Skulim Man Long Pasin i Kirapim Em Long Bilip
1 Ol man bilong autim gut tok, olsem aposel Pol, ol i save olsem bilong “autim stret tok tru bilong God,” ol i no ken ritim tasol ol tok bilong Baibel, nogat, ol i mas mekim sampela samting moa. (2 Ti. 2:15) Taim yumi mekim wok long Baibel, olsem wanem yumi ken “kirapim tingting” bilong ol man taim yumi skulim ol?—Ap. 28:23.
2 Larim Baibel i Skulim Man: Namba wan, stiaim tingting bilong man i go long Baibel long pasin i kirapim em long luksave olsem savetingting bilong God i stap long Baibel. Bilip bilong yumi long Baibel inap kirapim man i harim tok long putim gut yau long skripsa yumi ritim. (Hi. 4:12) Yumi ken tok olsem: “Mi bin kisim helpim taim mi kisim tingting bilong God long dispela samting. Lukim tok Baibel i mekim.” Taim rot i op, larim Baibel i skulim man long rot bilong ritim stret ol tok bilong en.
3 Namba tu, kamapim gut insait bilong skripsa. Planti man i save hatwok long kisimgut insait bilong ves long namba wan taim yumi ritim long ol. Olsem na yumi gat wok long kamapim klia olsem wanem skripsa i stret wantaim tok yumi stori long en. (Lu. 24:26, 27) Kolim stret hap tok bilong skripsa i strongim tok yu stori long en. Sapos yu kamapim wanpela askim long man, ating yu inap luksave em i kisimgut ol tok bilong skripsa o nogat.—Snd. 20:5; Ap. 8:30.
4 Toktok Gut Wantaim Man Long Baibel: Namba tri, wok strong long putim tok i go daun long bel na tingting bilong man. Pasin bilong toktok gut wantaim man long Baibel inap kirapim em long senisim tingting bilong em. (Ap. 17:2-4; 19:8) Olsem, taim yu toktok wantaim man bilong haus long God Triwan, yu inap tokim em: ‘Taim Jisas i kisim baptais, wanpela nek i kamap long heven na i tok: “Yu Pikinini bilong mi. Mi laikim yu tumas.” Sapos God i stap long graun na kisim baptais, yu ting em bai salim nek bilong em i go long heven na i kam bek bambai ol man long graun i ken harim dispela tok? Dispela i olsem God i giamanim ol man, a? Yu ting God husat “i no save giaman” inap mekim kain pasin olsem?’ (Lu. 3:21, 22; Ta. 1:1, 2) Planti taim pasin bilong toktok gut wantaim man long Baibel i save kamapim gutpela samting. Kain gutpela pasin olsem bilong skulim man long Tok Bilong God i save kirapim ol man i gat gutpela bel long lotuim God tru, em Jehova.—Jer. 10:10.
[Askim Bilong Stadi]
1. Wanem samting i insait long pasin bilong mekim gut wok long Baibel taim yumi autim tok?
2. Olsem wanem yumi inap helpim ol man long rispek moa long Baibel?
3. Bihain long yu ritim skripsa, yu inap mekim wanem bilong helpim man long kisimgut insait bilong tok?
4. Wanem narapela samting yumi mas mekim bambai wok tisa bilong yumi i kirapim man long bilip?