Lotu i Tru Bai Mekim Yu Stap Amamas Tru

1-2. Yumi mas mekim wanem na bai Jehova i orait long lotu bilong yumi?

YU TINGIM wanem samting taim yu harim dispela tok “lotu”? Ating yu piksaim long tingting wanpela brata i gat pasin daun i nildaun klostu long bet na em i beten long Jehova na kamapim bel na tingting bilong em. O ating yu piksaim wanpela famili i amamas long mekim Baibel stadi wantaim.

² Long dispela 2-pela eksampel, dispela brata na dispela famili i mekim ol samting bilong lotu long Jehova. Yu ting Jehova bai orait long lotu bilong ol? Em bai orait long lotu bilong ol sapos ol i mekim ol samting i stret wantaim samting em i tingting pinis long en, na ol i mekim long pasin laikim na pasin rispek. Yumi laikim tru Jehova. Yumi save olsem i stret long yumi lotuim em, na yumi laik givim bel olgeta long lotuim em.

 3. Yumi bai stori long wanem samting long dispela atikol?

³ Long dispela atikol, yumi bai stori long lotu em Jehova i bin orait long en long taim bilong ol man i raitim Baibel, na tu, yumi bai stori long 8-pela samting yumi mas mekim na bai Jehova i orait long lotu bilong yumi. Taim yumi mekim olsem, tingim gut ol samting yumi wan wan i ken mekim bilong mekim lotu bilong yumi i kamap gutpela moa. Yumi bai stori tu long ol risen na lotu i tru i mekim yumi stap amamas tru.

 4. Olsem wanem ol bilipman long bipo i soim olsem ol i rispektim na laikim tru Jehova?

⁴ Paslain long Krais i kam long graun, ol bilipman olsem Abel, Noa, Abraham, na Jop i soim olsem ol i rispektim na laikim tru Jehova. Hau ol i mekim olsem? Ol i bihainim tok bilong em, bilip long em, na mekim ol ofa long em. Baibel i no kolim stret olgeta samting ol i mekim bilong lotuim em. Tasol ol i givim bel olgeta long onarim Jehova na em i orait long lotu bilong ol. Bihain Jehova i givim Lo Bilong Moses long ol tumbuna pikinini bilong Abraham. Insait long ol dispela lo, Jehova i kolim stret ol samting ol i mas mekim na bai em i ken orait long lotu bilong ol.

 5. Bihain long Jisas i dai na kirap bek, wanem senis i kamap long lotu i tru?

⁵ Bihain long Jisas i dai na kirap bek, Jehova i no orait moa long ol manmeri i bihainim Lo Bilong Moses. (Rom 10:4) Ol Kristen i mas bihainim nupela lo, em “lo bilong Krais.” (Gal. 6:2) Ol i bihainim dispela nupela lo taim ol i bihainim eksampel bilong Jisas na ol tok bilong em. I no olsem ol i mas putim dispela lo long tingting bilong ol na bihainim wanpela lista bilong ol samting ol i mas mekim na ol samting ol i no ken mekim, nogat. Long nau tu, ol Kristen i givim bel olgeta long bihainim Krais bambai ol i ken amamasim Jehova na “kisim nupela strong.”—Mat. 11:29.

 6. Olsem wanem dispela atikol i ken helpim yumi?

⁶ Taim yumi skelim ol samting yumi mekim bilong lotuim Jehova, askim yu yet, ‘Mi kamap gutpela moa long wanpela bilong ol dispela samting?’ Yu ken askim yu yet tu olsem, ‘Mi inap mekim lotu bilong mi long Jehova i kamap gutpela moa?’ Yu ken amamas long ol samting yu mekim long nau, tasol yu ken askim Jehova long helpim yu long luksave tu long ol samting yu inap mekim i kamap gutpela moa.

 7. Jehova i holim wanem tingting taim yumi mekim ol beten em yumi pilim tru long bel?

⁷ Yumi lotuim Jehova taim yumi beten long em. Baibel i tok ol beten bilong yumi i olsem smok i gat gutpela smel em ol i ofaim long haus lotu sel na bihain long tempel. (Sng. 141:2) God i amamas tru long dispela smok i gat gutpela smel. Olsem tasol, taim yumi mekim ol beten em yumi pilim tru long bel, dispela i save amamasim em, maski yumi mekim ol simpol tok tasol. (Prov. 15:8; Lo 33:10) Yumi gat gutpela risen long bilip tru olsem Jehova i save belgut tru taim em i harim yumi mekim ol tok i soim olsem yumi laikim em na tenkyu long em. Em i laik bai yumi tokim em long ol wari bilong yumi, ol samting yumi bilip na wet long en, na ol laik bilong yumi. Olsem na paslain long yu beten long Jehova, i gutpela long tingim gut ol tok yu bai mekim. Taim yu mekim olsem, i olsem yu ofaim “smok i gat gutpela smel” long Papa bilong yu long heven.

 8. Yumi inap preisim God long wanem ol rot?

⁸ Yumi lotuim Jehova taim yumi preisim em. (Sng. 34:1) Yumi preisim Jehova taim yumi tokaut olsem yumi laikim tru na amamas long ol gutpela pasin bilong Jehova na ol gutpela wok em i bin mekim. Taim yumi pilim tru ol gutpela wok Jehova i bin mekim, dispela bai kirapim yumi long preisim em. Taim yumi lusim haptaim long tingim tingim ol gutpela pasin bilong Jehova, oltaim yumi bai gat ol gutpela risen bilong preisim em. Wok autim tok i opim rot long yumi long “givim biknem long God. . . . Dispela i olsem sakrifais yumi givim long God. Yumi yusim maus bilong yumi.” (Hib. 13:15) Yumi save tingim gut ol tok yumi bai mekim paslain long yumi beten long Jehova. Long wankain pasin, yumi mas tingim gut ol tok yumi bai mekim long ol manmeri em yumi bungim taim yumi autim tok. Yumi laik mekim olgeta samting bilong “givim biknem long God.” Olsem na taim yumi autim tok i tru long ol narapela, yumi save pilim tru long bel ol dispela tok.

 9. Ol lain bilong Jehova i kisim wanem ol blesing taim ol i go long ol miting? Stori long eksampel bilong yu yet.

⁹ Yumi lotuim Jehova taim yumi go long ol miting. Lain Israel long bipo i bihainim dispela lo: “Tripela taim long wanpela yia, olgeta man bilong yupela i mas go sanap long ai bilong Jehova, God bilong yupela, long ples em i makim.” (Lo 16:16) Ol i mas lusim ol haus na ol gaden bilong ol na go long ol bikpela bung. Tasol Jehova i tok promis long ol olsem: “Taim yupela i go bilong sanap long ai bilong Jehova, God bilong yupela, i no gat wanpela man bai kisim graun bilong yupela.” (Kis. 34:24) Lain Israel i trastim tru Jehova, olsem na ol i go long ol bikpela bung i save kamap long olgeta yia. Taim ol i mekim olsem, ol i kisim planti blesing. Olsem, ol i kisim sampela save moa long Lo Bilong God, ol i tingim tingim ol gutpela pasin bilong Jehova, na ol i amamas long bung wantaim ol arapela manmeri em ol tu i laikim Jehova. (Lo 16:15) Yumi kisim ol wankain blesing taim yumi go long ol miting Kristen. Na tingim dispela, Jehova i save amamas tru taim em i lukim yumi redim wanpela sotpela bekim bilong strongim ol narapela insait long kongrigesen.

10. Wai na pasin bilong singsing em bikpela samting long lotu bilong yumi?

¹⁰ Yumi lotuim Jehova taim yumi singsing wantaim ol bratasista bilong yumi. (Sng. 28:7) Lain Israel i tingim pasin bilong singsing olsem bikpela samting long lotu bilong ol. King Devit i bin makim 288 man long lain Livai long singim ol song long tempel. (1 Sto. 25:1, 6-8) Long nau tu, yumi ken soim olsem yumi laikim God taim yumi singim ol song bilong preisim em. I no olsem yumi mas i gat gutpela nek bilong singsing, nogat. Tingim dispela: “Planti taim yumi olgeta i save popaia” taim yumi toktok, tasol dispela i no stopim yumi long toktok wantaim ol narapela insait long kongrigesen na long taim yumi autim tok. (Jems 3:2) Olsem tasol, yumi ken singim ol song bilong preisim Jehova maski yumi pilim olsem yumi no gat gutpela nek bilong singsing.

11. Olsem Buk Song 48:13 i kamapim, wai na ol famili i mas lusim haptaim long stadi wantaim long Baibel?

¹¹ Yumi lotuim Jehova taim yumi stadi long Baibel na skulim ol pikinini long Jehova. De Sabat i opim rot long lain Israel long lusim ol wok bilong wan wan de bambai ol i ken mekim ol samting bilong strongim pasin pren bilong ol wantaim Jehova. (Kis. 31:16, 17) Ol lain i gat bilip i stap namel long lain Israel i skulim ol pikinini bilong ol long Jehova na ol gutpela pasin bilong em. Long nau tu, yumi mas wokim sediul bilong ritim na stadi long Tok Bilong God. Pasin bilong ritim Baibel na stadi long en em wanpela rot yumi ken lotuim Jehova, na dispela i helpim yumi long go klostu moa long em. (Sng. 73:28) Na taim famili i bung na stadi wantaim, papamama i ken helpim ol pikinini bilong ol long kisim pasin bilong pas gut tru wantaim gutpela Papa bilong ol long heven.—Ritim Buk Song 48:13.

12. Jehova i holim wanem tingting long wok bilong wokim ol samting bilong haus lotu sel?

¹² Yumi lotuim Jehova taim yumi sanapim na lukautim ol haus bilong mekim lotu. Baibel i tok wok bilong sanapim haus lotu sel na olgeta samting bilong en em “wok holi.” (Kis. 36:1, 4) Long nau, Jehova i tingim wok bilong sanapim ol Haus Kingdom na ol Haus Kibung samting olsem hap wok lotu bilong yumi. Sampela bratasista i lusim bikpela haptaim long mekim ol dispela wok. Yumi amamas tru long gutpela wok ol i mekim bilong sapotim wok bilong Kingdom! Ol dispela bratasista i save autim tok tu. Ating sampela bilong ol i laik mekim wok painia. Ol elda i ken sapotim ol wok konstraksen taim ol i redi long makim ol dispela bratasista long kamap painia oltaim sapos ol i winim mak bilong mekim olsem. Maski yumi gat save long mekim wok konstraksen o nogat, yumi olgeta i ken insait long wok bilong klinim na lukautim ol haus yumi yusim bilong lotuim Jehova.

13. Yumi mas holim wanem tingting long ol donesen yumi givim bilong sapotim wok bilong Kingdom?

¹³ Yumi lotuim Jehova taim yumi givim donesen bilong sapotim wok bilong Kingdom. Lain Israel i no ken go han nating long ai bilong Jehova. (Lo 16:16) Ol i mas bringim i go wantaim ol wanpela presen inap long mak bilong ol. Taim ol i mekim olsem, ol i soim olsem ol i pilim tru olgeta samting Jehova i mekim bilong lukautim ol long sait bilong bilip. Hau yumi ken soim Jehova olsem yumi laikim em na yumi tenkyu tru long ol samting bilong bilip em i givim long yumi? Wanpela rot em long givim donesen inap long mak bilong yumi long sapotim kongrigesen bilong yumi wan wan na bilong sapotim wok i kamap long olgeta hap bilong graun. Aposel Pol i tok: “Pasin bilong givim samting em i gutpela moa yet sapos man i gat laik long givim. Man i ken givim samting em i gat, na em i no gat wok long givim samting em i no gat.” (2 Kor. 8:4, 12) Jehova i save amamas tru taim em i lukim olsem bel i kirapim yumi long givim donesen, na em i no save tingim hamas mani yumi givim, nogat.—Mak 12:42-44; 2 Kor. 9:7.

14. Olsem Provep 19:17 i kamapim, Jehova i pilim olsem wanem taim yumi helpim ol wanbilip i sot long ol samting?

¹⁴ Yumi lotuim Jehova taim yumi helpim ol wanbilip em ol i sot long ol samting. Jehova i tok promis long bekim dinau bilong lain Israel em ol i helpim ol rabisman. (Lo 15:7, 10) Long olgeta wan wan taim yumi helpim wanbilip husat i sot long ol samting, Jehova i tingim dispela olsem presen yumi givim long Em. (Ritim Provep 19:17.) Eksampel, taim ol Kristen long Filipai i salim wanpela presen i go long Pol taim em i stap kalabus, Pol i tok dispela em “gutpela sakrifais em God i amamas long en.” (Fili. 4:18) Tingim ol lain insait long kongrigesen bilong yu na askim yu yet, ‘I gat wanpela mi ken helpim?’ Jehova i save amamas tru taim em i lukim olsem yumi yusim taim, strong, save, na ol samting yumi gat bilong helpim ol man i sot long ol samting. Jehova i tingim dispela olsem hap wok lotu bilong yumi.—Jems 1:27.

15. Yumi mas lusim bikpela haptaim na strong long mekim lotu i tru, tasol wai na dispela i no givim hevi long yumi?

¹⁵ Yumi mas lusim bikpela haptaim na strong long mekim lotu i tru. Tasol dispela i no givim hevi long yumi. (1 Jon 5:3) Wai na yumi tok olsem? Bikos yumi laikim Jehova, olsem na yumi lotuim em. Piksaim dispela: Wanpela liklik boi i laik givim presen long papa bilong em. Ating em i lusim planti aua long droim wanpela piksa bilong givim long papa. Dispela liklik boi i no bel hevi olsem em i lusim bikpela haptaim long mekim olsem. Em i laikim papa bilong em, na em i amamas long givim presen long papa. Olsem tasol, yumi laikim Jehova, olsem na yumi amamas long lusim bikpela haptaim na strong bilong yumi long lotuim em.

16. Olsem Hibru 6:10 i kamapim, Jehova i pilim olsem wanem long wok yumi wan wan i mekim bilong amamasim em?

¹⁶ Ol gutpela papamama i no ekspektim ol pikinini bilong ol long givim ol wankain presen long ol. Ol i save olsem ol pikinini i no wankain, na save na strong bilong ol long mekim ol samting i no wankain tu. Long wankain pasin, Papa bilong yumi long heven i save gut long ol samting yumi ken mekim na ol samting yumi no inap mekim. Ating yu ken mekim planti samting moa winim ol lain em yu save long ol na laikim ol. O ating yu no inap mekim planti samting olsem ol narapela i mekim bikos long krismas na helt bilong yu, o bikos yu gat ol wok em yu mas mekim insait long famili. Tasol yu no ken bel hevi. (Gal. 6:4) Jehova i no inap lusim tingting long wok yu mekim. Sapos yu givim bel long mekim wok na i gat gutpela risen na yu mekim olsem, Jehova bai belgut tru long yu. (Ritim Hibru 6:10.) Jehova i save long ol samting yu tingting pinis long mekim. Em i laik bai yu stap amamas na belgut tru taim yu lotuim Em.

17. (a) Sapos yumi pilim hatwok long mekim wanpela wok lotu, yumi ken mekim wanem? (b) Yu kisim wanem helpim taim yu mekim ol wok lotu i stap long blok “Mekim Yu Stap Amamas Tru”?

¹⁷ Yumi ken mekim wanem sapos yumi pilim hatwok long mekim wanpela wok lotu, olsem pesenel stadi o wok autim tok? Yumi bai luksave olsem taim yumi mekim ol dispela samting long olgeta taim, yumi bai amamas moa yet long mekim na yumi bai kisim planti moa helpim. Lotu bilong yumi i olsem wanpela eksasais o wanpela musik instramen yumi pilaim. Sapos yumi mekim ol dispela samting wan wan taim, yumi no inap kamap gutpela tumas long mekim ol. Tasol wanem samting bai kamap sapos yumi mekim long olgeta wan wan de? Ating pastaim yumi bai mekim inap sampela minit tasol na bihain isi isi yumi surikim taim bilong mekim. Taim yumi lukim gutpela samting i kamap long hatwok bilong yumi, yumi bai luk fowed long mekim ol dispela samting na yumi bai enjoim stret. Dispela i wankain tu long lotu bilong yumi!

18. (a) Wanem samting i stap nambawan bikpela samting long laip bilong yumi? (b) Dispela bai mekim wanem long yumi?

¹⁸ Nambawan bikpela samting yumi ken mekim long laip bilong yumi em long givim bel olgeta long lotuim Jehova. Taim yumi mekim olsem, yumi bai amamas na laip bilong yumi bai i gat mining tru, na rot i op long yumi inap lotuim Jehova inap oltaim oltaim. (Prov. 10:22) Yumi stap bel isi bikos yumi save olsem Jehova i save helpim ol wokman bilong em taim ol i karim ol hevi. (Ais. 41:9, 10) Tru tumas, yumi gat ol gutpela risen long stap amamas taim yumi lotuim gutpela Papa bilong yumi, na i stret long em i “kisim glori na ona na strong” long olgeta samting Em i bin wokim!—Rev. 4:11.