Buk Revelesen—Em i Tokaut Long Ol Samting i Painim Yumi Long Nau

1-2. I gat wanem wanpela risen na yumi gat laik long kisim save long tok i stap long Buk Revelesen?

OLSEM WANEM? Wanpela i bin givim yu poto albam bilong lukluk long en? Taim yu wok long lukluk long ol poto, yu lukim piksa bilong planti manmeri em yu no save long ol. Tasol wanpela poto i pulim ai bilong yu. Wai? Bikos yu stap insait long dispela poto. Taim yu lukluk gut long dispela poto, yu traim long tingim wanem ples na wanem taim ol i bin kisim dispela poto. Na tu, yu traim long luksave long olgeta lain insait long dispela poto. Dispela poto em i spesel tru long yu.

² Buk Revelesen i olsem dispela poto. Wai na yumi tok olsem? I gat tupela risen na yumi ken tok olsem. Namba 1, ol tok bilong dispela buk i bilong yumi stret. Long fes ves bilong dispela buk, yumi ritim tok olsem: “Jisas Krais i kamapim wanpela tok hait em God i bin givim long em bilong soim ol wokboi bilong em long ol samting i no longtaim bai kamap.” (Rev. 1:1) So ol tok i stap long dispela buk em i no bilong olgeta manmeri, nogat, em bilong yumi stret—yumi ol wokman bilong God i dediket pinis long em. Yumi lain bilong God long nau i no ken kirap nogut olsem yumi wok long insait long truim ol tok profet bilong dispela narakain buk. So taim yumi ritim ol tok bilong Buk Revelesen, yumi lukim olsem ol tok bilong en i stret long yumi, i olsem yumi lukim yumi yet long dispela poto.

3-4. (a) Olsem Buk Revelesen i kamapim, wanem taim ol tok profet bilong en bai kamap tru? (b) Dispela i mas mekim wanem long yumi olgeta wan wan?

³ Namba 2 risen, yumi laik save long wanem taim ol dispela tok profet bai kamap tru. Lapun aposel Jon i tokaut long dispela taim na em i tok: “Long rot bilong holi spirit mi lukim olsem mi stap long de bilong Bikpela.” (Rev. 1:10) Taim Jon i raitim ol dispela tok long 96 C.E., “de bilong Bikpela” i no kamap yet. (Mat. 25:14, 19; Luk 19:12) Tasol olsem Baibel i tok profet, dispela de i kirap long 1914 taim Jisas i kamap King long heven. Kirap long dispela yia na i kam, ol tok i stap long Buk Revelesen i stori long lain manmeri bilong God, ol i wok long kamap tru. Yes, nau yumi stap long “de bilong Bikpela”!

⁴ Yumi stap long dispela spesel haptaim, olsem na yumi mas tingim gut ol gutpela tok i stap long Revelesen 1:3, em i tok: “Man i ritim ol tok bilong dispela tok profet long ol arapela, na ol man i harim dispela tok, na ol man i bihainim ol tok bilong en, ol i ken amamas, long wanem, dispela taim God i makim em i kam klostu pinis.” Tru tumas, yumi mas “ritim” bambai yumi ken “harim dispela tok” profet na “bihainim” ol dispela tok. Wanem sampela bilong ol dispela tok profet em yumi mas bihainim?

 5. Buk Revelesen i laik kirapim yumi long tingim wanem bikpela samting bambai Jehova i ken orait long pasin bilong yumi long lotuim em?

⁵ Kirap long fes sapta bilong Revelesen, yumi kisim save olsem Jisas i lukim na em i save long olgeta samting i kamap insait long kongrigesen bilong ol manmeri bilong em. (Rev. 1:12-16, 20; 2:1) Jisas i tokaut stret long dispela samting long ol tok em i salim i go long 7-pela kongrigesen long Esia Maina. Long ol dispela tok em i givim, em i laik kirapim ol Kristen long taim bilong ol aposel long mekim ol samting bilong lotuim Jehova long pasin em i orait long en. Ol tok em i mekim i stret long olgeta wokman bilong God long nau tu. Yumi inap kisim wanem skul long ol dispela tok? Lida bilong yumi Jisas Krais, em i save sapos yumi pas gut wantaim Jehova o nogat. Yumi olgeta i stap aninit long lukaut bilong Jisas, na i no gat wanpela samting i hait long ai bilong em. Em i save long ol samting yumi mas mekim bambai Jehova i ken orait yet long yumi. So em i givim wanem ol tok em yumi ken bihainim long nau?

 6. (a) Olsem tok bilong Jisas long Revelesen 2:3, 4 i kamapim, kongrigesen long Efesus i gat wanem bikpela hevi? (b) Yumi inap kisim wanem skul long dispela?

⁶ Ritim Revelesen 2:3, 4. Yumi no ken lusim pasin bilong laikim Jehova em yumi bin gat long pastaim tru. Ol tok Jisas i mekim long kongrigesen long Efesus i soim olsem kongrigesen i bin sanap strong na ol i bin givim bel yet long mekim wok bilong Jehova, maski ol i bin karim planti hevi. Tasol ol i bin lusim pasin bilong ol long laikim tru Jehova em ol i bin gat long pastaim tru. Ol i mas kisim bek na strongim dispela pasin, sapos nogat, Jehova i no inap orait long lotu bilong ol. Olsem tasol, long nau tu yumi mas sanap strong na karim ol hevi na yumi mas mekim sampela samting moa. Yumi mas skelim gut as na yumi sanap strong. God bilong yumi em i amamas long ol samting yumi mekim na risen na yumi mekim olsem. Astingting yumi gat bilong lotuim em, dispela em i bikpela samting long em, bikos em i laik bai pasin bilong yumi long laikim em na tenkyu long em i kirapim yumi long lotuim em.​—Prov. 16:2; Mak 12:29, 30.

 7. (a) Olsem Revelesen 3:1-3 i kamapim, Jisas i lukim wanem hevi i stap long kongrigesen long Sardis? (b) Yumi mas mekim wanem?

⁷ Ritim Revelesen 3:1-3. Yumi mas wok yet long was i stap na no ken slip. Ol manmeri long kongrigesen long Sardis i gat wanpela narapela hevi. Bipo ol i bin givim bel long mekim wok bilong God, tasol bihain ol i no moa mekim ol wok bilong God. Olsem na Jisas i tokim ol long “lusim slip na kirap.” Dispela i ken givim wanem tok lukaut long yumi? Tru tumas, Jehova i no inap lusim tingting long ol wok yumi mekim. (Hib. 6:10) Tasol yumi no ken ting olsem ol wok bilong Jehova yumi mekim long bipo em inap, nogat. Maski long nau yumi gat planti hevi we i pasim yumi, yumi mas wok yet long bisi long mekim “wok bilong Bikpela,” na yumi mas wok yet long was i stap na no ken slip i go inap long pinis.​—1 Kor. 15:58; Mat. 24:13; Mak 13:33.

 8. Yumi kisim wanem skul long tok i go long ol brata long Laodisia olsem i stap long Revelesen 3:15-17?

⁸ Ritim Revelesen 3:15-17. Yumi mas wok strong na givim bel olgeta long lotuim Jehova. Tok Jisas i mekim long kongrigesen long Laodisia i soim olsem i gat wanpela narapela hevi i stap. Ol i “hot liklik tasol” long pasin bilong ol long lotuim God. Ol i no givim bel olgeta long lotuim God, olsem na Jisas i tokim ol olsem “ol i stap nogut tru na tarangu tru.” Ol i mas wok strong tru long laikim Jehova na lotuim em. (Rev. 3:19) Yumi inap kisim wanem skul long dispela? Sapos yumi lusim pasin bilong yumi long wok strong long lotuim God, orait yumi mas mekim ol samting bilong strongim gen dispela pasin na tingim tru ol gutpela samting em Jehova i givim long yumi. (Rev. 3:18) Yumi no ken larim pasin bilong wok strong long kisim gutpela sindaun na mani kago i pulim nabaut tingting bilong yumi na yumi putim pasin bilong lotuim Jehova i stap olsem namba tu samting long laip bilong yumi.

 9. Olsem tok Jisas i mekim long ol Kristen long Pergamum na Taiataira i soim, yumi mas sakim wanem samting long nau?

⁹ Yumi mas sakim tru tok bilong ol apostet. Jisas i bin stretim sampela long Pergamum long ol i bin brukim lain namel long ol brata. (Rev. 2:14-16) Em i mekim gutpela tok long ol brata long Taiataira long ol i bin stap longwe na sakim “ol bikpela tok hait bilong Satan,” na em i kirapim ol long “holim strong” tok i tru. (Rev. 2:24-26) Ol Kristen i no gat strongpela bilip long dispela kongrigesen i bin larim ol dispela tok giaman bilong Satan i pulim ol nabaut, olsem na ol i mas tanim bel. Olsem wanem long yumi long nau? Yumi mas sakim olgeta kain tok em ol man i skulim ol man long en we i no stret wantaim tingting bilong Jehova. Ol apostet inap “luk olsem ol i gat pasin bilong givim bel tru long God,” tasol ol samting ol i mekim i soim olsem “ol i no larim strong bilong dispela pasin i bosim wokabaut bilong ol.” (2 Tim. 3:5) Em i isi long luksave na sakim ol tok giaman em ol man i skulim ol narapela long en taim yumi stadi gut tru long Tok Bilong God.​—2 Tim. 3:14-17; Jut 3, 4.

10. Yumi inap kisim wanem narapela skul long tok Jisas i mekim long Pergamum na Taiataira?

¹⁰ Yumi mas sakim tru na no ken insait long olgeta kain pasin doti. I gat narapela hevi i stap long Pergamum na Taiataira. Jisas i tok sampela long ol dispela kongrigesen ol i no sakim ol pasin doti. (Rev. 2:14, 20) Yumi inap kisim wanem skul long dispela? Yumi ken save tru olsem Jehova i no inap orait liklik long yumi sapos yumi insait long ol pasin doti, maski yumi bin mekim wok bilong em inap planti yia o yumi holim ol gutpela wok bilong em long nau. (1 Sml. 15:22; 1 Pita 2:16) Em i laik yumi mas holimpas ol stretpela lo bilong em, maski ol manmeri bilong dispela graun i no moa bihainim ol stretpela lo.​—Efe. 6:11-13.

11. Yumi kisim wanem skul long ol tok em yumi stori pinis long en? (Lukim blok “Skul Yumi Kisim Long Nau.”)

¹¹ Yumi kisim wanem skul long ol tok em yumi stori pinis long en? Yumi laik mekim ol samting na bai Jehova i orait long pasin bilong yumi long lotuim em. Sapos yumi mekim sampela samting na yumi luksave olsem dispela bai bagarapim pasin bilong yumi long lotuim Jehova, orait yumi mas hariap long mekim samting bilong stretim dispela. (Rev. 2:5, 16; 3:3, 16) Tasol Jisas i stori long wanpela narapela samting long tok em i mekim long kongrigesen. Wanem dispela samting?

12. Yumi inap kisim wanem skul long tok Jisas i mekim long ol brata long Smerna na Filadelfia? (Revelesen 2:10)

¹² Nau yumi ken skelim tok Jisas i mekim long tupela kongrigesen em Smerna na Filadelfia. Em i tokim ol Kristen long dispela tupela kongrigesen long ol i no ken pret long karim hevi bilong pasin birua, long wanem, God bai givim gutpela pe long ol long pasin bilong ol long stap gut long em. (Ritim Revelesen 2:10; 3:10) Yumi inap kisim wanem skul long dispela long nau? Yumi mas save olsem pasin birua bai painim yumi na yumi mas redi long karim dispela hevi. (Mat. 24:9, 13; 2 Kor. 12:10) Wai na dispela tok em i bikpela samting long yumi?

13-14. Ol samting em Revelesen sapta 12 i stori long en i mekim wanem long lain bilong God?

¹³ Buk Revelesen i tokim yumi olsem ol man bai birua long lain bilong God long taim bilong yumi—em “de bilong Bikpela.” Revelesen sapta 12 i stori olsem pait i kamap long heven bihain tasol long Kingdom Bilong God i kirap long mekim wok. Maikel—em Jisas Krais husat i kisim glori pinis—wantaim ami bilong em i pait wantaim Satan na ol dimon bilong em. (Rev. 12:7, 8) Jisas na ami bilong em i winim pait na ol i rausim dispela birua bilong God i kam daun long graun na em i kamapim bikpela hevi long ol manmeri long graun. (Rev. 12:9, 12) Ol dispela samting i bin kamap i mekim wanem long lain bilong God?

¹⁴ Bihain Buk Revelesen i stori long samting Satan i mekim. Em i no gat rot long go bek gen long heven, olsem na em i belhat nogut tru na em i mekim nogut long liklik lain remnan em ol Kristen God i makim em ol i stap yet long graun, em ol manmeri husat bai mekim wok long Kingdom Bilong God na “ol i gat wok long tokaut long ol man long Jisas.” (Rev. 12:17; 2 Kor. 5:20; Efe. 6:19, 20) Olsem wanem dispela tok profet i bin kamap tru?

15. “Tupela witnes” em Revelesen sapta 11 i stori long ol i makim husat, na wanem samting i kamap long ol?

¹⁵ Satan i kirapim ol birua bilong God long mekim nogut long ol brata bilong Krais em God i bin makim pinis na ol i go pas long mekim wok bilong autim gutnius bilong Kingdom long graun. Ol brata i go pas long mekim dispela wok em Baibel i stori long ol olsem “tupela witnes” em ol man i bin kilim tupela i dai.b (Rev. 11:3, 7-11) Long yia 1918, ol man i bin sutim ol tok giaman na kalabusim 8-pela brata i go pas long mekim wok, na ol i makim ol long kalabus inap planti yia. Long ai bilong ol man, i luk olsem ol man i “kilim i dai” wok bilong ol dispela liklik lain em God i makim.

16. (a) Wanem narakain samting i kamap long yia 1919? (b) Kirap long dispela taim na i kam, Satan i wok yet long mekim wanem samting?

¹⁶ Tok profet long Revelesen sapta 11 i tok dispela “tupela witnes” bai kisim laip bihain long sotpela haptaim. Truim bilong dispela tok profet i bin kamap taim wanpela narakain samting i kamap long yia bihain long ol i bin kalabusim ol brata. Long mun Mas 1919, ol dispela brata em God i bin makim, ol i bin rilisim ol long kalabus na kot i bin dismisim ol tok em ol i bin kotim ol long en. Wantu tasol ol brata i go bek na kirapim gen wok—em wok bilong Kingdom. Tasol dispela i no pasim Satan long mekim nogut long lain bilong God. Kirap long dispela taim na i kam, Satan i wok long stiaim ol man long mekim nogut long lain bilong God, i olsem em i kapsaitim “bikpela wara” bilong pasin birua long lain bilong God. (Rev. 12:15) Tru tumas, dispela i makim olsem yumi olgeta wan wan “i mas sanap strong na holimpas bilip.”​—Rev. 13:10.

17. Lain bilong God i bin kisim wanem helpim maski Satan i bin birua nogut tru long ol?

¹⁷ Revelesen sapta 12 i kamapim klia olsem lain bilong God bai kisim helpim i kam long wanpela narakain rot. Dispela bai i olsem “graun i opim maus bilong en na i daunim dispela wara” bilong pasin birua. (Rev. 12:16) Na dispela samting i bin kamap tru. Sampela taim ol strongpela samting i stap aninit long Satan kain olsem ol kot bilong dispela graun i bin kisim bek lain bilong God. Planti taim ol wokman bilong Jehova i bin winim ol kot keis we i helpim ol long stap fri. Ol i mekim wanem long dispela pasin bilong stap fri? Ol i bin mekim gutpela wok tru long yusim dispela haptaim long mekim ol wok em Jehova i givim long ol. (1 Kor. 16:9) Ol i mekim wanem ol wok?

18. Wanem nambawan wok yumi save mekim long dispela taim bilong las de?

¹⁸ Jisas i tok profet olsem ol manmeri bilong em bai “autim dispela gutnius bilong Kingdom Bilong God” long olgeta hap bilong graun paslain long pinis i kamap. (Mat. 24:14) Taim ol i mekim olsem, ol i kisim helpim i kam long ol ensel em Baibel i stori long wanpela bilong ol olsem, “em i gat gutnius bilong i stap oltaim oltaim, na em i gat wok long autim dispela gutnius long ol manmeri i stap long graun, long olgeta kantri, long olgeta traib, long olgeta tokples na long olgeta lain pipol.”​—Rev. 14:6.

19. Ol manmeri i laikim Jehova, ol i mas tokaut long wanem narapela samting?

¹⁹ Lain bilong God i autim gutnius bilong Kingdom Bilong God na ol i tokaut long narapela samting tu. Ol i gat wok tu long sapotim wok bilong ol ensel em Baibel i stori long ol long Revelesen sapta 8 i go long 10. Ol dispela ensel i tokaut long belhat bilong God bai painim ol manmeri husat i sakim Kingdom Bilong God. Em as na ol Witnes Bilong Jehova i wok long tokaut long kot bilong God, dispela kot i olsem “ren ais na paia” na em bai painim ol manmeri na ol samting em Satan i bosim. (Rev. 8:7, 13) Ol manmeri i mas save olsem pinis i kam klostu tru na ol i mas hariap long mekim ol bikpela senis long laip bilong ol bambai ol i ken abrusim belhat bilong Jehova. (Sef. 2:2, 3) Tasol planti man i no laikim dispela tok. Olsem na yumi mas strongim bel bilong autim dispela tok. Long taim bilong traipela hevi tru, dispela tok bilong kot bilong God bai sutim tru bel bilong ol manmeri.​—Rev. 16:21.

20. Bai yumi stori long wanem tupela samting long atikol i kamap bihain?

²⁰ Yumi mas bihainim “ol tok bilong dispela tok profet,” long wanem, yumi insait long truim bilong ol dispela tok em Buk Revelesen i stori long en. (Rev. 1:3) Tasol olsem wanem yumi ken sanap strong na karim hevi bilong pasin birua na wok yet long tokaut long ol dispela tok? I gat tupela samting i ken strongim yumi: namba 1, em ol tok Buk Revelesen i mekim long ol samting bai painim ol birua bilong God, na namba 2, em ol blesing yumi bai kisim taim yumi stap gut long God. Long atikol i kamap bihain, bai yumi stori long ol dispela samting.