung wantaim ol Witnes Bilong Jehova, namba bilong ol i winim 6 milion, bai yu lukim wankain pasin amamas. Tru tumas, dispela pasin bilong bung wantaim we narapela i save strongim narapela, em tu em wanpela as na yumi ken tenkyu long Jehova, em dispela man i save givim holi spirit bilong mekim dispela samting i kamap.—Sefanaia 3:9; Efesus 3:20, 21.
5, 6. Yumi ken mekim wanem bilong soim olsem yumi tenkyu long dispela nambawan gutpela presen em God i bin givim bilong baim bek yumi?
5 Nambawan gutpela presen tru Jehova i givim yumi, em Pikinini bilong em, Jisas—em i givim laip bilong em olsem ofa bilong baim bek ol man. Aposel Jon i tok: “Long dispela pasin bilong en God i soim yumi olsem em i laikim yumi tru. Olsem na yumi wan wan i mas laikim tru ol arapela.” (1 Jon 4:11) Yumi tenkyu long dispela ofa taim yumi kamapim olsem yumi laikim na tenkyu long Jehova, tasol i no long dispela rot tasol, nogat—yumi mas bihainim ol pasin i kamapim klia olsem yumi laikim tru ol narapela tu.—Matyu 22:37-39.
6 Yumi ken lainim sampela samting moa long pasin bilong tenkyu, taim yumi skelim pasin Jehova i bin mekim long lain Israel bilong bipo. Long rot bilong Lo em i bin givim long ol Israel long maus bilong Moses, Jehova i skulim ol long planti samting. Long ‘gutpela save na tok tru bilong lo,’ yumi inap lainim planti samting bilong helpim yumi long bihainim dispela tok bilong Pol: “Yupela i mas tenkyu long God.”—Rom 2:20; Kolosi 3:15.
Tripela Samting Yumi Lainim Long Lo Bilong Moses
7. Olsem wanem pasin bilong givim namba 10 hap long Jehova i givim rot long ol Israel long soim olsem ol i tenkyu long em?
7 Long Lo Bilong Moses, Jehova i tokaut long 3-pela rot bilong ol Israel i ken soim olsem ol i tenkyu tru long ol gutpela pasin bilong em. Namba wan samting, em pasin bilong givim namba 10 hap. Wanpela bilong olgeta 10-pela hap kaikai bilong gaden na “wanpela bilong ol 10-pela bulmakau na sipsip samting” ol i samting bilong Jehova. (Wok Pris 27:30-32) Taim ol Israel i bihainim tok na mekim dispela samting, Jehova i mekim gut tru long ol. Em i tok: “Yupela i mas tilim olgeta samting bilong yupela long 10-pela hap na bringim wanpela hap olgeta long haus bilong mi. Olsem na ol wokman bilong mi bai i gat planti kaikai. Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.”—Malakai 3:10.
8. Wanem samting i mekim na pasin bilong givim ofa long laik bilong ol yet i narapela kain long pasin bilong givim namba 10 hap?
8 Namba tu samting, Jehova i stretim rot bilong ol Israel i ken givim ol kontribiusen long laik bilong ol yet. Em i tokim Moses long givim dispela tok long ol Israel: “Nau mi wok long bringim yupela i go long dispela graun mi laik givim yupela. Na bihain bai yupela i sindaun gut long en. Orait bai yupela i planim kaikai na kisim kaikai i mau. Na taim yupela i laik kaikai, orait yupela i mas kisim sampela kaikai na givim long mi olsem ofa.” Ol wantaim ol lain tumbuna i kamap bihain ol i mas kisim sampela “bret” ol i bin wokim long namba wan hap plaua bilong wit na givim long Jehova olsem “ofa,” o kontribiusen. Tingim: Lo i no kolim hamas ol i mas givim bilong ol dispela namba wan hap kaikai. (Namba 15:18-21; NW ) Tasol taim ol Israel i givim dispela ofa bilong kamapim tenkyu bilong ol, ol inap bilip olsem ol bai kisim blesing long Jehova. Driman bilong Esekiel long tempel i stori long wankain samting: “Ol manmeri i mas kisim ol nambawan kaikai i mau paslain long gaden na bringim long ol pris. Na ol pris i ken kisim ol samting bilong olgeta arapela kain ofa ol manmeri i bringim i kam long mi. Na long taim ol manmeri i kukim bret, ol i mas kisim namba wan bret ol i kukim pinis na givim long ol pris olsem ofa. Sapos ol manmeri i mekim olsem, orait bai mi mekim gut tru long ol haus na famili bilong ol.”—Esekiel 44:30.
9. Long pasin bilong larim hap kaikai i stap, Jehova i skulim ol man long wanem samting?
9 Namba 3 samting, Jehova i stretim rot bilong ol Israel i ken larim hap kaikai i stap long gaden bilong ol rabisman i ken kisim. God i tok: “Long taim yupela i katim kaikai i mau long gaden bilong yupela, yupela i no ken katim kaikai i sanap long arere tru bilong gaden. Na taim yupela i katim kaikai namel long gaden, sapos yupela i abrusim sampela, orait yupela i no ken i go bek na kisim. Larim i stap tasol. . . . Yupela i mas larim dispela kaikai i stap bilong ol rabisman na ol narapela lain i stap wantaim yupela, bai ol i kisim.” (Wok Pris 19:9, 10) Long dispela samting tu, Lo i no kolim stret hamas ol i mas larim i stap. Em samting bilong ol wan wan Israel yet i ken tingim hamas ol i laik larim i stap bilong helpim ol man i sot. Saveman King Solomon i tok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” (Sindaun 19:17) Long dispela rot Jehova i skulim ol Israel long mekim pasin sori na tingim gut ol man i gat hevi.
10. Taim ol Israel i no soim olsem ol i tenkyu, dispela i mekim wanem long ol?
10 Jehova i save mekim gut long ol Israel taim ol i givim ol namba 10 hap, na ol kontribiusen, na larim hap kaikai i stap bilong ol rabisman. Tasol taim ol Israel i no soim olsem ol i tenkyu, Jehova i no orait moa long ol. Dispela i mekim na bihain bagarap i painim ol na ol i go stap kalabus long narapela kantri. (2 Stori 36:17-21) Orait, dispela i skulim yumi long wanem samting?
Ol Rot Bilong Soim Olsem Yumi Tenkyu
11. Wanem nambawan gutpela samting yumi ken mekim bilong soim olsem yumi tenkyu long Jehova?
11 Nambawan gutpela samting yumi ken mekim bilong litimapim nem bilong Jehova na kamapim tenkyu bilong yumi, em long rot bilong mekim wanpela kain “ofa.” Tru, yumi ol Kristen i no stap aninit long Lo Bilong Moses, olsem na yumi no gat wok long givim ol animal o kaikai bilong gaden olsem ofa. (Kolosi 2:14) Tasol aposel Pol i bin tokim ol Kristen Hibru: “Oltaim yumi mas givim biknem long God . . . na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hibru 13:15) Long rot bilong yusim strong na mani samting bilong yumi bilong litimapim nem bilong Jehova—long taim yumi autim tok o long taim “ol manmeri i bung bilong lotu”—yumi ken kamapim olsem yumi tenkyu tru long gutpela Papa bilong yumi long heven, em God Jehova. (Song 26:12) Taim yumi mekim olsem, yumi ken lainim wanem samting long ol pasin ol Israel i bin mekim bilong kamapim tenkyu bilong ol long Jehova?
12. Long wok Kristen bilong yumi, pasin bilong givim namba 10 hap i skulim yumi long wanem samting?
12 Namba wan samting: Olsem yumi stori pinis, pasin bilong givim namba 10 hap i no olsem samting ol Israel i ken mekim long laik bilong ol yet, nogat. Em samting olgeta wan wan i mas mekim. Na olsem tasol, yumi ol Kristen i gat wok long autim tok na go long ol miting Kristen. Em ol samting yumi mas mekim. Long bikpela tok profet Jisas i mekim bilong taim bilong las de, em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14; 28:19, 20) Aposel Pol i stori long ol miting Kristen olsem: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:24, 25) Yumi soim olsem yumi tenkyu long Jehova taim yumi amamas long mekim wok bilong autim tok na lainim ol man, na bung oltaim wantaim ol brata long ol miting bilong kongrigesen, na tingim dispela wok olsem wanpela gutpela wok tru yumi inap mekim.
13. Yumi lainim wanem samting long pasin bilong givim ol kontribiusen na pasin bilong larim hap kaikai i stap long gaden?
13 Na i gat tupela samting moa yumi ken tingim em ol Israel i mekim bilong kamapim tenkyu bilong ol—em pasin bilong givim ol kontribiusen na pasin bilong larim hap kaikai i stap long gaden. Long pasin bilong givim namba 10 hap, Lo i makim hamas ol i mas givim, tasol long pasin bilong givim ol kontribiusen na larim hap kaikai i stap, Lo i no makim hamas. Dispela i givim rot na bai bel bilong ol wokboi bilong Jehova i ken kirapim ol long givim, long wanem, bel i pilim tru ol gutpela pasin bilong Jehova. Na olsem tasol, olgeta wokboi bilong Jehova i gat wok long go autim tok na go long ol miting Kristen, tasol olsem wanem? Yumi save amamas na givim bel olgeta long mekim ol dispela wok? Yumi save tingim ol dispela wok olsem wanpela rot bilong yumi ken tok tenkyu long olgeta samting Jehova i bin mekim bilong helpim yumi? Yumi insait long ol dispela wok inap tru long skel bilong yumi? O yumi tingim ol dispela samting olsem wanpela wok yumi mas mekim na em tasol? Ol dispela askim em ol askim yumi wan wan yet i mas bekim. Aposel Pol i tok: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.”—Galesia 6:4.
14. Jehova i laik bai yumi mekim wok bilong em olsem wanem?
14 God Jehova i save gut tru long sindaun bilong yumi. Em i save long ol samting yumi no strong tumas long en. Em i save tingim tru ol samting ol wokboi bilong em i amamas long givim, maski em i bikpela o liklik. Em i save yumi olgeta i no inap givim wankain samting, na tru tumas, yumi no inap mekim olsem. Taim aposel Pol i stori long pasin bilong givim samting bilong skin, em i tokim ol Kristen bilong Korin: “Sapos man i laikim tumas long givim samting, orait God i laikim tumas long kisim. God i save ting long ol samting ol wan wan man ol inap long givim, na em i kisim ol samting ol i givim. Em i no save ting long ol samting man i no gat, na em i skelim pasin bilong en.” (2 Korin 8:12) Dispela stiatok i stret tu long wok bilong God yumi mekim. Jehova i no ting long hamas aua yumi lusim long wok autim tok, nogat—em i tingim pasin yumi mekim dispela wok long en, em pasin bilong amamas na givim bel tru long mekim.—Song 100:1-5; Kolosi 3:23.
Kisim na Holimpas Tingting Olsem Bilong Ol Painia
15, 16. (a) Olsem wanem long wok painia na pasin bilong tenkyu? (b) Ol man husat i no inap mekim wok painia, olsem wanem ol inap kamapim olsem ol i gat tingting olsem bilong ol painia?
15 Wanpela gutpela rot bilong soim olsem yumi tenkyu long Jehova em long rot bilong wok autim tok fultaim. Pasin bilong laikim tru Jehova na tenkyu long marimari bilong em i bin kirapim planti wokboi i dediket pinis long em long mekim sampela bikpela senis long laip bilong ol na bai ol inap lusim planti aua moa long mekim wok bilong Jehova. Sampela inap mekim wok painia oltaim na lusim 70 aua long olgeta mun long autim gutnius na lainim ol man long tok i tru. Sampela i no inap wok painia oltaim, olsem na sampela taim ol i stretim rot na mekim wok painia haptaim na autim tok inap 50 aua long mun.
16 Tasol olsem wanem long ol planti wokboi bilong Jehova em ol i no inap mekim wok painia oltaim o haptaim? Ol i ken soim olsem ol i tenkyu long Jehova long rot bilong kisim na holimpas tingting olsem bilong ol painia. Ol i ken mekim olsem wanem? Long rot bilong strongim ol narapela em ol inap mekim wok painia, na long kirapim ol pikinini bilong ol na bai ol i gat laik long mekim wok autim tok fultaim, na long givim bel long autim tok inap tru long skel bilong ol. Wanpela bikpela samting i kirapim yumi long lusim planti aua long mekim wok bilong Jehova, em bel i mas pilim tru ol samting Jehova i bin mekim bilong helpim yumi, em ol samting em i bin mekim bipo, na long nau, na long bihain.
Kamapim Tenkyu Long Rot Bilong “Ol Nambawan Gutpela Samting” Bilong Yumi
17, 18. (a) Olsem wanem yumi ken kamapim tenkyu bilong yumi long rot bilong “ol nambawan gutpela samting” bilong yumi? (b) Jisas i gat wanem tingting long kontribiusen em meri wanpis i givim, na bilong wanem?
17 Sindaun 3:9 i tok: “Yu mas kisim ol namba wan hap kaikai i mau long gaden bilong yu [“na ol nambawan gutpela samting bilong yu,” NW ] na givim long Bikpela olsem ofa, na dispela bai i givim biknem long em.” Ol wokboi bilong Jehova i no gat wok moa long givim namba 10 hap bilong ol samting long Jehova. Tasol yumi mas mekim olsem Pol i bin tokim kongrigesen bilong Korin: “Yupela olgeta wan wan i mas tingting gut pastaim na save gut long wanem samting yupela i laik givim. Nogut wanpela man i bel hevi long givim samting, na nogut em i ting ol man i strong tumas long em i mas givim. Dispela pasin bilong givim em i no gutpela. God i save laikim man i amamas na i givim samting long laik bilong em yet.” (2 Korin 9:7) Pasin bilong givim ol kontribiusen long laik bilong yumi yet bilong helpim wok autim tok bilong Kingdom long olgeta hap, dispela tu i save soim olsem yumi tenkyu. Taim bel i pilim tru ol gutpela pasin bilong God, dispela i save kirapim yumi long mekim dispela samting long olgeta taim—ating long olgeta wik yumi ken putim hap mani, olsem ol Kristen bilong pastaim ol i bin mekim.—1 Korin 16:1, 2.
18 Hamas yumi givim, dispela samting yet i no kamapim olsem yumi tenkyu long Jehova. Samting i kirapim yumi long givim, dispela em bikpela samting. Em dispela samting Jisas i lukim taim em i lukim ol man i putim ol ofa bilong ol i go daun long bokis mani bilong tempel. Taim Jisas i lukim wanpela rabismeri, man bilong en i dai pinis, em i tromoi “tupela liklik mani i go long bokis,” em i tok: “Mi tok tru long yupela, dispela rabismeri, man bilong en i dai pinis, em i givim bikpela mani moa, i winim mani olgeta dispela lain manmeri i bin givim. Dispela olgeta manmeri ol i gat planti mani i stap, na ol i tromoi hap tasol i go long bokis. Tasol dispela meri em i sot tru, na em i tromoi olgeta mani em i holim bilong baim kaikai bilong en.”—Luk 21:1-4.
19. Bilong wanem i gutpela yumi skelim gen ol rot yumi save kamapim tenkyu bilong yumi?
19 Mipela laik bai dispela stadi i stori long olsem wanem yumi ken soim olsem yumi tenkyu, i ken kirapim yumi long skelim gen ol rot yumi save mekim wok long en bilong kamapim tenkyu bilong yumi. Olsem wanem? Yumi inap lusim bikpela hap taim moa long litimapim nem bilong Jehova, na givim sampela samting moa, olsem mani samting, bilong helpim wok autim tok long olgeta hap? Taim yumi mekim olsem, yumi ken bilip olsem gutpela Papa bilong yumi, Jehova, em man bilong givim planti samting, em bai amamas tru long yumi soim olsem yumi tenkyu.
Yu Inap Tingim?
• I gat wanem ol as na yumi mas tenkyu long Jehova?
• Yumi lainim wanem samting long pasin bilong givim namba 10 hap, na givim ol kontribiusen, na larim hap kaikai i stap long gaden?
• Olsem wanem yumi inap kisim tingting olsem bilong ol painia?
• Olsem wanem yumi ken mekim wok long “ol nambawan gutpela samting” bilong yumi bilong tok tenkyu long Jehova?
[Ol Piksa long pes 15]
“Olgeta gutpela samting yumi save kisim na olgeta presen i gutpela tru, em olgeta i save kam long heven”
[Ol Piksa long pes 16]
Ol piksa hia i kamapim wanem 3-pela samting em Lo i skulim yumi long en?
[Ol Piksa long pes 18]
Yumi ken mekim wanem ol ofa?